USINIBANIE - 2

 

Simulizi : Usinibanie

Sehemu Ya Pili (2)





HASIRA zilinipanda kichwani nikajiona nadhalilika mwanamume mimi, niliona wazi kuwa nakosewa adabu. "Nimchape vibao nini?" Nilijikuta nikiwaza kwa haraka haraka.

CHANZO:  https://deusdeditmahunda.blogspot.com/

Bahati nzuri akaingia mmojawapo wa watumishi wa mule ndani,

cha kushangaza Tausi hakuufurahia ujio ule. Akamdakia,

"sihitaji usumbufu, nina shauri muhimu na Hoza. Waambie na

wenzio!"



Yule mtumishi akatoka harakaharaka na kuishia zake

nje. Nikashusha pumzi ndefu kisha nikatulia kwa muda ili kuipa

nafasi hekima ichukue mkondo wake. Akili ilipotulia

nikamjibu. "Mimi sio mtunzi wa mashairi, huwa naandika

kilichopo moyoni wangu. Samahani kama nimekukwaza" nilimjibu kwa upole lakini kwa chuki kubwa.



Niliojiona nimedharaulika sana mwanamume mimi, lakini Tausi

hakuonyesha kujali kabisa. "Unaweza kuniambia

uliyemwandikia?" aliniuliza akiniangalia usoni.



Mapigo ya moyo yalibadilika ghafla. Laiti kama angetokea

daktari pale na kunipima presha, kwa hakika ningepelekwa

wodi ya wagonjwa mahututi kwa jinsi mapigo hayo

yalivyoongezeka.



Huyu mtoto sijui vipi? Anaongea na mwanamume akimtazama

usoni. Sijui kaitowa wapi tabia hii, ila kwa mimi

sikumshangaa kutokana na kusafiri nchi kadhaa. Ni tabia za

kizungu!



Nilishusha pumzi ndefu nikamkazia macho na kumjibu kwa upole lakini kwa kujiamini. "Sidhani kama itasaidia nikikwambia Tausi, niliyemwandikia ameshayasoma na anajijua ila sitamruhusu anijibu kwa maneno kwa kuwa hataweza

kunitamkia!"



Mchezo ukageuka ghafla, nikamwona Tausi anapoteza ujasiri

wake. Macho yake yalianza kubadilika rangi na kuwa mekundu

yakifunikwa na utando wa machozi. Nikaacha kumtazama kwa

kuwa alishindwa kuendelea kuangaliana na mimi wakati

nilitaka aniangalie nikimpa vidonge vyake.



Nikaendelea kumwambia "Nahisi ana mwingine ampendaye, moyo unaniuma lakini nafurahi kwa kuwa ameshazijua hisia zangu kwake. Mara zote nikimwangalia, natamani nimkumbatie lakini sidhani kama nitakuja kupata ruhusa yake!" .



Tausi akanikatisha "Nenda tafadhali Hoza, naomba uniache

nipumzike."



Kwa sauti aliyoitoa nilijihisi mwili unasisimkwa

na kupoteza ujasiri wake. Nikamwangalia usoni, hakuwa akionyesha kuwa ananiambia niondoke kwa nia mbaya, ila maneno yangu yalikuwa yakimchoma. Akageuka na kuanza kuondoka akiniacha nimesimama.



Nilijikaza mtoto wa kiume nikamuita. "Tausi!"



Akasimama bila kunigeukia, "unasemaje?"



"Nahitaji bado kuongea na wewe, ukipata muda naomba unifikirie!"



Tausi akageuka kuniangalia. Akasimama kwa muda akinitumbulia macho. Baada ya kimya kifupi, mrembo Tausi alishusha pumzi ndefu akaniuliza kwa sauti yake laini. "Huogopi?"



"Naamini sifanyi kosa, sidhani kama natakiwa kuogopa!"

nilimjibu kwa kujiamini.



Tausi alitabasamu, kisha akageuka na kunijibu akiwa

anaondoka. "Nishakuelewa unachotaka kuniambia."



Akaishia na kuniacha nimesimama kama sanamu ya kwenye duka la nguo kasoro sikutoa pozi. Mwanamume nikatoka taratiiibu nikiwapita watumishi na wambeya

wengine waliokuwa wakisubiri nje ili waniulize kuwa

nimeitiwa nini na Tausi.



Kweli watu wanapenda wenzao wakipatwa na matatizo,

walifurahi sana nilipowaambia kuwa niliitwa kusemwa kutokana

na kuchelewa kufanya usafi.



Nilipotoka pale nikaanza kufanya usafi haraka haraka, kisha

nikarudi kibandani kwangu na kujifungia ili nipate

kuutafakari mwenendo mzima wa maongezi yangu na Tausi.



Nilihisi mambo kama vile yameharibika, mara nyingi msichana

akishajua kama umemzimia inakuwa ngumu sana kumnasa kama yeye hakutaki. Nilijiona kuwa natakiwa kufanya uamuzi wa hatari sana na wa haraka, nilijua wazi kuwa Tausi hawezi

kuamua kunikubali hata kama ananipenda kutokana na hali

yangu.



