KITANZI, KISU NA BASTOLA - 3

 

Simulizi : Kitanzi, Kisu Na Bastola

Sehemu Ya Tatu (3)



“Simama hapohapo!” Salima alisema akimkatiza usemi Madam Flaviana na kushuka haraka akikimbilia moja kwa moja hadi ndani ya nyumba, macho yake yakakutana na mlango wa chumba chake ukiwa wazi huku kila kitu ndani ya chumba chake kikionekana isipokuwa Dedan.

Songa nayo…

CHANZO:  https://deusdeditmahunda.blogspot.com/

Salima hakuwa na muda wa kumshukuru Mungu baada ya kuona kila kitu chake kilikuwa salama, badala yake alizidi kupata wasiwasi na hofu baada ya kubaini kuwa Dedan hakuwepo ndani ya chumba hicho.

Madam Flaviana alimfuata kwa nyuma na kuingia katika nyumba hiyo ambapo watu na majirani walishaanza kutokeza vichwa vyao wakimshangaa Salima na huyo mgeni aliyeambatana naye kwa jinsi walivyopendeza huku watoto wa uswahilini wakilichezea gari la Madam Flaviana kila moja akidai ni la kwake.

Salima alishindwa kujizuia, alikaa chini na kuangua kilio akilitaja jina la Dedan. Madam Flaviana hakuwa akijua kilichokuwa kinaendelea, lakini kwa hali aliyoiona akajua kwamba huyo Dedan aliyekuwa akiishi na Salima hakuwepo chumbani humo jambo ambalo lilikuwa kweli.

Akajitahidi kumkokota Salima huku akimbembeleza hadi ndani ya chumba chake na kumwacha akilia kama mtoto kisha akatoka nje na kuulizia watu kama walimuona mwanaume yeyote akitoka ndani ya chumba hicho.

Watu wote walikuwa kimya wasijue kama Salima alikuwa akiishi na mwanaume mle ndani na wengine wakishangazwa na taarifa za kupotea kwa mtu aliyekuwa akiishi ndani ya chumba hicho na Salima bila ya wao kujua.

Madam Flaviana akiwa katika hali ya kukata tamaa, mtoto mmoja wa kiume alimfuata na kusema alimuona mwanaume mmoja akitokea chumba kilekile alichokuwemo Salima na kuelekea barabara ya Machinjioni.

Kwa siri kubwa Madam Flaviana akamvuta mtoto yule pembeni na kumuuliza kama kuna mtu mwengine alimwambia kuhusu jambo hilo, mtoto yule alijibu kuwa hakuna mtu yeyote aliyemwambia isipokuwa yeye tu.

“Safi sana, sasa usiseme kwa mtu umesikia eeeh!” alisema Madam Flaviana na kuchomoa noti ya shilingi elfu kumi na kumpa, lengo lake likiwa ni kumtenga Salima na jambo lolote litakalomtoa kwenye akili ya kazi waliyotaka aifanye.

Madam Flaviana alijua fika kuwa uhusiano wa mapenzi na kazi zao jinsi zisivyochangamana. Tangu mwanzo alipopata taarifa kuwa Salima alikuwa akiishi na Dedan alikuwa akifikiria jinsi ya kuwatenganisha na siku hiyo ilikuwa kama bahati kwake, ikiwa kama Dedan alitoka humo ndani mwenyewe au lah! Salima hakupaswa kuujua ukweli.

Kwa kificho akatoa simu yake na kumpigia Side akitoa maelekezo amfuatilie mwanaume fulani barabara ya Machinjioni na ikiwezekana ammalize mara moja. Side alifanya kama alivyoamrishwa, akakitonya kikosi kazi chake na mara moja wakaingia mtaani kumsaka Dedan wakati kwa upande wa pili, Madam Flaviana alimdanganya Salima kuwa kampuni imewataarifu polisi na tayari walikuwa wakimtafuta.

Akamshawishi waondoke maeneo hayo kwa usalama wake kwani alimfanya Salima aamini kuwa watu waliotumwa na Caro ndiyo waliomteka Dedan. Salima alikubali kwa kuwa aliamini Dedan hakuweza kusimama wala kutembea mwenyewe na hata kama angeweza kufanya hivyo isingekuwa rahisi kuufungua mlango kwani alikumbuka vyema alivyoufunga, tena kwa ufunguo.

Ni wazi aliyoyasema Madam Flaviana yalikuwa na ukweli ndani yake, akakubali kuondoka maeneo hayo huku akichukua baadhi ya vitu muhimu.

