WIVU - 1

 

IMEANDIKWA NA : BEKA MFAUME



*********************************************************************************





Simulizi : Wivu

Sehemu Ya Kwanza (1)



JUDI alimalizia kujifunga mkufu shingoni baada ya kukamilisha
kujikwatua kwa vipodozi tofauti vya gharama huku akiwa amevaa vazi lililompendeza mwilini. Alikuwa ameamkia nyumbani kwa Richard ambako alikuja usiku uliopita na kulala hadi asubuhi hiyo. Yeye ndiye aliyekuwa wa kwanza kumaliza kuoga na alikuwa akimsubiri Richard amalize kuoga kisha watoke pamoja kwenye gari la Richard. Kituo chao cha kwanza kingekuwa kwenye mgahawa wa Monde uliopo katikati ya jiji
kwa ajili ya kifungua kinywa, kisha baada ya hapo, Richard angempeleka kazini kwake.
Akiwa amekaa kitandani baada ya kutoka kujiangalia kwenye kioo
kilichopo kwenye kabati la kuvalia, Judi alianza kujiuliza kama ulikuwa ni wakati mwafaka wa kumuuliza Richard kuhusu matumaini yake ya kuolewa naye. Walikuwa ndani ya uhusiano wa mapenzi kwa muda mrefu na alikuwa akijisikia fahari mbele ya wanawake wenzake kuwa na uhusiano
huo na Richard ambaye ni mtoto wa mfanyabiashara tajiri na maarufu jijini Dar es Salaam. Pamoja na kuwepo na uhusiano huo wa muda mrefu, lakini haikuwahi kutokea hata siku moja kujikuta wakizungumzia suala la kuoana.
Haikuwa ni mara yake ya kwanza kulala nyumbani kwa Richard.
Alishakuwa mwenyeji wa nyumba hiyo tokea uhusiano wao ulivyoanza na kumfikisha hadi siku hiyo. Mara nyingi, husan siku za mwishoni mwa wiki kuanzia Ijumaa hadi Jumatatu alikuwa na mazoea ya kuhamia nyumbani kwa Richard na kuumiliki umama wa mwenye nyumba kuanzia usafi hadi mapishi na mengineyo, kiasi kwamba hata nguo zake zikawa zimegawanyika sehemu mbili; baadhi zikiwa nyumbani kwao ambako aliishi na wazazi wake na nyingine zikiwa nyumbani kwa Richard.
Uhusiano wao ulifahamika hadi kwa wazazi wao na kila mmoja alikuwa amejenga uhusiano mzuri kwa upande wa wazazi wa mwenzake. Richard alikuwa na uwezo wa kwenda nyumbani kwa akina Judi na kuomba kuondoka naye kwa muda wowote. Hali kadhalika, Judi aliweza kwenda nyumbani kwa Richard kwa muda wowote alioamua. Ingawa wote walikuwa huru kuyafanya mambo hayo, lakini walikuwa wakitofautiana kimawazo. Kwa upande wa Judi, yeye alikuwa hajiamini kama alikuwa peke yake kwenye penzi la Richard. Hakujua ni kwa nini alikuwa akipatwa na
hisia hizo mara kwa mara, kuna wakati alikiri huenda ni kwa vile Richard alikuwa ni mtoto aliyezungukwa na utajiri wa baba yake na mwonekano wake kumvutia msichana mwingine yeyote kutaka awe naye!
Wivu! Hilo ndilo lililokuwa likimsumbua na kumwingiza kwenye
wasiwasi huo. Alikiri dhana hiyo ya wivu ndio iliyokuwa ikiisumbua
nafsi yake na kumjengea woga kuwa, Robert alikuwa na wanawake wa nje! Pamoja na kuwa na hisia za aina hizo, lakini hakuwahi kumfumania na mwanamke mwingine japo mara moja!



Kwa upande wa Richard, yeye mawazo yake yalikuwa yakikinzana
kimkabala na mawazo ya Judi. Yeye alikuwa akiamini Judi alikuwa
hana mwanamume mwingine zaidi yake kutokana na uaminifu aliokuwa nao Judi. Pamoja na kuwa na mitazamo tofauti kati yao, ajabu ni kwamba, hakuna hata mmoja aliyediriki kuzizungumza hisia hizo kwa mwenzake.
Mahusiano yao ya muda mrefu yaliwawezesha kuwajengea mazoea ya kuzoeana, wakawa na uhuru kwa kila mmoja kwenda kwa mwenzake kwa muda wowote na wakati mwingine bila hata ya kutaarifiana. Uhuru huo ulimfanya Judi na wazazi wa pande zote mbili kuamini kuwa, suala la ufungaji wa ndoa kati yao lilikuwa lipo njiani na lingetangazwa wakati wowote. Lakini kama ilivyo ada kwa tamaduni za Kiafrika, mwanamume ndiye aliyepewa jukumu la kutamka dhamira hiyo, Judi akaamini, ipo siku Richard angekuja kulitamka jambo hilo kwake.
Richard hakufanya hivyo! Na Judi naye akashindwa kuvumilia!
Ndipo asubuhi hiyo, Judi alipoamua iwe siku ya kuuvunja ukimya
huo!



