MSAFARA WA MAMBA - 3

 

Simulizi : Msafara Wa Mamba

Sehemu Ya Tatu (3)



ILIPOISHIA:

Nilipokelewa na muhudumu na kunielekeza sehemu ya kumsubiri Anko. Aliniuliza natumia kinywaji gani, nilimjibu soda japo nilikuwa na hamu ya bia ya baridi.

Nikiwa pembeni ya ukumbi nikinywa soda yangu taratibu, nilishtushwa na mkono alionigusa begani nilipogeuka nilikutana na Anko.

"Aaah kumbe Anko, karibu."

"Asante, Helena umenifurahisha sana kwa kwenda na wakati nina imani hata hiyo kazi utaifanya vizuri na kupata malipo manono."

"Nitashukuru Anko maana hali ni mbaya sana."

Anko alivuta kiti na kukaa karibu yangu, huku akinichanulia tabasamu aliniuliza.

"Vipi mama yako anaendeleaje?"

"Aaah kidogo hajambo japo bado."

"Nina imani mambo yatakuwa mazuri baada ya leo."

"Hata mimi ndilo ninalo liomba kila siku."

Anko aliagiza pombe kali na kuanza kunywa taratibu na mimi nilikunywa soda yangu taratibu huku nikiwa na shauku kujua ni kazi gani hiyo nyepesi yenye malipo manono.

"Herena mbona unakunywa soda? hujawahi kunywa pombe?"

"Mara moja moja sana."

"Ooh, usiniogope kunywa hii au unataka bia?"

"Kilimanjaro ya baridi."

Nililetewa kilimanjaro ya baridi na kunywa taratibu huku nikisubiri kuelekezwa hiyo kazi. Nilijikuta nakata bia ya tatu bila kusikia lolote, mara ililetwa nyama choma ambayo tuliishambulia wote.

Muda wote sikuwa na wasiwasi wowote kutokana nilivyokuwa na Anko. Nilijikuta nikichanganya vinywaji vikali na baridi, mwisho kilichoendelea sikujua. Niliposhtuka nilijikuta kitandani nimelala na pembeni yangu kulikuwa na mwanaume amelala.CHANZO:  https://deusdeditmahunda.blogspot.com/

Nilipojichunguza vizuri nilijikuta sina nguo yoyote zaidi ya shuka niliyojifunika. Nilijikuta nikipandwa na gadhabu na kujiuliza ina maana kazi nyepesi aliyonitafutia Anko ni ukahaba. Nilipeleka mkono sehemu za siri na kujikuta nimeingiliwa.

Roho iliniuma sikuamini kama kweli Anko ndiye aliyenipeleka kwenye kazi ile au aliniacha na mtu kunichukua kama msamalia mwema na kunigeuza kitoweo. Mtu aliyekuwa amelala pembeni yangu ambaye alionekana eneo la kifua lililokuwa limesheheni manyoya, alikuwa bado kwenye usingizi mzito tena akikoloma.

Nilijikuta napata wazo na kuchukua kitu chocho kilichokuwemo mule ndani nimpige nacho kwa kitendo cha kuniingilia bila idhini yangu.

Nilijinyanyua kitandani huku nikiwa na hasira kwa kitendo nilichotendewa na mtu ambaye alikuwa kwenye usingizi mzito.

Nilisimama na kuivuta ile shuka ili nifuate nguo zangu, sikuamini kukuta yule mwanaume aliyekuwa uchi wa mnyama ni Anko. Nilijikuta nguvu zikiniisha na kuhisi kizunguzungu na kuanguka chini kilichoendelea sikujua. Nilipozinduka nilijikuta nikiwa nimelazwa kitandani nikiwa na nguo zangu. Niliposhtuka nilimuona daktari akiwa amesimama pembeni yangu.

Nilijiuliza pale nimefikaje na kwa nini nipo kitandani ikionesha ni mgonjwa. Anko alikuwa amesimama pembeni akifuta jasho kwenye paji la uso, nilitulia tuli nikiwaangalia wote waliokuwemo mule chumbani.

Taratibu kumbukumbu zilinirudia na kujikuta nikianza kulia na kutaka kunyanyuka kitandani huku nikisema kwa uchungu

"Ankoooo.. kwanini Anko?"