Inabidi nifosi goli! Hakika Tausi alikuwa ameanza kuuogopa

ujasiri wangu, nilimuona kuwa katikisika hivyo sikutaka

kumpa nafasi ya kuutafuta tena ujasiri wake ulioyeyuka.



Usiku ulivyoingia, nilienda moja kwa moja hadi dirishani

kwake na karatasi langu mkononi, wakati huo hakuwa ameingia

chumbani kwake, nikampenyezea. Karatasi hiyo niliiandika

hivi....



‘Nitaingia humu chumbani usiku sana tupige stori’

Karatasi lile lilipeperukia pembeni kidogo ya kitanda,

karibu na dirishani. Nilitulia pale nikisubiri kumwona

atalichukuliaje suala lile.



Tausi alipoingia chumbani, akalikuta lile karatasi. Moja kwa

moja akaliendea na kuliokota, akawa analisoma. Nilimuona

akiwa na hofu kubwa akiangaza angaza huku na kule ili ajue

karatasi lile limeingiaje mule ndani.



Alikuja hadi dirishani, nikainama chini ili asinione.

Akaanza kulikagua, alijisahau kuwa dirisha la kuzuia mbu

halikuwa limefungwa vizuri nami nilitumia upenyo huo

kupenyeza lile karatasi kisha nikalifunga.



Baada ya kushindwa kujua karatasi lile limeingiaje akabaki

pale kitandani akiwaza. Sikujua alikuwa akiwaza nini.

Nilikuwa nataka kuusoma mwenendo wake, kama angetoa taarifa kwa walinzi au angeuchuna.



Kuuchuna kwake kulimaanisha kuwa yuko tayari kuhifadhi siri.

Lakini vile vile yawezekana kuwa amekaa kimya kwa kujua

kwamba sina uwezo wa kufanya nilichoandika.



Ilipofika saa nane kasoro, myumba yote ilikuwa kimya. Ni

mbwa na walinzi tu waliokuwa wakiranda randa. Inaelekea hata

wale mbwa walikuwa wananishangaa kutokana na mizunguko yangu ya usiku kwa usiku, wangekuwa binadamu wamgeshatoa umbeya.



Sijui mapenzi yana nini? Nilikuwa na ujasiri wa ajabu kuweza

kufikiria kufanya lile nililokusudia. Nilimchungulia Tausi,

hakuwa amelala. Ananisubiri? Mwanaume nikaanza kunyata

nikiizunguka nyumba, nikaliendea bomba linalopandisha maji

kwenye tenki.



Nikaanza kulikwea taratibu hadi juu. Juu ya nyumba ya Mzee

Nurdin kuna sehemu ya kupumzikia, pia kuna mlango ambao

nilipoufungua kitasa chake kwa kutumia waya nilikutana na

sehemu yenye gazi.CHANZO:  https://deusdeditmahunda.blogspot.com/



Niliteremka na ngazi taratibu nikatokea kwenye chumba kimoja

chenye giza nene. Nilitulia kwanza ili macho yangu yazoee

lile giza. Japo nilikuwa nina tochi ndogo, lakini huwezi

kuwasha katika mazingira yale.



Macho yalipolizoea giza, niliona sehemu ulipo mlango mdogo.

Nikanyata kuulekea huo mlango, nilipotoka nikakutana na

korido ndefu ambapo mbele yake kulikuwa na mlango mkubwa

sana. Hakukuwa na mlango mwingine wowote ulioonekana katika mwanga ule hafifu.



Nilipotazama kwa makini niliona dalili za kuwepo mlango

mwingine mdogo mita chache kutoka pale niliposimama.

Nikatabasamu! "Huyu mzee ni mjanja sana!" nilijisemea

moyoni.Unajua katika mazingira ya kawaida ukitokea tu lazima

mawazo yote yatakuwa kwenye mlango ule mkubwa na ndipo huwa kunawekwa ulinzi mkubwa.



Nilicheza na kitasa cha kale kamlango nikaufungua,

nikatokeza kwenye kikorido kifupi chenye milango minne

tofauti. Nikajua ni vyumba vya kulala. Nilianza kupiga

hesabu kutokana na madirisha yalivyokaa kwa nje nikakihisi

chumba cha Tausi. Nikaanza kutembea nikinyata kuuelekea

mlango niliouhisi kuwa ni wa chumba cha Tausi.



Hapo sasa ndio akili ikaanza kunirudia. Wasiwasi ulinijaa,

jasho jembamba likaanza kunitoka lakini nikajipa moyo kuwa

hata nikishtukiwa poa tu, nitamwambia mkuu kuwa nilikuwa

naichunguza ile nyumba.



Nilipougusa mlango wa Tausi, nikagundua kuwa uko wazi.

Nikausukuma polepole na kuchungulia, Tausi alikuwa amepitiwa na usingizi akiwa kakaa kwenye kitanda huku amejiegemeza ukutani. Niliingia taratibu na kujiegemeza pembeni ya mlango nikimwangalia.



