KAHABA KUTOKA CHINA - 2

 

Simulizi : Kahaba Kutoka China

Sehemu Ya Pili (2)



Ilipoishia



mara wakasikia vishindo vya mtu nje ya chumba kile. Kila mmoja akaonekana kushtuka, alichokifanya Joshua ni kushuka kutoka kitandani kwa ajili ya kwenda kufungua pazia ili achungulie. Hata kabla hajalifikia pazia, sauti ya Bwana Shedrack ikasikia nje ya mlango.“Fungua mlango. Nasema fungua mlango kabla sijauvunja” Sauti ya Bwana Shedrack ilisikika kwa nje, sauti ambayo ilikuwa na hasira kupita kawaida.



Songa nayo sasa..



CHANZO:  https://deusdeditmahunda.blogspot.com/

Bwana Joshua alikuwa akiliendesha gari lake kwa kasi sana, kichwa chake kwa wakati huo kilikuwa kimechanganyikiwa, hasira zilikuwa zimemkaba kooni hali ambayo ilimfanya mpaka kuanza kutetemeka kana kwamba alikuwa akisikia baridi. Safari hiyo ilikuwa ni kuelekea Sinza Makaburuni, mahali ambapo kulikuwa na hosteli ambayo alikuwa akiishi Irene.

Kutoka Magomeni mpaka katika hostel hiyo hakutakiwa kuchukua muda mrefu ila kutokana na kuwa na foleni za magari Tandale kwa Mtogole na Sinza Kijiweni ikamchukua dakika arobaini mpaka kufika katika sehemu ilipokuwa na jengo la hostel hiyo.

Kwa kasi ya kijeshi akateremka na kuanza kuelekea katika mlango wa kuingilia hostel hiyo huku akihakikisha kwamba bunduki yake ilikuwepo kiunoni. Alipoufikia mlango, akaanza kuugonga. Wala hazikuchukua sekunde nyingi, msichana mmoja akafika mahali hapo na kisha kuufungua mlango.

“Karibu” Msichana huyo alimkaribisha.

“Irene nimemkuta?” Lilikuwa swali lililotoka mdomoni mwa Bwana Shedrack.

“Irene yupi? Wapo Irene saba humu” Msichana yule alimuuliza Bwana Shedrack.

“Irene Godfrey”

“Mmmh! Nilimuacha bafuni anaoga kipindi fulani. Ngoja nikamwangalie” Msichana yule alimwambia Bwana Shedrack na kisha kurudi ndani. Bwana Shedrack hakutaka kubaki mahali hapo, alichokifanya ni kuanza kumfuata msichana yule. Alijua fika kwamba endapo angefika kule na kumwambia Irene kwamba kuna mwanajeshi alikuwa amekuja kumuulizia angemfanya msichana huyo kukimbia.

Akamfuata msichana yule, akafika katika mlango wa chumba alichokuwa akiishi Irene na kisha kuugonga mlango. Mlango ulipofunguliwa, tayari Bwana Shedrack alikuwa amekwishafika, mkononi alikuwa na bunduki, akaingia ndani, akaanza kuangalia huku na kule, Irene hakuwepo.

Hakuonekana kuridhika, akatoka chumbani mule na kisha kuelekea bafuni. Kila msichana alikuwa akimshangaa, kila msichana alionekana kuogopa kupita kawaida, uwepo wa bdunduki mkononi mwa Bwana Shedrack ukaonekana kuwaogopesha. Alipofika bafuni, hakuonekana kujali, akaanza kuingia katika bafu moja mpaka jingine.

“Hayupo” Bwana Shedrack alijisemea mara baada ya kuangalia ndani ya babafu yote na vyoo, alipoona hayupo, akaondoka.

Alichokifanya ni kurudi ndani ya chumba kile. Akaishikilia vizuri bunduki yake na kisha kuanza kuwaangalia wasichana wale. Muda huo wote Bwana Shedrack alionekana kuwa na hasira, bado alikuwa akizidi kutetemeka kupita kawaida.

“Irene yupo wapi?” Ilisikika sauti ya Bwana Shedrack ikiuliza kwa hasira. Kila msichana akabaki kimya huku wote wakionekana kutetemeka kupita kawaida.

“Irene yupo wapi?” Bwana Shedrack alirudia swali lake kwa sauti ya juu iliyojaa hasira.

“Hay…up…o” msichana mmoja alijibu huku akitetemeka.

“Amekwenda wapi?”

“Alio…ndok…a..”

“Kuelekea wapi?”

“Hat..uj…u..i..”

Bwana Shedrack hakutaka kubaki, alichokifanya ni kuondoka mahali hapo. Katika kipindi hicho akaonekana kumkosa Irene ambaye alikuwa akimtafuta kupita kawaida. Akaingia garini na kisha kuondoka mahali hapo. Bado alionekana kuwa na hasira. Alipofika nyumbani, akaingia ndani.

Akaanza kuufuata mlango wa chumba chake, alipoufikia, akataka kuuingiza ufunguo, mlango ukafunguka hata kabla hajaufungua kwa ufunguo ule. Bwana Shedrack akaonekana kushtuka kupita kawaida, akaingia ndani, akawasha taa, alipoyapeleka macho yake juu, hakukuwa na mfuniko wa dari. Bwana Shedrack akaoneoakana kuchanganyikiwa zaidi, akalifungua kabati na kuangalia ndani, hata simu ya Rose haikuwepo

Kwa haraka akatoka na kisha kuelekea chumbani kwa Rose, Rose hakuwepo jambo ambalo lilionekana kumshtua kupita kwaida. Alichokifanya akaanza kueleka sebuleni, alipofika, akaanza kumwangalia John kwa macho yaliyojaa hasira.

“Rose yupo wapi?”

“Aliondoka”

“Kuelekea wapi?”

“Sijui. Aliingia darini kupitia stoo, baadae nikashtukia yupo nje na sijui alipitia wapi” John alijibu.

Bwana Shedrack akarudi chumbani, akapanda kitandani, akabaki akiwa ameegemea mto kitandani. Hakuonekana kujali kabisa kwa kitendo alichokifanya Irene cha kuondoka nyumbani pale. Ilipofika saa sita na dakika kadhaa usiku, akaonekana kuhisi kitu, akatoka chumbani na kuanza kumfuata John chumbani kwake.

“Unamjua Joshua?” Bwana Shedrack aliuliza.

“Namjua. Anaishi nyumba ya nne kutoka hapa”

“Hiyo yenye vyumba vingi?”

“Ndio” John alijibu.CHANZO:  https://deusdeditmahunda.blogspot.com/

Bwana Shedrack hakutaka kubaki hapo, alichokifanya ni kuondoka na kisha kuelekea chumbani kwake, akachukua bunduki yake na kisha kuondoka mahali hapo. Alipofika nje, akaanza kuelekea katika nyumba aliyokuwa akiishi Joshua, alipoifikia, akaanza kuugonga mlango wa chumba cha Joshua, alichokuwa akikitaka mahali hapo ni kuingia ndani, kumpiga sana Joshua, hata kama kumuua, haikuwa hatari, alikuwa radhi kwa hilo.

“Fungua mlango. Nasema fungua mlango kabla sijauvunja” Bwana Shedrack alisema huku akiugonga mlango kifujo fujo.

****

Irene alikuwa chumbani kwake pamoja na marafiki zake huku akiwa amevaa taulo tu. Umbo lake, makalio yake makubwa yakaonekana kutokuzoeleka katika macho ya kila msichana ambaye alikuwa akimwangalia. Alijua fika kwamba alikuwa na umbo zuri lililokuwa na mvuto, mapaja makubwa yaliyoonekana kujazia vyema hivyo alikuwa akifanya kila kitu kuwaonyeshea wasichana wenzake kwamba Mungu alikuwa ametulia sana katika kipindi ambacho alikuwa akifanya uumbaji wake.

Kila wakati alikuwa akisimama kwenye kioo kupande upande na kisha kuanza kuyaangalia makalio yake, uso wake ulikuwa ukijawa na tabasamu pana kila wakati. Mara baada ya kuona kwamba taulo lilikuwa limemkaa vizuri, akachukua maji yaliyokuwa ndani ya ndoo pamoja na kopo kisha kuanza kuelekea bafuni kuoga.

Alihakikisha kwamba kwa wakati huo anajisugua kila sehemu kwani alikuwa na mpango wa kutoka usiku huo kuelekea kwa Asha, msichana ambaye alikuwa akiishi Mwananyamala, msichana ambaye alikuwa akimchukulia kama mume wake kutokana na kumfanyia usagaji kila siku. Japokuwa Irene alikuwa kama mume kwa Rose lakini nae alikuwa na mume wake, huyu alikuwa Asha, msichana ambaye alikuwa akijulikana sana Mwananyamala kwa mchezo wake huo mchafu aliokuwa akiwafanyia wasichana wengine.

Mara baada ya kumaliza kuoga, moja kwa moja Irene akatoka bafuni mule na kueleke chumbani. Akaanza kuvaa nguo zake huku akijipulizia manukato ya bei kubwa ambayo alikuwa akiyanunua kwenye maduka makubwa yaliyokuwa jijini Dar es salaam. Huku akiendelea kujiandaa, mara simu yake ikaanza kuita.

Kwanza akapuuzia, huwa hataki kuacha kujipamba na kisha kukatisha urembo wake na kumsikiliza mtu akipiga simu. Aliendelea zaidi mpaka pale alipoona kwamba kulikuwa na umuhimu wa yeye kuipokea simu ile. Akaichukua na kisha kukiangalia kioo cha simu, jina la ‘My wifey’ lilikuwa likionekana, akatambua kwamba huyo alikuwa Rose.

Kwanza akashtuka, akabaki akijiuliza mara mbili mbili kwamba je mpigaji wa simu ile wakati ule alikuwa Rose au Bwana Shedrack? Alichokifanya ni kuipokea simu ile tena kwa tahadhari kubwa .

“Hallow” Sauti ya Irene ilisikika kinidhamu.

“Irene ondoka. Irene kimbia hapo hostel” Sauti ya Rose ilisikika simuni.

“Kuna nini tena? Mbona unanitisha?” Irene aliuliza huku akionekana kushtuka kupita kawaida.

“Baba anakuja kukuua. Kimbia, toka hapo ulipokuwa” sauti ya Rose ilisikika na simu kukatwa.

“Hallow…Hallow…!” irene aliita lakini simu haikuwa hewani.

Irene hakutaka kupuuzia hata kidogo, maneno ambayo aliambiwa na Rose yalikuwa yamemuingia sana. Akaanza kuonganisha matukio ambayo yalikuwa yametokea, tayari akajua kwamba kila kitu kilikuwa kimeharibika kwa wakati huo. Alichokifanya, akamalizia mambo yake haraka haraka na kisha kuanza kutoka nje.

“Vipi tena?” Bupe, msichana ambaye alionekana kuwa rafiki yake wa karibu alimuuliza.

“Naondoka” Irene alijibu huku akianza kukimbia.

“Wapi?”

“Baadae….” Irene alimwambia Bupe huku akizidi kukimbia kuelekea getini.

Irene akatoka nje ya uzio wa jengo lile la hostel na kisha kuanza kuangalia huku na kule, katika kipindi hicho tayari alikwishaona kwamba mambo yalikuwa yameharibika na kama angepuuzia basi Bwana Shedrack angeweza kumuua kweli. Alipoiona bajaji, akaisimamisha na kisha kuingia huku viatu vyake alivyokuwa navyo mkono akianza kuvivaa kwa haraka haraka sana.

“Wapi shemeji?” Dereva bajaji alimuuliza.

“Mwananyamala”

“Poa. Ila Mwananyamala kubwa”

“Mwananyamala A” Irene alijibu na kisha dereva kuwasha bajaji yake.

“Shilingi 4000/=”

“Wewe twende tu” Irene alimwambia na kuanza kuondoka mahali hapo.

Irene akashusha pumzi kana kwamba alikuwa amekimbia mbio ndefu, tayari aliona kufanikisha kile ambacho aliambiwa kukifanya na Rose. Katika kipindi hicho tayari hakuwa kwenye hali nzuri, alijiona kuwa mwingi wa mawazo, mwingi wa majuto kwa kila kitu ambacho alikuwa amekifanya kwa Rose. Akaanza kuyaona maisha yake yakianza kuwa ya kuangaika huku na kule kwa kuamini kwamba Bwana Shedrack asingeweza kumuacha hata mara moja, ni lazima angeendelea kumtafuta.

Walichukua dakika ishirini mpaka kufika Mwananyamala A ambapo akamlipa dereva bajaji fedha zake na kisha kuanza kuingia mitaani. Mavazi ambayo alikuwa ameyavaa katika kipindi hicho, kisketi kifupi ambacho kilikuwa kimefikia juu kabisa ya magoti yake kilikuwa kikipeperushwa na upepo kitu ambacho wakati mwingine kuyaacha mapaja yake wazi.

“Mmmh! Cheki pistol ile” kijana mmoja alisikika akimwambia rafiki yake katika kipindi ambacho Irene alikuwa akipita.