Kabla ya kunijibu nilimuona akimpa ishara yule daktari atoke nje ya chumba naye alifanya hivyo. Chumbani tulibakia wawili tu, nilinyanyuka na kutaka kusimama lakini alinishika kifuani na kunirudisha kitandani.

"Herena hebu tulia."

"Hapana Anko kwa nini umenifanya hivi au kwa ajili ya umasikini wangu?"

"Hapana Herena nina malengo mazuri sana kwako."

"Anko..Anko..ya.a.ani huwezi kunisaidia hadi unitumie, ni unyama gani huu?" nilijikuta nikilia kwa uchungu na kukumbuka maisha ya tabu ya mama yangu ndiyo yaliyopelekea niwe kwenye hali ile."

"Usifikilie hivyo mimi siwezi kukutumia ila nataka uwe mke wangu mdogo."

"Anko ni uchafu gani huo yaani utembee na mama yangu halafu utembee na mimi? Hata siku moja."

"Sikiliza Herena usiwe mjinga mimi sina uhusiano wowote na wewe lakini nimekuwa nikikusaidia kwa kiasi kikubwa. Nina imani nikikuoa kabisa matatizo ya mama yako tutayatatua kwa kiasi kikubwa. Kama kutokea imeisha tokea, hivi mimi ni kiumbe gani nitakaye fanya kazi isiyo na malipo."

"Anko Mungu angekulipia."

"Herena unanichekesha, ni nani aliyekweenda kwa Mungu akarudi akasema amelipwa malipo kwa matendo yake mema. Siku malipo ya duniani ubakia duniani na ndio maana tunafanya kazi na kupata mshahara na hatusubuiri malipo ya kwa Mungu si tungekufa njaa.

“Sikiliza mipango yangu kwako ni ya muda mrefu toka mama yako alipokata mahusiano na mimi. Herena kilichotokea nina imani hutakijutia ila jione kiumbe mwenye bahati, hebu fikilia leo nakupa laki tano siku ya mwanzo wa mahusiano yetu nina imani huu ni ukurasa mpya wa ukombozi wa maisha yenu..Kamata hizi."

Alinipa burungutu la pesa na kunikabidhi mkononi, nilisita kuzipokea lakini alining'ang'aniza. Nilijua yameisha tokea na hali ya mama ni mbaya na pa kukimbilia sina niliamua kuzipokea.

Baada ya kuzipokea nilifuta machozi kwa kwenda bafuni kunawa uso, niliporudi nilimkuta Anko akinisubiri na kuniambia.

"Herena nina imani jioni tutakutana hapa hapa, nina mpango wa kumpeleka hospitali mama yako kwa ghalama yoyote."

Nilijikuta nikijilamu kwa kumchukia Anko ambaye hakunipunguza kitu chochote hata nikiendelea naye bado nitabakia Herena yule yule. Vilevile tatizo la ukata na matibabu ya mama yatapata ufumbuzi. Nilimkubalia Anko kukutana naye jioni, tuliagana na kunipa elfu 50 za nauli ya kuja jioni. Jumla ya pesa alizonipa siku ile zilikuwa laki nane, yaani asubuhi ya jana laki mbili na nusu na usiku laki tano na nusu.

Nilirudi nyumbani na kumkuta mama akiwa amelala, sikutaka kumwamsha kwa vile nilikuwa nimeisha kula, nuilikwenda bafuni kuoga na kupanda kitandani. Asubuhi nilikutana na mama ambaye alitaka kujua hatma ya safari yangu.

Nilimdanganya mama kuwa mambo si mabaya ila nimetakiwa kurudi jioni ya siku ile. Nilimficha mama kuwa nimepata pesa, nilijua lazima atakuwa na wasiwasi na kutaka kujua pesa zote zile kwa kazi gani, nilizificha ndani kwa ajili ya kututatulia matatizo yetu.

***

Kuanzia siku ile nikawa nyumba ndogo ya Anko nikiwa nimemrithi mama yangu mzazi. Lakini ilikuwa siri kubwa ambayo mama hakuijua, na matibabu ya mama yalikuwa mazuri yaliyorudisha hali ya mama upya.