***

Ndani ya jengo kubwa la ‘serenity’ salima alikuwa ndani ya ‘lifti’ akiongozwa na Madam Flaviana mpaka kwenye chumba kilichokuwa ghorofa ya sita alichooneshwa kuwa makazi yake mapya. Mazingira mazuri ya chumba hicho hayakumfanya amsahau Dedan hata kidogo.

Katika mawazo yake alishawishika kuwa kutoweka kwa Dedan ulikuwa ni mchezo aliochezewa na Carolina kama alivyodanganywa na Madam Flaviana. Uoga na hasira vyote vilimjaa kwa pamoja akashawishika kuwa ‘Serenity’ ni mahali salama kwake kwa muda huo japo hakukubali kama amempoteza Dedan moja kwa moja kiasi cha kutoonana naye maisha yake yote.

“Siku moja nitakuona mpenzi wangu, utakuwa wangu tena,” alijiliwaza Salima huku machozi yakimlengalenga. Akapitiwa na usingizi huku akiombea yote yaliyotokea yawe ndoto ya mchana isiyo na ukweli wowote wakati atakapoamka.

***

Usiku uliingia, Dedan alizidi kutokomea mitaani huku njaa ikizidi kumuuma. Hakuna mtu aliyekuwa akimjali hata pindi alipojibana kwenye kona ya Ofisi ya Serikali ya Mtaa wa Mwanakwetu akiugulia njaa kali asijue dawa yake.

Kama angelijua kuwa chakula ndiyo tiba ya ugonjwa wake si ajabu angeishajiunga na mapunguwani wenzake waliojazana karibu na jalala kubwa la jiji wakigombania mabaki ya vyakula jirani kabisa na mahali alipokaa, lakini Mungu wake kwa siku hiyo hakuwa kabisa na mja wake huyo. Kiu na njaa kali vilimfanya adhoofu na kupoteza fahamu kabisa, akalala kifo kikimnyemelea, ubongo wake ukiimba nyimbo za huzuni huku taswira na jina la msichana mzuri aitwaye Carolina ikififia kichwani mwake..



Usiku huo giza lilikuwa nene kupita kiasi. Watu wengi tayari walisharudi kutoka kwenye mihangaiko ya kila siku na kujifungia majumbani mwao. Hakuna hata mmoja aliyejua kama kuna mtu aliyekuwa akitaabika na njaa huko nje pasipo kuwa na msaada wowote.

Kadiri muda ulivyozidi kwenda mbele, ndipo kibaridi cha usiku kilizidi kuvuma na kumfanya Dedan azinduke kutoka katika usingizi wa kifo uliompitia. Kidogo fahamu zake zilirejea, akasimama na kutazama kila kona kama vile hakumbuki kama alienda mahali hapo mwenyewe.

Ghafla, tone zito la maji ya baridi lilimwangukia mkononi, akalitazama na kulipangusa mara moja. Mara matone mengi zaidi yalizidi kumwangukia kila sehemu ya mwili wake huku upepo mkali ukiyumbisha miti na mapaa mahali hapo. Kufumba na kufumbua ilizuka mvua kubwa ya upepo.

Dedan akiwa hafahamu lolote, akasimama mahali hapo amejikunyata kwa baridi huku akilowa na mvua pasipo kujua jinsi ya kujikinga nayo. Mvua ilinyesha na kuilowanisha midomo yake mikavu, kidogo maji yaliyopenya yalimpa ladha nzuri katika ulimi wake. Akaachama mdomo huku akiyameza maji ya mvua yaliyokuwa yakitiririka kwa wingi usoni mwake.

Aliendelea kunywa mpaka tumbo lake likagoma kupokea maji tena. Hapo ndipo alipogundua tiba ya kiu chake japo tumbo lilianza kumuuma huku baridi kali likimpiga kila kona, alianza kutetemeka.

Kwa mwendo wa kasi gari moja lilipita maeneo hayo na kufunga breki mbele ya Dedan. Mara moja watu watatu waliovalia makoti makubwa ya mvua walishuka na kumsogelea Dedan. Mkubwa kuliko wote ambaye alionekana kama kiongozi wao, alitoka na kusimama karibu kabisa na gari lile huku wale wawili wakimfuata Dedan.CHANZO:  https://deusdeditmahunda.blogspot.com/

“Wewe kwa nini upo hapa peke yako?” alisema mmoja wao kwa ukali akimwambia Dedan huku akitazama kila upande kuhakikisha kwamba hakukuwa na mtu karibu.