“Mbona yupo kama demu wako tu”

“Hahaha! Hapana bwana, yule kazidi utafikiri hajawahi kwenda chooni mwaka mzima”

“Hizo tamaa tu. Unaweza ukakuta yule pia ni rafiki yako facebook” Jamaa mwingine alimwambia.

Bado Irene alionekana kuwa gumzo kwa kila mvulana ambaye alikuwa akimwangalia kwa wakati huo. Mapaja yake pamoja na makalio yake yakaonekana kuwa chachu kwa kila kijana ambaye alikuwa akimwangalia. Kwa kila mtu ambaye alikuwa akipishana nae, alikuwa akigeuka na kumwangalia vizuri Irene kwa nyuma. Hata kama kulikuwa na mtu ambaye alikuwa akitembea na mpenzi wake, kila alipokuwa akipishana na Irene, kwa sababu aliona kwamba kugeuka kwa sababu mpenzi wake angemuona sio, akawa akizuga kama anafunga kabla viatu vyake ili anapoinama tu basi aweze kuyaangalia makalio ya Irene.

Mwendo wake kwa wakati huo ulikuwa ni wa haraka sana, alikuwa akitembea kwa upesi sana jambo ambalo liliyafanya makalio yake kuchezacheza sana na kuzidi kuwapagawisha wanaume ambao walikuwa wakimwangalia kwa matamanio. Hawakujua kabisa kwamba mtu ambaye walikuwa wakimwangalia alikuwa Irene, msichana ambaye alikuwa msagaji mkubwa na alikuwa rafiki wa Asha, msichana mwenye sifa za kuwasaga wasichana wengine.CHANZO:  https://deusdeditmahunda.blogspot.com/

“Mbona umekuja kwa kunishtukiza sana, au ulitaka kunjifumania?” Asha alimuuliza Irene mara baada ya kumtia machoni.

“Mwenzako nilitaka kuuawa” Irene alimwambia Asha.

“Na nani tena?”

“Mwanajeshi”

“Wa kiume au wa kike?”

“Wa kume”

“Umeanza lini kuchukua wanaume?”

“Sikumchukua. Nilikuwa namsaga binti yake”

“Mweeee…umekuwa kungwi kama mimi tena mke wangu?”

“Yeah! Nilikuwa najifunza”

“Sawa.Sio mbaya. Kuna jipya umekuja nalo?”

“Hapana. Ni hilo tu”

“Haiwezekani. Kuna jipya umekuja nalo mke wangu ila haujaliona” Asha alimwambia Irene huku akianza kuipeleka mikono yake kiunoni mwa Irene.

“lipi?”

“Ulivyovaa. Mavazi yako yanaeleza kila kitu” Asha alimwambia Irene na kisha kuanza kubadilishana nae mate kitendo ambacho kiliwapeleka mpaka kitandani na kisha kuanza kusagana.

Uwezo wa Asha ulikuwa ni wa juu sana, alionekana kama kusomea katika mchezo huo, akaanza kumsaga Irene ambaye muda wote alikuwa akilalamika kimahaba tu. Asha kama alikuwa na cheti cha kusagana, alikuwa amebobea mambo hayo kwa zaidi ya miaka kumi na tano kwa hiyo alikuwa na uwezo mkubwa sana. Kama kuwa na wanawake ambao aliwaita ‘wake’ basi hapo Mwananyamala alikuwa nao wengi sana ambao walikuwa wakimheshimu kama mume wao.

****

Katika kipindi ambacho Rose alikuwa akihitaji maji, Joshua akatoka na kisha kuanza kuelekea dukani. Kichwani mwake alikuwa akifikiria mambo mengi sana ambayo yalikuwa yakimsumbua kupita kawaida. Bado alikuwa akijiuliza zaidi juu ya kitendo kilichomfanya Rose kuja mahali pale kwa ghafla sana huku akionekana kwamba alikuwa amefukuzwa nyumbani. Kitendo kile kilimchanganya kupita kiasi huku mbaya zaidi akiwa anamuogopa sana Bwana Shedrack ambaye hakuwa na mchezo kwa mtoto wake.

“Inakuwaje Bingwa wa mkoa” Ally, kiajana ambaye alikuwa akiishi karibu na chumba chake alimuuliza.

“Poa. Inakuwaje wewe?”

“Kama kawa. Mbona hatuonani siku hizi japokuwa tunaishi nyumba moja?” Ally alimuuliza.

“Nipo bize sana”

“Sasa unakwenda wapi?”

“Dukani kununua maji”

“Ya shilingi ngapi?”

“Mia sita”

“Sasa toka lini umenunua maji ya mia sita, hauoni kwamba utaumwa tumbo kwa sababu halijazoea?” Ally alimtania.

“Acha zako bwana…hahah! Hapa nina msala sana”

“Msala gani?”

“Rose yupo gheto kwangu”

“Rose! Huyu mtoto wa mjeda?”

“Huyo huyo. Amekuja muda si mrefu”

“Duh! Wewe jamaa kweli noma. Sivuti picha utakavyofaidi na ule weupe pamoja na hiki kibaridi. Leo nitategesha masikio yote chumbani kwako” Ally ambaye alionekana kujaa utani alizidi kutania.

“Sikiliza. Rose hajaja kiamani, kaja na majanga Ally”

“Majanga! Majanga gani?”

“Ametoroka kwao”

“Kisa?”

“Sikijui. Ila ametoroka na kuja kulala kwangu”

“Sasa hauoni kama huo msala?”

“Ni msala ila hauna jinsi. Wakati mwingine unatakiwa kufanya maamuzi magumu hasa kwa msichana umpendae” Joshua alimwambia Ally.

Wote wakawa wamekwishafika dukani na kisha kuanza kuongea mpaka baada ya dakika kadhaa kuanza kurudi nyumbani na kila mtu kuingia chumbani kwake. Muda wote, Ally alikuwa macho, masikio yake alikuwa ametegesha kusikia ni kitu gani ambacho kingeendelea chumbani mule. Alikuwa akijua kwamba Rose alikuwa mpenzi wa Joshua na hivyo hakutakiwa kuwa na shaka, alijua tu kwamba ni lazima baada ya muda fulani kuanza kusikia sauti ambazo zingeonekana kumfariji kutokana na kibaridi ambacho kilikuwa kikimpiga muda huo.

“Mmmh! Hawaanzi tu. Muda unakwenda halafu jamaa anaremba. Au wameanza ila kimya kimya! Ngoja nipande juu kwanza nichungulie” Ally alisema.

Hapo hapo akainuka na kisha kuanza kupanga stuli yake, kwa sababu nyumba haikuwa na silling board ikamuwia wepesi kuushikilia ukuta kwa juu na kisha kuanza kuwachungulia huku kukiwa na mwanga hafifu. Alichokiona wala hakukitegemea, wote wawili walionekana kulala huku wakiangalia juu, akaonekana kukasirika.

Siku hiyo akajua fika kwamba kusingekuwa na chochote ambacho kingetokea usiku huo, akarudi kitandani na kulala. Ilipofika saa sita usiku, Ally akashtushwa na sauti ya Bwana Shedrack ambaye alikuwa akiogonga mlango kifujo fujo, tayari akajua kwamba ule ulikuwa msala mkubwa na hivyo alitakiwa kufanya kitu kimoja, kumuokoa rafiki yake kutoka kwa mzee huyo aliyeonekana kuwa na hasira za mbogo.

Kwa haraka sana Ally akateremka kutoka kitandani, akaufuata mlango wake na kisha kuanza kuufungua. Alipoufungua akatoka nje na macho yake kugongana na macho ya Bwana Shedrack ambaye bado alionekana kuwa na hasira kali.

“Shikamoo mzee” Ally alimsalimia lakini Bwana Shedrack hakuitikia.

“Fungua mlango kabla sijauvunja” Bwana Shedrack alienndelea kusema huku akionekana kuwa na hasira.

“Mwenyewe hayupo mzee” Ally alimwambia bwana Shedrack.

“Amekwenda wapi?”

“Amekwenda kupiga rusha roho Mbezi kwa Yusufu. Hajarudi mpaka sasa hivi, labda kesho asubuhi” Ally alijibu.

“Yeye ni Dj?”

“Ndio”

“Akirudi…kama akirudi mwambie roho yake halali yangu. Umesikia” Bwana Shedrack alimwambia Ally.

“Nimesikia mzee”

“Nimesemaje?”

“Akija nimwambie roho yake halali yako”

“Sawa sawa. Ukisahau hata roho yako inaweza kuwa halali yangu” Bwana Shedrack alisema na kisha kuondoka.

Ally hakutaka kujali sana, alichokuwa amekijali kilikuwa ni kumsaidia rafiki yake ili asikutwe na matatizo yoyote yale. Akarudi kulala.

Saa kumi na moja asubuhi Joshua akatoka nje pamoja na Rose. Hawakuwa wamelala toka usiku, walikuwa wakifikiria ni kipi ambacho kilitakiwa kufanyika. Walipotoka, Joshua akaelekea katika jengo la CCM na kisha kukodisha bajaji moja ya rafiki yake ambaye alitaka imfikishe Rose Sinza Makaburini.

“Kwa hiyo unakwenda kufanya nini huko?” Joshua alimuuliza.

“Nakwenda kuonana na rafiki yangu. Nadhani sitorudi tena nyumbani” Rose alimwambia Joshua.

“Sawa. Ila kuwa makini na ujauzito wangu” Joshua alimwambia Rose.

“Usijali mpenzi” Rose alisema na kisha kuingia kwenye bajaji na kuanza kuelekea katika hostel aliyokuwa akiiishi Irene huku akiwa amegawia kiasi cha shilingi laki moja na Joshua kwa ajili ya kumsaidia kwa mahitaji yake.

Baada ya kuhakikisha kwamba bajaji aliyopanda Rose ilikuwa imeondoka, akaanza kurudi kuelekea nyumbani huku kichwa chake kikiwa katika mawazo lukuki. Bado suala la Rose lilikuwa likikisumbua sana kichwa chake, hakuonekana kuwa na amani hata mara moja. Huku akiwa amefika nyumba na huku akijifikiria kuingia ndani ya ile nyumba, akasimama na kisha kuchukua simu yake, akaanza kupiga namba fulani na kuipeleka simu sikioni.

Hata kabla simu haijapokelewa, Joshua akashtuka, mwili ukampiga ganzi kubwa, akatamani kukimbia, akabaki akitetemeka kupita kawaida huku kijasho chembamba kikianza kumtoka. Bwana Shedrack alikuwa ametokea ghafla mahali hapo na kusimama mbele yake.





***************************

Uzuri wa msichana Rose unawapelekea wavulana wengi kumtamani kimapenzi. Umbo lake, sura yake pamoja na mwendo wa madaha vilionekana kuwa chachu ya urembo wake ambao ulionekana kumdatisha kila mwanaume aliyekuwa akimwangalia. Wanaume wakajaribu bahati zao, wakashindwa kumteka mikononi mwao. Msichana Rose alijiheshimu lakini la zaidi ni kwamba alikuwa akimuogopa baba yake ambaye alikuwa mwanajeshi. Wanaume wengi walikuwa wakipigwa na mzee huyo ambaye hakutaka utani kwa binti yake.

Kila siku aliendelea kumchunga lakini msichana Irene ambaye alihamia ndani ya nyumba hiyo akaonekana kuanza kumharibu Rose. tabia yake ya usagaji akaipandikiza kwa Rose, wakaanza kusagana mpaka walipoanza kutumia uume wa bandia ambao ukamfanya Rose kutamani kukutana na mwanaume kimwili.

Mvulana aliyekutana nae alikuwa Joshua. Wakafanya mapenzi katika siku ya hatari, mbegu zikakutana na yai ya Rose, akapata mimba. Hakujua afanye nini lakini kwa sababu kulikuwa na mwanaume aitwaye Peter ambaye alikuwa akimtaka, akambambikizia mimba hiyo, Peter akakubali bila kujua kwamba mhusika alikuwa Joshua.

Kwa hasira alizokuwa nazo bwana Shedrack, akataka kumuua Irene baada ya kugundua kwamba alikuwa amemfundisha mchezo mchafu binti yake. Anapofika chuoni, Irene hayupo kwani alikwishapewa taarifa na Rose kwamba akimbie. Kwa upande wa Rose, anaamua kutoroka nyumbani, anakwenda kulala kwa Joshua. Kwa sasa, bwana Joshua ameamua kurudi kwa mara ya pili kumtafuta Joshua, bahati nzuri kwake, anakutakna na Joshua macho kwa macho.

Ili kuongeza chachu ya hadithi na isitoshe, nimeanza kuuelezea upande mwingine, upande ambao hakukuwa na mtu aliyekuwa akiufikiria, yote hayo ni kuinogesha hadithi yetu

**************************

CHANZO:  https://deusdeditmahunda.blogspot.com/

Maandamano bado yalikuwa yakiendelea ndani ya nchi ya China katika mji mkuu wa Beijing. Watu zaidi ya laki saba walikuwa barabarani wakiyaendeleza maandamano hayo huku wakiwa wameshika mabango makubwa ambayo yalikuwa yakimtaka Waziri wa Afya wa China, Bwana Zhan Wei kujiuzulu kutokana na yale ambayo yalikuwa yakiendelea kutokea nchini hapo.