Kwa kweli maisha yalikuwa mazuri na Anko kukubali kutusaidia kwa kisingizio ananiona kama mwanaye wa kuzaa. Sikuwa na sababu ya kuacha kunihudumia kiumbe nisiye na hatia, mmh kumbe tulikuwa tunamla mama kisogo.

Shule niliendelea kama kawaida, sikuwa tena yule Herena msichana mbishi mwenye msimamo mkali kwa walimu wapenda ngono. Siku za nyuma nilikuwa nipo tayari kuadhibiwa na walimu niliowakataa kimapenzi. Lakini baada ya kujua faida ya mwili wangu wa kunisaidia kwenye matatizo, sikuwa tena mbishi, mwalimu alipotaka kuniadhibu bila kosa nilimuuliza tatizo nini, jibu aliniambia kwani sijui, basi nilimwambia anione kwa wakati wake.

Herena nilijikuta nikipoteza mwelekeo kwa kuwa mama huruma kwa kugawa mapenzi ovyo bila kuhofia hatari iliyopo mbele yangu.

********

Siku zilivyozidi kwenda nilijikuta hata hamu ya masomo inapotea na muda mwingi nilifikilia mapenzi hasa penzi la Anko. Nlijikuta nikiacha shule kwa sababu ya ugomvi wa kila siku na wanafunzi wenzangu juu ya kuchangia mabwana yaani walimu.

Kingine ni ile hali ya kuutoa mwili wangu bure kwa walimu na pindi nikataapo huambulia adhabu kali. Ajabu ilikuwa tofauti na awali nilipomueleza Anko juu ya uamuzi wangu wa kuacha shule, aliupokea kwa mikono miwili. Hakuonyesha kunijutia kwa uamuzi wangu mgumu, alinieleza kitu ambacho kwa kweli siku ile nilikufurahia sana kumbe...Anko alinieleza kuwa.CHANZO:  https://deusdeditmahunda.blogspot.com/

"Herena kusoma kote ni kwa ajili ya kupata pesa kama una mtu mwenye pesa kusoma kuna maana gani? Unakosa nini Helena muda si mrefu nitakamilisha jumba lako la kifahari pamoja na usafiri wa nguvu.

“ Wewe sasa hivi hutakiwi kuumiza akili yako bali kuituliza na kula raha ya maisha, au hujui wanaume tumeumbwa kuwatafutia wanawake. Herena maisha mazuri yanakusogelea kwani hujui kusoma?"

"Najua." nilimjibu huku nikimtazama usoni, wakati huo nilikuwa nimemlalia mapajani tukiwa juu ya kitanda ndani ya nyumba ya wageni.

"Kingereza unaongea kwa ufasaha sasa tatizo nini?"

"Hakuna mpenzi."

"Hapo ndipo ninapokupendea, unajua mama yako angekuwa kama wewe sasa hivi ningekuwa nimemjengea ghorofa lakini kwa vile ameichezea bahati nafasi hiyo ni yako. Kula raha mtoto wa kike umri bado unaruhusu."

Yalikuwa maneno yaliyonivimbisha kichwa na kujiona mimi ndiye mimi, ni mwanamke niliye bahatika kuliko wanawake wote. Baada ya kuacha shule kwa kweli sikuwa Herena yule uliyenizoea, muda mwingi niliutumia kujipodoa na kuvaa nguo za gharama.

Pamoja na kufanya upuuzi ule sikumuacha mbali mama yangu nilimpa kipa umbele katika kumshughulikia matibabu yake. Kwa kweli pesa haishindwi na kitu. Mama alijenga afya yake kwa mara nyingine, kwa kweli mama alinishukuru kwa kuyaokoa maisha yake.

Uamuzi wa kuacha shule nilipomweleza mama kwanza alikuja juu, lakini nilimueleza sababu za muhimu moja walimu kunitaka kwa nguvu kimapenzi na Anko kuamua nipumzike huku akinitafutia shule nyingine. Nilitengeneza uongo ambao mama aliukubali.

Kuanzia hapo hakuna aliyeulizia maisha yangu zaidi ya kila kukicha kuongeza huduma nyumbani. Siku moja mama aliniambia kitu ambacho kilinishtua.