“Una uhakika ni huyu?” yule mwingine alimuuliza mwenzake huku akionekana kuchoka sana kwa kazi fulani waliyoifanya siku hiyo.

“Funga domo lako bwana we huoni ninajaribu?” alijibu kwa hasira mtu yule wa mwanzo na kumtikisatikisa Dedan aliyesimama akiwatazama kwa uwoga.

“Lazima atakuwa ndiye huyu, angalia!” yule mtu wa mwanzo alimwambia mwenzake baada ya kugundua kucha fupi na ndevu zilizokatwa vizuri usoni kwa Dedan japokuwa alikuwa mchafu kama chizi wengine.

Wote wawili walikubaliana kuwa huyo ndiye mtu waliyetumwa kumtafuta na Side, wakamuangalia yule mtu mwingine aliyesimama nyuma yao akatoa ishara fulani. Mara moja Dedan akapigwa mtama na kufungwa kamba mikono na miguu kisha wakamtupa ndani ya buti la gari na kupotea maeneo hayo.

***

“Haloo (kimya kidogo) ndiyo lakini lazima tuhakikishe kama huyu ndiye Dedan kweli kabla hatujafanya jambo lolote (kimya kidogo..) okey, basi kama Salima atakuwa na picha yake litakuwa jambo zuri (kimya kidogo..) kama atakuwa ni huyu tuliye naye basi hesabu kama kazi imekwisha tayari,” aliongea Side kwa njia ya simu na mtu mwingine.

“Wewe ni Dedan au siyo?” aliongea Side akimtazama Dedan aliyekuwa akifakamia chakula kwa pupa baada ya kuiga mfano kutoka kwa mtu fulani aliyemuona akila pembeni yake.

Kwa jinsi Side alivyosimuliwa na Madam Flaviana kuhusu Salima alivyosahau kumpa chakula Dedan kwa siku nzima, alimuonea huruma mtu huyo na kumpa chakula.

Side alikuwa na amekuwa akishuhudia mara nyingine  kusababisha au kufanya mauaji ya watu wengi kwa manufaa ya ‘Serenity.’ Hakufikiria kama angetumwa tena kumuua mtu mwingine ambaye hana hatia kwa masilahi ya kampuni hiyo. Dhamira yake daima imekuwa ikimsuta kwa yote aliyoyafanya. Akaamua lolote na liwe, lakini kwa mikono yake hata mwaga damu ya mtu mwingine tena lakini lazima atafute njia ya kumficha mtu huyo ikiwa ni Dedan kweli.

***

Kama kuna mtu alifahamu kuwa ndani ya vyumba vya ‘Serenity’ kulikuwa na siri basi alikuwa amekosea. Kuanzia sakafuni mpaka kwenye paa, jengo zima lilikuwa limesheheni vinasa sauti na kamera za ‘CCTV.’ Kwa hiyo kila kitu kilichokuwa kikifanyika na kuongelewa humo ndani, kilikuwa kinasikiwa na kuonwa na Mr. John Chakos aliyekuwa maili mia moja kutoka katika jengo hilo.

Chakos alijua vema yupi kati ya wasichana walioingia humo mjengoni hana ari ya kazi na yupi kwa pesa alizopata kwa kazi hiyo alikuwa radhi kukaa hapo ‘Serenity’ kwa miaka yote ya maisha yake.

Tangu Salima alipoingia ndani ya jengo hilo Mr. John Chakos, alikuwa akimtazama kupitia kompyuta yake. Alimtazama usiku mzima jinsi alivyokuwa amelala, mpaka asubuhi ya siku hiyo mpya. Alishinda akimuangalia Salima alivyokuwa akioga na kuvaa nguo zake na hata akitembea ndani ya korido za jengo hilo.

Nafsi yake ilianza kujaa tamaa ya kufanya mapenzi na msichana huyo.



Salima kwa upande wake aliamka asubuhi na mapema akiwa na nia ya kumuuliza Madam Flaviana kama mpenzi wake, Dedan alikuwa amepatikana. Akatembea akikatiza korido kadhaa akikielekea chumba ambacho alielekezwa tangu jana yake kuwa ni cha Madam.

Kama vile Madam Flaviana na Salima walikuwa na fikra sawa, kabla hata Salima hajabisha hodi kwenye mlango wa chumba hicho, Madam Flaviana naye alikuwa akitoka mlangoni. Wote wakakutana kwenye korido.