* * * * *



Richard alitoka kuoga na kuingia chumbani. Kitendo cha kufunguliwa kwa mlango wa maliwatoni ambayo ilikuwa imo humo humo chumbani, ile hali ya kutoka kuoga aliyokuwa nayo Richard na kufunguliwa kwa mlango huo kulisababisha harufu ya sabuni ya kuogea iingie chumbani humo, lakini ilichukua sekunde chache harufu hiyo kumezwa na manukato yenye harufu ya nuni yaliyokuwa yamepulizwa mwilini na kwenye nguo alizovaa Judi.
Judi akaanza kumpigia mahesabu Richard aliyekuwa ameanza kuvaa nguo ya ndani na kisha akamwona akivaa suruali aliyoitoa kwenye kining’inizo cha kuwekea nguo kwa kutumbukiza mguu mmoja baada ya mwingine kwenye suruali hiyo. Judi akashusha pumzi kwa nguvu bila ya kutarajia. Hali hiyo ilimjia baada ya kugundua jambo alilokuwa anataka kulizungumza kwa Richard lilikuwa na uzito mkubwa kwenye mustakabali wa maisha yake ya baadaye.
Hali ya utambuzi wa mustakabali huo ilimuweka kwenye unyonge, hata kule kujiamini kuwa yeye ndiye mwenye nafasi ya kuolewa na Richard, ghafla kukaanza kumuweka kwenye njia panda. Hofu hiyo ikamuweka kwenye mizani kwa kuzivuta kumbukumbu za matukio kwa kipindi chote alichokuwa na Richard, ikawa kama vile anajifanyia usaili utakaomwezesha kumpa moyo wa kuendelea na dhamira yake aliyoidhamiria; dhamira ya kulizungumza suala la ndoa kwa Richard!
Aliyakumbuka matukio mengi mazuri yaliyoonyesha upenzi kati yao; kama vile kununuliwa vito na nguo za thamani kwenye maduka yanaouza bidhaa hizo kwa bei ghali; kutoka pamoja kwa ajili ya kula chakula cha usiku kwenye hoteli za kifahari au migahawa ya Kimataifa; kuhudhuria
kwa pamoja mialiko tofauti ya sherehe walizokuwa wakialikwa au wakati mwingine kufurahisha nyoyo zao kwa kwenda kwenye mahoteli yaliyopo nje ya jiji la Dar es Salaam au kwenye majumba tofauti ya starehe.
Ujumla wa kuyakumbuka matukio hayo ulimfanya ajione ni nembo
maalumu ya Richard na kuamini kuwa, ni yeye ndiye aliyechaguliwa!
Lakini pia, pamoja na kuyakumbuka mazuri yote yaliyofanyika kati yao, pia aliikumbuka mizozo waliyokuwa wakizozana kwa mambo madogo. Kama vile kukasirikiana kutokana na maudhi yaliyokuwa yakisababishwa na vijijambo vya kipuuzi, wakati mwingine kuwafikisha kununiana kwa saa kadhaa au zaidi ya hivyo.
Baadhi ya matukio waliyoudhiana waliweza kuombana misamaha,
lakini pia kuna baadhi yaliyowafanya wasiombane misamaha kwa sababu kila mmoja alijiona ana haki ya kuvuta kamba upande wake. Mizozo ambayo hakuwakuombana misamaha iliweza kumalizika kimya kimya na kuwa kama vile hakukuwepo na mtafaruku uliotokea kati yao.
Alipoyaweka kwenye mizani matukio hayo, mengi yakawa ni mazuri na zile kasoro chache zilizokuwa zikijitokeza, akazichukulia ni sehemu ya kawaida kwa binadamu wanaoishi kwa karibu. Ukweli huo ukamuweka Judi kwenye imani aliyoikubali kuwa, walikuwa wakipendana kwa dhati.



Akajiona yupo kwenye nafasi kubwa ya kuolewa na Richard!
Hali hiyo ikamrejeshea nguvu ya kuitupa karata yake juu ya meza!
“Richie,” Judi aliita. Alikuwa amezoea kumwita Richard kwa jina hilo.
Richard aliyekuwa amesimama mkabala na kioo kilichopo kwenye
kabati la kuvalia akiwa anazichana nywele zake, aligeuka na kuitikia huku akimwangalia Judi aliyekuwa bado amekaa kitandani.
“Kuna jambo nataka nikuulize,” Judi alisema huku akijaribu
kuyatuliza macho yake kumwangalia Richard usoni na wakati mwingine kuyakwepesha.
Richard alishitushwa na kauli hiyo baada ya kugundua Judi alikuwa
amekosa utulivu usoni mwake wakati akiitamka. Akahisi kulikuwa na tatizo!