"Mwanangu Herena siwezi kukuzuia kwenye matamanio ya mwili ni wazi kuna mtu ana mahusiano na wewe. Ninacho ogopa ni Anko wako kujua huenda akapunguza au kukata kabisa huduma zake.

“Hivyo basi sipendi tumuudhi kwa mara nyingine samahani ilizidi hugeuka kero. Pia mwanangu kama kweli huyo mwenzako anakupenda basi usikubali akugeuze gunia la mazoezi. Mlete hapa atambulike kisha muwe mke na mume naogopa mwanangu anaweza kukupa ujauzito na kukukimbia.

“Nitajisikia vibaya siku moja ukija kuishi maisha kama yangu, haya sio maisha ni maisha yasiothaminika katika jamii yetu. Pia mwanangu sipendi siku moja uingie kwenye msafara wa Mamba wakati wewe ni mjusi hata ukenge hujafikia."

"Una maana gani mama?"

"Mwanangu ugonjwa wa ukimwi ni mbaya ukikupata yataka ujasiri la sivyo unaweza kuyakatisha maisha yako kwa kuhofia aibu. Hivyo mwanangu chukua taadhari kabla ya hatari, nife unizike sio ufe uniache."

Mmh! Maneno ya mama yalikuwa mengi pia angejua huyo anayemzungumzia ni Anko sijui angesemaje. Ni kweli nilikuwa nimefanya makosa kutembea na mwanaume ambaye tayari ameisha tembea na mama yangu ambaye alikuwa sawa na baba yangu.

Lakini siku zote makosa ndiyo huzaa kosa, sikuwa na njia nyingine ya kunusuru uhai wa mama uliokuwa ukichungulia kaburi zaidi ya kujirahisi kwa Anko. Nilifanya siri kama tulivyo kubaliana na Anko kwa kuogopa domo la mama pale atakapojua tumeoga bwawa moja.

Hali ya mama ilitengamaa na kujikuta akirudi kilingeni kama kawaida, kwa kweli sikumchunguza ana fanya nini zaidi ya muda mwingi kujishughulisha na mambo yangu. Siku zilivyozidi kwenda ndivyo na mimi nilivyoondoa woga na kutembea na Anko popote alipotaka kwenda.

Safari zake nyingi za nje nilikwenda naye kama mkewe, huwezi kuamini nilinenepa na kupendeza hata mimi nililitambua hilo. Niliweza kuondoka na Anko na kwenda naye mikoani zaidi ya miezi miwili na kutumbua maisha. Kilichonifurahisha ni hali ya mama kuongezeka kuimalika na kuweza kufanya kazi zake kama zamani.

Mama naye baada ya kupata kurudi kwenye hali yake ya kawaida alirudia kazi yake ya ukahaba. Pamoja na kujua athari zake lakini moyo ulinisuta zaidi ya kumuacha afanye atakavyo. Ahadi ya Anko ilianza kukamilika pale aliponipeleka kwenye Site kunionesha ujenzi wa nyumba yangu.

Nilijikuta nikimshukuru Anko kwa kuonesha ananijali sikujutia uamuzi wangu wa kuchangia mwanaume mmoja na mama. Tokea hapo sikusikia ya mnadi swala msikitini au mgonga kengele kanisani. Siri siku zote ya mtu mmoja akizidi wa pili si siri tena.

Hilo sikuhofia kwa kujua hata mama aliipata nafasi kama ile na alijimwaga bila woga. Naikumbuka siku moja ambayo itakuwa vigumu kunitoka akilini na ndio mwanzo wa kuelewa nini nilichokuwa nikikifanya na kunipelekea kuandika walaka huu.



Nina imani kila anaye soma asichukulie kama haditi tamu au kisa cha kusikitisha bali ni somo tosha maishani. Tatizo langu sipendi mtu mwingine limkute nitajisikia vibaya na kuona ujumbe wangu hukuwafikia walengwa. Elimu si darasani tu, la hasha elimu ni chochote kikutokeacho mbele yako chenye mafunzo kwa kuona au kusikia.