Maandamano yale hayakuishia Beijing tu, bado yalikuwa yakiendelea zaidi na zaidi mpaka katika miji mingine. Yalingia mpaka Lanfang na kuelekea mpaka Tianjin. Ndani ya masaa saba tu, miji mingi ya nchini China watu wake walikuwa wameingia katika maandamano hayo makubwa ambayo yalikuwa yakitaka waziri wa afya huyo ajiuzulu kutoka na ubadhilifu wa fedha ambazo alikuwa ameziiba.

Ufisadi ambao alikuwa ameufanya kuchukua zaidi ya dola bilioni mbili ukaonekana kuwakasirisha Wachina ambao hawakuwa wakipenda hata siku moja kiongozi yeyote wa Serikali kuiba kiasi chochote kile cha fedha. Kila Mchina alikuwa akitaka waziri Zhan ajiuzulu yeye mwenyewe na kisha kufikishwa mahakamani kwa kile ambacho alikuwa amekifanya.

Maandamano hayakuisha, watu wengine hawakuwa wakienda kazini, kila siku saa mbili asubuhi walikuwa wakikutana na kisha kuanza maandamano. Nchi ya China ikaonekana kutokuwa nchi ya amani katika kipindi hicho hasa kwa wageni ambao walipokuwa wakiteremka na ndege katika viwanja vya ndege vya Kimataifa kama Beijing, Changchun, Anyang, Changzhou pamoja na viwanja vingine.

Waandishi wa habari wengi hasa wa Kimataifa walikuwa wameelekea nchini China kwa ajili ya kuandika kile ambacho kilikuwa kikiendelea wakati huo. Kila mtu alionekana kuwa na hasira kiasi ambacho wakati mwingine walikuwa wakimlaumu rais wao, Bwana Wou Peng kwa kumkingia kifua swahiba wake aliyeufanya ufisadi, Waziri Zhan Wei.

Watu hawakukoma hata mara moja, bado kila siku hali ilikuwa ikiendelea vile vile mpaka kufikia kipindi ambacho rais, Bwana Wou Peng alipoamua kumuita waziri wa Afya, Bwana Zhan na kumtaka kujiuzulu kwa ajili ya maendeleo na amani ya nchi hiyo.

“Nikijiuzulu, watu watataka nifikishwe mahakamani” Bwana Zhan alimwambia rais.

“Hilo usijali. Nitakukingia kifua tu. Hakuna kitu kibaya kitakachotokea” Bwana Wou alimwambia Bwana Zhan.

“Kama itakuwa hivyo, nitafanya hivyo”

Hiyo ndio ilikuwa mara ya kwanza kwa waziri nchini China kujiuzulu kutoka na ubadhilifu wa fedha ambao ulikuwa umefanyika. Wachina wote wakaonekana kuwa na furaha, hawakuamini kama kweli fisadi mkubwa alikuwa amejiuzulu, fisadi ambaye alionekana kuwa kama adui kwa maendeleo ya nchi ya China.

Vyombo vingi vya habari vikaanza kutangaza kuhusiana na kujiuzulu kwake, kila mtu alimwangalia Bwana Zhan kwa jicho la tatu kwani kwa kitendo ambacho alikuwa amekifanya kilionekana kuwa kitendo cha kishujaa sana kwani viongozi wengi nchini China hawakuwa wakitaka kujiuzulu hata mara moja

Maandamano hayakuisha, kujiuzulu kwake hakukumaanisha kwamba maandamano yangemalizika. Kitu ambacho walikuwa wakikitaka ni yeye kujiuzulu lakini katika kipindi hiki walikuwa wamekuja na jambo jipya kabisa, jambo ambalo kila mmoja alitaka lifanyike kwa haraka sana. Katika kipindi hiki, watu wa nchini China walikuwa wakitaka kitu kimoja tu, Bwana Zhan afilisiwe mali zote alizokuwa nazo benki na kisha kufikishwa mahakamani na kuhukumiwa hukumu kubwa na nzito.

“Anyongwe…Anyongwe…Anyongwe…” Wachina walikuwa wakipiga kelele katika kila maandamano ambayo walikuwa wakiyafanya.

Nyumbani kwake, Bwana Zhan hakuonekana kuwa na furaha, muda wote alikuwa akionekana kuwa na huzuni sana. Kitendo cha wananchi wa China kuandamana kwa kumtaka kujiuzulu kilionekana kumuumiza kupita kawaida. Kuhusu ubadhilifu wa fedha, ni kweli aliufanya kwa nia ya kuendeleza biashara zake mbalimbali ambazo alikuwa akizifanya.

Japokuwa alikuwa waziri nchini China, lakini Bwana Zhan alikuwa akimiliki kiasi kikubwa cha fedha ambacho kilikuwa kikingia kila siku katika biashara zake mbalimbali. Yeye ndiye ambaye alikuwa akimiliki kiwanda kikubwa cha kutengeneza magari cha Chengdu Motor Industry ambacho kilikuwa kikitengeneza magari ya kifahari. Ukiachana na kiwanda hicho, pia alikuwa akimiliki kiwanda kingine ambacho kilikuwa kinatengeneza viatu vya aina mbalimbali na ndicho ambacho alikuwa amewekeana mkataba na chama cha mpira wa kikapu cha NBA cha nchini Marekani kwa ajili ya kuwauzia viatu.

Bwana Zhan alionekana kuwa msaada mkubwa watu, zaidi ya wafanyakazi milioni moja walikuwa wameajiliwa katika viwanda vyake hivyo. Kila siku Wachina walikuwa wakimpenda lakini kutokana na ubadhilifu ambao alikuwa ameufanya, kila mtu akaonekana kumchukia.

Bwana Zhan alikuwa na mke mmoja, Lucy Liu ambaye katika kipindi hicho alikuwa mjamzito ambaye alikuwa akitakiwa kuwekwa chini ya uangalizi mkubwa katika kipindi hicho kwani muda wowote ule angeweza kushikwa na uchungu na hatimae kujifungua. Kila wakati Bwana Zhan alikuwa akimwangalia mke wake, kila wakati kichwa cha mke wake kilikuwa mapajani mwake, alikuwa akimpenda sana mke wake kuliko mtu yeyote yule, kila alipokuwa akiliangalia tumbo kubwa alilokuwa nalo, alikuwa kitabasamu kila wakati.

“Nimejiuzulu” Bwana Zhan alimwambia mke wake ambaye wala hakuonekana kuwa na furaha kabisa. Lucy hakuongea kitu chochote kile, uso wake ulikuwa ukionekana kuwa na huzuni tu.

“Hii haimaanishi kila kitu kimefikia tamati, bado kuna mambo mengi ya kufanya. Natamani mtoto wetu aje kuwa tajiri mkubwa hapa nchini China kama nilivyokuwa” Bwana Zhan alimwambia mke wake kwa sauti ya unyonge.

“Hii haimaanishi kwamba kila kitu kimekufa kwetu, bado tuna nafasi kubwa mpenzi” Lucy alimwambia mume wake.

“Hiyo ndio ilikuwa maana yangu halisi. Bado tunampenda mtoto wetu atakayezaliwa, sitokuwa radhi ya kufilisiwa. Bado nahitaji kuwa na fedha zote hizo katika akaunti yangu” Bwana Zhan alimwambia mke wake.

“Kuna kitu nimeona”

“Kitu gani?”

“Kwa nini hizi fedha usiziamishe”

“Kwenda wapi?”

“Marekani au Japan”

“Mmmh! Hilo suala ni gumu sana kwani wataweza kugundua kwa haraka sana. Kama nitaamua kuzipeleka katika nchi masikini na ndogo, hapo hakuna tatizo kabisa” Bwana Zhan alimwambia mke wake.

“Kwa hiyo wewe umefikilia nchi gani?”

“Subiri kwanza” Bwana Zhan alisema na kisha kuinuka mahali hapo.

Moja kwa moja akaanza kuelekea chumbani kwake. Bado uso wake haukuwa na furaha hata mara moja, kichwa chake kilikuwa kimejaza mambo mengi kwa wakati huo. Katika kipindi hicho, alikuwa akitaka kufanya kitu kimoja tu, kuzisafirisha fedha zake mpaka katika nchi ambayo angeiona kufaa sana. Baada ya dakika kadhaa, akarudi mahali pale huku akiwa na kompyuta yake ya mapajani.

Akaiwasha na kisha kuunganisha na intaneti. Akaanza kuangalia kila kitu ambacho alikuwa akitaka kuangalia, uso wake ulionyesha umakini mkubwa kupita kawaida. Muda wote huo, mke wake, Lucy alikuwa kimya huku akimwangalia mume wake ambaye macho yake alikuwa ameyaweka katika kioo cha kompyuta yake tu.

“Nimeshapata” Bwana Zhan alimwambia mke wake, Lucy.

“Wapi?”

“Tanzania. Nchi moja ambayo ipo Afrika” Bwana Zhan alisema.

“Basi hakuna tatizo” Lucy alisema.

Kila kitu mpaka katika kipindi hicho kilikuwa kikienda vizuri kabisa, hakukuwa na mtu ambaye aliona kwamba wangeweza kushindwa katika suala hilo. Baada ya kukubaliana kwa kila kitu, tayari kukawa na tatizo ambalo lilikuwa limetokea. Je fedha hizo zingeweza kusafirishwaje bila wafanyakazi wa benki kuu ya China kugundua? Alijua fika kwamba kama angeingia ndani ya bennki hiyo na kisha kusaini karatasi kadhaa na fedha zile kusafirishwa, watu wangejua kazipeleka nchi gani.

“Kwa hiyo utafanyaje ili asijue mtu?” Lucy alimuuliza mume wake ambaye alikuwa akifikiria mambo mengi.

“Nipe dakika kumi. Nitajua nini cha kufanya” Bwana Zhan alisema.

Kwa haraka haraka bila kupoteza muda akachukua kompyuta yake ya mapajani na kisha kuanza kuangalia baadhi ya vitu kadhaa. Akaandika ‘CRIMINALS IN USA’. Majina ya watu kadhaa ambao walikuwa wamefanya uhalifu mkubwa nchini Marekani yakatokea. Akaanza kumwangalia mmoja baada ya mwingine. Walikuwepo wahalifu ambao waliwahi kuvamia benki na kisha kuiba fedha, walikuwepo wale ambao waliwahi kuiba mamilioni ya fedha pamoja na kuua watu, ila ukiachana na hao, pia walikuwepo wale ambao walikuwa wameiba fedha nyingi kupitia kompyuta ambao walikuwa wamekamatwa.

Bwana Zhan hakuishia hapo, aliendelea zaidi na zaidi mpaka alipokutana na jina la Justin Terry, kijana mwingereza ambaye alikuwa akiishi nchini Marekani, kijana ambaye alikuwa akifanya kazi katika kampuni kubwa ya GOOGLE. Huyo ndiye ambaye alikuwa akitaka kuwasiliana nae kwa kuamini kwamba kila kitu kingekuwa kama alivyotaka kiwe.

Hakutaka kuongea nae simuni, alichokuwa akikitaka ni kuongea nae ana kwa ana. Alichokifanya mara baada ya kuwasiliana nae ni kumtaka kuelekea nchini China ambapo huko angeonana nae na kisha kuongea nae juu ya kazi ambayo alikuwa akitaka kumfanyia.

****CHANZO:  https://deusdeditmahunda.blogspot.com/

Justin Terry. Huyu alikuwa kijana raia wa Uingereza ambaye alikuwa na akili za kuzaliwa. Uwezo wake mkubwa kiakili ndio ambao ulionekana kuwa tatizo kwa walimu wote ambao waliwahi kumfundisha kijana huyu darasani. Kila kitu ambacho alichokuwa akifundishwa alionekana kukijua jambo ambalo lilionekana kuwakasirisha walimu ambao kwake aliwaona kama wanafunzi wake.

Uwezo wake ulikuwa ni wa hali ya juu, walimu hawakutaka kuona wakiambiwa kwamba hapa ulitakiwa kufanya hivi, hivyo walikuwa wakimfukuza darasani. Kila mwalimu alikuwa akiogopa kufundisha mbele ya uwepo wa Terry ambaye kwake alionekana kuwakosoa kupita kawaida. Visa vikaanza mashuleni mpaka pale ambapo Terry akafukuzwa shule.

Hakukuwa na shule ambayo ilikuwa ikimkubali kutokana na kusikia juu ya uwezo wake. Akaanza kuishi nyumbani kwao tu katika jiji la Birmingham. Hakuelekea tena shule, alikuwa akijisomea nyumbani tu. Japokuwa alikuwa nyumbani lakini bado alionekana kufahamu mambo mengi. Katika umri wa miaka kumi na sita, hapo ndipo alipoanza kuwa rafiki mkubwa wa kompyuta, alikuwa akipenda kompyuta kuliko kitu kingine.