“Jambo gani?” Richard aliuliza huku akiwa ameganda na kitana chake mkononi.
“Una mpango wowote wa kunioa?”
Richard alionekana kama aliyesukumiwa ngumi ya ghafla iliyotua
usoni mwake! Akiwa ameishiwa nguvu ghafla baada ya kupigwa swali hilo, alijikokota kwa kujisogeza taratibu hadi kwenye kabati la kuvalia, akaliegemea. Uso wake ulikuwa umepigwa na tahayari iliyomwonyesha kuwa, alikuwa akihaha kulitafuta jibu. Macho yake yalishindwa kuyakabili macho ya Judi yaliyokuwa yakimwangalia. Akaiangalia sakafu iliyojengwa kwa marumaru kama vile eneo hilo ndilo lingetoa majibu ya swali alilokuwa ameulizwa.
Ukimya uliofanywa na Richard ukaanza kumchanganya Judi. Akili
yake ilianza kukataa kuamini kile anachokishuhudia kutoka kwa Richard.
Richard alikuwa akionekana kupata kigugumizi kulijibu swali ambalo lingehitimisha ndoto ya Judi; ndoto ya kuolewa!
“Mbona hunijibu?” Judi aliuliza huku sauti yake ikionyesha
ukakamavu wa kutaka ajibiwe, lakini moyo wake ukisambaratika kwa maumivu yaliyoanza kumkatisha tamaa. Woga na hofu ya kupewa jibu litakalomwumiza vikawa vinaitafuna nafsi yake, hali hiyo ikauweka moyo wake kwenye mapigo ya kasi yaliyotishia uhai wake!
Richard alianza kwa kupiga kite na kushusha pumzi huku uso wake
ukiwa bado unaangalia sakafuni.
“Hapana Judi!” Richard alijibu kama vile alikuwa akiongea na sakafu aliyokuwa akiitazama. Kisha akauinua uso wake kumwangalia Judi. “Sina mpango wowote wa kukuoa!” alimalizia.
“Yesu wangu!” Judi alinong’ona peke yake na kuishiwa nguvu huku
akiwa amefumba macho.
“Najua haitokuwa rahisi…” Richard alianza kuutetea uamuzi wake.
Judi akawahi kumnyooshea mkono Richard kumzuia asiendelee
kuzungumza.
Kimya kikapita kati yao.
Judi akashusha pumzi kwa nguvu akiwa bado amefumba macho. “Uko serious na jibu lako?” aliuliza.
Richard akaonekana kuwa kwenye wakati mgumu, lakini pamoja na kuwa kwenye hali hiyo, bado alikusudia kuwa kwenye msitari wa ukweli.
“Ndiyo! Niko serious!” Richard alisema.
Judi akanywea, kila kiungo chake cha mwili kikaonekana kama
kimekataa kufanya kazi! Akatulia pale kitandani alipokuwa. Ghafla
akalikumbuka tukio la kufanya mapenzi na Richard saa chache zilizopita baada ya kurudi kutoka disko kabla hawajalala na kuamka asubuhi hiyo.
Halikuwa tukio geni kwao, lakini tukio hilo la saa chache zilizopita likawa kama tukio pekee katika maisha yake na Richard lililompa picha halisi jinsi Richard alivyokuwa akimchezea katika maisha ya ngono walizokuwa wakizifanya huku yeye akiamini kwa imani zote kuwa, ilikuwa ni njia ya kuelekea kwenye kufunga ndoa!
Lilikuwa pigo kwenye maisha yake! Aliusikia moyo wake ukikatika
pande mbili kwa maumivu makali aliyokuwa hajawahi kukumbana
nayo. Alihisi kama anayeelekea kuzirai, akajaribu kupambana na hali hiyo isimtokee akiwa ndani ya nyumba hiyo ambayo sasa ilishakuwa ni nyumba asiyotaka aendelee kuwemo tena. Akamudu kuizuia hali hiyo, lakini akashitukizwa na tukio jingine ambalo laiti angepatwa na hisia za mapema kuwa lilikuwa njiani kumtokea, kamwe asingeweza kuliruhusu limtokee mbele ya Richard; Richard alishakuwa Shetani mbele yake!
Yalikuwa machozi aliyoshindwa kuyazuia!
Kitu kikaja kumbana kooni na kumwanzishia kilio chenye kwikwi
iliyomuweka kwenye kilele cha majuto! Richard akamsogelea na kumshika maungoni ili ambembeleze, Judi akaupangua kwa nguvu mkono wa Richard usimshike!
“Tafadhali usinishike!” Judi alisema kwa sauti yenye chuki iliyotawaliwa na hasira zilizokuwa katikati ya kilio.
Kuanzia siku hiyo uhusiano wao ukawa umeingia doa!