“Waoh! Salima, umeamkaje leo? Nifuate tukapate kifungua kinywa,” alisema Madam Flaviana kwa mshtuko kwani hakutegemea kama Salima angekuwa hapo mlangoni kwa wakati huo.

“Madam, polisi wamepata taarifa zozote kuhusu Dedan?” Salima alimuuliza Madam Flaviana bila kupepesa macho yake.

“Hapana mpaka sasa bado hatujasikia lolote, lakini polisi walikuwa wakihitaji picha zake ili wamtafute kiurahisi, si unazo?”

“Ndiyo ninazo ngoja nikuletee,” alisema Salima na kukimbilia chumbani kwake mara moja ambapo alirudi na picha kibao za Dedan na kumkabidhi Madam Flaviana achague ipi moja wapo iliyokuwa ikionekana vizuri ili aipeleke haraka polisi wakamtafutie mpenzi wake.

Mara baada ya Madam Flaviana kuzipata picha hizo alifurahi kimoyomoyo akijua kuwa kama Dedan ndiye yule mtu aliyekamatwa na kikosi kazi kilichoongozwa na Side jana yake, basi huo ndiyo ulikuwa mwisho wake. Akamsikitikia Salima kwa kutokujua dhumuni lake kisha akainua simu na kumpigia Side akimtaka aonane naye mara moja ili amuoneshe picha hizo kama zilikuwa zikifanana na huyo mtu waliye naye huku Salima akizugwa kuwa Madam alikuwa akiongea na ofisa fulani wa polisi.

Baada ya kunywa chai, Madam Flaviana alimpeleka Salima kwenye jukwaa kubwa na kumfundisha jinsi ya kutembea kama mamiss ‘catwalk.’ Akamfundisha pia na maneno machache ya kumkarimu mtu kwa lugha ya Kiarabu bila Salima mwenyewe kujua kusudi la somo hilo kuwa ni kumuandaa kwa ujio wa Prince Khalfan, mgeni kutoka Falme za Kiarabu.

Kwa kuwa Salima alionekana na mawazo mengi kuhusu Dedan, Madam Flaviana aliona ni vyema amshawishi Salima kunywa pombe ili angalau apoteze mawazo. Madam Flaviana akajifanya kama vile alikuwa akimfundisha Salima majina mbalimbali ya vinywaji vikali na ladha yake, ambapo ilibidi Salima aonje na kutambua ladha ya kila pombe aliyopewa, somo ambalo Salima alivutiwa nalo na kujikuta siyo tu akionja, bali akinywa pombe hizo kwa kiwango kikubwa hadi akapoteza fahamu.

Haraka wasichana waliokuwa wakihudumia mahali hapo wakambeba Salima na kumpeleka chumbani kwake kisha wakarudi na kuendelea na shughuli zao. Madam Flaviana akautumia muda huo kukutana na Side ili amuoneshe picha za Dedan alizozipata kutoka kwa Salima.

***CHANZO:  https://deusdeditmahunda.blogspot.com/

“Vipi mume wangu mbona haupo sawa leo?” aliongea Sonia akimtazama mumewe Side ambaye tangu alipopokea simu ya Madam Flaviana aliyemtaarifu kuwa picha za Dedan zilikuwa zimepatikana alikuwa na wasiwasi mkubwa huku mikono yake ikitetemeka.

Side alikuwa akiomba kimoyomoyo huyo kijana waliyemteka na kumhifadhi kwenye godauni la kiwanda cha vyuma ‘BIASI,’ asiwe Dedan kweli, kwani kwa vyovyote kama ni yeye basi kifo chake kilikuwa kikimkaribia. Akajikaza na kuvaa shati lake ambapo alikosea kufunga baadhi ya vifungo kwa uoga na wasiwasi.

“Niambie ni nani sasa waliyekutuma ukamuue?” Sonia alizidi kumtwanga maswali Side, utadhani alikuwa akimfahamu vyema Side kiasi cha kutambua hata baadhi ya siri zake za kazi.

“Nitakwambia nikirudi,” Side aliondoka na kufunga mlango kwa nguvu huku Sonia akibaki njia panda asijue ni kipi kilichokuwa kikimsumbua mumewe japo kuwa alipatwa na hisia kuwa lazima damu itamwagika mahali fulani.