Ukaribu wake na kompyuta ndio ambao ulimfanya kufahamu mambo mengi mpaka kugundua njia ambazo mtu alitakiwa kuziibia benki nyingi duniani. Codes zote za benki akaanza kuzifahamu, kitu ambacho alikuwa amekifanya ni kuiba kiasi cha paundi elfu ishirini kutoka katika benki ya Barclays na kuziingiza katika akaunti yake.

Hakukuwa na mtu ambaye alifahamu kama fedha zilikuwa zimeibwa jambo ambalo lilimfanya kuona kwamba alikuwa ameiva katika wizi wa kutumia kompyuta. Alipofikisha miaka kumi na tisa, hakutaka kuishi nchini Uingereza, akaelekea nchini Marekani, huko ndipo alipoanzisha maisha yake. Kila wakati alikuwa na kompyuta yake ya mapajani begini mwake, hakutaka kuiacha, sehemu yoyote ambayo alikuwepo alikuwa akifanya uharifu wa fedha kwa kutumia kompyuta yake.

Alikuwa akiishi kwa ujanja ujanja lakini akafanikiwa kupata fedha nyingi za wizi za zaidi ya dola milioni mbili. Aliendelea na tabia yake hiyo mpaka pale ambapo wapelelezi wa FBI walipokuja kumgundua na kisha kumkamata. Kwao, tayari Terry alionekana kuwa mtu muhimu sana, usingeweza kumfunga jela mtu ambaye alikuwa na uwezo wa namna hiyo. Walichokifanya, wakamuweka katika kitengo hicho cha upelelezi akiwafanyia kazi zao kwa malipo makubwa mpaka pale ambapo kampuni kubwa ya GOOGLE ilipoamua kumchukua kwa malipo makubwa kwa kuwafanyia kazi kubwa zilizotakiwa kufanywa na yeye.

Kwa sasa alikuwa akifahamu mengi sana japokuwa hakutaka tena kuiba. Alikuwa akimiliki kiasi kikubwa cha fedha, alikuwa na uwezo mkubwa wa kumuibia mtu yeyote kiasi chochote cha fedha na kukipeleka kwenye akaunti yoyote duniani bila mtu yeyote kufahamu. Huyo ndiye alikuwa Terry, kijana ambaye alikuwa akihitajika na Bwana Zhen kwa ajili ya kuzisafirisha fedha zake katika benki kuu ya Tanzania bila serikali ya China kufahamu fedha zake zilikuwa zimesafirishiwa wapi. Katika kila kitu ambacho Bwana Zhan alikuwa akikifanya, alikuwa akifanya kwa ajili ya mtoto wake ambaye alitarajiwa kuzaliwa, mtoto ambaye alimuona kuwa kila kitu kwake.

“Nimekwishafika” Terry alimwambia Bwana Zhan simuni na kisha kumuelekeza kuelekea hotelini, huko ndipo ambapo wakakutana na kisha kuanza mazungumzo.

“Kazi rahisi sana hiyo. Tena kwa sababu una namba zako za siri, zoezi rahisi sana. Ila itakubidi uongee na hata rais wa nchi hiyo ili akaunti yako iwe salama”

“Hilo si tatizo. Kila kitu tayari, nimekwishaongea nae na ni wewe tu ndiye nilikuwa nakusubiria” Bwana Zhan alimwambia Terry.

“Hakuna tatizo. Kiasi changu cha dola milioni moja nitakiingiza kwenye akaunti yangu kama malipo”

“Hilo si tatizo”

“Basi sawa. Ndani ya dakika tano tu kazi yako itakuwa tayari”

“Dakika tano?” Bwana Zhan aliuliza huku akionekana kushtuka.

“Yeah! Tena hapo nimechelewa. Huwa ninafanya kwa dakika moja tu. Zimekuwa tano kwa sababu nataka kuziiba codes za benki ya huko na hii benki ya hapa China” Terry alimwambia.

“Hakuna tatizo”

“Poa” Terry alisema na kisha kuchukua kompyuta yake ya mapajani na kisha kuanza kazi yake.

****

Joshua alikuwa akitetemeka kupita kawaida, hakuamini kwamba mtu ambaye alikuwa akimhofia ndiye ambaye alikuwa mbele yake kwa wakati huo. Alibaki akiwa amesimama huku simu yake ikiwa sikioni mwake, hakujua ni kitu gani ambacho alitakiwa kukifanya kwa wakati huo, akabaki kimya kwa muda.

“Wewe kijana” Bwana Shedrack alimuita Joshua, katika kipindi ambacho akataka kuitikia, simu ambayo alikuwa amepiga ikapokelewa. Alichokifanya ni kumuomba radhi Bwana Shedrack kwa ajili ya kuongea na simu mara moja.

“Ebwana nimefika mpaka hapa ila nimekuta mlango umefungwa na Joshua hayupo. Nadhani bado hajarudi kutoka Mbezi, sasa tufanye nini manake bila huyu jamaa hata spika zetu za rusha roho hatutoweza kuzipata muda muafaka” Joshua alisema na kuendelea huku Bwana Shedrack akiwa mbele yake.

“Ok! Basi cha msingi tufanye hivi nirudi baadae kwa sababu mtu mwenyewe kashaonekana kuzingua. Yeah! Ndio hivyo bosi, cha msingi sisi tupate spika zetu tu” Joshua alisema huku kadri alivyokuwa akiongea, mwili wake ulikuwa ukipoa. Alipomaliza, akakata simu na kuizima kwa kuona mtu ambaye alikuwa amempigia na kumwambia habari zisizoeleweka angeweza kumpigia.

“Samahani mzee. Nikusaidie nini?” Joshua alimuuliza Bwana Shedrack.

“Wewe unaishi humu?”

“Hapana. Nimekuja kumuulizia Dj Joshua kwa ajili ya kuchukua spika zetu ila bahati mbaya nimemkosa” Joshua alidanganya.

“Ila unamjua?”

“Ndio”

“Sawa. Ukimuona mwambie namtafuta. Nataka nimuue tu” Bwana Shedrack alisema huku akionekana kuwa na hasira.

“Nimwambie anatafutwa na nani?”

“Bwana Shedrack”

“Sawa” joshua alijibu na kisha Bwana Shedrack kuondoka mahali hapo huku tayari suruali ya Joshua ikiwa imeloa kwenye zipu.









Njia nzima Rose alikuwa na mawazo, hakuamini kama ule ndio ulikuwa mwisho wa kukaa nyumbani kwao. Hakutaka kurudi tena, hakutaka kuwasiliana na ndugu yeyote yule kutoka nyumbani kwao, kitu ambacho alikuwa akikitaka kwa wakati huo ni kuondoka na kwenda kuishi mbali. Bado alikuwa akifikiria mengi, hasa kutokana na ujauzito ambao alikuwa nao katika kipindi hicho, haukuonekana kuwa sababu ya yeye kuendelea kuishi ndani ya nyumba ile.

Leo baba yake alikuwa ameamua kwenda kumuua Irene, ile ilimaanisha kwamba ingewezekana siku nyingine kuamua kumuua hata yeye mwenyewe. Alitaka kuwa makini kwa kila hatua ambayo ilikuwa inatokea, alitakiwa kuwa makini kwa kila kitu ambacho alitakiwa kukifanya.

Ndani ya jiji la Dar es Salaam alikuwa na ndugu wengi lakini katika kipindi hicho aliona asingeweza kwenda kwa ndugu yeyote yule zaidi ya Irene ambaye nae alionekana kuwa adui wa familia yake. Safari bado ilikuwa ikiendelea kuelekea Sinza Makaburini, katika kipindi hicho alikuwa akitaka kuonana na msichana Irene na kumwambia kwamba alikuwa ameamua kuondoka nyumbani kwao.

Safari wala haikuwa ndefu sana, wakafika Sinza Makaburini ambapo akamlipa dereva bajaji kiasi cha fedha alichokuwa akikihitaji na kisha kuanza kuifuata jengo la hosteli ile, alipolifikia akafungua geti na kuingia ndani. Wasichana wengi walikuwepo ndani ya eneo lile wakifua wengine wakiwa na mataulo wakielekea bafuni kuoga.

“Samahani. Irene nimemkuta?” Rose alimuuliza dada mmoja ambaye alikuwa akifua.

“Irene yupi?” Msichana yule aliuliza.

”Irene Godfrey”

“Mmmh! Sijui. Nenda katika chumba chake ukamuulizie” msichana yule alimwambia Rose

“Chumba chake kipo wapi?” Rose aliuliza.

Hapo ndipo ambapo yule msichana alipoanza kumuelekeza Rose chumba cha Irene kilipokuwa na kisha Rose kuanza kupiga hatua kuelekea alipoelekezwa. Alipoufikia mlango, akaanza kupiga hodi na kisha kufunguliwa. Wasichana kadhaa walikuwa ndani ya chumba hicho wakijiandaa kuelekea vyuoni.

“Samahani” Rose alisema mara baada ya salamu.

“Karibu” Msichana mmoja alimwambia Rose.

“Irene nimemkuta?”

“Hayupo”

“Kaelekea wapi?”

“Aliondoka toka jana. Hakutuaga. Ila si umpigie simu” Msichana yule alimwambia Rose.

Hapo hapo Rose akachukua simu yake na kisha kuanza kumpigia Irene, simu haikuita sana, ikapokelewa na sauti ya kichovu ya Irene kuanza kusikika. Waliongea kwa dakika kadhaa, Rose akatakiwa kuelekea Mwananyamala A alipokuwa Irene. Rose hakutaka kuendelea kubaki mahali hapo, alichokifanya ni kuaga na kisha kuondoka mahali hapo. Alipofika nje, akakodi bajaji na kuondoka.

Safari ya kuelekea Mwananyamala A ikaanza , mpaka pale ambapo alipofika Mwananjamala A na kumuona Irene ambaye alikuwa akimsubiri. Wakakumbatiana kwa furaha na kisha kuanza kuondoka mahali hapo. Safari hiyo ikaishia katika chumba cha Asha, chumba ambacho kilionekana kukaliwa na mtu msela kutokana na mpangilio wake kutokuwa wa kuvutia.

“Imekuwaje tena?” Irene alimuuliza Rose.

“Nilikimbia nyumbani. Nilihofia kwamba kama baba amegundua nimekupigia simu, hasira zake zingeishia kwangu” Rose alimwambia Irene.

“Pole sana. Kwa hiyo hautorudi tena?”

“Siwezi kurudi”

“Dah! Haina jinsi. Ngoja nikufanyie mishemishe ya mjini hapa ukakae katika chumba kimoja nilipanga hapo Kinondoni ila sijakitumia sana na kuhamia hosteli. Kama miezi sita imebaki mpaka kodi kumalizika. Unaonaje? Au utashindwa kukaa peke yako?” Irene alimwambia Rose.

“Hakuna tatizo” Rose alijibu.

Irene hakutaka kuchelewa sana, akaoga na kisha wote kwa pamoja kuanza safari ya kuelekea Kinondoni na kisha kuelekea katika chumba hicho. Walipofika, wakaingia ndani na kisha kuanza kukifanyia usafi kutokana na fumbi kuwa jingi ndani ya chumba hicho.CHANZO:  https://deusdeditmahunda.blogspot.com/

Chumba kilionekana kuwa kikubwa, kilikuwa na kila kitu, makochi makubwa, kitanda pamoja na jiko la gesi bila kusahau televisheni ambayo ilikuwa katika stendi yake. Kwa kiasi fulani, chumba kile kilionekana kumvutia Rose ambaye akaridhika kwa moyo mmoja kukaa ndani ya chumba kile.

Hapo ndipo ambapo Rose akaanza maisha, mara kwa mara Irene alikuwa akifika hali hapo kwa ajili ya kumuona na pia kumfanyia usagaji. Katika kipindi hiki Rose akaonekana kubadilika sana, hakutaka kufanyiwa mchezo wa usagaji, alikuwa amekwishaamua kwamba alikuwa ameuacha mchezo huo kwa sababu tu alikuwa mjauzito katika kipindi hicho.

Irene alibaki kumshangaa, hakuamini kama kulikuwa na msichana ambaye alikuwa akiufanya mchezo ule na kisha kubadilika na kuamua kuuacha kabisa. Hilo likaonekana kuwa tatizo kwa Irene, mara kwa mara alikuwa amimshawishi Rose lakini wala hakuonekana kukubaliana nae, alikuwa ameamua kubadilika kwa asilimia mia moja.

Irene hakuonekana kufahamu kile ambacho kilikuwa kikiendelea kwa Rose, hakufahamu kama binti huyo katika kipindi hicho alikuwa mjauzito. Kwake, alimuona kuwa msichana wa kawaida sana ambaye wala hakuwa na kiumbe chochote tumboni mwake.

“Kwa nini lakini mpenzi?” Irene alimuuliza Rose kwa sauti ya unyonge.

“Hapana. Nimeamua tu” Rose alijibu.

“Hakuna mtu anayeamua kitu bila sababu. Kutakuwa na sababu tu”

“Nina mimba. Hiyo ndio sababu yenyewe” Rose alitoa jibu liliomfanya Irene kushtuka.