*****



JOHN Sailas akiwa varandani mwa nyumba anayoishi yenye chumba kimoja cha kulalia, varanda moja, jiko na choo ambayo alipanga, alitengeneza tabasamu dogo mdomoni mwake wakati akiisoma barua iliyoletwa na mshenga wake iliyokuwa imejibu barua yake ya uchumba aliomchumbia rafiki yake wa kike anayeitwa Dina siku kadhaa zilizopita.
Barua aliyokuwa akiisoma ilikuwa ikielezea jinsi alivyokubaliwa uchumba wake na tabasamu alilokuwa amelijenga lilikuja baada ya kusoma masharti yaliyokuwa yanahitaji yatimizwe siku itakayopelekwa mahari. Baadhi ya masharti aliyaona kama aina ya mzaha unaochekesha.
Kukubaliwa kwake kumuoa Dina alikutarajia kwa sababu alikwisha
kuizungumza nia yake hiyo kwa mwenyewe Dina, wakakubaliana na ndipo alipomtuma mshenga kuipeleka posa hiyo. Lakini pia, hata kabla ya kulizungumza hilo, uhusiano wao wa mapenzi uliokwishadumu kwa zaidi ya mwaka mmoja, nao ulikuwa ukifahamika na wazazi wa Dina, hali kadhalika na wazazi wake mwenyewe. Pamoja ya kuwa mila za Kiafrika huwa zinawaweka mbali mtu na mkwewe, lakini uhusiano wake na Dina
uliweza kumuweka karibu na mama mkwe wake kiasi kwamba kukawa na urafiki fulani ulioongezea aina ya utani wa hapa na pale.
Ukaribu huo na mama mkwe wake ndio uliompa John uelewa kuwa, posa yake hiyo isingekumbana na vikwazo vyovyote. Alikuwa akijua mama yake Dina ndiye aliyekuwa na sauti ndani ya nyumba huku baba yake Dina ambaye ni mstaafu akiwa hana kauli ya kumpinga mama huyo. Mama yake Dina ambaye bado ni mwajiriwa, ndiye aliyekuwa mwendeshaji wa nyumba kwa karibu kila kitu.
John aliikunja barua aliyokuwa akiisoma na kuirudisha kwenye
bahasha, kisha akaiweka juu ya meza na yeye mwenyewe kujilaza kivivu kwenye sofa aliyoikalia. Uso wake aliuelekeza juu na kuliangalia pangaboi lililokuwa likizunguka kwa kasi ndogo. Uzungukaji wa pangaboi aliokuwa akiuangalia ilikuwa ni kama vile alikuwa akizirudisha nyuma tafakuri zake kwa kipindi cha zaidi ya mwaka mmoja uliopita kwa kuikumbuka siku ambayo yeye na Dina walionana kwa mara ya kwanza. Ilikuwa siku ya Jumamosi!
Aliikumbuka vizuri siku hiyo. Siku hiyo alikwenda eneo la Ndege Beach akiwa na pikipiki yake. Hakuwa mgeni na eneo hilo, alikuwa na mazoea ya kwenda mara kwa mara kwa ajili ya kuogelea kutokana na fukwe ya eneo hilo kuwa ya kupendeza ukilinganisha na fukwe nyingine zilizopo Dar es Salaam kama ukiziondoa zile za eneo la Kigamboni.
Akiwa na begi lake lililobeba nguo yake ya kuogelea baada ya kufika kwenye fukwe hiyo, alilitua begi juu ya mchanga mweupe hatua chache
kutoka baharini. Aliwaangalia kwa sekunde chache watu waliokuwa
wakiogelea kwenye bahari ambayo haikuwa na mawimbi makubwa kwa siku hiyo. Kisha aliinama tena, akalifungua begi lake na kutoa bukta aliyoiandaa kuogelea nayo. Kabla ya kuivaa bukta hiyo, alijifunga taulo kubwa iliyoziba maungo yake ya kati hadi miguuni, akaivua suruali yake ya jeans kwa kuiunganishia na chupi aliyokuwa ameivaa na kuzikunja vizuri nguo hizo kisha akaivaa bukta ya kuogelea. Baada ya kuwa kamilifu kwenye hali ya kwenda kuogelea, alizichukua nguo zake alizozivua na
kuzitia kwenye begi pamoja na ile taulo.
Badala ya kwenda kuogelea, John alikaa kwenye mchanga kando na lilipo begi lake na kuanza kuwatizama waliokuwa wakiogelea baharini.
Akavutiwa na kundi dogo la wasichana watatu, wawili wakionekana
angalau wanaweza kujaribu kuogelea na yule watatu akiwa hajui kabisa kuogelea. Msichana huyo wa tatu ndiye aliyemvutia; na si kwamba kwa vile alikuwa hajui kuogela, lakini pia alikuwa na mvuto kuliko wenzake aliokuwa nao. Msichana huyo mwenye umbo la kupendeza lenye urefu wa wastani, alipendezwa na nguo za kuogelea aina ya bikini ambayo ilimfanya John apate ushawishi wa kumkaribia msichana huyo ili amwone vizuri!
Aliendelea kumwangalia msichana huyo alivyokuwa akijilaza kwenye maji kama anayetaka kuogelea, lakini kwa kukosa ustadi wa kujua kuogelea, akawa anaishia kwenye mwelekeo wa kuzama kila alipokuwa akijaribu kuogelea. Wakati wote alipokuwa akijaribu alijikuta akiishia kupiga magoti na sura yake kuangukia majini. Kitendo hicho kilimfanya ajiinue kwa haraka kila tukio hilo lilivyofanyika na kuonyesha woga wa kuogopa kuzama huku akijifuta maji ya usoni na kuhema kwa kuacha
mdomo wazi na kuzitafuta pumzi kwa kuruka ruka kwenye maji huku akipenua macho yake. Hali hiyo ilimfanya John atabasamu peke yake.
John aliondoka alipokuwa amekaa na kuelekea kwenye maji, akaenda upande walipokuwepo wasichana hao na kumfuata yule aliyekuwa hajui kuogelea.
“Samahani,” John alimwambia yule msichana. “Una nia ya kujua
kuogelea?”
Uso wa msichana yule ukajengwa na aibu kwa kugundulika kuwa hajui kuogelea, hata hivyo aibu hiyo akaiziba kwa tabasamu lenye haya.
“Kwa jinsi unavyojaribu kuogelea, katu hutojua kuogelea,” John
aliendelea bila ya kusubiri jibu la msichana huyo. “Kwanza ni mwoga. Pili, maji hayawezi yakakuinua kwa sababu tu, unataka kuelea. Kuna mbinu za uogeleaji ambazo lazima ufundishwe ndipo utakapoweza kuogelea,” John alisema. Akakumbuka kujitambulisha. “Jina langu ni John, John Sailas.
Unaitwa..?”
Moja kwa moja macho ya msichana yule yakawaangalia wenzake
walioacha kuogelea, nao wakawa wanakuja pale aliposimama na John.
“Vipi?” mmoja wa wale wenzake wawili alimwuliza huku akijaribu
kumwangalia John kwa kutaka kujua kinachoendelea.
“Nataka kumfundisha mwenzenu namna ya kuogelea,” John alijibu
ingawa swali lililoulizwa lilikuwa halikulenga kwake.
Nyuso za mshangao zikajengwa na wasichana hao wawili na kuonyesha dhahiri hawakulitarajia jibu hilo. Wakajikuta wakimwangalia mwenzao kama kutaka kujua ameliafiki vipi wazo hilo. Mwenzao hakujibu chochote, ukimya wake ukawajumuisha wote watatu kupigwa na ganzi ya kutojua wajibu nini kwa mtu huyo au wawili hao wamshauri vipi mwenzao.
“Nitarudi baadaye nijue mmeamuaje!” John alisema kisha alijilaza
kwenye uso wa maji na kuanza kuogelea kwa ustadi wa kukusudia
kuwaonyesha wasichana hao namna gani jinsi anavyojua kuyakata maji.
John aliogelea kwa umbali mrefu kama njia ya ushawishi kumfanya
msichana huyo endapo atakubali kufundishwa naye basi ajione atakuwa salama mikononi mwake.
John aliporudi tena kwa wale wasichana, wakakubali amfundishe
mwenzao, lakini kwa sharti kuwa hata nao walihitaji kufundishwa.
“Basi nitaanza na huyu ambaye hajui kabisa,” John alisema.
Wazo la John likakubaliwa.
Wakiwa wawili peke yao kabla ya kuanza kufundishana kuogelea, John akakumbuka kujitambulisha tena, “Jina langu ni John Sailas…”
Macho ya John na yule msichana yakaangaliana. John akauhisi moyo wake ukipiga kwa kasi. Akakijua kilichopo moyoni mwake dhidi ya msichana huyo.
“Naitwa Dina,” msichana alisema huku akionyesha tabasamu dogo
lililojificha kwa dhamira.
Ni siku ambayo John hakuisahau kamwe!