Mapigo ya moyo wangu yalienda kwa kasi ya ajabu, nilikuwa

sijui nifanyeje. Kwa akili ya haraka haraka nilijua kuwa

endapo angeshtuka, cha kwanza angepiga kelele. Nikajivua

kamba ya urembo ambayo nilikuwa napenda kuivaa mkononi,

nikaidondosha chini kisha nikaondoka.



Ilipofika asubuhi niliendelea na taratibu zangu kama

kawaida. Nilifanya kama vile hakikutokea kitu usiku wake.

Nilipomaliza usafi nikakaa kwenye eneo langu la kujidai na

paka wa Tausi. Kila nilipochungulia pale dirishani kwenye

eneo la Tausi, sikumuoana Tausi.



Nilianza kuingiwa na wasiwasi. Baada ya muda kidogo

nilimuona Tausi akiwa anajongea mbele yangu. Niliingiwa na

hofu sana lakini nilijikaza kwa kutabasamu ili kuficha hofu

niliyokuwa nayo. "Hivi wewe Hoza, una akili kweli?"

Alinianza kwa swali la kebehi.



"Sina akili hata moja Tausi," nilimjibu bila kusita hata

nukta. Tausi alikaa kimya kwa muda kabla ya kutoa kicheko

kilichoambatana na mhemo.



"Ulimtuma nani kuleta hii kamba yako?"



"Niliileta mwenyewe!"



"Thubutuuu!" Tausi alisema huku akicheka kwa kebehi

akinirushia kamba yangu. Niliiona kama bahati ya mtende,

nikamwambia kuwa kama anabisha aende nayo, usiku nitaifuata

kama nilivyoileta. Naye eti akakubali, sasa sijui nae

alikuwa na hamu tuonane usiku au alikuwa anabisha kiukweli

ukweli.



Malaika ’mzima jua’ akafanya kazi yake, giza likatawala

katika uso wa dunia na watu katika himaya ya Mzee Nurdin

wakawa wamelala. Kitu ambacho nilikuwa nimekigundua wakati nikiongea na Tausi asubuhi ni kwamba alikuwa ameondoka kabisa ile hali ya kuwa mimi ni mfagizi wao. Alikuwa akinichukulia kama mwanamume anayemfukuzia.



Jambo hilo lilinipa mzuka sana, nikajiona nimepiga hatua kubwa sana kuelekea kumpata Tausi.



Usiku ulipoingia, mwanamume nikapitia njia yangu ile ile.

Ila kabla sijaianza safari yangu nilimchungulia Tausi

nikamkuta yuko macho anasubiri aone ’uongo wangu’.



Nilipofika mlangoni, sikuhangaika na kuufungua mlango wake,

niligonga taratibu. Mlango ukafunguliwa, tukakutana uso kwa

uso na Tausi. Tausi hakuweza kuuficha mshangao wake, nami

nilijihisi kuwa mzunguko wa damu umeongezeka kasi mara dufu.





Tukabaki tunatazamana kwa muda.



Ghalfa akili ikamrudia Tausi akanivutia kwa nguvu ndani.

"Una hatari sana wewe! Umeingiaje?" Nilikuwa natabasamu tu

nikimuangalia Tausi. Alikuwa kavalia suruari ya kulalia na

shati lake vilivyomkaa sawa sawa. Nikamuuliza kimoyomoyo,

"Mbona hujanivalia lile gauni lako la hudhurungi

linaloonyesha yaliyomo?"



Tausi alibaki kimya akinishangaa, nami nilibaki nikimtazama

usoni. Nadhani alishangaa nilivyovaa, nilivaa suruali ya

’traksuti’ nyeupe, juu nilivaa fulana nyepesi nyeupe ya

mikono mirefu ambayo ilionyesha mabonde na milima ya mwili

wangu.



Nilikuwa msafi haswa tena wa kukaribishwa kitandani.

Tulikaa kimya kwa muda tukitazamana, sio yeye wala mimi

ambaye alipata kauli ya kutamka. Taratibu tabasamu lilianza

kutoweka usoni kwa Tausi, nami nikafunika meno yangu

yaliyopangana mithili ya punje za mahindi.



Nilishusha macho yangu kuitazama midomo yake nikahisi kuwa

inahitaji kitu fulani. Nikasogea hatua moja mbele, tukawa

tunatazamana kwa ukaribu sana. Nikaupeleka mkono wangu

kumshika shavuni, nikimpapasa. Midomo yetu ikakutana kisha

ndimi zikasabahiana.



Niliuzungusha mkono wangu kiunoni kwake, nikauhisi mwili

wake ukitetemeka, ukivaibreti kama uliopigwa na shoti ya

umeme. Miili yetu ilikuwa ikibadilishana joto na kuifanya

akili yangu ishindwe kufikiri wala kuiona hatari ya mimi

kuwa mule ndani usiku ule.



Ghafla Tausi akanisukuma na kujitoa kwenye mikono yangu,

alibaki akinitazama huku anatweta. Akaniambia kwa sauti

laini iliyojaa mihemo. "Ondoka Hoza!"



Nilimwangalia kwa sekunde kadhaa, kisha nikageuka na kuanza

kuondoka. Tausi akanishika bega nikageuka na kumwangalia.