“Una mimba? Ya nani? Imekuwaje tena?” Irene aliuliza huku akionekana kushtuka.

“Nimepata mimba Irene”

“Kivipi.Uume wa bandia umekupa mimba?”

“Hapana. Nimepewa mimba na Joshua” Rose alijibu.

Hapo ndipo ambapo Rose akaamua kumhadithia Irene kila kitu ambacho kilikuwa kimetokea katika maisha yake katika kipindi ambacho alikuwa nyumbani. Ile ikaonekana kuwa stori mbaya kwa Irene ambaye alikuwa makini akimsikiliza tu. Hakukuwa na kitu kilichobadilisha ukweli katika kipindi hicho, Rose alikuwa mjauzito na kwa mbali tumbo lilikwishaanza kuonekana.

“Kwa hiyo ndio basi tena?” Irene aliuliza kwa sauti ya upole.

“Haina jinsi. Itabidi iwe hivyo” Rose alijibu.

“Sasa itakuwaje kwa Peter ambaye anaamini mimba ni yake?”

“Bado sijajua. Sitaki kufikiria hilo kwa sasa. Acha nifanye mambo yangu kwanza” Rose alimwambia Irene.

****

Terry alikuwa kimya huku akiifanya kazi yake ambayo aliambiwa aifanye katika kipindi hicho. Aliambiwa azitoe fedha zote na kubakisha kiasi cha dola milioni mbili ambazo hizo zingebaki na kisha Bwana Zhan kufanyia mambo yake. Kama alivyosema, zoezi wala halikuwa kubwa, ni ndani ya dakika nne tu tayari zoezi zima lilkuwa limekamilika.

Hiyo ikaonekana kuwa furaha kwa Bwana Zhan ambaye akaamua kula chakula cha mchana na Terry na kisha kumfanyia mipango ya usafiri wa ndege kwa ajili ya kurudi nchini Marekani huku akitaka kila kitu kiwe siri yao na asiambiwe mtu yeyote, kwa maana hiyo siri ingekuwa kwa Bwana Zhan, Terry pamoja na mke wa Bwana Zhan, Lucy.

Bado kulikuwa na mambo mengi ya kufanya kwa wakati huo, bado aliona kwamba kulikuwa na kitu kimoja ambacho alitakiwa kukifanya kwa wakati huo, kutoroka na kuelekea nchini Tanzania bila kugundulika. Hiyo haikuonekana kuwa rahisi kufanyika, alitakiwa afanye kitu kitu kimoja ambacho kingemfanya kutokujulikana na mtu yeyote kama alikuwa yeye.

Wazo moja likamjia kichwani, wazo lile likaonekana kustahili sana kuchukuliwa hatua, kwa moyo mmoja, akaamua kutengeneza sura za bandia ambayo angeitumia kusafiria mpaka nchini Tanzania pamoja na mke wake. Kwa haraka bila kupoteza muda akaanza kuwasiliana na wachongaji wa sura za bandia na ndani ya masaa mawili walikuwa ndani ya nyumba hiyo na kisha kuanza kuwapa maelekezo juu ya nini kilitakiwa kufanyika mahali hapo.

Kiasi kikubwa cha fedha kilihitajika kwa ajili ya kukamilisha kila kitu ambacho alikuwa akitaka kifanyike na ndani ya siku mbili, tayari sura mbili za bandia zilikuwa zimekwishakamilika. Mpaka hapo kila kitu kilikuwa tayari na walipanga kwamba siku itakayofuatia ndio ilikuwa siku ya kuondoka nchini hapo na kuelekea nchini Tanzania. Usiku wakalala kitandani kwao huku sura za bandia zikiwa pembeni ili ikifika asubuhi wazivae na kisha kuanza kuitoroka nchi ya China.

****

Wachina bado walionekana kuwa na hasira kupita kawaida, kila siku hitaji lao liliendelea kuwa lile lile, Bwana Zhan afikishwe mahakamani. Kwa sababu Bwana Zhan alikuwa swahiba mkubwa wa rais Bwana Wou jambo lile likaonekana kuwa gumu sana kufanyika na kama lingefanyika basi Bwana Zhan angeshinda kila kitu na hivyo kuwekwa huru.

Wachina walikuwa wamekwishalijua hilo na kwa sasa walitaka kufanya kitu kimoja tu, kumuua Bwana Zhan na familia yake kama njia ya mkato kwa ajili ya kuirudisha furaha yao ambayo ilikuwa imeingia doa kutokana na kitendo cha Bwana Zhan kuchukua fedha za wananchi, fedha ambazo zilitakiwa kusaidia idara mbalimbali.

Wachina mia moja, wanaume ambao walikuwa na nguvu na hasira wakajikusanya kwa lengo moja tu, kuvamia nyumba ya Bwana Zhan na kisha kumuua na familia yake. Kila mmoja alikuwa na silaha, kila mmoja alikuwa akitaka kufanikisha kile ambacho walikuwa wakitaka kufanikisha kwa wakati huo. Kilichofanyika, usiku wa saa sita wakaanza kuelekea katika mtaa wa Yungshai, mtaa uliokuwa ukikaliwa na matajiri kwa lengo la kuiteketeza familia ya Bwana Zhan.

Kila mmoja alikuwa na silaha mikononi mwao na walikuwa wakitaka kufanya kitu kimoya kimya. Walipofika katika geti la kuingilia ndani ya nyumba ile, kitu cha kwanza wakawaweka chini ya ulinzi walinzi ambao walikuwa mahali hapo na kisha kwenda kuzitoa kamera ambazo zilikuwa zimezunguka nyumba hiyo na kisha kuanza kuelekea ndani.

Mlango ulikuwa ukifunguliwa kwa alama za vidole vya wahusika wa nyumba ile lakini kwa sababu nao walikuwa wamejiandaa vilivyo, vijana ambao walikuwa wazoefu katika kuchezea kompyuta walikuwa pamoja nao. Kwa haraka kijana mmoja akaanza kuufuata mlango, akachukua kompyuta yake ndogo ya mapajani na kisha kuuchukua waya, akaifungua mashine ile na kuanza kuchezea kwenye kompyuta yake. Wala haikuchukua muda mrefu, akakipeleka kidole chake katika mlango ule na kisha mlango kufunguka, kilichofuatia, vijana kumi wakaanza kuingia ndani ya nyumba ile.

Kila mmoja aliyeingia ndani ya nyumba ile alikuwa na lengo moja tu kichwani mwake, kumuua Bwana Zhan pamoja na mkewe. Vijana wawili wakabaki pale sebuleni na wengine kuelekea katika sehemu kulipokuwa na chumba cha Bwana Zhan na kisha kutaka kuufungua mlango. Mlango ukaonekana kuwa mgumu kukufunguka, wakajaribu kukitekenya kitasa lakini wala haukuweza kufungua jambo ambalo likawafanya kuanza kuupiga teke mlango ambao ukaachia na kuwa wazi.

Wakaingia ndani ya nyumba ile, ni Bwana Zhan peke yake ndiye alikuwepo ndani ya chumba kile. Walichokifanya, hawakutaka kuuliza nini wala nini, wakaanza kumshambulia kwa hasira na ndani ya dakika moja tu, Bwana Zhan akatulia sakafuni, damu zilikuwa zimetapakaa sakafuni pale, alikuwa amekwishakata roho.

“Mkewe!” Kijana mmoja alisema.

“Yupo wapi?”

“Sijui. Au kajificha?”

“Sijui yupo wapi

Vijana wale wakaanza kumtafuta Lucy, wakaanza kuingia katika kila chumba. Wafanyakazi wote wa ndani ambao walikutwa ndani ya vyumba vingine wakawekwa chini ya ulinzi huku wakiamriwa kutopiga kelele. Walitafuta katika kila kona ndani ya nyumba ile lakini Lucy hakuonekana kabisa jambo ambalo lilionekana kumshangaza kila mtu.

“Inawezekana kwamba hakulala ndani ya nyumba hii?” Kijana mmoja aliuliza.

“Haiwezekani hata kidogo”

“Sasa yupo wapi?”

“Mmmh! Sijui. Tusingekuwa tumemuua yule mzee angetuambia tu”

“Kwa hiyo tufanye nini?”

“Tuondokeni”

“Tuondoke bila kumuua mke wake?’

“Yeah! Haina jinsi”

“Sawa”

Vijana wale waliongea na kushauriana. Katika kipindi hicho hawakutakiwa kubaki sana ndani ya nyumba ile, kwa sababu walikuwa wamemkosa Lucy, wote kwa pamoja wakashauriana kuondoka ndani ya nyumba ile bila ya kufanikisha zoezi la kumuua Lucy. Wakatoka nje ya nyumba ile, wakawafunga kamba walinzi na kisha wao kuondoka.

Asubuhi, vyombo vya habari vikaanza kutangaza kuhusiana na mauaji ya Bwana Zhan. Hakukuwa na mtu ambaye alihuzunika, kila mmoja alikuwa akifurahi, taarifa ile kwao ikaonekana kuwa njema, hawakuwapenda kabisa mafisadi, watu ambao walikuwa wakiyatumia madaraka kwa ajili ya kujinufaisha wao na familia zao.

Swali moja ndio ambalo lilibaki, mke wake alikuwa wapi? Hakukuwa na mtu aliyekuwa akilijua jibu la swali lile. Waliulizwa walinzi, hawakuwa wakifahamu, wakaulizwa wafanyakazi wa ndani lakini nao jibu lilikuwa lile lile, hawakuwa kifahamu pia. Kila mmoja akaonekana kuchanganyikiwa, kifo cha Bwana Zhan kilionekana kuwafurahisha lakini bila Lucy kuuawa kilionekana kuwakasirisha, yaani kwao walifananisha na kuukata mti na kisha kuubakisha mzizi, mzizi ule uliobaki ungeweza hata kuuleta mti mwingine, mti ambao ungekuwa kama ule uliokatwa na hivyo kuonekana kutofanya kitu chochote kile.



CHANZO:  https://deusdeditmahunda.blogspot.com/



Bwana Zhan alikuwa chumbani pamoja na mke wake, muda mwingi alikuwa akiifikiria safari yao ya kuelekea nchini Tanzania. Kila kitu ambacho walikuwa wakikitaka walikuwa wamekwishakipata na wala kusingekuwa na tatizo lolote kuhusiana na safari yao ya kuelekea nchini Tanzania. Kama ni fedha, tayari zilikuwa zimekwishatumwa nchini Tanzania kwa ajili ya kuendelea na maisha yao mara baada ya kufika ndani ya nchi hiyo.

Usiku kwao ukaonekana kuwa mrefu, mioyo yao ilikuwa na wasiwasi mkubwa kwamba kulikuwa na uwezekano wa Wachina kufanya jambo lolote lile baya kama tu wangeendelea kubaki nchini hapo. Ilipofika usiku wa sita usiku, Bwana Zhan akaonekana kuhisi kitu, hata kabla hajafanya kitu chochote kile akaanza kuifuata kompyuta yake iliyokuwa mezani na kisha kuiwasha.

Akaanza kuziangalia kamera zake ambazo alikuwa amezitegesha katika maeneo mbalimbali ndani ya nyumba ile. Zile kamera ambazo zilikuwa nje, hazikuwa zikionyesha chochote kile kitu kilichomfanya kugundua kwamba zilikuwa zimetolewa. Hapo ndipo ambapo akashikwa zaidi na hofu moyoni mwake. Akaendelea kuziangalia kamera nyingine hasa zile zilizokuwa sebuleni na maeneo mengi, kamera za sebuleni zikawaonyesha watu fulani wakiingia sebuleni pale.

Alichokifanya ni kumuamsha mke wake, akachukua sura ya bandia na kisha kumtaka kuivaa. Lucy hakuelewa sababu iliyompelekea mume wake kufanya jambo lile huku akionekana kuwa na wasiwasi mkubwa mno, alichotakiwa kukifanya ndicho ambacho alikifanya bila kuonyesha mgomo wowote ule. Alipoona kwamba tayari mke wake alikuwa amekwishaivaa ile sura ya bandia, hapo ndipo akaitoa picha moja aliyoibandika ukutani na kisha macho yake kutua katika kitufe ambacho alikifungua na kukibonyeza. Sakafu ya chini ikajifungua na kisha kumwambia Lucy aingie.

“Ondoka” Bwana Zhan alimwambia Lucy.

“Niende wapi?”

“Popote pale ila ondoka”

“Vipi kuhusu wewe mpenzi?”

“Nabaki. Ngoja nibaki. Usiwe na wasiwasi na mimi” Bwana Zhan alimwambia Lucy huku tayari wakianza kusikika kitasa kikianza kutekenywa na mtu wa nje ambaye alikuwa akitaka kuufungua mlango.

“Chukua hii kadi. Hii kadi ni akaunti yangu ya benki, utakuwa ukichukua fedha kwa ajili ya kukusaidia na pia chukua hii karatasi, humu kuna namba ya Terry, utawasiliana nae baada ya wiki moja ili kujua ni kwa namna gani atakupa kadi ya kukuruhusu kuchukua fedha nchini Tanzania” Bwana Zhan alimwambia Lucy ambaye akaanza kutokwa na machozi.