***

Sonia alikumbuka vyema siku ambayo alimuona Side akitetemeka kwa hofu ya kuua kama alivyomuona siku hiyo. Alikumbuka ambavyo alitamani kuifutilia mbali tarehe na mwezi ule ili isahaulike kabisa kutoka kwenye kalenda.

 Siku hiyo yeye Sonia, alikuwa ndiye mtu aliyetakiwa kuuawa na Mr. John Chakos.



Side aliyeiseti vyema bunduki yake katikati ya paji la uso wa Sonia, hakuweza kufanya chochote zaidi ya kumtazama kwa huruma.

Sonia alikumbuka kuwa katika saa hizo zilizokosa nuru, ndipo alipomuona Side akiwa katika hali kama hiyo aliyomuona nayo muda mfupi uliopita.

Ni wazi Side alikuwa akitetemeka kwa hofu ya kutekeleza kile alichotumwa na bosi wake. Hatimaye Side aliishusha silaha yake na kumtorosha Sonia kwa siri akimficha hapo katika Kijiji cha Ulongoni, nje kidogo ya mji na kuanza maisha mapya.

Kwa msaada wa Side, Sonia alikuwa hai mpaka siku hiyo, hivyo Sonia hakusita kulipa fadhila kwa kukubali kuishi na mwanaume huyo kwa kuwa ni siku nyingi alikuwa akimuonesha wazi kuwa alikuwa akimpenda, lakini hakuweza kumwambia kutokana na hali ya maisha ilivyo ndani ya jumba la ‘Serenity.’

Kanuni zilijieleza wazi; Sonia alipaswa kuwa malaya wa kimataifa na Side alikuwa kibaraka wa kuhakikisha hayo yalifanyika bila kuuliza swali au kuingilia upande usiomhusu, kwa hiyo chochote alichojisikia moyoni mwake kuhusu Sonia kilipotea na upepo mpaka siku hiyo.

Kwa vile Side alikuwa akiaminiwa sana na Chakos, hakukuwa na mtu yeyote aliyefuatilia kama alikuwa ameshafanya mauaji kama alivyokuwa ameagizwa au lah, kwani kwa kufoji maiti ya msichana mwingine, Side aliweza kumshawishi Mr. Chakos kuwa alitekeleza kila kitu kama alivyotumwa na bosi wake.

Tangu siku hiyo, Sonia alikuwa ni mtu wa kukaa nyumbani tu huku muda wote akiufunika uso wake kwa baibui na nikabu ili watu wasijue kuwa yupo hai kwa kuwa kama angetambulika, hatari isingekuwa kwake pekee, bali hata kwa mumewe na watoto wake pia.

Kwa uoga, Sonia alikaa chini na kusali akiomba kwa Mola wake kila kitu kiende salama kwa mumewe na huyo mtu aliyekuwa katika hali ya kuitetea roho yake.

***

Diana na Zubeda walikuwa katika vyumba vyao chini ya Madam Bernadeta ambaye alikuwa ni kiongozi wa hosteli yao. Katika kila upande wa jengo kulikuwa na hosteli moja na kiongozi wake ambaye kazi yake ilikuwa ni kuhakikisha kila msichana alifanya kama alivyokuwa akiagizwa kutoka ngazi ya juu ambayo ni Madam Flaviana, naye akiongozwa na Mr. John Chakos.

Chakos naye alikuwa chini ya Mr. George japokuwa hakuna mtu yeyote aliyewahi kuiona sura yake, hakuna, hata Chakos mwenyewe hakuwa akimfahamu mbali na kupewa maelekezo ya sauti na maandishi.

Siku hiyo, Madam Bernadeta alikuwa na ujumbe kwa msichana Diana ambaye alikuwa akihitajika mara moja na utawala. Pasipo kujua jambo aliloitiwa, Diana alisimama na kumfuata Madam Bernadeta mara moja na kufungua mlango wa chumba kilichokuwa ghorofa ya juu kabisa.

Mara milio ya risasi ikifuatiwa na sauti kali iliyoashiria maumivu makali ilisikika kwa mbali kutoka ndani ya chumba hicho. Kufumba na kufumbua kukawa na damu kila mahali, zikichirizika kutoka katika mwili wa Diana.

“Safisha chumba na hakikisha hakuna mtu atakayejua kuhusu jambo hili, sawa!” Iliongea sauti ya kiume kutoka kwenye spika zilizokuwa ukutani ikimwambia Madam Bernadeta aliyekuwa amejibana nyuma ya chumba alichoingia Diana.

