FAMILIA TATA - 5

 

Simulizi : Familia Tata

Sehemu Ya Tano (5)



“Jamani pole sana, simu niliizima muda mrefu, sikutaka usumbufu, basi asante ntampigia baba nimsikie,” alisema na Jumba akatikisa kichwa huku akiondoka sehemu hiyo.

Sasa endelea...

.CHANZO:  https://deusdeditmahunda.blogspot.com/

Jumba alipotoka, mke wa mzee Linus alibonyeza namba za mume wake na haraka sana ikapokelewa. Mzee Linus hakuamini aliposikia sauti ya mke wake, alitambua kwa vyovyote angekuwa mikononi mwa dola. Swali la kwanza alilomuuliza ni kuhusu sehemu aliyokuwepo. Alipojibiwa kuwa alikuwa bado hotelini kwake, alipomua na kumwelezea mambo yote yalivyokwenda hadi pale walipo.



“Kwa hiyo sasa nifanye nini?” mama alimuuliza mumewe.

“Sina uhakika, lakini jaribu kuzima simu, uwe unawasha kila baada ya saa tatu au nne na unipigie nikupe maendeleo, sawa?” mzee Linus alimweleza mkewe ambaye alikubali.



Alipokata simu tu, namba asiyoijua ikaingia katika simu ya mama, akajiuliza maswali mengi kabla ya kupokea. Iliita hadi ikakata. Ilipokata akampigia mumewe kumweleza kuhusu simu hiyo, akamuuliza kama aipokee au la maana aliitilia mashaka. Mumewe akamshauri kupokea lakini kama itakuwa ni ya Polisi, basi adanganye kuwa yupo nje ya Dar.



Namba ileile ikaingia tena, akaipeleka simu sikioni huku akitetemeka. Sauti ya kike ya upande wa pili ilimpa unafuu, akarejesha ujasiri wake na kutulia. Baada ya kusalimiana, aliyepiga alijitambulisha kama mwalimu wa shule anayosoma mwanaye Tonny, kwani alikuwa na siku tano sasa hakuwa amekwenda na hawana taarifa zake.



“Jamani tulipatwa na matatizo, tukajikuta tumechanganyikiwa, nyumba yetu iliungua moto na kuteketea yote, hivyo watoto wote wanaishi kwa ndugu zao ambao wapo mbali na nyumbani,” alisema mama Tonny.



“Sasa kuna fomu zinatakiwa kujazwa na mzazi pia kuchukua ripoti yake ya mwisho wa mwaka, tutafanyaje mama?” Mwalimu alimuuliza.Wakakubaliana aende akachukue, akawaahidi kwenda kesho yake saa nne asubuhi!



Aliamka kiasi cha saa mbili asubuhi, akajinyoshanyosha mwili wake halafu akaingia bafuni kuoga, kisha akavaa nguo zake na kutoka nje, moja kwa moja kwenye mgahawa uliokuwa ng’ambo ya pili ya barabara, akaagiza chai na vitafunwa, alipomaliza kunywa, akachukua bajaj kuelekea shuleni kwa mtoto wake, Mother Of Mercy, Madale.



Alikaribishwa ofisini kwa mwalimu mkuu, ambako baada ya kujieleza, aliulizwa pia kuhusu sababu za mwanaye kutoonekana shule, akaelezea ilivyokuwa. Akapewa pole nyingi, kisha akakabidhiwa ripoti ya mtoto wake ya mwisho wa mwaka.



Aliwashukuru walimu, akajiinua kitini na kutoka nje ambako aliangaza macho na kuliona gari moja dogo jeupe limeegeshwa katika njia ya kutokea nje ya shule, gari hilo halikuwepo wakati akiingia. Hakujali, akaanza kutembea taratibu hadi alipolifikia, mlango wa gari ukafunguliwa na msichana wa umri wa miaka kama 28 hivi akatoka na kumsimamisha.



“Mama shikamoo, samahani..!”

“Marahaba, bila samahani mwanangu, unasemaje,” alimjibu huku akiangalia ndani ya gari, ambako kulikuwa pia na watu wawili, dereva na msichana mwingine aliyekuwa amekaa siti ya nyuma.



“Mimi ni askari polisi kutoka kituo cha Wazo, kuanzia sasa upo chini ya ulinzi na tunaomba tuongozane kituoni kwa mahojiano zaidi,” alisema msichana huyo huku akimtolea kitambulisho, kitendo kilichomfanya mama Tonny kupoteza mawasiliano kichwani mwake kwa sekunde kadhaa!



Akili yake ilipokaa sawa, akajaribu kuuliza sababu za yeye kutakiwa kituoni, askari akamshauri kuwa mtulivu kwani suala hilo angeweza kulifahamu mara tu baada ya kufika huko. Akakubali kwa shingo upande kuingia ndani ya gari. Wale watu wengine waliokuwa garini, ambao nao walikuwa bado vijana, walimsalimia kwa heshima na safari ya kuelekea kituoni ikaanza.





STONE aliondoka katika duka lile alilosimama na kunywa soda kwa muda mrefu, akasogea katika pub moja hivi iliyokuwa kwa mbali kidogo na nyumba aliyokuwa ameingia Maria, hata hivyo angeweza kumuona na kumtambua mtu yeyote ambaye angetoka au kuingia.



Pale alipokaa, akaagiza tena soda yake baridi, akaendelea kunywa taratibu huku macho yake yakiwa yameganda pale kwenye nyumba ile. Kwa muda aliokuwa ameshautumia kukaa pale, haukuweza kumshawishi kama ndipo wanapokaa wale majirani zao, kwa sababu hakumuona tena mtu mwingine akitoka wala kuingia anayemfahamu.



Muda wa saa kumi na moja na nusu hivi, macho ya Stone yaliona kitu alichokitaka, Maria, akiwa na nguo zilezile, alitoka akiwa ameongozana na jamaa mmoja hivi, ambaye kwa kuwatazama, walionekana kama wapenzi.



Ndiyo, Jimmy, kijana mmoja mkakamavu alikuwa ni mpenzi wa Maria kwa muda mrefu na pale ndipo alipokuwa amepanga. Kwa muda wote ambao wamekuwa na matatizo, msichana huyo alipata mwanya wa kuwa anakwenda pale mara kwa mara, lakini hakuwa akilala.



Stone akahisi hivyo pia na kwa kuwa walikuwa wanaondoka, akadhamiria kuwafuata tena nyuma, kuona ni wapi ambako Maria angemalizia safari yake. Akamaliza haraka soda yake, akainuka na kuwafuata wapenzi wale ambao baada ya kuingia katika uchochoro na kutokea upande wa pili wa barabara, wakaifuata Bajaj na kujipakiza.



Stone naye akaifuata Bajaj iliyokuwepo eneo lile, akaingia na kumwambia dereva aifuate ile iliyokuwa mbele yake.“Kwani vipi Bro na ile Bajaj?” dereva alimuuliza.