“Vipi kuhusu wewe?” Lucy aliuliza huku akilia.

“Acha nife. Nimefanya jambo moja kubwa sana kwa watu wa China. Acha nife mke wangu ili wafurahi” bwana Zhan alimwambia Lucy na kisha kumkumbatia.

Lilikuwa ni kumbatio lenye huzuni kupita kawaida, wte kwa pamoja walikuwa wakitokwa na machozi, kila mmoja alijua fika kwamba huo ndio ungekuwa mwisho wa wao wawili kuonana maishani mwao. Walitumia muda wa sekunde kadhaa na kisha kuachiana, Bwana Zhan akambusu Lucy shavuni na kisha kumwambia aondoke mahali pale.

“Usikose kumwambia mtoto wangu kila kilichotokea” Bwana Zhan alimwambia Lucy.

“Nitamwambia…nitamuelezea kila kitu” Lucy alimwambia mume wake na kisha kuanza kuteremka chini.

“Dokta alisema ni wa kike au wa kiume?” Bwana Zhan alimuuliza Lucy.

“Wa kiume”

“Sawa. Mpe jina la Lee endapo ukijifungua salama”

“Nitafanya hivyo” Lucy alisema na kisha Bwana Zhan kuufunga mlango ule wa kuelekea chini.

Lucy alikuwa akikimbia huku akilia, ndani ya bomba lile hakukuwa na usafi wowote ule, uchafu mwingi ulikuwa mahali kule, maji machafu na yanayonuka yalikuwa yakiendelea kumwagika ndani ya bomba lile kubwa ambalo hata ukisimama, bado lilikuwa kubwa.

Lucy alikuwa akitembea zaidi na zaidi kuelekea lilipokuwa likielekea bomba lile. Macho yake yalikuwa mekundu sana huku mashavu yake yakiendelea kuchirizikwa na machozi yaliyokuwa yakimtoka mfululizo. Safari ndani ya bomba lile kubwa haikuwa ndogo, alikuwa akiendelea na safari mpaka baada ya masaa matano ndipo alipotokea katika bahari kubwa, bahari ya Njano ambayo ipo upande wa Mashariki nchini China, bahari ambayo kama ungesonga nayo zaidi, ungeweza kuingia katika bahari nyingine iitwayo Bahari ya Mashariki ya China.

Mara baadaya kutokea katika bahari hiyo, Lucy akatoka na kuanza kutembea pembezoni mwa bahari ile huku usoni akiwa amevaa sura ya bandia ambayo alikuwa amepewa na mume wake. Katika kipindi hicho, Lucy alionekana kuwa tofauti kabisa, sura ambayo alikuwa ameivaa kusingekuwa na mtu ambaye angeweza kumgundua kabisa.

Alitembea pembezoni mwa bahari ile mpaka alipotokea katika sehemu iliyokuwa na hoteli kubwa, hakutaka kukaa ndani ya hoteli hiyo bali alikuwa akiitumia njia hiyo ya hoteli kutokea nyuma mpaka pale alipoingia barabarani. Kichwani kwake kwa wakati huo alikuwa akitaka kuelekea Dongying, sehemu ambayo ilikuwa ni kijiji kikubwa, kijiji ambacho kilikuwa kilometa mia tatu kutoka katika jiji la Beijing.

Alichokifanya Lucy ni kuchukua basi kubwa la abiria ambalo lilikuwa likielekea Dongying ambapo huko angeanza maisha mapya kwa kuona kwamba hata kama alikuwa na sura ya bandia, hasingeweza kuishi ndani ya jiji la Beijing. Safari ile ilichukua masaa mawili, akafika katika kijiji hicho ambapo akateremka na kuanza kuelekea katika sehemu ambazo zilikuwa na nyumba nyingi.

Alichokifanya Lucy ni kuulizia sehemu kulipokuwa na nyumba ya mwenyekiti wa kijiji hicho, Bwana Sheng Lou kwa ajili ya kutaka kuzungumza nae mambo machache. Vijana ambao alikuwa amewauliza ndio ambao wakampeleka mpaka katika nyumba ya mwenyekiti wa kijiji hicho na kisha kuanza kuongea nae.

“Mumeo amefariki?” Bwana Lou aliuliza..

“Ndio” Alifariki katika lile tetemeko la ardhi lililotokea Shangdon katika ule mgodi wa dhahabu” Lucy alidanganya.

“Sawa. Kwa hiyo nikusaidie nini?”

“Nimekuja kutafuta kazi. Maisha yangu ni ya kimasikini sana, nimekuja kuomba kazi ili nipate fedha za kumlea mtoto wangu atakayezaliwa”

“unaweza kulima?” Mzee Lou alimuuliza.

“Nitaweza tu”

“Hakuna tatizo. Huwa tunawasaidia watu mbalimbali kijijini hapa, tunapenda watu” Mzee Lou alimwambia.

Kuanzia siku hiyo Lucy akaanza kukaa ndani ya kijiji hicho, kila siku alikuwa akielekea shambani kulima pamoja na wanawake wengine. Kwake, maisha hayakuonekana kuwa rahisi hata kidogo, hakuzoea kulima hata mara moja lakini katika kipindi hicho hakuwa na jinsi, alitakiwa kulima huku akivuta muda wa kujifungua na kisha kuanza safari ya kuelekea nchini tanzania.

Baada ya wiki mbili, akaanza kuwasiliana na Terry ambaye akamtumia kadi yake ya benki ambayo alitakiwa kuitumia nchini Tanzania. Katika kipindi hicho DHL ndio ilionekana kukamilisha kila kitu Mizigo yote ambayo alikuwa akiitaka kuipata kutoka nchini Marekani alikuwa akiipata bila wasiwasi wowote ule.

Kazi zilikuwa zikiendelea kama kawaida kijijini hapo, wanawake wengi walikuwa wakifanya kazi kwa kujitoa. Hakukuwa na mtu ambaye alijua kwamba msichana ambaye alijitambulisha kwa jina la Lanfen alikuwa Lucy, mke wa marehemu Zhan ambaye alikuwa ameuawa katika kifo cha kinyama, mtu ambaye alikuwa akichukiwa sana na wachina.

Siku zikaendelea kukatika mpaka katika siku ile ambayo Lucy akashikwa na uchungu. Hakupelekwa hospitalini zaidi ya kujifungua kupitia kwa wakunga wanawake ambao walikuwa wakizifanya kazi zile vizuri tena bila wasiwasi wowote ule. Mtoto wa kiume akazaliwa na kupewa jina la Lee, jina ambalo baba yake alitaka mtoto huyo apewe.CHANZO:  https://deusdeditmahunda.blogspot.com/

Lee akaonekana kuwa kila kitu kwa mama yake, lee akaonekana kuwa mtu wa thamani sana kwa mama yake, Lucy. Kila wakati alikuwa pamoja nae, alikuwa akimjali kupita kawaida. Muda mwingi alipokuwa akimwangalia lee alikuwa akitokwa na machozi, maisha ambayo lee alikuwa akiyaishi ndani ya kijiji kile yalionekana kuwa maisha ambayo hakutakiwa kuyaishi kabisa kutokana na fedha ambazo alikuwa nazo.

Mwaka wa kwanza ukapita, mwaka wa pili ukaingia na hatimae mwaka wa tatu kuingia. Lucy hakutaka tena kuishi ndani ya kijiji hicho, alichokifanya ni kuaga kwamba alikuwa akielekea mjini kwa ajili ya kutafuta maisha zaidi. Hakuzuiliwa na mzee Lou zaidi ya kutakiwa kuwa makini, akaondoka zake.

Alipofika Beijing akaanza kufanya mishemishe za kutaka kuja nchini tanzania. Kwanza kabisa akaanzisha kampuni yake ya ujenzi ambayo akaambiwa achague nchi ya kufanyia kazi, akachagua nchi ya tanzania. Kama ilivyokuwa kwa wachina wengine, serikali ikamuunga mkono kwa kila kitu, ikamgawia kiasi fulani cha fedha kwa ajili ya kumsadia kwani serikali ilikuwa ikitaka watu wake watawanyike dunia nzima kwa ajili ya kufanya mambo mengi.

Pamoja na hayo, serikali ikamwandalia wafanyakazi kadhaa kwa ajili ya kumuunga mkono kwa kile ambacho alikuwa akitakiwa kukifanya. Mpaka miezi miwili inakatika, na kwa kutumia kiasi kilichobaki katika akaunti ya mume wake, akaanza safari ya kuelekea nchini Tanzania huku wachina wakiendelea kumtafuta kwani nae alitakiwa kuuawa pia.

Alipofika nchini tanzania, akatafuta nyumba na kisha kuanza kuishi pamoja na mtoto wake. Kwa sababu alikwishaitaarifu serikali ya Tanzania juu ya ujio wake, akapewa tenda ya kutengeneza ghorofa kubwa Posta Mpya, ghorofa la McFee ambalo lipo karibu na jengo la kampuni ya TTCL.

Lucy hakutaka kuchelewa, kwa sababu kampuni yake ilikuwa na makarani wakubwa na wenye uwezo mkubwa akaipokea tenda hiyo kwa mikono miwili na hatimae baada ya miezi miwili kazi kuanza mahali hapo. Makarani hao ndio ambao walikuwa wakisimamia kila kitu kilichokuwa kikiendelea mahali hapo huku makubaliano ya malipo ya fedha yakiwa yamekwishaanza kufanyika.

Mpaka kufika katika kipindi hicho, hakutoa kiasi chochote cha fedha kutoka mfukoni mwake, serikali ya China ndio ambayo ilikuwa ikilipia kila kitu ambacho kilikuwa kikifanyika likiwa pamoja na suala la kuwalipa wafanyakazi waliokuwa wakibeba matofali na hata kunyanyua vyuma.

Wakinamama mbalimbali wakaanza kukusanyika katika eneo la ghorofa hilo ambalo lilikuwa likiendelea na ujenzi kama kawaida, wakinamama hao walikuwa na kazi moja tu mahali hapo, kuuza vyakula kwa wafanyakazi ambao walikuwa wakiendelea kufanya kazi ya ujenzi katika ghorofa lile ambalo lilikuwa likiendelea kwa kasi sana.

Kati ya wakinamama wote ambao walikuwa wakifanya biashara mahali hapo, kuna msichana mmoja ndiye ambaye alikuwa akisifika sana kutokana na chakula chake kuwa kitamu. Wafanyakazi wengi walikuwa wakila kwake, alionekana kujua kupika sana huku mara nyingi akitumia hata viungo vya kichina jambo ambalo liliwafanya hata wachina akiwepo Lucy kula chakula chake.

Chakula chake kilikuwa maarufu sana mahali hapo hata zaidi ya yeye mwenyewe. Kila siku alikuwa akiingiza fedha huku kimuonekano akionekana kuwa mwanamke mjamzito ambaye wala hakuwa na muda mwingi kabla ya kujifungua. Baada ya wiki kadhaa, mwanamke yule hakuonekana tena mahali pale jambo ambalo kila mtu akajua kwamba katika kipindi hicho alikuwa akikaribia kujifungua.







Maisha yalikuwa magumu kwa upande wake hasa mara baada ya fedha ambazo alipewa na Joshua kumuishia. Hapo ndipo picha halisi ya maisha ya shida yalipoanza kujitokeza katika maisha yake. Rose akawa mtu wa kushinda ndani tu, maisha yake yalkuwa na upweke mkubwa, kitendo cha kukosa fedha kilimuweka katika wakati mgumu sana.

Hakutaka kukata tamaa japokuwa hakuju ni kwa namna gani angeweza kupata fedha za kuweza kutatulia matatizo mbalimbali ambayo alikuwa nayo katika kipindi hicho.Majirani zake hasa Bi Fatuma ndiye ambaye alikuwa karibu nae zaidi katika kipindi hicho. Kila wakati mwanamke huyu alikuwa akiongea nae mambo mbalimbali hali iliyomfanya Rose kumwambia mambo mengi isipokuwa usagaji ambao alikuwa amefanyiwa na Irene.

Ukaribu wao haukuishia hapo, kila siku walikuwa pamoja huku Bi Fatuma akijitahidi sana kufanya vitu mbalimbali kwa ajili ya Rose. Yeye ndiye ambaye mara kwa mara alikuwa akimnunulia dawa ambazo kama mama mjauzito alitakiwa kunywa, yeye ndiye ambaye akaamua kuishi nae kama mmoja wa familia yake. Alikuwa akimpa chakula pamoja na mahitaji mengine madogo madogo.

“Unajua kupika?” Bi Fatuma alimuuliza Rose.

“Ndio najua” Rose alijibu.

“Unaweza kupika mama ntilie?” Bi fatuma alimuuliza.

“Kupika mama ntilie? Mmmh!”

“Unaguna nini tena? Au bado unayafurahia maisha haya?” Bi Fatuma alimwambia na kumuuliza.