* * * * *



Aliacha kuliangalia pangaboi lililokuwa likizunguka na kukiangalia kiambaza cha varandani mwake. Akiwa hajaondoka kimawazo kuzikumbuka siku za mwanzo alivyoonana na Dina, John alizikumbuka siku hizo jinsi walivyokuwa wakipanga na wasichana hao siku za kuendelea kuwafundisha.
Akiwa ameanza kwa kumfundisha Dina kama makubaliano yao yalivyo, John alijikuta akipata wakati mgumu wa kutoonyesha hisia zake jinsi alivyokuwa akiteketea kimapenzi kwa msichana huyo hasa pale alipokuwa akiuzuia mwili wa Dina kwa mikono yake ambayo ilikuwa ikilaliwa na Dina aliyekuwa akijilaza juu ili asizame wakati akimfundisha mbinu za kutumia mikono na miguu wakati wa kuogelea. Kitendo hicho ambacho kilifanya mgusano wa mara kwa mara kwenye matiti ya Dina na ulaini wa tumbo la msichana huyo kukawa kunampelekea John kwenye hisia za matamanio zaidi, isitoshe wakati mwingine Dina alikuwa akionyesha woga wa kuzama na kujikuta akimkumbatia John. Kitendo cha mgusano wa miili yao kwa kukumbatiwa na Dina kilimfanya John awe anajihisi
kama anayepigwa na shoti ya umeme!
Kadri walivyokuwa wakizoeana, macho yao yakaanza kuonyesha ukweli wa mambo kila walipokuwa wakitazamana. Ujumbe wa kuonyeshana kuwa wote wawili wanahitajiana ukawa dhahiri kati yao!
Siku moja John akauvunja ukimya!
“Dina,” John aliita wakati wakiwa ndani ya maji yaliyowafika kwenye vifua vyao wakiangaliana ana kwa ana. “Nataka uwe girl friend wangu!” Ajabu ni kwamba, Dina hakuonyesha mshituko na kauli hiyo, ikiwa ni kinyume na John alivyotarajia kuwa ingeleta ubishano kati yao.
“Nilijua ipo siku ungeniambia hivi,” Dina alisema na kuikunja miguu yake ndani ya maji na kuanza kuelea na kichwa chake kuwa juu na hapo hapo akayapuliza nje maji yaliyoingia kinywani mwake.
“Nataka upajue ninapoishi,” John aliendelea.
“Tutapanga!” Dina alisema kirahisi kama vile jambo hilo halikuwa na umuhimu kwake, kasha alianza kuogelea na kumuacha John akiwa amesimama palepale alipokuwa.
Hawakupanga! John alisita kulikumbushia, alihofia angeonekana anaharakisha mambo. Dina naye akawa anaonyesha kama vile hakukuzungumzwa jambo la mapenzi kati yao! John akaendelea kuwafundisha kuogelea wasichana hao huku Dina akiwa kwenye hatua kubwa ya kujua kuogelea.
John akaona subira yake inaweza ikamwangamiza. Akamvaa tena Dina!
“Dina nataka Jumapili uje nyumbani kwangu!” John alimwambia Dina
kwenye simu, safari hii likawa sio ombi tena, bali ni mwendelezo wa kile alichokianza!
“Si tutaonana Jumapili beach? Tutakapoonana tutalizungumza hilo,” Dina alijibu kwa utulivu.
John akatambua yupo kwenye kuyeyushwa na Dina. Akakaza buti!
“Jumapili sitokwenda beach,” alisema. “Nitaitumia siku hiyo kwa ajili ya kukusubiri wewe uje nyumbani.”
“Huoni kama utakapokuja beach utaweza kunielekeza vizuri nyumbani kwako na tutakapoipanga siku itakuwa ni suala la mimi kuja moja kwa moja?”
“Naishi Kimara Baruti, niambie ni saa ngapi utakuja hiyo Jumapili ili nikusubiri kituoni?” John aliingiza karata ya ubishani.
“John mbona hivyo?” Dina alilalamika. “Nimekwambia tutakapoonana beach tutayazungumza yote hayo. Kwani una wasiwasi gani?”
“Kwa hiyo unanikatalia?”
Kimya kikajiunda kwenye simu.
“Dina,” John aliita.
“Bee,” Dina aliitika.
“Kwa hiyo nijue hutaki?” John aliuliza.
John akamsikia Dina kwenye simu akishusha pumzi.
“Basi nitakuja saa nne,” hatimaye Dina alikubali. 
“Nisubiri kituoni.”
Saa nne! John aliwaza. Akaufikiria muda huo jinsi unavyotumiwa kwa siku za Jumapili kwa watu mbali mbali kupeana ahadi. Hakujua ni kwa nini ulionekana ni muda bora kuliko muda mwingine!
“Utanikuta nikikusubiri,” John alisema.
Baada ya kukata mawasiliano, John akatambua zilikuwa zimebaki siku mbili kuiwezesha Jumapili ifike! Akaomba ahadi ya Dina iwe ya kweli na akamwomba Mungu siku hiyo kusitokee tatizo lolote litakaloingiza doa ahadi hiyo.
Jumapili ikafika, John akawa kituoni kabla ya saa nne. Akatarajia kumwona Dina akiwasili kwa daladala, akashangaa alipomwona akiteremka kutoka kwenye teksi!
Ukawa mwanzo wa penzi lao, sasa wanataka kuoana!