“Kuna jamaa kaingia na demu wangu, nataka kuwafuatilia nijue wanakoenda, sina shida na mwanaume, nataka ushahidi wa kumuacha demu,” Stone aliongopa tena, uongo ambao dereva wa Bajaj aliutilia shaka. Kwa kuwa aliyekuwa akiendesha ni watu wanaofahamiana, akaamua kumtumia ujumbe mfupi wa maneno na kumweleza kuhusu suala hilo.



Dereva wa ile Bajaj baada ya kusoma ujumbe ule, hakutaka kuremba, mara moja akawaambia abiria wake kuhusu kufuatiliwa na mtu nyuma yao.

.CHANZO:  https://deusdeditmahunda.blogspot.com/

Maria alishtuka sana kusikia vile, kwani kwa zaidi ya miaka mitatu aliyokuwa na Jimmy hakuwahi kutoka na mwanaume mwingine. Jimmy kwa upande wake, alikuwa mtulivu, akamwambia dereva wa Bajaj aendelee kuwasiliana na mwenzake ili kujua nyendo zake.



Waliuliza kuhusu umbo lake, muonekano wake na sauti yake kama angeweza. Ujumbe mmoja ulioingia ulianza kutoa mwanga kwa Maria na Jimmy, ambao dereva aliwasomea … “Jamaa kavaa tisheti kifuani imeandikwa Join Them.”



“Kuna sehemu nimeshawahi kuiona hii flana, wapi, wapi wapi vile jamani, aaaah kuna mtu namjua,” alilalama Maria aliyekuwa akijitahidi kukumbuka, lakini kabla hajamaliza, Jimmy akaja na wazo.



“Sikia dereva, wasiliana na mwendesha Bajaj mwingine mwambie aje resi amfuate mshkaji wako, akampige picha abiria wake alafu akurushie tumuone huyo jamaa, si inawezekana,” alisema na wote wakakubaliana naye.



Sasa walikuwa wanaingia eneo la Kigogo Sambusa, safari yao ilikuwa ni Kawe, ambako Maria ndipo alipokuwa anaishi.

**

Gari liliingia katika kituo cha Polisi Wazo kwa mwendo wa taratibu, likaenda na kuegeshwa sehemu yake, kisha mama Tonny akateremka na kuwafuata askari waliomsindikiza ndani ya kituo hicho. Akaongozwa moja kwa moja hadi katika chumba kimoja, ambacho hakikuwa na mtu. Akatakiwa kusubiri kwa muda.



Wale askari wakatoka na kumuacha peke yake. Moyoni mwake, alijawa na wasiwasi usio kifani, katika maisha yake yote, hii ilikuwa ni mara yake ya kwanza kukamatwa.Baada ya muda mchache askari aliyemkamata, aliingia akiwa ameandamana na mwanamke mwingine aliyekuwa amevalia kiraia, ambaye baada ya kukaa alijitambulisha kuwa ni askari, mkononi mwake akiwa na karatasi kadhaa.



“Sikia mama, tuna taarifa zote kuhusu kilichofanyika katika nyumba yenu, tunajua wewe pia unajua kilichotokea. Mumeo yuko wapi?” alimuuliza kwa sauti ya upole kabisa.



“Kwa kweli mimi sijui alipo, mara ya mwisho alinipigia simu akisema yupo Dodoma, lakini akaniambia anaelekea Mwanza,” alijibu.“Sasa sikia..” yule mwanamama askari akamwambia mama Tonny!





Mama Tonny alibakia kimya akimuangalia yule askari ambaye alikuwa akizichezea karatasi zilizokuwa mikononi mwake. Akatumia kiasi cha dakika 15 kumuelekeza jinsi ya kufanya kwa ufasaha kabisa bila kukosea, vinginevyo angekosa bahati ya kuondolewa katika shitaka kubwa linalomkabili mumewe pamoja na watu wengine.



“Nadhani umenielewa mwanamke mwenzangu?” askari alimuuliza mkewe mzee Linus, ambaye alitingisha kichwa kuonyesha kuelewa. “Haya sasa, piga,” askari mwanamama alimwambia.

Mama Tonny alibonyeza namba za mumewe, baada ya sekunde chache, mzee Linus aliipokea simu hiyo, kama kawaida akiwa na hofu flani moyoni mwake.



Mkewe alimsalimia na baadaye alimuuliza kama yupo sehemu ambayo anaweza kuongea bila wasiwasi. Akiwa sebuleni kwa Dayani, kule Morogoro, alimtoa wasiwasi mkewe na kumwambia anaweza kuendelea, lakini huku akimkonyeza rafiki yake Dayani.



“Nimepigiwa simu na Polisi, sijui wamepata wapi namba yangu, wanataka niende kituoni eti kuna jambo wanataka kuzungumza na mimi, nimewakubalia, lakini kabla sijaenda nikataka kwanza ushauri wako, niende nisiende?” mkewe aliongea huku askari aliyekuwa naye karibu, akirekodi kwa kuwa simu ilikuwa imewekwa ‘loud speaker’.



“Hebu ngoja kwanza nitakupigia baada ya dakika mbili, ngoja nishauriane na Dayani,” Mzee Linus alisema simuni na kukata. “Safi sana, ninakuhakikishia usalama wako, ni kufuata tu vile tunataka utusaidie,” mwanamama askari alimwambia mkewe mzee Linus.



Dakika mbili baadaye, mumewe alikuwa hewani akimtafuta kwenye simu yake.

“Sikiliza, hawa hawatakiwi kabisa kutupata muda huu, ngoja kwanza tupotee ili angalau tujipange tujue jinsi ya kujitetea. Kwani sasa hivi uko wapi,” alimwambia mkewe.



“Nimeamua kuondoka ile hotel, nimehamia nyingine kule chini kidogo,” mkewe alimjibu.

“Sasa sikiliza, sikiliza vizuri, nenda kachukue mizigo yako, halafu uende pale Kimara, kuna gereji moja bubu ipo mbele tu ya Resort Inn, muulizie mtu anaitwa Bob, jitambulishe, utapewa usafiri uje hapa tulipo,” alisema mumewe, akimsisitizia kufanya zoezi hilo haraka.



Baada ya kukata simu, askari alitoka chumbani, akaingia chumba kingine na baada ya dakika ishirini, kila kitu kikawa sawa. Gari moja nyekundu, yenye namba za kiraia ilimchukua mama Tonny na askari wengine wawili waliovalia kiraia.



Dereva aliendesha kasi hadi walipofika Kimara, katika gereji bubu iliyokuwa mbele ya Resort Inn. Mama huyo akashuka garini huku askari wa kike wakimtazama, alikwenda hadi kwa kijana mmoja na kuzungumza naye maneno machache. Kisha, mtu mmoja mwenye mwili mkakamavu akajitokeza na kwenda kuzungumza naye. Alipoanza kujitambulisha tu, akamkatiza.