“Hapana”

“Basi kila kitu weka chini na twende tukafanye kazi hiyo iweze kutuingizia fedha” Bi Fatuma alimwambia Rose ambaye alionekana kujishtukia kufanya kazi hiyo.

“Hakuna tatizo” Rose alijibu.

Japokuwa mdomoni alikubaliana nae lakini moyoni mwake alionekana kulikataa hilo. Kwanza alijaribu kuuangalia uzuri ambao alikuwa nao na kisha kuifananisha na biashara ambayo alitakiwa kuifanya. Alizaliwa katika familia iliyokuwa na fedha na hivyo hakuwahi kufikiria hata siku moja kama angekuja kuwa mama ntilie. Ila kwa sababu alikuwa na uhitaji wa fedha, hakuwa na jinsi, akaamua kukubaliana nae.

“Kwa hiyo tutauzia wapi?” Lilikuwa swali ambalo lilitoka mdomoni mwa Rose.

“Kuna ghorofa linajengwa kule Posta. Huko ndipo tutakwenda kufanya biashara hiyo” Bi Fatuma alimwambia Rose.

Hakuwa na jinsi, kwa sababu maisha kwa wakati huo yalikuwa magumu sana basi akaaamua kwa moyo mmoja kuanza biashara ya kuuza mama ntilie katika jengo ambalo lilikuwa kwenye ujenzi maeneo ya Posta. Kwake, kipindi cha kwanza kazi ile ilionekana kuwa kubwa sana lakini mwisho wa siku akajikuta akiizoea na kuwa kama kawaida.

Ndio, alikuwa msichana mzuri sana lakini hakukuwa na mvulana yeyote ambaye alimuonyeshea macho ya matamanio kutokana na ujauzito ambao alikuwa nao katika kipindi hicho. Ujauzito ule uliwafahamisha watu kwamba tayari Rose alikuwa na mtu kwa hiyo hakutakiwa kusogelewa na mwanaume yeyote yule katika kipindi hicho.

Mwili wake tayari ulikuwa umeongezeka, japokuwa alikuwa ni msichana mwenye mawazo kila wakati lakini mawazo yale hayakumfanya kupungua. Uzito ukaongezeka na hata mwili wenyewe kuongezeka. Uzuri haukupungua hata mara moja jambo ambalo liliwafanya wavulana kumwangalia sana kama ishara ya kuiridhisha mioyo yao.

“Oyaaa Hemedi unaweza kuniangushia jiwe la kichwa” Jamaa mmoja alimwambia mwenzake katika kipindi ambacho walikuwa wakipandisha matofali ghorofani kwa kutumia ngazi.

“Daah! Unajua Rose mzuri sana. Yaani mzuri sana” Hemedi alimwambia mwenzake.

“Najua ila sio unamwangalia hivyo mpaka unidondoshee jiwe la kichwa. Twende kwanza, Rose yupo utamwangalia hata baadae” Jamaa yule alimwambia Hemedi.

Bado uzuri wa Rose uliendelea kuwa gumzo mahali hapo. Hakukuwa na mwanaume ambaye alithubutu kumwangalia kwa mara moja na kuyapeleka macho yake pembeni, uzuri wake ulikuwa ukiendelea kuwavutia wanaume wengi mahali hapo. Uzuri wake pia ukaonekana kuwa mvuto kwa wanaume wengi kuja kwake na kisha kununua chakula, wanaume hawakutaka kupitwa na kitu chochote kile jambo ambalo lilikuwa likimfanya kupata wateja wengi na kumaliza chakula kwa haraka sana.

“Shida yangu si chakula kingi Rose” Hussein alimwambia Rose.

“Sasa shida yako nini tena?” Rose aliuliza huku akitabasamu.

“Kuna watu wamezaliwa na bahati zao bwana. Yaani toka wapo tumboni mwa mama zao, tayari walikuwa wameandikiwa bahati” Hussein alimwambia Rose.

“Sijakuelewa”CHANZO:  https://deusdeditmahunda.blogspot.com/

“Hahaha! Hivi mtu kukupa tumbo msichana mzuri kama wewe…sio bahati hiyo?” Hussein alimuuliza Rose.

“Kwa nini unasema hivyo?”

“U mzuri sana. Huyo jamaa kweli alijua kuchagua aisee” Hussein alimwambia Rose maneno ambayo yaliwafanya vijana wengi waliokuwa mahali hapo kuanza kucheka.

Yeah! Kila mtu alikuwa akikubaliana na uzuri ambao alikuwa nao Rose. Vijana ambao walikuwa wajenzi mahali hapo walikuwa wengi sana kiasi ambacho kilimfanya Rose kumaliza chakula mapema sana. Kazi hiyo ambayo kwake ilionekana kuwa ngumu kufanyika katika kipindi cha nyuma kwa sasa alikuwa akiifanya kama kawaida.

Wachina hawakuwa wakila chakula mahali hapo lakini mara baada ya Rose kujifunza kupitia vitabu vya mapishi jinsi ya kutumia viungo vya kichina katika vyakula mbalimbali, akaanza kutumia. Alipoona kwamba amepika chakula ambacho hakikuwa kingi huku akiwa ametumia viungo vingi vya kichina ambavyo alivinunua katika supermarket, Rose akamwambia Lucy ambaye akafika mahali hapo na kisha kukionja chakula hicho.

Chakula kilionekana kuwa kitamu, viungo ambavyo vilikuwa vimewekwa katika chakula kile vilionekana kupendezesha chakula kile na kuleta ladha ile ambayo Wachina walikuwa wakiitaka midomoni mwao. Hapo ndipo hata wale makarani wa kichina wakaanza kula chakula kile alichokuwa akikipika Rose. Nao Watanzania hawakutaka kupitwa, nao pia wakaanza kununua chakula hicho ambacho kilionekana kuwa na ladha tofauti midomoni mwao.

Rose hakubagua wateja, chakula chenye ladha ya viungo vya kichina kikaongezwa na hatimae kuzidi kupata wateja zaidi. Lucy ndiye ambaye alikuwa akikifurahia sana chakula hicho kiasi ambacho kila siku alikuwa mtu wa kwanza kufika mahali hapo na kisha kununua chakula ambacho kilikuwa na ladha ya viungo vya kichina.

“Where did you learn to cook Chinese food? (Umejifunza wapi kupika chakula cha kichina?)” Lucy aliuliza huku akionyesha uso uliokuwa na tabasamu.

“From differerent books (Kutoka katika vitabu mbalimbali)”

“It is very delicious (Ni kitamu sana)” lucy alimwambia Rose.

“Thank you (Asante)” Lucy aliitikia.

Siku ziliendelea kukatika mpaka katika kipindi ambacho Lucy akapotea kabisa mahali hapo. Watu walikuwa wakijiuliza juu ya mahali ambapo alipokuwepo lakini kutokana na hali ambayo alikuwa nayo kabla, wengi wakagundua kwamba katika kipindi hicho alikuwa amejifungua mtoto kutokana na mimba ambayo alikuwa nayo kuwa kubwa sana katika kipindi kile cha nyuma.

Vijana wakaonekana kumkumbuka, vijana wakaukumbuka uzuri wake lakini zaidi ya yote, walikikumbuka chakula chake ambacho kilikuwa kinaonekana kuwa tofauti sana. Hapo ndipo vijana walipojipanga kwa ajili ya kwenda kumtembelea Rose ambaye bado alikuwa nyumbani. Baada ya Lucy kupata taarifa juu ya safari ambayo walikuwa nayo wajenzi, nae akaungana nao na kisha kuanza kuelekea huko.

Rose alikuwa akipendwa na kila mtu, katika kipindi hicho kila mtu alikuwa akitaka kumuona msichana huyo ambaye zilikuwa zimepita siku arobaini tangu aache kuja katika biashara yake. Kutoka Posta mpaka Kinondoni wala hakukuwa mbali sana, wakatumia dakika chache wakafika na kisha kumsalimia Rose ambaye alikuwa na mtoto wake aliyeonekana kuwa na afya njema.

“Kabla ya yote hebu tuambie, mwanajeshi au nesi?” Hemedi, kijana aliyeonekana kuwa mchangamfu sana aliuliza.

“Nesi” Rose alijibu huku akitabasamu.

“Afadhali sasa. Nadhani mtoto wangu kapata mrembo wa kuoa” Hemedi alimwambia Rose.

Siku hiyo ikaonekana kuwa furaha kwa kila mtu, kila mmoja alikuwa akitaka kumuona mtoto wa Rose ambaye alipewa jina la Lydia. Alionekana kuwa mtoto mzuri ambaye alichukua sura nzuri ya mama yake. Lucy hakuweza kuvumilia, akamchukua Lydia na kisha kumpakata, kwake alionekana kuwa mtoto mzuri zaidi.

Rose hakutaka kwenda tena katika biashara zake, kila siku alikuwa akiishi nyumbani pale akimlea mtoto wake ambaye alizidi kukua zaidi na zaidi. Bi Fatuma alikuwa mtu pekee ambaye alikuwa akimsaidia kwa kila kitu mahali hapo. Msichana Irene ambaye alikuwa akimtegemea nae alikuwa amekwishakata mguu kufika mahali pale jambo lililoonyesha kwamba alikuwa amekasirika kutokana na Rose kupata ujauzito na hivyo kumkatalia kumfanyia usagaji.

Rose hakujali, katika kipindi hicho tayari alikuwa amekwishafungua biashara yake ya kuuza chakula hapo hapo Kinodnoni, hakutaka kwenda mbali na nyumbani hapo kutokana na kuwa na mtoto ambaye mara kwa mara alikuwa akihitaji uangalizi mkubwa. Alisaidiana na Bi fatuma katika kila kitu, kwake, alimchukulia kama mama yake aliyemzaa.

“Kwa hiyo baba yake anakuja lini kumwangalia mtoto wake?” Bi Fatuma alimuuliza Rose.

“Wala sitaki aje kwa sasa”

“Kwa nini?”

“Basi tu. Kama akipajua mahali hapa, anaweza akapigwa mkwara na baba apataje nilipo, akipataja na baba kuja hapa, itakuwa sio vizuri” Rose alijibu.

Alichokuwa amekiamua Rose ndicho ambacho alikuwa amekiamua, hakutaka Joshua apafahamu mahali hapo, alitaka kubaki hivyo hivyo mahali hapo kwa ajili ya usalama wake. Lydia hakuwa mtoto wa kulia sana, mara nyingi alikuwa kimya ila alikuwa akipenda sana kunyonya.

Kidogo maisha yalikuwa yakienda sawa, hata pale ambapo Irene alipoamua kuonyesha ubaya wake kwa kuja kuchukua kila kilichokuwa chake, Rose hakubaki mikono mitupu, alikuwa amekwishaanza kununua baadhi ya vyombo mbalimbali ndani kwake. Kuhusu kulala, wala hakujali sana, godoro ambalo alipewa na Bi fatuma ndilo ambalo alikuwa akilitumia kulalia kila siku usiku.

“Mungu yupo. Kuna siku atakuona tu” Bi Fatuma alimwambia Rose maneno ambayo yalionekana kumfariji kupita kawaida.

Miezi iliendelea kukatika, mpaka mwezi wa sita unakwisha, Rose akapokea simu moja, simu ambayo ikaonekana kumshtua kupita kawaida. Kwanza hakuamini, hakuamini kama ile simu alikuwa amepigiwa yeye. Muda wote uso wake ulikuwa ukitabasamu kwa furaha, alikuwa akiongea huku machozi ya furaha yakiwa yakimtoka. Kwake simu ile ikaonekana kuwa kama sapraizi, akajikuta akizidi kutokwa na machozi zaidi.

Simu ilipokatika, Rose akaruka juu kwa furaha, simu ile ambayo aliipokea ikaonekana kumfurahisha kupita kawaida. Kelele za furaha yake ndizo ambazo zikamfanya Bi fatuma kufika ndani ya chumba kile ambapo akamkuta Rose akiendelea kuruka kwa furaha.

“Umasikini basiiiiiiiii….!” Rose alimwambia Bi Fatuma ambaye alionekana kumshangaa.

CHANZO:  https://deusdeditmahunda.blogspot.com/





Yeah! Ilikuwa ni simu, simu moja ambayo ilimfanya Rose kuwa na furaha kupita kawaida, ilikuwa ni simu ambayo ilimfanya kujiona kama alikuwa anakwenda kuwa milionea katika kipindi kichache kijacho. Katika kipindi chote hicho, Rose alionekana kuwa na furaha zaidi, alikuwa akijipa uhakika kwamba katika kipindi kichache kijacho maisha yake yangekwenda kubadilika kabisa.

Hakuamini, alikuwa akijiona kama yupo ndotoni ambapo baada ya kipindi kichache kuamka na kujikuta yupo katika godoro lililochoka ambalo alikuwa amepewa na Bi Fatuma ambaye alionekana kumjali kupita kawaida huku pembeni akiwepo mtoto wake, Lydia. Rose hakutaka kuongea kitu kingine kwanza, alikuwa akihitaji muda wa kushangilia hata kabla hajaongezea maneno mengine yenye furaha.