“Ha…hakuna mtu atakayefahamu bosi,” alijibu Madam Bernadeta kwa uoga.

“Vizuri, kesho asubuhi atakuja msichana mpya, jina lake ni Salima. Mpokee na mfahamishe kila kitu anachotakiwa kukifanya, nitakuwa nikifuatilia kila kitu!”

“Sawa Mr. Chakos,” alijibu Madam Bernadeta huku sauti kali ya Mr. John Chakos ikipotea taratibu kwa njia ya mwangwi na kukiacha chumba alichoingia Diana kikiwa na ukimya wa hali ya juu.

“Ooh, my God!” alihuzunika kimoyomoyo Madam Bernadeta mara baada ya kuuona mwili wa Diana ukiwa sakafuni hali ukiwa na matundu mengi ya risasi. Aliyafumba macho ya Diana ambayo bado yalikuwa yakitazama kisha akaiburuza maiti yake mpaka kwenye sinki kubwa lililojaa uji wa shaba iliyoyeyushwa na kuitumbukiza humo mpaka ikayayushwa na uji huo wa moto.

“Ulichokitaka umekipata, si ulitaka kurudi nyumbani?” aliongea peke yake Madam Bernadeta huku akichora ishara ya msalaba hewani kama padri aombeavyo maiti.

***

“Angalia!” aliongea Madam Flaviana huku akimpatia bahasha ndogo Side aliyeipokea kwa mashaka na kuifungua.

“Ndiye, siye?” aliuliza Madam Flaviana akimtazama Side aliyekuwa akizikodolea picha alizozitoa ndani ya bahasha ile.CHANZO:  https://deusdeditmahunda.blogspot.com/

“Vipi?” Madam Flaviana aliuliza tena baada ya kumuona Side akitetemeka kwa hofu kama mtu aliyeona jini.

Picha zilikuwa sawa kabisa na mtu waliyemkamata usiku wa jana yake, isipokuwa tofauti ilikuwa ni unene na nywele ambazo kwenye picha alikuwa nazo tofauti na alivyomuona.

Akili ya Side ikafanya hesabu za harakaharaka na kujipongeza kwa kile alichokiita kujihami, kwa kuwa alikuwa tayari ameishafikiria jinsi ya kumtorosha Dedan mapema kabla ya kufika hapo kwani alijua lazima Dedan atakuwa ni mtu yuleyule waliyemkamata jana yake.

Kikwazo kikabaki kuwa Madam Flaviana.

Side alijiuliza ikiwa mwanamke huyo atataka akamuone huyo mtu waliyemkamata jana yake wangempeleka nani tofauti na Dedan? Hata kama wangempeleka mtu mwingine ambaye Side tayari alikuwa ameshamuandaa badala ya Dedan je, Madam Flaviana atamwacha mtu huyo akiwa hai? Side alijiuliza maswali hayo kwanza kabla hajajibu swali  aliloulizwa na Madam Flaviana. Hakutaka kuona damu ya mtu mwingine ikimwagika kwa ajili yake.

Muda wa kufikiri ulikuwa umekwisha kwa Side, alihofia pengine angempandisha hasira Madam Flaviana kwa kuchelewa kujibu maswali yake haraka iwezekanavyo, kwa ujasiri akafungua kinywa chake.

“Siye,” alijibu Side huku akishindilia picha zile ndani ya mifuko ya suruali yake.

“Siye!..twende ukanioneshe huyo mtu uliyenaye,” aliongea Madam Flaviana kwa hamaki huku akipiga hatua kuelekea mahali lilipo godauni.

Side alikuwa makini akiitegemea hatua hiyo ya Madam Flaviana, kwa pamoja wakaelekea ndani ya godauni hilo ambalo mara nyingi hulitumia kwa mambo yao ya kikatili.

“Ooh shit! Namtaka Dedan haraka sana siyo chizi huyu!” aliwaka Madam Flaviana baada ya kumuona mtu asiyefanana hata chembe na Dedan akiwa amefungwa kitambaa kizito usoni na mikononi.

Kwa hasira Madam Flaviana akaikoki bastola yake akitaka kumuulia mbali mtu huyo.

Ghafla Side akamuwahi Madam Flaviana na kuukwepesha mkono wake, risasi mbili zikatua pembeni bila kumpata huyo chizi.

“Madam, mtu mwenyewe ni chizi asiyejitambua unapoteza nguvu zako bure,” aliongea Side akimpooza Madam Flaviana aliyefura kwa hasira.