"Umekasirika?"



Sikumjibu kitu, nilibaki nikimwangalia tu kwa

upole, akanivuta na kunipiga busu.

CHANZO:  https://deusdeditmahunda.blogspot.com/

Nami sikufanya ajizi nikampelekea, tena zima-zima. Baada ya

muda tukawa tunatazamana. "Ahsante kwa busu lako, mimi

naenda!" Nilimwambia Tausi nikigeuza na kuanza kuondoka.



Wakati navuka mlango nikamsikia akisema kwa sauti ya

kunong’ona "I love you." Nikarudi ndani. "Unasema?" Akabaki

akiniangalia huku akitabasamu. "Toka hapa! Kama hujasikia

basi!" Nilicheka kidogo na kutoka kupitia njia yangu ile

ile.



*********



Naukumbuka usiku ule, kwa kweli sikupata usingizi wa moja

kwa moja. Na hata nilipopata usingizi ndoto zilikuwa ni

kuhusu mabusu ya Tausi tu.



Najua unaweza kuniona bwege kwa kutofanya kweli katika usiku ule, lakini ngoja nikudokolee siri za wanawake hasa warembo kama Tausi.



Hutakiwi kuwa na papara, kuuteka moyo wa Tausi ni kitu

kikubwa kuliko kufanya nae mapenzi. Wanaume wengi hudhania kufanya mapenzi ndiyo uhakika kuwa unapendwa. Mtachekwa!



Siku iliyofuatia Mzee Nurdin, baba yake Tausi alirejea toka

safari yake akiwa na msafara wake kamili. Ulinzi

uliimarishwa mara dufu na sheria zikaanza kuzingatiwa,

ilikuwa ngumu sana.



Zilipita siku kadhaa bila ya mimi kumuona Tausi, moyo wangu uliniuma sana.Nilihisi kuwa hata yeye alikuwa na wakati mgumu kama mimi.



Mawazo kuhusu kazi iliyonipeleka pale hayakuweza kabisa

kuitoa akili yangu katika fikra juu ya Tausi. Nikaanza na

kuingiwa na woga wa kuharibu kazi, nikakumbuka mambo ya

Ngoswe katika kitabu cha ’Penzi Kitovu cha Uzembe’.



Lakini nilijipa moyo kutokana na uwezo wangu mkubwa wa

kuutumia upungufu wangu kama njia ya kupatia ushindi. Kila

mpango nilioupanga sikuona kama ungeleta manufaa au katika

kazi yangu ya kumpeleleza Mzee Nurdin ama katika kumsogeza

karibu tabibu wa moyo wangu, Tausi.



Siku moja baada ya kufikiria kwa kina, nikaamua kufanya

jambo la hatari, nikaamua kuwa liwalo na liwe. Lazima

nionane na Tausi! Siku hiyo niliamua kuwa katika hali ya

kivita haswa, nilivaa pajama jeusi, fulana nyeusi na raba

nyeusi.



Niliamua kuwa mtu wa gizani. Niliamua pia kuifanya

safari hiyo mapema sana mara baada ya giza kuingia.

Nilitembea taratibu kuielekea njia yangu ya kuingilia ndani

kwa Mzee Nurdin.



Nilipanda taratibu kwenye bomba kuelekea

juu. Nilipofika tu juu nikashtushwa na sauti ya miguu

inayotembea, nikatulia na kuangaza katika giza lile.

Nilimuona mlinzi mmoja akirandaranda huku mkononi amekamata bunduki.



Nikatulia kwanza!





Yule mlinzi alizunguka zunguka kisha akawa anaelekea kwa mbele ya sehemu ile ya kupumzikia ambayo ukisimama unaona hadi getini, akawa kanipa mgongo.



Nilinyata kwa haraka hadi kwenye kigeti cha kuingilia ndani,

nikakuta kimeegeshwa tu. Nikakifungua taratibu na kuanza

kushusha ngazi kwa tahadhari kubwa. Sikufika moja kwa moja

kwenye kale kachumba ka giza, niliishia kwenye gazi nikawa

nakikagua kwa macho kwa kukichungulia. Nikakiona kuwa ni

kitupu. Nikasimama kulitazama lango kubwa, safari hii

lilikuwa wazi.



Nilimuona mlinzi mmoja akiwa kasimama sambamba na ukuta

karibu na lango lile. Pia kutoka pale niliweza kuwaona

watumishi wa ndani wakizunguka huku na kule. Nikabaki

nikipiga hesabu za kuweza kuufikia ule mlango mdogo ambao

huwa ninapitia. Tena kuufikia bila ya kuonekana na yule

mlinzi na watumishi.



Kwa kuangalia zile pilika pilika za watumishi nikajua kuwa

yalikuwa ni maandalizi ya chakula cha jioni, kwa hiyo nikawa

nasubiri kuwaona Mzee Nurdin na familia yake wakipita. Baada

ya muda pilika zilitulia, nikamuona Tausi akipita.



Nilijikuta nikitabasamu! Kisha mama yake na Mzee Nurdin nao

wakipita.