Ilikuwa siku ambayo iliniingiza dunia nyingine ambayo sikuitegemea kuuingia hata siku moja japo ndipo nilipokuwa nikielekea.

Ilikuwa ni siku ya jumamosi majira ya saa tatu usiku nakumbuka nilikuwa na wiki sijarudi nyumbani baada ya kuwekwa kwenye hoteli ya kifahari na Anko. Niliwasiliana na mama kwa njia ya simu na kunipa moyo kuwa hali yake ni mzima wa afya nje hofu kubwa ilikuwa kwangu.

Nilimtoa hofu kuwa yangu hali ilikuwa salama salimini, hakutaka kujua nipo wapi zaidi ya kuniombea dua niendelee kuwa salama. Siku hiyo baada ya kukaa upande wa baa na kunywa pombe ambazo nilimuona kama Anko zimemzidia. Nilimnyanyua ili nimrudishe chumbani.

Kwa kweli nilipata shida kumnyanyua na kuweza kumtembeza kwa shida, tulikwenda kwa shida sana huku tukiyumba kama gari umetatika senta bolti. Nilimtoa kwenye baa na kumpeleka kwenye vyumba vya kulala. Kutokana uzito nilimfikisha kwa shida hadi mlangoni na kuanza kufungua mlango kwa funguo.

Nilimzuia kwa mguu ili asiende chini na kujitahidi kufungua mlango.

Sauti ambaye haikuwa ngeni masikioni yangu lakini akili yangu haikukubali kama ni yenyewe iliniita nyuma yangu:

"Helena ni wewe?" CHANZO:  https://deusdeditmahunda.blogspot.com/

Niligeuka akili yangu asiamini ni kweli ile sauti ni ya mama yangu mzazi, haikuwa tofauti na mapokeo yangu kuwa ni kweli ni mama yangu mzazi mama Herana. Nilishindwa kumjibu haraka nilikuwa kama mwanga aliyeshikwa akiwanga mchana kweupe.

"Huyu nani?" aliniuliza ikionesha haamini macho yake.

"Anko."

"Imeanza lini? Helena mwanangu siamini nimekubali duniani hakuna kitu cha bure."

Mama alionekana amepagawa nina imani hakupenda nichangie mume mmoja na yeye. Wakati huo Anko alikuwa bado amelala chini sakafuni.

"Herena mwanangu kwa nini usiulize kabla ya kuingia kwenye msafara huu, mmh, kweli msafara wa Mamba haukosi kenge na mijusi. Siamini na sitaamini mpaka naingia kaburini kama mwanangu umeingia kwenye msafara wa Mamba usiokuhusu.

“Wasiwasi wangu umekuwa kweli, Herena kwa nini lakini umeingia kwenye msafara wa mamba?"

"Kwani mama tatizo nini, huyu si baba yangu mzazi pia mliisha achana na mwisho nilifanya hivi kuokoa maisha yako," nilimjibu mama huku nikijikaza kutokana na hali aliyoonesha mama yangu aliyekuwa akizungumza huku machozi yakimtoka.

"Herena huwezi kuniokoa huku akijiangamiza, nilikueleza mara ya mwisho kuwa sipendi uishi maisha yangu. Kwa nini mwanangu umechukua kila kitu kwangu, kwa nini hukutaka kuendelea na tabia yako ya awali ya msimamo leo hii umeingia kwenye msafara wa mamba.

“ Oooh! Mwanangu yaani leo nimesikia uchungu kama siku iliyokuleta duniani, uchungu huu ni wasiwasi kukupoteza duniani."

Maneno ya mama niliyaona kama uchuro, nilimweleza sehemu ile si muhimu muhimu ya kuyazungumza kwa kina ni nyumbani. Mama hata yule bwana aliyekuwa naye alimuacha na kuondoka huku akilia. Mwanaume aliyeongozana naye alibakia njia panda asijue nini kinaendelea. Nami nilitumia nafasi ile kumwingiza ndani Anko aliyekuwa hajitambui kwa pombe.

****



Siku ya pili niliporudi nyumbani nilimkuta mama macho yamemuiva na kuvimba kuonesha amelia kwa muda mrefu. Hali ile ilinitisha na kujiuliza kuna kingine kilichomliza mama yangu au ni kilekile cha kunikuta na Anko. Niliamini kikubwa kilichomuumiza ni kuchangia mwanaume mmoja na mwanaye.