Kwa ushawishi huo Side alifanikiwa kumuondoa Madam eneo hilo bila ya damu ya mtu yeyote kumwagika. Akamfungulia chizi huyo na kumuacha huru aondoke zake, cha kushangaza ndiyo kwanza alikuwa aking’ang’ania kubaki maeneo hayo bila uoga wowote.

***

Salima aliamka katikati ya usiku akiwa mchovu sana kutokana na wingi wa pombe alizokunywa mchana wa siku hiyo. Akiwa amechanganywa na giza la usiku, alihisi huenda alipitiliza siku nzima akiwa kitandani. Akilini mwake alihitaji kujua nini kilikuwa kikiendelea muda wote alipokuwa amelala. Akaamka na kuufungua mlango wa chumba chake akaelekea kwenye korido kuu inayovitenga vyumba vingi katika upande wa kulia na kushoto.

Ukimya wa hali ya juu ndani ya jengo hilo haukumtisha na kumfanya asitembee huku na huko akichunguza kila sehemu ya jengo hilo ambalo tangu ahamishie makazi yake humo hakuwahi kulichunguza.

Akiwa katika kutembea huko, ghafla alihisi kuna mtu alikuwa akimfuata nyuma yake. Mwili wake ukasisimka kwa mtindo wa ajabu. Akageuka nyuma na kutazama, lakini hakukuwa na mtu yeyote.

Bila hofu Salima akaendelea kutembeatembea, bila kujua kuwa hisia zake zilikuwa kweli, kwani Mr. John Chakos ndiye mtu pekee aliyekuwa akimtazama kupitia kamera zilizotegwa humo ndani akimfuatilia kila alipokuwa akielekea usiku huo.

Alimaliza kuzunguka kila mahali katika ghorofa hiyo, akapanda ngazi inayoelekea ghorofa ya juu yake na kushangazwa na muundo uleule wa vyumba kama ulivyokuwa katika ghorofa aliyoitazama mwanzoni. Vyumba vingi katika ghorofa hiyo vilikuwa havina madirisha wala milango iliyoruhusu kutazama mazingira ya nje. Kwa namna moja ama nyingine Salima alistaajabishwa na ramani ya jengo hilo lililokaa kama aina fulani ya gereza.

Akiwa katika mawazo hayo mara alisikia muungurumo wa lifti ikishuka kutoka ghorofa ya juu na kusimama. Mara akasikia sauti ya mlango wa umeme ukifunguka na kufuatiwa na hatua za watu. Hakutaka kukamatwa akichunguzachunguza mambo ya watu usiku kama alivyokuwa akifanya. Hatua zilizidi kusogea kuelekea mahali alipokuwa.

Laiti kama angechelewa kujificha kwa dakika moja tu, basi watu hao waliokuwa wakipita maeneo hayo wangemkuta hapo.

Kwa muda huo kona ya korido tu ndiyo iliyokuwa ikimfanya asionekane. Bila kupoteza muda Salima alijaribu kufungua mlango wa chumba kilichokuwa karibu yake mara moja ukafunguka kisha akajitosa ndani yake asijue kama chumba hicho kilichotanda kwa kiza totoro kilikuwa ni cha nani!



Hatua zile zilifika na kukomea hapohapo kwenye chumba alichoingia Salima. Mara akasikia mlango ukifunguliwa na kufungwa huku sauti za minong’ono na miguno ya kimahaba zikisikika kutoka kwa watu hao ambao kwa sauti zao, Salima aliwatambua kuwa wote walikuwa wanawake.

Salima alikuwa ameshajua jinsi gani alivyojiweka matatani kwa kuingia ndani ya chumba hicho, kwani kama angelikubali aibu ya kukamatwa akizungukazunguka kwenye vyumba vya ghorofa isiyomhusu, ingelikuwa afadhali kuliko kujitokeza muda huo, tena akiwa ameshaingia kwenye chumba cha watu. Akaendelea kujificha nyuma ya sofa kimya bila kutikisika wala kutoa sauti akisubiri nini kitakachofuatia.

***

Wakati huo Mr. John Chakos alikuwa akikosa uhondo wa kuona kile kilichokuwa kikiendelea ndani ya kile chumba. Kamera zake zilishindwa kupata picha angavu kutokana na kiza kilichotanda ndani ya chumba hicho.

Mara ya mwisho alimuona Salima akijificha na kukimbilia humo ndani ambapo baada ya dakika chache, aliwaona Madam Bernadeta na Julieth nao wakiingia huku wakiwa wamekumbatiana na kupigana mabusu mfululizo.