Macho ya mlinzi yalikuwa yakiwasindikiza, nikapita haraka kuuendea mlango wangu. Kuugusa ukawa umefungwa!



Nikarudi spidi na kujituliza pale gizani nikitafakari cha kufanya.

Akili moja iliniambia nirudi, nyingine iliniambia nisonge

mbele.



Wakati nimekaa nafikiria cha kufanya, niliuhisi ubaridi

fulani kwenye ule ukuta niliouegemea ambao ni tofauti na

ubaridi wa ukuta wa kawaida. Nikajaribu kuugonga-gonga.



Ulikuwa ni ukuta wa chuma!



Nikatoa tochi ndogo yenye mwanga hafifu na kuanza kuukagua

ukuta ule wa chuma. Nikaviona vitufe kadhaa kama vya lifti

za kwenye majengo marefu. Baada ya kuvisoma kwa muda

nikagundua kuwa ule ni mlango, nikajawa na shauku ya kuujua

ni mlango wa kuelekea wapi?



Nikabonyeza kitufe cha kufungulia, lango likafunguka. Mbele

kulikuwa na ngazi kadhaa, nikashuka taratibu kuzifuata hizo

ngazi. Chini nikakutana na korido ndefu sana, nikatulia kwa

muda ili kuona kama kuna harakati zozote. Kulikuwa kimya

mno!



Nikaanza kutembea kuifuata ile korido kwa uangalifu. Baada

ya kutembea kwa takribani dakika tano nikatokea kwenye

chumba chenye milango mitatu tofauti. Mmoja ulikuwa ni

mkubwa, miwili ilikuwa ni midogo.



Nikaanza kuvichunguza vitasa, nikauhisi mlango mmojawapo

kati ya ile midogo miwili una hadhi ya juu na haufunguliwi

mara kwa mara. Nikauchagua huo, nikaukorokochoa na funguo

zangu malaya, ukafunguka. Nikaingia kwa tahadhari kubwa,

nikakutana na ngazi zinazopandisha juu ambako nilikikuta

choo.



Kilionekana kuwa ni choo cha mtu binafsi, na kilikuwa

kimefungwa kwa ndani. Nikakifungua na kutoka nje, nikakutana

na sebule kubwa ya kifahari. Kwa kuiangalia haraka haraka

ile sebule haikuwa ngeni kwangu! Nikaanza kuvuta kumbukumbu.



Jibu nililolipata sikuweza kuliamini, ni ofisini kwa Mzee

Nurdin! Sikuamini kwa sababu kutoka ofisini kwa Mzee Nurdin hadi nyumbani kwake ni mwendo wa zaidi ya robo saa kwa gari!



Inakuwaje? Nilianza kuikagua taratibu sebule ile kwa macho,

nikahakikisha kuwa ndio yenyewe. Nikaanza kufanya upekuzi wa nyaraka mbalimbali pale sebuleni na ndani ya ofisi yake.



Nilitoa kopi nyaraka kadhaa ambazo nilidhani kuwa

zingenisaidia kwa upelelezi wangu, pia nilinyonya mafaili

kadhaa toka kwenye kompyuta yake baada ya kufanikiwa

kuzibomoa namba zake za siri. Nikayaweka kwenye flash diski

yangu.



Wakati najiandaa kuondoka nilipata wazo ambalo lilinifanya

niingiwe na hofu kwa sekunde kadhaa. Nikaangaza kona zote za

ofisi ile, nikakikuta nilichokitarajia. Kamera! Mambo yote

niliyokuwa nikiyafanya yalikuwa yakirekodiwa na kamera ile!

CHANZO:  https://deusdeditmahunda.blogspot.com/

Nilifikiria njia ya kufanya bila jibu.



Niliwaza kama kuna watu walikuwa wanafuatilia ina maana hadi pale nilishajulikana na sikuwa na ujanja wa kufanya lolote!



Akili ikaanza kuzunguka nikipanga na kupangua namna ya

kujinasua bila kuharibu uwepo wangu pale nyumbani kwa Mzee

Nurdin.



Nilijua nikiharibu tu na Tausi nimemkosa. Nikaanza kukosa

raha. Nilishusha pumzi ndefu, nilipopata wazo. Nikarudi

kwenye kompyuta za ofisini kwa Mzee Nurdin, nikaanza

kuifungua moja baada ya nyingine.



Hatimaye, nilifanikiwa kupata inayohifadhi rekodi

zinazochukuliwa na zile kamera za ulinzi. Nikaipapachua na

kukitoa kisehemu cha kuhifadhia kumbukumbu kisha nikaizima.



Niliporidhika kuwa kila kitu kiko sawa nikaanza safari yangu

ya kurudi huku nikiwa na mawazo mawili mawili, nipite kwa

Tausi ama la! Nilifanikiwa kurudi hadi kwenye kale ka chumba

ka giza, nilibaki pale nikipiga hesabu za kutoka.



Kutokana na vitu nilivyobeba haikuwa busara kwenda kwa

Tausi. Tatizo kubwa alikuwa yule mlinzi mwenye bunduki

anayelinda sehemu ya kupumzikia iliyo juu ya nyumba ya Mzee

Nurdin.