Bi Fatuma alikuwa na hamu ya kutaka kujua kuhusiana na simu ile ambayo ilimfanya Rose kuwa na furaha kupita kawaida. Kila alipomtaka Rose aongee zaidi na zaidi lakini Rose akaonekana kushindwa, bado furaha ilikuwa imemkaba kooni na hivyo alihitaji kufurahia zaidi. Bi Fatuma hakuonekana kujali sana, alichokifanya ni kumpa nafasi zaidi ya kufurahia kwa kuamini kwamba baadae angeweza kumwambia ni kitu gani ambacho kilikuwa kimeendelea mpaka kuwa katika hali ile ya furaha. Baada ya kufurahia sana na kushangilia, Rose akakaa chini.

“Haya sasa niambie, kuna nini?” Bi Fatuma alimuuliza Rose.

“Nimepigiwa simu”

“Kutoka wapi?” Bi Fatuma alimuuliza.

“Kutoka kwa Bi Lucy”

“Yule mchina?” Bi fatuma aliuliza huku akionekana kushtuka.

“Ndio”

“Amesemaje?”

“Daah! Sijui niseme nini aiseee...yaani siamini” Rose alisema huku uso wake ukionekana kuwa na furaha tele.

“Kuna nini tena Rose? Mbona unanihadithia nusu nusu?” Bi Fatuma alimuuliza.

“Amenitaka niende nikaishi kwake” Rose alijibu huku meno yote yakionekana.

“Ukaishi kwake?” Bi Fatuma aliuliza huku akionekana kushtuka.

“Ndio. Daah! Najiona kubadilisha maisha yangu” Rose alimwambia Bi Fatuma.

“Ila bado sijajua kabisa kuhusiana na hilo. Ukaishi kwake ili iweje?” Bi Fatuma alimuuliza Rose.

“Nikaishi kwake na kumsaidia kazi zake za pale nyumbani kwake. Hii ni taarifa nzuri sana kwangu, naamini shida zote zimefikia ukingni” Rose alimwambia Bi fatuma.

“Na vipi kuhusu mtoto?”

“Amesema niende nae pia”

“Sawa. Hiyo ni bahati lakini kamwe usisahau ulipotoka. Mshukuru Allah kwa kila kitu” Bi Fatuma alimwambia Rose.

“Siwezi kusahau na siwezi kumsahau Mungu. Kila siku nitatakiwa kumshukuru kwa kila kitu” Rose alijibu.

Siku hiyo ikaonekana kuwa siku nyingine, siku mpya ambayo Rose alikuwa ameiingia katika maisha yake, siku ambayo ilimpa furaha ambayo wala hakuwa akitegemea hata kidogo. Kitendo cha yeye kuitwa na Bi Lucy kwenda kuishi kule ndicho kitu ambacho kilionekana kumpa furaha kupita kawaida. Kwake, alikuwa na uhakika kwamba alikuwa anakwenda kubadilisha maisha yake katika kipindi hicho.

Mbele yake aliyaona mafanikio yakija kwa kasi sana, aliona kila kitu katika kipindi hicho kingekwenda vizuri kama ambavyo alikuwa amepanga, maisha ya shida na dhiki ambayo aliyaona kwamba angeyaishi mtoto wake, Lydia yakaonekana kuanza kufutika akilini mwake, katika kipindi hicho alijiona akikaribia kuishi katika maisha ya mafanikio kupita kawaida.

Kwake, kwa kitendo cha kwenda kuishi na Bi Lucy kikaonekana kuwa kitendo kimoja ambacho kilitakiwa kufanyika kwa haraka sana bila kujifikiria. Katika kipindi cha siku mbili za mbele, alitakiwa kuanza kazi kwa Bi Lucy, chakula ambacho alikuwa akikipika huku akiweka viungo vingi vya kichina ndivyo ambavyo vilionekana kumvutia Bi Lucy mpaka kufikia hatua ya kumtaka Rose aende akafanye kazi ndani ya nyumba yake.

Rose hakutaka kumfikiria Irene, alikuwa amepuuzia kila kitu ambacho kilikuwa kimetokea katika maisha yake ya nyuma. Ni kweli kwamba alikuwa msagaji katika kipindi cha nyuma lakini ile haikumaanisha kwamba katika kipindi hicho alikuwa msagaji kama kipindi cha nyuma, kwa moyo mmoja alikuwa ameamua kuyabadilisha maisha yake, hakutamani tena kuwa msagaji.

Ukiachana na Irene, pia hakutaka kumfikiria sana baba yake, kwake, mwanaume huyo alionekana kutokuwa na utu, alikuwa akitumia nguvu zake kumlea mtoto katika malezi ambayo wala hakuwa akiyapenda, malezi ambayo hayakumpa uhuru wowote kwa kumfanyia jambo hili na lile. Katika kipindi cha nyuma alikuwa akimchukia sana baba yake lakini katika kipindi hicho hakuwa na jinsi, alitakiwa kumpenda baba yake, Bwana Shedrack kwani hakutaka kuanza safari ya mafanikio huku akiwa na mzigo wa chuki moyoni mwake.

Ukiachana na hao pia kulikuwa na mtu mwingine, huyu alikuwa Peter. Kwanza alichokifanya ni kusahau kila kitu ambacho alikuwa amekifanya pamoja na mwanaume huyo ambaye alikuwa na mapenzi ya dhati, mwanaume ambaye alikuwa akipambana kila siku kuhakikisha kwamba Rose anakuwa wake. Baada ya msaada mkubwa wa Bwana Shedrack, Peter akafanikiwa lakini hilo halikuwa jambo ambalo lilimpa furaha, alikuwa na Peter si kwa sababu alikuwa akipenda kuwa na mwanaume huyo, hapana, alikuwa nae kwa sababu alikuwa akitaka kumridhisha baba yake ambaye hakuonekana kuwa muelewa hata kidogo.

Ukiachana na hao wote, kulikuwa na mtu mwingine, mtu huyu alionekana kuwa maalumu kwa ajili yake, mtu ambaye alikuwa na mapenzi ya dhati, inawezekana kuwa zaidi ya watu wote, huyu aliitwa Joshua. Mwanaume huyu ndiye alikuwa mwanaume wa kwanza kupata nafasi ya kuuchezea mwili wake na kisha kufanya nae mapenzi kwa mara ya kwanza na kufanikiwa kumpa ujauzito.

Huyo ndiye alikuwa mwanaume pekee ambaye alikuwa ndani ya kichwa chake katika kipindi hicho, ni mara nyingi sana alikuwa akimkumbuka kwa mengi lakini katika kipindi hicho hakuwa na jinsi, alitakiwa kuishi maisha yake kwa wakati huo, maisha ya kujitegemea pamoja na mtoto wake huku akiamini kwamba kuna siku angeweza kuwa tena pamoja na mwanaume huyo ambaye alimpa nafasi kubwa ndani ya moyo wake.

Baada ya siku mbili kutimia, moja kwa moja Rose akafuatwa na gari mpaka nyumbani pale na kisha Bi Lucy kuteremka na kisha kumchukua na kuondoka nae kwa ajili ya kuanza maisha ndani ya nyumba yake. Bado kila kilichokuwa kikitokea kwa wakati huo kilizidi kuonekana kama ndoto fulani ambayo baada ya muda fulani angeamka na kujikuta pale pale pa kila siku, kwenye godoro lililochoka.

Kila kilichokuwa kikiendelea hakikuwa ndoto, kilikuwa ni kitu halisi ambacho kilikuwa kikiendelea kufanyika katika ulimwengu halisi. Ndani ya gari, Rose alitamani kulia, hakuamini kama leo hiyo alikuwa akienda kuishi na mchina, mchina ambaye alionyesha kwamba alikuwa na mapenzi ya dhati kwake.

Baada ya kufika nyumbani, hapo ndipo Rose alipoanza kufanya kazi zake. Kila kitu ambacho alikuwa akikifanya hakikuwa kikubwa sana na mara nyingi kazi zake wala hazikuwa kubwa kama alivyokuwa akifikiria kabla. Kama kufua, kulikuwa na mashine za kufulia, kama kupiga deki, kulikuwa na vifaa maalumu ambavyo vingemfanya kutokuinamana na kuuchosha mgongo wake.

Maisha yake nyumbani hapo yakaonekana kuwa mazuri, kila siku Bi Lucy alikuwa akipenda kukaa karibu na Rose huku akitamani sana kuisikia historia ya maisha yake ambayo ilimfanya kuwa mahali pale. Kwa Rose, wala hakutaka kumficha Bi Lucy, akajaribu kumwelezea kila kitu ambacho kilikuwa kimetokea katika maisha yake, hakuficha kitu, hata suala la usagaji alikuwa amelizungumzia kwa ukaribu sana.

Ile ikaonekana kuwa stori mbaya ambayo ilimuumiza hata Bi Lucy mwenyewe, hakuamini kama kulikuwa na mwanamke ambaye alikuwa na umri wake ambaye alipitia katika matatizo kama yale. Japokuwa alikuwa amesahau mengi lakini Bi Lucy alikuwa akimfariji kila siku, faraja ambazo zilimfanya Rose kuwa imara zaidi na zaidi.

Mara kwa mara, Lee ndiye ambaye alikuwa akicheza sana na Lydia, Lee akaonekana kuvutiwa sana na Lydia huku akipenda kumbeba na kwenda nae huku na kule japokuwa alikuwa na miaka mitatu na nusu tu. Wote kwa pamoja wakaungana na kuwa kama familia moja, Rose hakuchukuliwa kama mfanyakazi ndani ya nyumba hiyo, alichukuliwa kama mmoja wa familia hiyo.

“Kuna vitu ambavyo vitatakiwa kufanyika. Unaonaje kama baadae tukaenda kufanya manunuzi ya nguo?” Bi Lucy alimuuliza Rose.

“Hakuna tatizo” Rose alijibu.

Hayo ndio yalikuwa maisha ambayo walikuwa wakiishi, Rose akaonekana kuridhika na kuvutia zaidi mpaka kuwa zaidi ya uzuri ambao alikuwa nao katika kipindi cha nyuma. Muonekano wake ukawavutia vijana mbalimbali waliokuwa wakifika mahali hapo lakini kwa Rose wala hakuonekana kujali kabisa.

Mwaka wa kwanza ukapita, bado Rose alikuwa ndani ya nyumba hiyo, mwaka wa pili ukapita mpaka mwaka wa tano kuingia. Hakukuwa na kitu ambacho alikuwa akikikumbuka nyuma zaidi ya kumkumbuka Bi Fatuma ambaye alikuwa akiwasiliana nae sana pamoja na Joshua ambaye toka aondoke nyumbani hakuwa amewasiliana nae tena.

Katika miaka mitano, Lydia alikuwa amekua sana na hivyo kuwa mmoja wa wanafunzi katika shule ya St Marry ambayo alikuwa akisoma pamoja na Lee. Ukaribu wao ulikuwa mkubwa kila siku, walimu walikuwa wakiwashangaa huku mara kwa mara wakihoji maswali lakini hakukuwa na mtu ambaye alikuwa akifahamu kile ambacho kilikuwa kikiendelea kwa watoto hawa.

Katika vichwa vyao, Lee alionekana kuwa tofauti sana, alikuwa na akili nyingi kupita kawaida. Katika umri wa miaka nane ambao alikuwa nao alipitishwa madarasa mawili lakini bado huko alikuwa kichwa zaidi ya wanafunzi wote. Ni kweli alikuwa mtundu lakini pamoja na utundu wake huo, alikuwa akipenda sana kukaa na kompyuta mapajani mwake japokuwa hakuwa akijua ni kitu gani ambacho alikuwa akitakiwa kukifanya.

Lyidia hakuwa na akili sana kama ilivyokuwa kwa Lee lakini mara nyingi Lydia alionekana kuwa mtoto mpole ambaye hakupenda kuongea na watoto wengi shuleni pale. Katika siku za kwanza walimu walifikiri kwamba Lydia alikuwa mgonjwa lakini mara baada ya kumsoea, wakagundua kwamba ile ndio ilikuwa asili yake.CHANZO:  https://deusdeditmahunda.blogspot.com/

Watoto wawili wenye tabia tofauti wakawa wakiishi pamoja, Lee alikuwa mtundu na muongeaji sana ila kwa Lydia alikuwa mpole na mkimya sana. Lee hakupenda kumuona Lydia akiwa katika hali hiyo, kila siku alikuwa akitaka kumuona Lydia kiwa muongeaji kama yeye lakini Lydia hakuonekana kubadilika kabisa, bado alikuwa akiendelea kuwa kimya na mpole sana.



Endelea ku LIKE, ku COMMENT hata ku SHARE ili story hii tamu na ya kuvutia iweze kuwafikia na wenzako wapate kujifunza kitu hapa.

Je nini kitaendelea?

Je nini kitatokea katika maisha ya wawili hawa?

Je kahaba kutoka China ni nani?

Je Joshua yupo wapi?

Je Peter ataweza kumpata Rose wake?



ITAENDELA