“Ingia kwenye ile pale gari, kwani una mizigo zaidi ya huo mkoba? Hawa rafiki zako unaweza kuwaaga tu,” Bob akamwambia akimuonyesha gari moja nyeupe, lakini yenye vioo vya giza, aina ya Prado VX!

Mama Tonny alirejea kwenye gari alilokuja nalo, akawakonyeza askari na kuwaaga kwa kuwapa mikono, akalifuata Prado na kuingia. Gari la askari likageuza na kurejea zake mjini, wakati alilopanda mkewe mzee Linus, likaingia upande wa Morogoro, safari ikaanza!



Katika gari hilo, kulikuwa na watu wawili tu, yeye na dereva ambaye pia alikuwa mwanamke. Hakumsemesha jambo lolote hadi walipopita mizani Kibaha, tena baada ya kuwa ametoka kuwasiliana kwa simu.



“Mama nimependa tabia yako, kwa kawaida sisi kama tuko na mtu tusiyemfahamu, hatupendi awe anatumia simu yake, lakini wewe tokea tumepanda sijakuona uhangaike na simu yako,” sauti nyororo kutoka kwa mwanamke dereva ilipenya masikioni mwa dereva na kabla mkewe Linus hajajibu, simu yake ikaita.



“Ndiyo kama nimeiambia iite sasa, lol,” alisema na kusababisha wote kuangua kicheko, ilikuwa inatoka kwa mumewe.

“Mmefika wapi,” aliuliza mzee Linus, swali ambalo alijibiwa kuwa ndiyo kwanza wanatoka Kibaha, kabla ya kukata simu.







“Mwenzangu, hapa nilipo nina mawazo kama nini, kwanza hata sijui naenda wapi, sijui huko itakuwaje, yaani sioni hata raha ya simu yenyewe, natamani saa hizi ningekuwa nimesinzia nisahau haya mambo ya dunia,” alisema mama Tonny kumweleza dereva wake.



Ingawa ni kweli kuwa alikuwa amechanganyikiwa, lakini kitu kingine kilichomfanya akose raha na simu yake ni kuwa ilikuwa imeunganishwa na Polisi, ujumbe au maneno yoyote ambayo angeongea na simu yake, yangesikika pia kwao.

.CHANZO:  https://deusdeditmahunda.blogspot.com/

Alikuwa na uhakika askari walikuwa hatua chache nyuma yao na hakuona usalama wowote wa yeye, mumewe na mtandao wao wote, akili yake ilikuwa inamtazama mumewe akiwa mahakamani, akihukumiwa kwa uhalifu alioufanya!

**

Jimmy, Maria na dereva wao, badala ya kupita barabara ya Kawawa, wakapinda kushoto na kuelekea Kigogo huku wakiendelea na mawasiliano na mtu aliyekuwa na Stone.

Walifanya hivyo ili kumpa urahisi mtu wa Bajaj ya tatu ili asikumbane na foleni katika barabara hiyo eneo la Magomeni. Walishawasiliana na mwenzao na alikuwa anakuja spidi ili amuwahi mtu aliyekuwa na Stone.



Bajaj ya akina Maria haikuwa inakimbia sana, hivyo na hata ile ya Stone nayo ikawa inakuja mwendo mdogomdogo. Wakati akina Maria walipofika Kigogo Mwisho, Stone alikuwa nyuma yao na Bajaj iliyokodishwa kwa ajili ya kumpiga picha ilishaingia njia hiyo ya Kigogo na ilikuwa hatua chache nyuma ya akina Stone.



Wakatumiana meseji ili azime Bajaj mara moja, ajifanye tatizo la kiufundi ili amuwahi atakaposimama na kumpiga picha. Katika eneo linalojulikana kama First Inn, Bajaj ya mbele ilikuwa inaelekea Mabibo, ya kati ikazimika ghafla.



“Dah, hii ngoma mbona inataka kuzingua, kuna kiwaya kinasumbua, dakika moja bro,” dereva wa Bajaj hiyo alisema huku akishuka, akijifanya kwenda nyuma na kufunua kisehemu kimoja na kujifanya kama anaunga kitu.



Stone aliendelea kubaki kwenye Bajaj lakini macho yake yakiwa yameganda mbele akiwafuatilia kwa makini uelekeo wao. Aliyetakiwa kupiga picha alishafika alipokuwa Stone, akaipaki mbele yao na kumsemesha mwenzake.



“Oyaa vipi imebuma? Ngoja kwanza nikupige picha kwa kumbukumbu yako,” alisema huku akifanya zoezi hilo, akimchukua Stone aliyekuwa hana habari. Aliwaona kama watu wanaofahamiana kutokana na wote kufanya kazi moja. Baada ya kupiga picha mbili tatu, akaondoka zake huku akimtania mwenzake.



Dereva alishamaliza kuunganisha waya aliosema, akarejea kwenye usukani na kuiwasha, kwa spidi kali akaondoka kuifuata Bajaj ya mbele yake.“Khaaa, huyu ni Stone, Mungu wangu, maisha yangu yako hatarini,” alisema Maria mara tu baada ya picha za mtu aliyeko kwenye Bajaj kutumwa kwa dereva wao.



Jimmy alimtazama Stone, hakuwahi kumuona kabla, lakini alipata simulizi zake kutoka kwa mpenzi wake, wakati ule aliosemekana alitaka kumdhuru mdogo wake. Lakini hakuonyesha hofu yoyote, alitaka waendelee na safari hadi mwisho ili waone mwisho wake. Maria alikuwa akitetemeka sana, alitaka kuwataarifu wazazi wake wajue la kufanya.



Jimmy akamtaka kuwa mtulivu na dereva wa bajaj waliyopanda, akataka waucheze mchezo huo waone mwisho wake.“Twendeni mpaka mwisho wa safari, huyu dada akishuka, mimi na wewe tujifanye tunaondoka, halafu tumvizie huyu tuone atafanya nini,” alisema, kauli ambayo iliungwa mkono na Jimmy. Akaongeza kasi na akina Stone nao wakaongeza kasi hadi walipofika katika nyumba moja iliyopo ndani kidogo ya kituo kinachoitwa Kanisani.



Jimmy hakushuka, bali Maria aliteremka na kukimbilia ndani. Stone alimuona na nyumba aliiona. Akaisimamisha Bajaj yao na kutaka kiasi cha pesa zinazotakiwa kulipwa. Alipomalizana naye, akashuka na kuanza kutembea kurudi kituo cha basi.



Jimmy na dereva wake wakarudi na kwenda kupaki sehemu ambayo Stone asingeweza kuwaona. Kwa mshangao wao, Stone hakukaa sana, lilipopita daladala akadandia na kuondoka zake!!





Inspekta Jerom, aliyekuwa ameegesha gari lake pembeni ya mzunguko wa Msamvu, Morogoro, aliliona Prado VX lenye rangi ya damu ya mzee kama alivyoelekezwa na wenzake waliokuwa nyuma, walikuwa wametega magari katika njia zote, ile ya kuingia mjini, kuelekea Iringa na Dodoma. Lilipochagua njia ya kwenda Dodoma, askari waliokuwa mbele ya kituo cha mabasi, wakaamriwa kuondoa gari taratibu ili wapitwe wakiwa wanaendesha.