Nilikuwa najaribu kupiga hesabu ili kwa vyovyote ilivyo

niepuke mapambano, japo najiamini kwa ufiti nilionao haikuwa

ni jambo jema kutoa ujumbe kuwa umetokea uvamizi.



Nilianza kunyata taratibu nikizipanda ngazi za kuelekea juu,

hadi nilipolikaribia geti. Nikamuona yule mlinzi ametulia

katikati ya geti. Nikakaa pale ngazini nikimkodolea macho

yule mlinzi mnoko ambaye hakuwa na dalili yeyote ya kuondoka getini.



Zilipita takribani saa mbili ndipo mlinzi yule alipotoka

pale getini kufanya mzunguko mdogo. Nikaitumia fursa hiyo

kutoka kwa haraka ila kwa tahadhari kubwa. Nikatembea na

ukuta, nikalidandia bomba na kuseleleka kushuka chini bila

kufanya kelele.



Nikanyata na kurudi kwenye kibanda changu nnachoishi.

Nilikuwa nimepiga hatua moja kubwa sana! Nilitumia usiku ule

kuzipitia nyaraka zote nilizozitoa kopi kule ofisini kwa

Mzee Nurdin, nilivinakili vitu muhimu nilivyovitaka kisha

makaratasi yale nikayaweka kwenye sufuria ndogo na

kuyaunguza.



Nilibaki na flash diski na kile kiboksi cha kuhifadhia

kumbukumbu cha kwenye kompyuta. Inabidi hivi vifike kwa

mkuu!



Siku iliyofuatia kulikuwa na pilika zisizo za kawaida hivyo

kila mtu akawa anajiuliza kuwa ni nini kimetokea ila jioni

yake tukapata taarifa kuwa wasaidizi wa Mzee Nurdin

wanashikiliwa na polisi.



Wakati kila mtu akitafakari kuhusu mambo yale, ilikuja gari

la polisi, tukakusanywa wafanyakazi wote kasoro walinzi.

Akilini nilijua kuwa ni nini kinaendelea. Tukapelekwa hadi

kituo cha polisi ambacho sijawahi kukijua kabla kwa

mahojiano, akawa anachukuliwa mmoja mmoja.



Ilipofika zamu yangu kupelekwa nilishangaa kujikuta uso kwa

uso na chumba kitupu. Wakati nashangaa akatokea mkuu, nyuma yangu. "Umepata nini?"



Mara moja niliitambua sauti yake, wakati huo alikuwa

akielekea kukaa kwenye kiti kilicho mbele yangu. Nikampa

taarifa zote. Nikamwelekeza nilipoficha flash diski na kile

kiboksi cha kompyuta.



"Sasa nimeanza kupata picha, nilishangaa kwa biashara

anayoifanya anawezaje kupata fedha nyingi za kufadhili

shughuli za chama," alisema mkuu akizunguka-zunguka kwenye

kiti.



Pia alinidokeza kuwa wale waliokuja kutuchukua hawakuwa

askari wa kawaida na pale ni kituo bandia cha polisi ambacho

huwa wanakitumia kwa operesheni kama hizo. Nikarudishwa kwa wenzangu ambako kila mtu alikuwa akilalamika kivyake.



Biashara kubwa alizokuwa akizifanya Mzee Nurdin za magendo, kusafirisha nyara za serikali na mbaya zaidi kusafirisha watoto nje ya nchi. Ila kwa watu alikuwa akijulikana kama mfanyabiashara wa mazao ya kilimo akimiliki pia viwanda vya usindikaji.



Ila taarifa iliyomwacha hoi zaidi mkuu ni ile kwamba kuna

watu wazito katika taasisi nyeti ambao wako katika orodha ya

malipo ya Mzee Nurdin. Kuna maofisa wakubwa katika jeshi,

idara ya usalama wa taifa, mahakama, polisi, ikulu, ndani ya

chama tawala na ofisi ya bunge. Hao wote hutumika kumlinda

na kumfikishia taarifa zote muhimu.



Tuliachwa pale kituoni na mapolisi feki kadhaa.

Tukasikia

mlio wa gari linaloondoka, nikajua kuwa wanafuata vitu

nilivyowaelekeza. Kichekesho alikuwa yule bosi wangu mnoko,

toka tukamatwe ye alikuwa analia tu akilalama. Eti hastahili

kukamatwa kwa kuwa yeye ni mtumishi mtiifu wa Mzee Nurdin.

Tuliachiwa kesho yake alfajiri kwa kurudishwa na lile lile

gari. Wakati tunashushwa pale nje kwa Mzee Nurdin, nilimuona

Tausi amesimama akituangalia.



Uso wake ulikuwa umejaa huzuni kubwa, ila sikutaka hata

kumtazama. Niliinama chini na moja kwa moja niliongozea

kibandani kwangu ambako sikukuta chochote kati ya vile vitu

nilivyowaelekeza. Nikajua kazi imefanyika!