Lakini kwa upande wangu sikuona kosa kwa vile Anko hakuwa baba yangu wa kunizaa pia alikuwa ameachana na mama. Kingine nilichokiamini kuwa nipo sawa kilitokana na msaada mkubwa wa Anko uliosababisha hali ya mama kurudi katika hali yake ya kawaida.

“Mama kuna nini?” nilimuuliza mama.

“Ina maana hujui?”

“La kunikuta na Anko?”

“Mwanangu kwa nini unajiua ukiwa bado maisha hujayajua.”

“Kivipi mama?”

“Umeingia kwenye msafara ya mamba bila kujijua wakati wewe ni mjusi.”

“Kivipi?”

“Leo mwanaume ni muuaji asikuue kama mimi mama yako.”

“Lakini mama Anko ndiye aliyeshikilia maisha yetu baada ya wewe kuugua.”

“Kivipi?” mama alitaka kujua.

Ilibidi nimweleze sababu ya kuwa na Anko na sababu kubwa alikuwa yeye baada ya kumtukana mbele ya mkewe na kuamua kukata misaada.

“Mama kuwa na Anko sikupenda bali ilibidi nikubali ili kuokoa maisha yako bila hivyo ningekupoteza. Pia Anko amekuwa na malengo makubwa kwangu kwa vile hakutaka kunichezea ameninunulia gari na sasa hivi na muda si mrefu nitaingia katika jumba la kifahari.”

“Mmh!” mama hakuwa na la kusema aliinama wakati huo nilikuwa nimemsogelea kwa vile kitendo cha kutoa machozi kiliniumiza sana.

“Mama najua kiasi gani nimekukosea adabu ya kutembea na mwanaume uliyewahi kuwa naye ambaye sawa na baba yangu. Lakini mama sikuwa na jinsi kuuvua utu wangu kwa ajili ya maisha yako mama yangu. Mama wewe ni kila kitu kwangu kama nitakupoteza nitakuwa mgeni wa nani.

“Hivyo basi mama naomba unisamehe nipo chini ya miguu yako, sikuwa na nia mbaya zaidi ya kutafuta njia ya kukomboa hali yetu ya maisha kibaya zaidi hali yako mama ilikuwa mbaya sana ya kutishia amani ya moyo wangu.”

“Herena mwanangu nakujua vizuri jinsi ulivyokuwa na msimamo, najua Mr Joel ametumia mwanya huo kunichanganya na mwanangu. Kwa vile mna malengo siwezi kuingilia. Vipi mkikutana mnatumia mpira?”

“Mpira kivipi?”CHANZO:  https://deusdeditmahunda.blogspot.com/

“Kondomu.”

“Ndiyo mama si unajua siwezi kumuamini mpaka tupime kwa vile anataka mtoto,” nilimdanganya mama kwa kujua lazima angenilaumu sana kama ningemwambia ukweli.

“Kama hivyo afadhali,” mama alishusha pumzi ndefu kitu kilichonishtua na kuuliza.

“Mbona hivyo mama?”

“A’aa kawaida, ila usikubali kufanya naye mapenzi mpaka mwenye mkapime.”

“Sawa mama.”

Maneno yangu kidogo yalimfanya mama arudi kwenye hali yake ya kawaida, japokuwa jioni ya siku ile nilitakiwa kukutana na Anko nimuomba radhi ili niwe karibu na mama. Siku ya pili mama aliamka katika hali nzuri kitu kilichonipa nafasi ya kuweza kutoka.

Mchana Anko alinipigia simu kuwa ana safari ya nje ya mkoa hivyo alinitaka mapema kwa ajili ya mipango ya safari. Nilimuaga mama ambaye muda huo alionesha hana kinyongo tena.



Maneno yangu kidogo yalimfanya mama arudi kwenye hali yake ya kawaida, japokuwa jioni ya siku ile nilitakiwa kukutana na Anko nimuomba radhi ili niwe karibu na mama. Siku ya pili mama aliamka katika hali nzuri kitu kilichonipa nafasi ya kuweza kutoka.