* * * * *






John aliinuka kutoka pale varandani alipokuwa amekaa, akaichukua barua yake ya majibu na kuingia nayo chumbani kwake. Aliyafikiria mahari aliyotajiwa, kidogo yalikuwa juu lakini hayakumwumiza kichwa.
Akafikiria namna ya kuzipeleka habari hizo kwa wazazi wake. Alijua angelaumiwa kwa kiasi fulani kwa kuyafanya mambo kipeke yake hadi kufikia hatua hiyo bila ya kuwahusisha wao. Hilo nalo halikumsumbua kichwa, wazazi wake hawakuwa wakiendekeza lawama zisizokuwa na tija. Walikuwa waelewa na wenye ufahamu wa kuyajua mazingira tofauti. Simu yake ikaita. 
Alikuwa Muddy, rafiki yake wa karibu sana.
“Sema Muddy,” John alisema baada ya kuipokea simu.
“Nakuja kwako, upo nyumbani?”
“Wewe uko wapi?” John aliuliza.
“Nina kama dakika tatu au mbili nitakuwa nimeshatia timu hapo
kwako.”
“Utanikuta,” John alisema. 
Muddy alimkuta John akilifunga jokofu lake baada ya kujimiminia maji ya kunywa kwenye glasi na kuirudisha chupa.
“Na mimi nahitaji hayo maji,” Muddy alisema na kwenda kuchukua glasi iliyokuwa ndani ya kabati la vyombo la kisasa.
John aliyekuwa ameitoa tena nje ya jokofu chupa ya maji aliyoitumia awali, alimmininia kwenye glasi maji aliyokuwa akiyahitaji Muddy. Muddy akayanywa maji akiwa amesimama.
“Posa imejibu,” John alisema.
“Usiniambie!” Muddy alisema huku akijifuta mdomo kwa kiganja chake na kuiweka glasi juu ya meza.
“Subiri nikuletee barua yenyewe,” John alisema akiwa na furaha huku akielekea chumbani kwake.
Muddy aliisoma barua hiyo na kadri alivyokuwa akiendelea kuisoma, uso wake ulizidisha tabasamu hadi alipoimaliza.
“Mwanangu unaoa!” alisema huku akiirudisha barua hiyo kwa John.
“Ndio manaake!”
“Lakini mahari wamegonga!”
“Kitu chenyewe kile ghali.”
“Kweli mwanangu, Dina mgogoro!”
Wote wakacheka na kugongesheana mikono.
“Umeshamwambia mwenyewe?” Muddy aliuliza.
“Nani, Dina?”
“Yeah.”
“Sijamwambia, lakini si atakuwa anajua?”
“Hata kama anajua, kumwambia nako kuna raha yake.”
“Jioni atakuja, nitamwambia. Isitoshe nina mpango wa kumnunulia na kumvisha pete ya uchumba, lakini hatutafanya sherehe yoyote.”
“Ahh, hebu mtwangie umpe news.”
“Unajua hata wazee bado sijawaambia!” John alisema.
“Eti?” Muddy aliuliza huku uso wake ukionyesha kutoamini kile alichokisikia.
“Sijawaambia!”
“Lakini si wanajua kuwa umechumbia?”
“Hilo nalo sijawaambia!”
“Hayo masihara John?”
“Kweli sikuwaambia!”
Muddy akaonekana kuchoka ghafla, akakaa kwenye sofa. “Yaani wewe siku zote hizi za mchakato wa kutaka kumchumbia Dina, ina maana wazazi walikuwa hawajui?” aliuliza.
John akionekana kama aliyekosa amani, naye alijikuta akikaa kwenye sofa.
“Leo nitakwenda kuwafahamisha,” alisema.
“Duu!” Muddy aliguna, kisha hakuendelea.
“Lakini wazazi ni waelewa, watanielewa tu.” John alisema na sauti yake ilionyesha wazi alikuwa akijitetea.
“Hivyo ulivyofanya kama dharau ya kiaina mwanangu,” Muddy alilalamika. 
“Wao ndio watakaokuwa kila kitu kwenye harusi yako, halafu hawajui kama umechumbia na wakati wanamjua Dina. Hiyo noma na haipendezi!”
“Nitakwenda kuyaweka sawa, usiwe na presha.”
“Tatizo lako John unajiamini sana. Shauri yako!” 
John akaamua kuyabadilisha mazungumzo.



*****






MZEE Ken Richard Korogwe, tajiri maarufu jijini Dar es Salaam mwenye kumiliki meli mbili ndogo za mizigo zinazoitwa vidigidigi zinazosafirisha mizigo kwenye mwambao wa Afrika ya Mashariki kama vile Mombasa, Zanzibar na Comoro na ambaye pia ni mmiliki wa malori ya mafuta na vituo vya mafuta kwenye maeneo tofauti jijini na vingine vikiwa mikoani, ndiye baba mzazi wa Richard, mtoto pekee aliyezaa na mkewe kwa miaka thelathini na mitano wanayoishi ndani ya ndoa yao. Baada ya kuzaliwa Richard, miaka michache baadaye mkewe aligundulika kuwa na matatizo
ya tumbo na kufanyiwa operesheni ya kuondolewa kizazi, hali iliyowafanya wabaki na mtoto mmoja tu. Kubaki kuwa na mtoto mmoja kukawafanya yeye na mkewe wamwone Richard kama jicho lao, nembo na tunda la ndoa yao.
Mzee Ken na mkewe walihakikisha wanampa Richard elimu iliyo bora na kumfanya Richard afanikiwe kupata Shahada yake nchini Uingereza.
Mzee Ken kitaaluma ni Mhasibu, awali aliwahi kuajiriwa kuwa Mhasibu Mkuu kwenye Kampuni ya Mafuta kwa miaka kadhaa kabla ya kuteuliwakuwa Mkurugenzi wa Fedha na Utawala kabla ya kuacha kazi na kufungua biashara zake.
Mafanikio ya Richard kupata Shahada yalitokana na umahiri wake
kwenye somo la hisabati na kulidhihirisha kurithi kipaji cha baba yake. Richard baada ya kupata Shahada yake alirudi nchini na kujiunga na biashara za baba yake na kuwa mmoja wa viongozi kwenye kampuni inayomilikiwa na baba yake.
Malezi yalimfanya Richard awe na jeuri na kiburi cha kudharau watu.
Ujio wa Richard kwenye kampuni hiyo ya baba yake kukazua malalamiko ya kuwanyanyasa wafanyakazi na malalamiko hayo yakamfikia mzee Ken. Lakini mzee huyo kutokana na shinikizo kutoka kwa mkewe ambaye ni
mama yake Richard, akawa anashindwa kumchukulia hatua kali mwanae, badala yake akawa anamsihi asiwe anawanyanyasa wafanyakazi hasa wa ngazi ya chini. Usia wake ukasaidia kupunguza kwa kiasi fulani manyanyaso hayo, lakini haukumaliza dharau za kijana huyo aliyekuwa akiringia utajiri wa baba yake na elimu aliyokuwa nayo. Baadhi ya wafanyakazi walilazimika kuacha kazi kwa ajili yake, ikawa inamlazimu mzee Ken apate kazi ya kuziba nafasi zinazoachwa kwa kuajiri wafanyakazi wengine
kila matukio hayo yalipojileta!
Richard alikuwa haiishi na wazazi wake, alikuwa akiishi kwenye moja ya nyumba nzuri zilizokuwa zikimilikiwa na baba yake iliyopo eneo la Mlalakuwa. Huko ndiko alikokuwa akiutumia muda wake na rafiki yake wa kike Judi, hadi walipokorofishana kuhusiana na masuala ya ndoa!