Pamoja na kufurahia kuwa nimefanikisha jambo kubwa sana,

upande mwingine nilikuwa nasononeka kwa kuwa mazingira ya

kumbinjukia Tausi yangekuwa ni magumu sana. Sio kwamba

ningeshindwa kubinjuka, bali endapo ingetokea kugundulika

mchezo wangu basi mzigo wote wa yaliyotokea ungekuwa ni juu

yangu. Nifanyeje?



Siku moja wakati nimekaa kwenye eneo langu la kazi,

nikamuona Tausi amekaa sehemu ile aliyokuwa akutumia

kunichungulia. Tukakutanisha macho. Akafungua dirisha na

kutupa kifurushi kidogo, aliniangalia kwa muda kisha

akaondoka pale dirishani. Nilienda kwa kasi hadi pale

dirishani, nikakiokota na kukifungua. Ilikuwa ni simu ya

Nokia 3310, maarufu kama nokia ya jeneza.



Ilikuwa na chaja yake na tayari ndani kulikuwa na laini na

salio la kutosha. Lilikuwa limehifadhiwa jina moja tu,

’Ndege’ alikuwa akitania kutokana na jina nililompa katika

shairi langu nililomwandikia siku ile. Kwa shauku nikaanza

kuipiga namba hiyo ya ’Ndege’ simu iliita hadi ikakatika.

Ghafla akapiga yeye.

CHANZO:  https://deusdeditmahunda.blogspot.com/

"Inaelekea una kiu sana, hata dakika haijapita?" Nilijikuta

nikiishia kucheka tu nikishindwa kutoa jibu ila nilifurahi

kupita kiasi. Tulianza kuwasiliana karibu kila dakika labda

kwa kupiga au kwa ujumbe mfupi, ila tuliboresha sana

uhusiano wetu.



Nikaanza kujihisi nahitaji penzi la Tausi, nilihisi kuwa

naye ana haja hiyo. Ila niliogopa msemo wa ’mvumilia mbivu

hula mbovu’. Nikaanza chombeza chombeza, naye akielekea

kibra!



"Lini utanipa penzi Tausi?" nilijikuta nikiulizia. Tausi

alicheka sana hadi nikajihisi nimechemka kumuuliza swali

hilo. Nikawa mpole, tena mdogo kuliko kidonge cha piriton.

Siku nzima nilikosa raha kutokana na kitendo kile cha

kikatili alichonifanyia Tausi binti Nurdin, nilijihisi kama

nimeachwa bila nguo.



Niliamua kuizima simu ili nipate muda muafaka wa kufikiria

nini cha kufanya, kwa kuwa ilikuwa ni mara ya kwanza kujiona

mjinga, ilibidi nijipe nafasi ya kujitia ujasiri.

Usiku uliingia bila kuwasiliana tena na Tausi, nikalala

kinyonge nikijikunyata kama kinda la njiwa. Nilikuwa Musa

Njiwa hasa, Musa mtoto wa Njiwa. Nikawazia kuwa ni kweli

majina huwa yanajidhihirisha.



Asubuhi ya siku iliyofuatia, nilijidamka asubuhi sana

nikazifanya kazi zangu zote na kurudi katika kibanda changu

na kurudi kulala.



Ilipofika saa nne asubuhi, mlango wangu uligongwa.

Nikakurupuka kwenda kuufungua, nikakiona nilichokitegemea,

kiongozi wangu wa kazi. "Twende kuna kazi, unalala lala

sana. Mzembe sana wewe" alianza kubwabwaja bila breki.

Niliamua kukaa kimya bila kumjibu chochote kwa maana maneno

yote yaliyokuwa karibu na mdomo wangu ni matusi matupu, huku

moyo wangu ukiwa umejaa chuki. "Ipo siku yake tu ataingia

kwenye anga zangu" nilijisemea moyoni.



Wakati najifikiria jamaa likawa linaendelea na mineno yake

ya kukera, nilichokifanya nikurudi ndani na kuvaa raba

zangu. Nikatoka na kumfuata kwa nyuma kwa kuwa muda wote

alikuwa mlangoni akinisubiri utafikiri askari anayemsubiria

mfungwa atoke mahabusu.



Tuliongozana mkukumkuku akinipeleka hadi kwenye lango la

nyumba kubwa. Tausi alikuwa amesimama akiwa katika hali ya

kutoka, pembeni yake amesimama binti mmoja mtumishi wa mle

ndani.



"Utampeleka bosi kufanya manunuzi yake, huko acha uvivu

uvivu wako" lile jamaa liliendeleza gubu. Nilimwangalia kwa

jicho kali huku nikishusha pumzi ndefu, jamaa linanitoa

nishai mbele ya mtoto bwana?



Tausi alitangulia kwenye gari bila kunisemesha akifuatiwa

kwa nyuma na yule mtumishi. Wakati huo dereva alikuwa

ameshawasha gari. "Kanichunia nini?" Nilijiwazia huku

nikilijongelea gari na kuingia.



Safari ilianza taratibu kila mtu akiwa kimya, hakuna

aliyekuwa na la kumwambia mwenzake japo tumetoka nyumba moja ukiondoa mawasiliano ya siri kati yangu na Tausi hakuna

aliyekuwa na mazoea na mwenzake zaidi ya kuonana kwa juu

juu.