Mara nyingi amekuwa akiwaona wakiwa katika hali hiyo na pengine hata wakifanya mapenzi ya jinsi moja. Jambo hilo halikumsumbua Chakos hata kidogo kwa kuwa Madam Bernadeta na Delilah walikuwa wakifanya kazi zao vizuri.

Mr. Chakos alitaka kushuhudia jinsi ambavyo Salima atajiokoa na kutoka humo chumbani bila kuonekana. Akawa makini kuangalia video ya chumba kile bila kupepesa macho kwa kuhofia kupitwa na shoo ile.

“Wawili kwa mmoja, Salima! Mtoto mzuri utatokaje?” Mr. Chakos alijikuta akizungumza mwenyewe huku macho yake yakiangalia kwa makini giza nene la chumba kile kwa kutumia televisheni kubwa zilizounganishwa kitaalamu na kamera za jengo zima la Serenity, lakini aliambulia kusikia sauti za akina Madam na Delilah tu wakiwa katika mambo yao.

***

Usiku huo, Madam Flaviana akiwa kwenye gari lake tayari kwa kuondoka, machale yakamcheza. Akairudisha siku nyuma na kutafakari, taratibu akaona shaka juu ya tabia ya Side.

Alikumbuka jinsi Side alivyokuwa na wasiwasi alipomkabidhi azitazame picha za Dedan, pia alishindwa kujua kwa nini Side alikuwa na huruma kiasi kile hata akamkwepesha mkono wake alipotaka kumfyatulia risasi yule mwendawazimu aliyefungwa ndani ya godauni!

Madam Flaviana alihisi kuna kitu kilichokuwa kikiendelea nyuma ya pazia. Akaanza rasmi kumtilia shaka Side. Akainua simu yake ya mkononi na kubofya namba kadhaa kisha akaiweka sikioni na baada ya muda kidogo:CHANZO:  https://deusdeditmahunda.blogspot.com/

“Haloo Henry,” aliongea Madam Flaviana kwa madaha huku akivuta sigara kubwa maarufu kama ‘cigarette.’

“Haloo Madam,” ilisikika sauti nzito kutoka upande wa pili wa simu.

“Ninahitaji kukupa kazi nzito, upo tayari?”

“Sema ni nani nikammalize!”

“It’s a rat out mission, no one in particular people (ni mpango wa kumfichua msaliti, siyo mtu fulani moja kwa moja).”

“Guess it’s like old times, is it! (Nadhani ni kama enzi zile au siyo!)”

“Yeah! It’s like old times (Ndiyo, sawia kabisa)”

“Hesabu kazi yako imekwisha. Ni nani mtu huyo?”

“Unamkumbuka Side?”

“Yeah, unahitaji nini kuhusu yeye?”

“Kikubwa nahitaji kujua kila kitu anachokifanya, narudia tena kila kitu!”

“Mh! Nahisi itakugharimu kidogo. Nadhani unajua kuwa mimi ni muuaji siyo paparazi?”

“Usihofu kuhusu malipo, nusu kabla na nusu ukimaliza kazi, sawa?”

“Ok sawa.”

Baada ya kumaliza kuongea na mtu huyo, Madam Flaviana akawasha gari lake na kutokomea gizani, akifikiria jinsi gani Side ataliepuka hilo zimwi aliloliamsha juu yake.

“Better be without any secret Side, otherwise you will be dead (Bora usiwe na siri Side, la sivyo utakufa).”

***

Baada ya purukushani za muda kwenye kitanda, hatimaye muda ulifika na watu hao wakawa kimya kabisa huku sauti pekee Salima aliyokuwa akiisikia ni mlio wa moyo wake tu ambao ulikuwa ukidunda kwa nguvu.

“Madam, nitakuja kesho mi naondoka bwana,” aliongea Julieth na kusimama akiwa na nguo zake mkononi.

“Subiri kwanza kwani unawahi nini?” alisema Madam Bernadeta akimvutia Julieth ndani ya kitanda chake.

“Unamjua yule msichana mpya?” alisema Madam Bernadeta kwa kunong’ona huku akiendelea kumtomasatomasa Julieth.

“Namjua yule anayeitwa Salima?”

Salima alishtuka baada ya kusikia jina lake likitajwa, akatega masikio yake ajue ni nini kilichokuwa kikitaka kuongelewa kuhusu yeye.





ITAENDELEA