Walipokata tu kona, kama mtu aliyefahamu kwamba walishafika Moro, mzee Linus akampigia simu mkewe na kutaka kujua walipo, na alipoelezwa kuwa walishatoka katika mzunguko wa Msamvu wakielekea Dodoma, akakata simu mara moja na kumgeukia Dayani.



“Wameshapita Msamvu wanakuja,” alimwambia huku akiwa ameshikilia simu yake, kwa shauku.

“Devo anapajua hapa na hata namna ya uingiaji wake anaujua, wewe tulia,” Dayani alimjibu huku akipuliza sigara yake kwa mikupuo ya mfululizo.



Jibu hilo lilimfanya kutokuwa na nia tena ya kumpigia mkewe kama mwanzo, wakaendelea kutazama televisheni ambayo wakati huo ilikuwa inaonyesha marudio ya mpira wa miguu kati ya Brazil na Ujerumani katika fainali za Kombe la Dunia, mechi ambayo iliisha kwa Wadachi kuibuka na ushindi wa mabao 7-0.



Gari alilopanda mkewe mzee Linus lilikuwa limewekwa katikati. Mbele kulikuwa na magari mawili  ya polisi yaliyokuwa na namba za usajili za kiraia na nyuma pia yalikuwa mawili. Yale ya mbele yalikuwa yakipishana, moja likija nyuma ya gari lao na lingine likiwa mbele yao, ili mradi tu hawakuweza kugundua kinachoendelea. Lile gari lililokuja kulisindikiza lile Prado, liliunganisha kituo kikuu cha polisi mjini Morogoro.



Lilipofika na kukata kulia eneo la Mkundi, magari yote mawili ya Polisi yaliyokuwa mbele yalishapita, hivyo ikawa rahisi gari moja likakata kulifuata gari hilo, lakini kwa mbali. Prado lilikwenda likaipita nyumba ya Dayani na kwenda kupaki katika nyumba ndogo iliyokuwa mbele ya nyumba hiyo. Yule dereva aliteremka, akaenda kufungua geti.



Akarudi garini na kuliingiza ndani. Halafu akarejea na kulifunga, kitu kilichowashangaza Polisi. Kwa mujibu wa maelezo waliyokuwa nayo, watu hao wangelakiwa na wenzao, ambao ndiyo hasa waliokuwa wanatakiwa.

.CHANZO:  https://deusdeditmahunda.blogspot.com/

Polisi wakapashana kuhusu jambo hilo, askari kanzu wawili wakaachwa kwa mbali kulichunga eneo hilo, wengine wakarejea kituo kikuu kwa ajili ya mazungumzo ya kujipanga, lakini kila mara walikuwa wakiwasiliana na wenzao ili kujua kinachoendelea.



Baadaye, zikaja taarifa kutoka kwa majirani kwamba nyumba ile ilikuwa ikitumika mara chache sana na ni nadra kumuona mtu akiingia na kutoka. Jambo hili nalo liliwatia mashaka Polisi ambao walipanga kufanya shambulio la kushtukiza usiku wa siku hiyo.



Hadi ilipofika saa nne za usiku hakukuwa na mtu yeyote aliyekuwa ametoka, ingawa taa zilikuwa zinawaka ndani, ishara kwamba kulikuwa na watu. Kitu cha kwanza walichofanya polisi, ni kuwasiliana na Tanesco, ili kuzima umeme katika eneo lote lile, zoezi ambalo lilitimia baada ya dakika ishirini.



Umeme ulipokatika tu, askari wawili waliokuwa jirani na nyumba hiyo waliruka ukuta na mmoja akakimbilia katika mlango, mwingine akabingirika na kuingia chini ya uvungu wa gari. Askari wengine walikuwa nje, nao wakasogea katika mlango wa nyumba hiyo lakini kabla hawajafika, taa zikawaka!



Wale wa ndani wakapatwa na taharuki kubwa, lakini kwa mshangao wao, hawakuona dalili zozote kama kulikuwa na mtu. Kwa kutumia ufunguo m****** wakafungua geti, wenzao waliokuwa nje wakaingia ndani. Ua ulikuwa mkubwa, ndani kulikuwa kimya, wakakubaliana kuuvunja mlango. Wakitumia bastola isiyotoa sauti, wakapiga risasi tatu kwenye kitasa, kikaachia, mlango ukafunguka!







Wakasubiri kwa muda wa dakika mbili, kukawa kimya. Kwa tahadhari kubwa, askari wa kwanza, bastola ameitanguliza mbele, akaingia sebuleni. Hakukuwa na mtu. Akaingia askari wa pili na wa tatu, wa nne akabakia nje.



Wakaitazama sebule, ilikuwa imepambwa vizuri, wazi kuwa kulikuwa na mtu aliyekuwa anashughulika nayo kila mara. Upande wa kila sebule, kushoto na kulia kulikuwa na milango, ya chumbani bila shaka. Wakashangaa kuona hakukuwa na mtu aliyeshituka, licha ya milio ya risasi.



Wakapeana ishara za kugonga milango. Wakachagua kuanza na wa kulia kwao, wakagonga zaidi ya mara nne, hakukuwa na jibu. Wakaugeukia wa kushoto, nao wakagonga kama vile mambo yakawa yaleyale. Wakakubaliana kutumia ufunguo malaya. Wakafungua mlango wa kwanza, ndani wakakuta kitanda kikubwa, cha ukubwa wa sita kwa sita, kimetandikwa vizuri!



Ukutani nako kulikuwa na kabati kubwa la nguo. Walipojaribu kulifungua, likakubali bila ubishi. Wakalipekua, ndani kulikuwa na nguo za aina mbalimbali, za kike, za kiume na watoto. Wakajiridhisha kuwa kuna familia inaishi ndani ya nyumba hiyo.



Wakahamia chumba cha pili, nako kama ilivyokuwa katika chumba cha kwanza, kulikuwa na kitanda kikubwa na kabati, vyote vikiwa nadhifu. Wenyewe walikwenda wapi?

Wakakubaliana kutoka nje kwanza kwa ajili ya kubadilishana mawazo na wenzao. Wakatoka nje ya geti, wakasimama na kuwasiliana na wenzao kwa ajili ya majadiliano mafupi. Kwa muda wote tokea wanawake wale waingie, hakuna mtu aliyetoka, sasa wako wapi?



Swali lile liliwaumiza sana kichwa. Wakarejea tena ndani na kujaribu kuona kama kuna sehemu yoyote imevunjwa au dirisha limefunguliwa na kuwaruhusu kutoka, hawakuona. Wakiwa nje, eneo lote likiwa giza, wakagundua kuwa kulikuwa na nyumba mbili tu zinazowaka taa. Ile waliyokuwa wameizingira na nyingine iliyokuwa mita kadhaa mbele yao.