Tausi alikuwa kimya akiangalia mbele bila kusema neno wala

kumwangalia yeyote kati yetu, na kwa jinsi ilivyokuwa

ilionekana kuwa dereva alikuwa na ratiba kamili ya safari.

Tulipita katika maduka mbalimbali lakini yote aliteremka

Tausi na yule binti mtumishi. Mara ya kwanza nilitaka

kuteremka akanizuia kwa kuniambia kuwa akihitaji niteremke

ataniambia.



Nilihisi ananinyanyasa kisaikolojia, ila kilichonikera zaidi

ni kitendo cha yule dereva kunicheka kwa kuniona kuwa mimi

ni kimbelembele.



Nilitamani kumtukana kwa kuwa ndio lugha inayonipunguziaga

hasira. Tukahama toka Posta, tukaelekea maeneo Mnazi Mmoja.

Gari likaegeshwa mbele ya benki iliyokuwa mtaa wa Lumumba

katika jengo la Ushirika, yule binti akataka kuteremka na

Tausi.



"We subiri kwenye gari na vitu. Hoza twende!" Mapigo ya moyo

yaliongezeka spidi nisijue yule binti alitaka nimsindikize

benki kwa ajili gani. Akawa ametangulia mimi niko nyuma

yake.



Kufika mlango wa benki akapitiliza, nikaendelea kumfuata kwa

nyuma. Akawa kama anaelekea kupanda lifti, akakata kona

kuzielekea ngazi lakini hakuzipanda kwenda juu akawa

anateremka.



Kama kawaida niliendelea kumfuata kwa nyuma kama mbuzi

anayepelekwa machinjioni, tukafika chini tukatokeza kwenye

maofisi mengi. Tausi aliongozea kwenye ngazi nyingine

inazopandisha juu.



Tulitokea nyuma ya jengo la Ushirika kwenye mtaa wa Kipata,

akasimamisha teksi akaingia mlango wa nyuma, na mimi

nikamfuata humo humo kwenye siti ya nyuma. "Wapi dada?"

Dereva aliuliza.



"Hotel yeyote iliyo karibu" akajibu Tausi.

’Kama hoteli yeyote si tuingie hii hapa mbele yetu?’

nilidakia mazungumzo. Dereva wa taksi aliniangalia jicho la

kuniambia ’acha uchawi wewe’



"Dah kweli. Samahani kaka, lakini nitakupa hela kidogo"

alitamka Tausi akionyesha alimwelewa. Tukaingia hotelini.

Tukafanya taratibu za haraka haraka, tukapata chumba.

Mpaka muda huo sikujua lengo la Tausi lilikuwa ni lipi,

lakini cha mwisho nilichoamini ni kuwa kaamua kunisusia

penzi lake. Nilipowaza hilo nilijihisi mwili ukisisimka

kujiandaa na kukabiliana na zawadi ya penzi la kushtukiza,

nguo ikawa haikai vizuri tena. Tukaingia ndani, tukajifungia

mlango.



Mwanamume nikaanza kutetemeka bila kujijua, nikajihisi

napata tumbo la kuhara. "Sijui nitoke kidogo nikamnywee

konyagi?" Nilijiuliza kwa haraka haraka. Nilijikuta mawazo

ya kihama huku na kule.



Kutahamaki Tausi alikuwa amenisimamia mbele yangu

akiniangalia usoni. "Umenikasirikia?" Aliniuliza kwa utulivu

akiwa ananitazama usoni.



"Hapana ila nilifadhaika sana ulipoamua kuniche.."

nikakatizwa na mdomo wake ambao tayari ulikuwa umeshafika

mdomoni kwangu. Nilijiona dhahiri kuwa nazidiwa, Tausi

alianza kuutawala mchezo.



Nikaona ni jambo la hatari kumruhusu mpinzani akutawale

mchezoni. Mwanamume nikaanza kupiga ’kaunta ataki’ au kwa

lugha fasaha mashambulizi ya kushtukiza. Nikawa namgusa zile

sehemu zitakazomfanya apoteze kasi yake.



Nilianza kumtoa kitambaa cha kichwani alichokitumia

kuzistiri nywele zake, nikaanza kuzichezea nywele zake

taratibu nikimpiga busu masikioni na kushuka taratibu hadi

shingoni. Nikamuona akianza kuhema kama mgonjwa wa pumu.

Tausi alianza kuhema kwa shida akitetemeka, nikajua sasa

nimeudhibiti mchezo. Nikamlaza pole pole kitandani.

CHANZO:  https://deusdeditmahunda.blogspot.com/

"Nakupenda sana Hoza" aliniambia akihema. Nilimwangalia kwa

makini, hakuonyesha masihara akitamka maneno yale.

Mambo yote toka tuliache gari pale mbele ya benki

yalituchukua takribani dakika kumi na tano, nikaona kuwa

bado naweza kulifanya nilitakalo kwa muda uliobakia.

Nikajipa tena dakika tano za ’shoo gemu’.





ITAENDELEA