* * * * *



Kitendo cha Richard kukataa kumuoa kilimdhihirishia Judi kuwa alikuwa ahitajiki tena na Richard! Jambo hilo lilimpa wakati mgumu, likakatisha tamaa mustakabali wa hatima ya maisha yake ya ndoa kuishi na Richard.
Alimpenda Richard, alimpenda si kwa sababu ni mtoto wa tajiri, lakini pia alimpenda kwa sababu ni kweli alikuwa akimpenda! Alimheshimu kwa kila hali. Alimfanya aikatae mialiko ya kumtaka kimapenzi aliyokuwa akipewa na wanaume tofauti wenye uwezo wa juu wa kimaisha. Kamwe hakutarajia kama ingetokea siku Richard angemtamkia kauli kama hiyo!
Lilikuwa pigo kwake!
Ingawa Richard alijaribu kumbembeleza waendelee kuwa wapenzi, lakini kwa kutoa sharti la kutofunga ndoa wakati alipokuwa akijaribu kumfafanulia uamuzi wake huo wa kutomuoa, hata hivyo Judi hakuliridhia ombi hilo ingawa alijua kama angelikubali lingetoa nafasi nyingine ya kuendelea kufaidika kupata huduma za Richard. Judi alikiri kama angekubaliana na ombi hilo angekuwa sawa na kukubali kutumika kingono huku akijua haolewi! Ingawa alikiri, endapo angekubaliana na ombi hilo la Richard ingekuwa ni nafasi yake ya kuweza kuificha siri ya kukataliwa kwake kuolewa, lakini pia, kungewezesha kuendelea kuwakomoa kwa kuwaumiza wanawake wenzake waliokuwa wakimwonea wivu. Hata hivyo aliuona uamuzi wa kukubali kuendelea kuwa hawara wa Richard usingemsaidia.
Hakuwa tayari kuchezewa kisa tu, aonekane na wanawake wenzake kuwa amemdhibiti Richard! Alichokihitaji ni ndoa na sio kuchezewa!
Uamuzi huo wa Richard wa kukataa kumuoa ulimwumiza kila
alipoikumbuka kauli hiyo iliyokana kumuoa na wakati mwingine ilifanya aina ya mwangi uliomtesa kichwani mwake. Aliiona ni aina ya dharau aliyofanyiwa na alikuwa hakujiandaa na tukio la aina hiyo kutokana na kujiamini kwa asilimia zote kuwa, alikuwa ni chaguo la Richard! Judi alijijua kuwa ni mmoja kati ya wanawake wenye sifa za uzuri na mwenye mvuto kiasi cha kujiona alikuwa ni chaguo maridhawa kwa mtu aina ya Richard. Alikumbuka jinsi alivyokuwa hakusita kuonyesha dalili za kumkubalia wakati Richard alipokuwa akimzengea siku za nyuma kabla hawajafikia kuwa na mahusiano ya kimapenzi. Na baada ya kuwa wapenzi, urafiki wao ukawa wa wazi, popote walipokwenda walikuwa pamoja. Uhusiano wao ukawa sehemu ya mazungumzo kwa vijana wenye
umri wao hususan wasichana ambao wengine hawakuzificha hisia zao za kumwonea wivu.
Viongozi wenye vyeo tofauti, Serikalini, Mashirika binafsi na Taasisi
nyinginezo walikuwa wakimjua Richard kuwa ni mtoto wa mzee Ken, mfanyabiashara tajiri. Na kila walipokuwa wakikutana naye wakati akiwa na Judi, Richard hakusita kutoa ujulisho kuwa, Judi ni rafiki yake wa kike!
Ujulisho huo ukampa Judi umaarufu wa kujulikana kama mchumba wa Richard. Ukamzidishia kupata marafiki waliojikomba kwake na wakaibuka vile vile waliokuwa wakimwonea donge!
Umaarufu wa kujulikana kwake ulimfanya apewe kipaumbele kwa
kuletewa kadi kadhaa za mialiko kutoka kwa watu mbalimbali wenye daraja la juu kimaisha, zilizokuwa zikimtaka ahudhurie vikao vya harusi, michango ya sherehe na Harambee nyingine tofauti. Na mahudhurio yake katika shughuli kama hizo yalikuwa yakitukuzwa kwa kupokewa kama mtu maalumu. Judi alikiri heshima zote alizokuwa akizipata zilitokana na uhusiano wake wa kuwa na Richard ubavuni mwake! Akajiuliza, kwa nini Richard alitumia nguvu zote za kumtambulisha kwa watu mbalimbali
kisha aje kumtosa kirahisi hivyo?
Ilimuuma!
Ilimuuma kwa sababu hakuijua sababu iliyomfanya Richard akatae
kumuoa. Moyo wake ulipata tabu ya kuamini labda kuna mwanamke mwingine ambaye Richard alipanga kumuoa. Alishindwa kuliamini hilo kutokana na ukweli wa mzunguko wa maisha aliyoishi akiwa na Richard.
Richard alikuwa akimtimizia kila alichokuwa akikihitaji, lakini pia,
aliweza hata kumfungulia benki akaunti yenye kiwango kizuri cha pesa huku akaunti yake ya zamani ikiendelea kuwepo.
Judi alizidi kutatizwa na tukio la kukataliwa kuolewa na Richard ilhali Richard tokea awali alikuwa akimwonyesha dalili zote kuwa alikuwa akimpenda na hakuwahi kumfanyia visa vya aina yoyote pamoja na kuzungukwa na hisia za kumhisi kuwa ana wanawake wengine.
Kwa nini Richard amekataa kunioa? Swali hilo likabaki kuwa mwiba
uliomwumiza moyoni kila alipojiuliza!
Judi hakuwa mtoto wa maskini, lakini pia hakuwa mtoto wa tajiri. Wazazi wake wote wawili walikuwa wasomi na wenye uwezo wa pesa wa kawaida uliotokana na ajira zao wakiwa ni watawala makazini wanakofanyia kazi.
Maisha hayo ya wazazi wake ambao anaishi nao kwenye nyumba nzuri waliyoijenga eneo la Makongo na yeye mwenyewe kupewa elimu ya kutosha iliyompatia kazi nzuri, aliamini yangeweza kumsaidia kumuweka kwenye uamuzi wa kuachana na Richard, kisha angejenga subira kwa kutoa nafasi kwa mwanamume mwingine msomi mwenye kazi nzuri na maisha mazuri
kujitokeza ambaye atakuwa na mapenzi ya dhati na hatimaye kufunga naye ndoa.
Kwa kuupitisha uamuzi huo, Judi akajiandaa kupambana na wakati
mgumu wakati uhusiano wake na Richard utakapojulikana kuwa
umevunjika. Alijua wapo watu ambao wangemkabili bila ya aibu na
kumwuliza ukweli wa jambo hilo. Na wengine wangetaka kuijua hata sababu ya uhusiano wao kuvunjika, wengi wao wakiwa ni wanawake!
Wanawake! Judi aliwaza. Kweli tuna matatizo!