Wakafanya mawasiliano na watu wa Tanesco ili kujua kama umeme umekatwa kikamilifu katika nyumba zote, wakajibiwa kuwa eneo lote limezimwa na zile zinazowaka, huenda wana jenereta zao binafsi.

Jibu hilo likawavutia, wakapeana ishara ya kuizingira nyumba ile nyingine inayowaka umeme pia. Askari wakaongezwa. Usiku ule wa saa nne, ilikuwa ni mapema mno kukamilisha operesheni yao waliyokusudia kuwakamata watu wanaohusika na mauaji. Mawasiliano ya simu kutoka simu za watuhumiwa, zilizokuwa zimetegwa, zote zilionekana kuzimwa!



***

Mlio wa risasi katika kitasa cha mlango wa ile nyumba ndogo, ulisikika kwa usahihi kabisa sebuleni kwa akina Dayani, kwani kulikuwa na spika kubwa iliyotegwa, ambayo ingeweza kuleta sauti ya kitu chochote kisicho cha kawaida ambacho kingetokea.



Na ni mlio ambao ni Dayani pekee miongoni mwa watu zaidi ya sita waliokuwepo sebuleni waliousikia na kutambua maana yake. Kwa mara ya kwanza katika maisha yake, hofu ikamtawala moyoni mwake. Hata hivyo, hakutaka kuionyesha.



Mzee Linus, mshirika wa zamani wa Dayani, pamoja na kuwa hakuwa naye karibu kwa miaka mingi, lakini bado hisia za kihalifu zilikuwa ndani ya damu yake, na alijua jinsi ya kuhisi hatari au hata kumtambua mtu aliye hatarini. Mabadiliko ya ghafla ya rafiki yake, yalimpa ishara mbaya.

“Chuga” Mzee Linus alimshtua Dayani kutoka katika mawazo ya kuchanganyikiwa yaliyokuwa moyoni mwake na kuitwa jna hilo, kulimkumbusha kuwa alikuwa katika mapambano.

“Noma,” alijibu kwa kifupi, kauli ambayo mzee Linus aliielewa vizuri sana.

“Sasa?” aliuliza.



“Wapo hatua chache kutoka tulipo, inabidi tuondoke haraka eneo hili,” alisema na kusimama, akaingia chumbani kwake, kwenye kiboksi kimoja kilichokuwa ukutani mwake, akabonyeza kitufe chenye rangi ya njano.



Kama ilivyokuwa katika makazi yake ya jijini Dar es Salaam, Dayani pia aliijenga nyumba hii kwa ajili ya ulinzi wake binafsi wakati wa matatizo yake ya kihalifu. Nyumba ndogo ambayo Devo na mama Asfat waliingia, ilikuwa na sehemu ya kuingilia, yenye ngazi zilizotokeza kwenye nyumba yake na ndimo walimopita. Kitufe cha njano alichokibonyeza, kiliziba njia hiyo kwa zege kubwa lilionyesha kama mwisho wa njia hiyo!



.CHANZO:  https://deusdeditmahunda.blogspot.com/



BAADA ya Stone kupanda daladala na kuondoka, walibakia dereva wa Bajaj na Jimmy pale walipokuwa wamejibanza. Wakawa wamebakia kimya kwa muda kabla ya kuanza mazungumzo.

“Una mawazo gani mshkaji,” Jimmy alimuuliza dereva wa Bajaj, ambaye alishajitambulisha kwa jina la Sensei.

“Nadhani jamaa alitaka kujua anapoishi huyu msichana, huenda anajipanga siku maalum ya kuja, nilidhani tungetoa ripoti polisi,” Sensei alimshauri Jimmy.



“Ni kweli, halafu hatuwezi kujua siku gani atakuja, nadhani umetoa ushauri mzuri, lakini sasa wa kuripoti polisi inabidi awe Maria mwenyewe,” Jimmy alikubaliana na Sensei.

Jimmy akatoa simu yake na kumpigia Maria, wakazungumza kuhusu mpango ule, ambao msichana huyo alikubaliana nao. Akatoka nje na wakapanda tena Bajaj hadi Kituo cha Polisi Kawe ambako alitoa taarifa hizo. Askari aliyekuwa akiandika maelezo, alikuwa ni yuleyule aliyeandika maelezo ya baba yake katika Kituo cha Wazo, akamkumbuka Stone.



“Hivi wewe kwenu ni Nakasangwe?” askari alimuuliza Maria, ambaye alishangazwa na swali hilo, ambalo hakulitegemea.

“Ndiyo, umejuaje kama naishi kule wakati nimekuja kutoa ripoti huku,” naye alijibu kwa swali, huku akionyesha tabasamu.



“Kuna kesi kama hii niliandikisha kule Wazo, wewe una mdogo wako ambaye alitaka kudhuriwa na huyuhuyu Stone? Niliandika maelezo yanafanana sana na jina ni hilihili, nyinyi mna matatizo gani ya kifamilia?” aliuliza askari.



Walibadilishana maneno mawili matatu, kisha baadaye wakaondoka. Yule askari alilichukulia suala lile kwa umakini, akapiga simu Kituo cha Wazo na kuwasiliana na wenzake, akawataarifu kuhusu maelezo aliyonayo pale kituoni kwake.



Kikao cha dharura kikaitishwa, ikakubaliwa kuwa kijana huyo atafutwe na akamatwe, kwa sababu kulikuwa na kila dalili za kutokea maafa. Wakati wakipekuapekua mafaili mezani kituoni Wazo, wakakutana na faili la mzee Linus, ambaye watoto wake walikuwa wanatafutwa na Stone!



“Kuna ugomvi mkubwa wa kifamilia baina ya majirani hawa, unakumbuka huyu mzee ndiye aliratibu mpango wa kuchoma nyumba ya mwenzake lakini bahati mbaya wakaichoma nyumba yake mwenyewe? Hawa wanalipiziana kisasi, ni vizuri huyu bwana mdogo akakamatwa kabla hajaleta madhara, maana kuna kesi kubwa inakuja na hawa watu watatiwa mbaroni wakati wowote kuanzia hivi sasa,” mkuu wa Kituo cha Polisi Wazo aliwaambia askari kanzu aliowaita ili kuwaeleza kwa kifupi suala hilo lilivyo.



Wakakubaliana waende kuendesha msako wa kumtafuta Stone na wakati huohuo kuweka ulinzi wa siri nyumbani anakoishi Maria ili kuhakikisha hadhuriwi. Askari wawili waliondoka kuelekea Nakasangwe nyumbani kwa akina Stone na wakapiga simu kituoni Kawe kuwataarifu umuhimu wa Maria kulindwa bila mwenyewe kujua.



***

Stone alifika Kawe tangu asubuhi na mapema. Zamani aliwahi kuishi ndani ya Kambi ya Jeshi ya Lugalo, wakati huo baba yake mdogo akiwa askari miaka ile ya 2000. Alipata kuwa na marafiki sehemu za Ukwamani, Tanganyika Packers, Kanisani hadi Kawe Beach. Alivijua vijiwe vingi vya wavuta bangi na wahuni wanywa gongo.