Mchana Anko alinipigia simu kuwa ana safari ya nje ya mkoa hivyo alinitaka mapema kwa ajili ya mipango ya safari. Nilimuaga mama ambaye muda huo alionesha hana kinyongo tena.

“Herena mwanangu naomba kabla hamjaondoka mkapime afya zenu kwanza.”

“Sawa mama.”

Niliagana na mama na kwenda sehemu Anko aliyosema anikute, wakati namsubiri nilikuwa na mawazo mengi juu mama kung’ang’ania kupima na kushusha pumzi ndefu baada ya kumwambia natumia kinga. Nilijikuta nikipata wazo la kijinga la kutafuta cheti cha kununua ili kumpelekea mama aondoe wasiwasi kwa Anko.

Baada ya ziara ya kikazi tulitotumia siku nne nje ya mkoa, nilibahatika kununua vyeti viwili vyenye majibu mazuri kuwa wote tupo sawa. Niliporudi nilimpa mama, baada ya kuvipokea mama alivisoma na kusema kwa mshtuko.

“Unataka kuniambia Anko wako naye yupo salama?”

“Ndiyo mama, mbona umeshtuka?”

“Walaa! Kawaida tu,” kauli ya mama ilinitisha na kutaka kujua mbona hakufurahia zaidi ya kuyashangaa majibu ya Anko.

“Mama mbona sikuelewi?”

“Nipo sawa, kwani hospitali aameambiwa nini?”

“Wametupongeza na kutuomba turudi baada ya miezi mitatu ili kupata uhakika wa majibu.”

“Kama hivyo hakuna tatizo.”

Siku zilizidi kukatika huku nikiendelea kula raha na mzee mzima, nakumbuka siku moja tukiwa hotelini na Anko, mkewe alilengeshwa na wapambe aje afumanie. Siku hiyo nilitamani ardhi ipasuke inimeze kwa kujua mkewe anaweza hata kuniua.

Lakini ilikuwa tofauti baada ya mkewe kuingia ndani aliangua kilio huku akimlaumu mumewe. Maneno aliyoyasema yalikuwa kama msumeno ulioupasua moyo wangu bila ganzi.

“Mume wangu hii tabia ya kuendelea kuua wasichana bila kosa utaisha lini, hebu mwangalie huyo binti alivyo mdogo sana na mwanao wa mwisho. Hivi wanao wakifanyiwa hivi utafurahi? We binti mlipokutana mmetumia kondomu?”

Nilikataa kwa kichwa kwani uoga ulikuwa umenitawala.

“Si kweli hiyo kondomu ipo wapi? Ona sasa, umeniumiza mimi mkeo hukuridhika sasa unaisambaza tu, binti inawezekana hunijui mimi ndiye mkewe mzee Joel. Mume wangu ni muathirika anayesambaza virusi kwa kuwahonga wasichana wadogo na kufa nya nao ngono zembe. Ukitoka hapa kapime ili ujue hali yako lakini muongope mwanaume kama ukoma”

Kauli ilinishtua na kunifanya ninyanyuke kitandani na kupitia nguo zangu zingine nilimalizia kuvaa kwenye korido. Nilipofika nje nilikodi gari hadi nyumbani, bahatu nzuri nilimkuta mama. Nilipomuona niliangua kilio kama nimefiwa.

Mama alinishangaa na kutaka kujua kulikoni kuwa katika hali ile.

“Vipi tena kulikoni?”

“Kumbe kweli Anko muathirika.”

“Una maana gani kusema hivyo?”

“Mkewe kanihakikishia kuna nini hapo.”CHANZO:  https://deusdeditmahunda.blogspot.com/

“Kakuhakikishia nini?”

“Kuwa Anko ni muathirika.”

“Sasa wewe unamuamini nani mkewe na vipimo?”

“Mama nilikudanganya kuwa nimepima kumbe uongo.”

“Eti!?”

“Kweli mama nilinunua cheti ili kukudanganya?”

“Mungu wangu, Helena mwanangu kwa nini ulifanya hivyo?”

“Mama ni akili za kitoto.”

“Sasa una uhakika gani kama umeathirika?”

“Sikutumia kinga mara nyingi nilipokutana naye.”