Asubuhi hii, aliingia katika nyumba moja iliyo pembezoni kabisa na uzio wa kambi hiyo, ambako wanauza gongo na bangi, baadhi ya wateja wao wakubwa ni vijana wa jeshi hilo. Alifahamika na ingawa alikuwa havuti wala hanywi, lakini walimzoea kama mtu wa kijiweni.



Hakumweleza yeyote kilichompeleka hapo, lakini aliwaambia kwamba siku hiyo alikusudia kulala mitaa hiyo na tayari alishafanya miadi ya kulala kwa rafiki yake wa muda mrefu, Alva.



Ilipofika saa tisa, akaamua kusogea karibu na makazi ya akina Maria, kulikuwa na saluni moja ya kiume iliyopo uchochoroni, ambako akikaa aliweza kuona watu wanaotoka na kuingia katika nyumba hiyo.

Alipiga stori hapo hadi saa kumi na moja jioni, alipomuona Maria akitoka. Mavazi yake, yalionyesha alikuwa na mtoko maalum, akapata furaha moyoni mwake. Maria alikwenda hadi kituoni na kuchukua Bajaj. Stone, akiwa amevaa kofia iliyoficha uso, naye alimfuata taratibu..







BAJAJ aliyochukua Maria iligeuza na kuifuata njia ya Mikocheni, Stone naye akaifuata mojawapo na kuichukua. Katika mzunguko wa Kawe, Bajaj ilikata kushoto na kuifuata barabara ya Mbezi, ikaendelea hadi iliposimama nje ya hoteli moja iliyopo pembezoni mwa barabara hiyo ya zamani ya Bagamoyo.



Maria akaingia ndani ya hoteli hiyo na kwenda moja kwa moja hadi katika meza zilizokuwa zikilitazama jukwaa la muziki lililokuwa limeandaliwa siku hiyo. Vipeperushi vilivyokuwa vimefungwa kuzunguka jukwaa hilo vilionyesha kuwa siku hiyo kulikuwa na onyesho la bendi ya Kalunde Band. Ilikuwa ni bendi nzuri, iliyokuwa chini ya kinara wake, Deo Mwanambilimbi.



Baada ya kujiuliza mara mbilimbili kuhusu kama aingie ndani ya hoteli hiyo au la, hatimaye Stone, aliyekuwa ameshashuka kwenye Bajaj iliyomleta, aliamua kuingia na kuangalia wapi alikuwa amekaa.

Kama mtu asiyekuwa na haraka, alilifuata geti la hoteli hiyo na kuingia ndani huku macho yake yakiwa makali kutazama kila upande kwa haraka, lakini kwa umakini. Kwa vile alishamuona Maria alivyovaa, ilimchukua sekunde chache tu kugundua alipokuwa amejiweka, naye bila kutazama kule alikokuwa amekaa adui yake, akaufuata upande wa pili na kukaa, katika usawa ambao angeweza kumuona vizuri msichana huyo!



Hakukuwa na watu wengi, lakini walitosha kuweza kumficha mtu aliyetaka kujificha. Mhudumu alipomfuata, akaagiza juisi na kukaa macho yake yakiwa katika jukwaa la muziki, ambako kijana mmoja alikuwa akiimba nyimbo za kunakili kutoka kwa wanamuziki wa nje. Pale, alikuwa anaimba wimbo wa hayati Bob Marley uitwao Redemption Song ambao Stone alikuwa akiupenda sana!



“Uko wapi Jimmy, nakufa leo,” Maria alimwambia mpenzi wake, mara baada ya simu aliyompigia kupokelewa upande wa pili. Muda wote tangu alipotoka nyumbani kwao, moyo wake haukuwa sawa, alijihisi mzito kana kwamba chochote kinaweza kumtokea. Hata alipofika pale akiwa katika ile Bajaj, hakuwa na amani kabisa.



“Ndiyo nachukua Bajaj hapa Makonde, kuna nini?” Jimmy alijibu upande wa pili. Ahadi yao ilikuwa ni kukutana katika ukumbi huo kwa ajili ya kufurahia wikiendi, kwani wote walikuwa ni mashabiki wakubwa wa Kalunde Band!



“Stone yupo hapa, inaonekana kabisa amenifuata, Mungu wangu, natetemeka mwili mzima,” Maria alimwambia mwenzake kwenye simu. Kauli hiyo, iliusisimua mwili wa Jimmy, ambaye alimjibu kuwa awe mpole, kwani angekuwa mitaa ile si zaidi ya dakika kumi kuanzia muda huo..!



**

“Tonsaa,” Dayani aliita kutoka ndani alikokuwa wakati akifungua mlango na kurejea sebuleni. Kijana mmoja wa kazi, aliitika na kukimbia kuja pale alipo mara moja.

“Naam mkuu,” aliitika tena baada ya kufika sebuleni.

.CHANZO:  https://deusdeditmahunda.blogspot.com/

“Kimenuka, hebu tokeni nje kuangalia hali ya hewa, tunatakiwa kuondoka eneo hili haraka sana, wanoko wako araundi,” Dayani alisema huku Tonsa akiingia chumbani kwao, sekunde chache baadaye, vijana wanne wakiwa wamevalia kama Wamasai, waliibuka. Walikuwa wamebadili muonekano wao ili waonekane kama walinzi.



Wakatoka nje baada ya kufungua geti na kulifunga, wakasambaa kila mmoja katika pembe moja ya nyumba. Uzoefu wao wa kihalifu ukawaonyesha kuwa watu wasio wa kawaida walikuwa wameizingira nyumba yao ndogo. Hata pale walipokuwa, napo palionekana kuwa na watu karibu ambao hawakuwa wa kawaida!



Wakapigiana simu na kukubaliana kuondoka eneo hilo mmoja mmoja, ili wakakutane barabarani-, lakini wakati huo huo, wakawasiliana na akina Dayani ndani kuwa kulikuwa na watu, ambao kwa vyovyote ni askari waliokuwa nje ya nyumba hiyo. Wakawataka kutoka nje mmoja mmoja haraka iwezekanavyo!





Hakuna wakati ambao Dayani aliwahi kuwa katika hofu kama siku hiyo. Alitambua kuwa wakati wowote kuanzia muda huo angeweza kukamatwa na yeye hakuwa tayari kuwekwa chini ya ulinzi kirahisi. Akawaambia wenzake kuwa wanatakiwa kutoka haraka ndani ya nyumba hiyo, kwani tayari wamezingirwa.



Dayani alikuwa wa kwanza kutoka ndani ya nyumba hiyo baada ya kuwa amefungua geti, mavazi yake yalionyesha kama mtu ambaye anajiandaa kwenda kulala. Alipofika nje, simu yake mkononi, akawa anazungumza huku akipiga hatua taratibu kuyaacha makazi hayo. Dakika moja baadaye, wanawake wawili walitoka na kufungua geti, gari dogo jekundu likawa linataka kutoka.

Ndani ya gari hilo kulikuwa na dereva tu huku wale wanawake wawili wakionekana wazi kuwa watakuwa ni abiria.



Vijana wanne wa Kimasai walipotoka walimshtua Frank, mmoja kati ya askari kanzu waliokuwa wameweka doria katika mitaa hiyo. Katika kipindi chote tangu waanze kujikusanya hapo, hakukuonekana dalili za kuwepo walinzi. Lakini kilichomshtua zaidi, ni jinsi walivyotoka na baadaye kutoweka kwa namna ya kushangaza, ingawaje hapo mwanzo walionekana kama waliotoka mara moja.



Kitendo hicho kilimpa mashaka. Hata hivyo, hulka ya Frank siku zote ni kuzifanyia kazi hisia zake, mara moja akafanya mawasiliano na wenzake, akawaambia kuhusu wale vijana wa Kimasai na hofu yake katika nyumba ile. Askari nao wakajipanga, waliokuwa barabarani wakawa wanawafuatilia wale vijana wa Kimasai ambao walikutana katika baa moja iliyokuwa barabarani.



Macho ya askari pia yakaongezeka kwenye nyumba hiyo na hata Dayani alipotoka, askari wawili walienda naye. Kilichowashtua Polisi, ni kwamba naye alikwenda moja kwa moja na kujiunga na vijana wale wa Kimasai katika ile baa.



Baada ya kupashana habari, wakaazimia kuwakamata ili kufanya nao mahojiano. Hadi wakati huo, hawakuwa wamemtambua mtu yeyote kati ya wale waliokuwa wameketi pale baa. Wakati wakijipanga, ndipo walipoliona geti likifunguliwa na gari dogo likionekana kutaka kutoka.



“Kwa nini katika usiku huu watu nane wanatoka katika nyumba moja?” Frank alijiuliza akiwa anasogea karibu na barabara, tayari kwa kulisimamisha gari hilo.



Mzee Linus ndiye alikuwa dereva, akalirudisha gari nyuma na kulitoa kabisa. Baadaye wale wanawake wawili nao wakajipakia garini na safari ikaanza. Ni wakati akibadili gea ya kwanza tu, gari lao likamulikwa na taa kubwa za gari lililokuwa mbele yao. Zilipozima, watu wawili walishuka kwenye gari hilo na kuwapungia mkono, dalili za kuwaomba kusimama.

Wote watatu ndani ya lile gari walipatwa na hofu wakajibishana haraka haraka wakati wakijiandaa kusimama.



“Tuwalipue tusepe zetu,” msichana aliyekuwa amekaa na mkewe mzee Linus aliuliza huku akitoa bastola yake yenye uwezo wa kubeba risasi tisa.

“Hapana, ngoja kwanza tuone, yaweza isiwe hatari,” mzee Linus alisema huku akiliegesha gari pembeni. Aliposimama, aliliona gari lingine likiwasogelea, likaegeshwa nyuma yao. Watu wengine wawili wakatoka na kuwafuata pale walipokuwepo.



**

“Dereva unaweza kuongeza mwendo zaidi, maana naona kama unatambaa vile,” Jimmy alimwambia dereva wa Bajaj aliyopanda, kwani wito wa mpenzi wake ulimfanya mwili wake usisimke, alitamani kukutana na Stone haraka sana.



Dereva akaongeza mwendo uliomfurahisha Jimmy na muda mchache baadaye akawasili katika hoteli ile aliyokuwa mpenzi wake. Hakupata taabu kumuona alipo, akaenda moja kwa moja na walipokutana, wote wakasimama, wakapigana busu kama wafanyavyo watoto wa mjini!

“Niambie sweet, yuko wapi huyo mpumbavu?” Jimmy alimuuliza huku akizungusha kichwa chake kuwatazama watu waliokuwa hotelini hapo, kila mtu akiwa bize kwa shughuli zake.







“Wewe kaa kwanza utulie, hivi umeshakuja roho yangu ina amani,” Maria alimwambia Jimmy aliyekuwa akivuta kiti na kukaa, akiangalia upande ambao angeweza kuona vizuri mambo mengi. Jamaa akakubali kwa kutingisha kichwa.



Ndani ya ukumbi ule, askari kanzu wawili pia walikuwa wakiwatazama Stone na Maria kwa zamu. Waliamini kabisa kwamba ule ulikuwa ni wakati ambao kijana huyo alipania kufanya uhalifu. Walitaka kumkamata kijana huyo bila jambo hilo kujulikana kwa wateja wengine waliopo hotelini hapo.



Baada ya kuwa wameshafanya mawasiliano na askari wa Kawe kituoni waliokuwa wakija na difenda ya Polisi, askari mmoja aliifuata meza waliyokuwa wamekaa Jimmy na Maria.“Habari zenu, mimi ni askari, tupo wawili na mwenzangu humu ndani.

.CHANZO:  https://deusdeditmahunda.blogspot.com/

Wewe dada unafuatiliwa na jamaa mmoja pale anaitwa Stone, anataka kukudhuru. Lengo letu sisi ni kumkamata, hatutaki kufanya hivyo humu ndani, kwa hiyo tunakuomba usimame ufanye kama unatoka nje, wewe bro subiri hapahapa, yule jamaa atasimama na atakamatwa mara tu akifika getini,” alijieleza askari huyo na kuwafanya vijana wale kumkazia macho.



“Tutaamini vipi kama wewe ni askari na si mmoja wa watu wa Stone,” Jimmy alimuuliza huku akizungusha macho, Stone alikuwa akifuatilia meza yao kwa tahadhari kubwa.“Huna haja ya kuwa na hofu,” alisema huku akitoa kitambulisho chake mfukoni na kumsogezea kwa namna ambayo Stone hakuweza kuona. Jimmy alimwelewa, wakakubaliana na palepale akasimama na kuelekea chooni wakati askari akisimama kuondoka meza hiyo.

***

“Mko chini ya ulinzi,” mmoja wa watu wawili walioshuka kwenye gari lililofunga breki nyuma yao ndiye alitoa kauli hiyo na kumfanya mzee Linus na wenzake waliokuwa ndani ya gari kutahayari. Yule mtu aliyesema maneno hayo alilisogelea gari lao na kufungua milango.



Wakaamriwa kutoka nje. Katika jambo lililowashangaza zaidi mzee Linus na mkewe pamoja na mwanamke waliyekuwa naye, ni kitendo cha gari lingine la tatu kufika eneo hilo na askari wenye bunduki kushuka. Wote watatu wakaamriwa kuingia katika gari moja, ambalo liliwashwa na kuondoka eneo hilo likielekea kituo cha Polisi mjini Morogoro.



Baada ya kuhakikisha wale watu watatu wameanza safari ya kuelekea polisi, askari wale wenye silaha walielekea katika baa iliyokuwepo barabarani, ambayo Dayani alikuwa amekaa na vijana wake.