“Lakini bado huwezi kujua kama umeathirika bila kupima.”

“Hapana mama, nasikia kawaambukiza wengi.”

“Si nilikuambia ukapindisha maneno, lakini bado usijihukumu, unatakiwa kwenda kupima ili kujua ukweli.”

Nilikubaliana na mama kwenda kupima muda ule ule, baada ya kuoga na kubadili nguo. Tuliongozana wote hadi kutuo cha ushauri nasaha ili kujua afya yangu, tulivyo fika kituo cha ushauri na kupima virusi vya ukimwi. Katika kuchukua namba ya kuingia nilikutana na shoga yangu niliyekuwa nasoma naye shule moja.

Aliponiona alishtuka na kuniuliza.

“Helena kulikoni huku?”

“Hidaya mambo ya kucheki afya si unajua tumecheza sana rafu.”

“Ni kweli, hata mimi ndicho kilichonileta, una taarifa?”

“Zipi hizo?”

“Za mwalimu Zakayo,” mimi kiroho pa!

“Taarifa zipi?”

“Helena upo wapi wewe?”

”Hidaya sikuwemo muda mwingi jijini.”

“Kwa taarifa yako, mwalimu Zakayo amejinyonga baada ya kugundulika ameathirika.”

“Mungu wangu tumekwisha.”

“Kweli tumekwisha, wanafunzi kibao na walimu waliotembea naye wote wameumia na mimi nimeona nije nipate ukweli sijui wewe shoga yangu.”

Mmh, kweli nilikuwa katikati ya balaa nyuma mwalimu mbele Anko, sikuamini kama ningetoka salama. Wazo la haraka lilikuwa kama nikikutwa nimeathirika ninywe sumu ili kuikimbia aibu ya kuvishwa nepi.

Kwa vile Hidaya alikuwa ameisha chukua kadi, nami nilikwenda kuchukua kadi kusubiri zamu yangu kuitwa kwenye vipimo. Baada ya kuchukua kadi nilirudi kusubiri kuitwa, Hidaya alitangulia kuitwa baada ya muda alitoka. Zamu yangu nami ilifika niliitwa na kuingia ndani.

Nilipokelewa na dada mmoja mpole ambaye alivyo hukufanya mtu uondoe wasiwasi wa moyo.

“Karibu mdogo wangu.”

“Asante.”

“Mm’hu,” alionesha kuuliza nini kilichinipeleka pale.

“Kama hivyo dada nimekuja kujua afya yangu.”

“Ooh, vizuri kipi kilichokushawishi kupima.”

“Nafikili kuunga mkono kauli mbiu ya Muheshimuwa Rais Tanzania bila ukimwi inawezekana.”

“Vizuri sana, je ukijikuta umeathirika utafanyaje?”

“Sina la kufanya kwa vile nimeisha athirika kinachotakiwa ni kufuata masharti yanayotakiwa ili niishi muda mrefu.”

“Vizuri, na ukijikuta upo salama?”

“Vile vile sitakubali kufanya ngono zembe huku nikimuhimiza mwenzangu naye kupima afya yake ili tufanya ngono salama.”

“Vizuri sana binti kwa uelewa wako, sasa hivi utaelekea chumba cha kutolea damu.”

Nilinyanyuka hadi chumba cha kutolea damu kisha nilirudi nje kusubiri vipimo. Baada ya muda Hidaya alitangulia kuchukua majibu yake, muda kidogo alitoka akionesha kuchanganyikiwa hata kujigonga mlangoni wakati wa kutoka. Niliamini hata mimi nilikuwa nimekwisha, mapigo ya moyo yalinienda kwa kasi, nilimuomba Mungu aniepushe na balaa lile lililokuwa mbele yangu. Jasho lilinitoka kwa hofu la majibu, mama aliliona lile na kunipoza. CHANZO:  https://deusdeditmahunda.blogspot.com/

“Najua upo katika wakati mgumu, lakini kila kitu kipo katika mpango wa Mungu zuri au baya yatakiwa tulipokee ili tukabiliane nalo. Jibu baya lisikutishe tupo pamoja kuambikizwa si kufa,” mama alinitia moyo.



ITAENDELEA