“Mbona tena simu zao hazipatikani?” Dayani aliwauliza vijana wake alipokuwa akijaribu bila mafanikio kupiga simu ya mzee Linus na wenzake.



“Hebu ngoja nijaribu kusogea nione kuna kitu gani, maana wakati tunaondoka pale kulikuwa na hali flani ya wasiwasi,” Tonsa alimwambia bosi wake huku akisimama. Lakini kabla hajafanya lolote, askari wawili waliovalia kiraia walitoa bastola zao.



“Wote mpo chini ya ulinzi, inueni mikono juu mara moja,” walisema kwa pamoja huku wakijiweka tayari kushambulia. Ni wakati huo ndipo gari lililokuwa na askari wengine waliokuwa na silaha, waliotoka kuwakamata akina mzee Linus ndipo walikuwa wanaingia na kulifanya eneo lile la baa kuwa tulivu.



Watu walikuwa wanashangaa kuona askari wakiingia huku wakiwa na bunduki. Hawakuelewa kitu gani hasa kimetokea. Askari wakawafuata akina Dayani waliokuwa wameinua mikono juu na kuwapekua. Watatu kati yao walikutwa na bastola hivyo kuzidi kuwachanganya wanywaji wengine waliokuwepo hapo.



Akilini mwake, Dayani alikuwa anajilaumu sana kwa kuruhusu kukamatwa kizembe namna ile. Hakuwa ametegemea kama wangeweza kumfikia kama walivyomfikia. Difenda ya Polisi ikaja na kuwaamuru kupanda garini. Ni baada ya msafara huo kuondoka katika baa hiyo, ndipo uhai ukaonekana kurejea upya.







Aliwahi kukamatwa mara nyingi, lakini mara hizo zote ilikuwa ni baada ya polisi kuhangaika sana na kila alipokamatwa, aliachiwa muda mchache baadaye baada ya kukosekana ushahidi, ingawa pia kwa Dar es Salaam, alikuwa na watu wake ndani ya jeshi la polisi waliokuwa wakimlinda.



Kati ya watu waliokutwa na bastola, na yeye ni miongoni mwao. Licha ya silaha hiyo, pia alichukuliwa simu yake ya mkononi na karatasi zingine zilizokutwa mfukoni mwake. Ingawa alijua angeachiwa baada ya muda mfupi, lakini alifahamu wazi kuwa alikabiliwa na wingu kubwa mbele yake.



Mawazo yake yakarejea familia yake na kwa namna ya kushangaza kabisa, akajikuta akimlaumu rafiki yake mzee Linus, kwa kitendo chake cha kumrejesha katika harakati za kihalifu kwani kwa kiwango cha maisha alichokuwa anaishi, hakutakiwa tena kujihusisha na uhalifu.



Njia nzima hakuna mtu aliyesema jambo lolote hadi gari hilo lilipoegesha nje ya Kituo cha Polisi Morogoro na askari kutangulia kushuka na kuwaamuru wahalifu nao kufuata. Katika usiku ambao lolote lingeweza kutokea, askari waliwaamuru kuweka mikono vichwani mwao.



Wakapita kaunta, wakaingizwa katika chumba kimoja kilichoonekana kuwa ni ofisi. Kulikuwa na viti, wakaamriwa kukaa. Waliachwa humo kwa dakika kadhaa kabla ya Dayani kuchukuliwa na kuondolewa.



Dayani, rekodi zinakutaja kama mhalifu mzoefu na tunao ushahidi wa kutosha katika hili. Huyu Linus bado tunatafuta vitu vya kumuunganisha japo hatuna shaka na urafiki wenu. Hapa Morogoro hamna kesi, isipokuwa usiku huu mtasafirishwa kwenda Dar es Salaam mnakokabiliwa na kesi ya mauaji. Hawa vijana wenu watashtakiwa hapa kwa makosa mengine ya uhalifu ambayo tunaendelea kukusanya ushahidi dhidi yao, askari aliyevalia kiraia, aliyewakalisha katika chumba kingine aliwaambia Dayani na rafiki yake mzee Linus, ambao muda wote walikuwa kimya.



***

Yule askari kanzu baada ya kuondoka katika meza aliyokuwa amekaa Maria na mpenzi wake Jimmy, aliondoka na kuelekea nje, pasipo kuangalia katika meza aliyokuwa amekaa Stone. Jimmy hakukaa sana chooni, alirejea, lakini badala ya kwenda alipokuwa amekaa mpenzi wake, alipitiliza hadi katika eneo lingine la baa ambalo lilikuwa ndani ya hoteli hiyo.



Macho ya Stone yalikuwa yanazunguka kama ya Tai angani, alitazama nyendo za watu wote waliohusiana na Maria na akashindwa kuelewa ni kitu gani kilikuwa kinaendelea. Lakini pale alipokaa, aliamini kabisa msichana huyo jirani yao alikuwa hajamuona. Jua lilianza kuzama na hilo lilimfurahisha zaidi.



Hakukaa muda mrefu kabla ya kusimama na kuanza kuondoka kuelekea nje, jambo ambalo Stone alilifurahia sana. Alipogusa geti la kutokea, Stone aliinua chupa yake ya soda na kumalizia kinywaji chake kilichobaki ndani, kisha akainuka na kuanza kuondoka kuelekea mlangoni.



Wakati akiinuka, Jimmy alimuona, lakini hakufanya papara yoyote. Alipofika nje, alimuona Maria akitembea kwa kuelekea upande ambao haukuwa barabara, kitu kilichomshangaza kidogo Stone. Alimtegemea aelekee barabarani, kwani kule chini alikokuwa akienda, kulikuwa na nyumba za kuelekea baharini, ambako hakudhani kama kunamhusu binti huyo.



Baada ya kupingana na mawazo yake kwa sekunde kadhaa, akaamua kumfuata huko huko anakoelekea, kwa mwendo wa taratibu huku akisoma ramani kama anaweza kutimiza dhamira yake eneo lile.

.CHANZO:  https://deusdeditmahunda.blogspot.com/

Mbele kidogo Maria alisimama. Stone hakutegemea, akageuka nyuma, akawaona watu wawili nao wanakuja upande ule, lakini wakionekana kila mmoja akiwa na safari yake. Akachepuka pembeni na kujifanya anajisaidia haja ndogo. Wale watu wawili walimpita. Lakini mtu mwingine akaonekana anakuja upande ule, akaendelea kujifanya anajisaidia huku Maria akiwa bado amesimama.



Akili yake ilikuwa kwa Maria tu. Akamaliza kujisaidia na kuanza kumfuata. Akamsogelea alipokuwa amesimama na alipomfikia, hakumpa nafasi ya kuzungumza. Akamrukia na kumkaba shingo. Lakini pasipo kutarajia, akasikia kitu kizito kikipiga kichwa chake….akapoteza fahamu!!!



MWISHO