* * * * *



Ofisi za kampuni ya mzee Ken zipo kwenye jengo moja maarufu jijini Dar es Salaam lililokuwa na maofisi mengine ya makampuni tofauti lililoko katikati ya jiji. Ofisi za kampuni yake zilikuwa kwenye ghorofa ya nne ndani ya jengo hilo lenye ghorofa zaidi ya kumi na mbili. Mzee Ken mwenyewe alishikilia vyeo vya Mkurugenzi Mtendaji na Mhasibu Mkuu huku mwanae Richard akiwa ni Mkaguzi wa Ndani wa Mahesabu.
Asubuhi ya siku hiyo Richard aliingia ofisini na kumkuta karani wake wa kike akiwa shughulini na kompyuta.
“Niitie Rama!” Richard alimwambia karani wake bila ya kutanguliza salamu yoyote, alionyesha kisirani asubuhi hiyo na sauti yake ilifanya amri.
Karani huyo aliyeitwa Rehema alimwangalia Richard na kugundua bosi wake yupo kwenye kisirani asubuhi hiyo. Alikuwa akizijua vizuri tabia za Richard na alikwishazizoea na kumzoea Richard mwenyewe. Aliubinua mdomo wake kwa aina ya dharau wakati Richard akiingia ofisini kwake.
Rama ambaye ni dereva anayetumiwa mara kwa mara kuliendesha gari la Richard pale anapohitajika dereva wa kuliendesha, umri wake ulikuwa wa mtu mzima aliyevuka miaka hamsini. Wafanyakazi wote kasoro Richard, walikuwa wakimuita kwa jina la ‘mzee Rama.’ Mara zote alikuwa akivaa kofia ya baragashea na suti ya Kaunda yenye rangi ya ugoro ambayo ni sare yake ya kazini. Alifika ofisini kwa Rehema kuitikia mwito, akasimama mbele ya meza aliyokuwepo Rehema.
“Umesema bosi ananiita?” mzee Rama aliuliza.
“Yuko ndani!” Rehema alisema kwa sauti iliyoonyesha kumchukia Richard.
“Na leo uangalie, naona jamaa hakuamka vizuri!”
Macho yaliyoonyesha woga yakajitokeza usoni kwa mzee Rama, akajikuta akiuangalia mlango wa ofisi ya Richard kama vile Richard angejitokeza muda huo huo. Akaurudisha uso wake kwa Rehema kasha akaiinamia meza na kujizuia kwa mhimili wa mikono yake.
“Kwani anasemaje?” alinong’ona huku akiwa ametengeneza kibyongo mgongoni
mwake. Sauti yake haikufanya mzaha, alionyesha dhahiri alikuwa akimwogopa Richard.
“Mi, ntajuaje?” Rehema alimshushua mzee Rama kwa kumpa jibu la mkato. Kisha akaendelea, “Na wewe mzee acha woga! Unamwogopa huyo Richard utadhani ni Mungu wako!”
Mzee Rama akajaribu kutengeneza tabasamu lililokataa usoni kwake.
“Huyu kijana ni mkorofi sana!” alisema.
“Hee! Unaanza kuogopa kabla hujajua anachotaka kukwambia? Huyu si kama mwanao tu! Naona siku atakayokwambia kibarua kimeisha, utarudishwa nyumbani ukiwa maiti!”
Mzee Rama akajichekesha. “Wewe mtoto acha maneno ya uchuro!” alisema huku akiendelea kujichekesha.
Mlango wa ofisi ya Richard ukafunguliwa, Richard akatokeza! Mzee Rama akashituka, akaganda pale alipokuwa, akabadilika kama siye yeye aliyekuwa akizungumza. Kujichekesha kukayeyuka, akauchuna uso kama samaki aliyekaushwa! Rehema akawa anaumia mbavuni kwa kujizuia kucheka huku akijitahidi kuendelea na kazi kwenye kompyuta kama vile hajui kinachoendelea.
Richard alikuwa amekamata funguo za gari mkononi, akamwangalia mzee Rama, kisha bila ya kusimama akamtupia funguo hizo, zikampiga mzee Rama maungoni na kuangukia miguuni mwake huku akihangaika kutaka kuzidaka.
“Kalikoshe gari langu!” Richard alisema bila ya kugeuka nyuma, akatokahuku akimuacha mzee Rama ameinama akiziokota funguo alizotupiwa.
Baada ya Richard kutoka nje ya ofisi, Rehema alisikitika peke yake na kulalamika kwa hasira, “Huyu baba huyu!” kisha asiendelee.
Uso wa mzee Rama ulikuwa bado umejengwa na hofu ya nidhamu ya woga, akamwangalia Rehema na kusema, “Wacha nitoke, asije akarudi na kunikuta!”
Rehema alimwangalia mzee Rama alivyokuwa akitoka kisha akaendelea tena kusikitika peke yake. Akajisemea moyoni: Laiti ningetupiwa mimi funguo zile, nami ningeziokota na kumrudishia kwa kumtupia nazo na kazi leo hii ningeacha!






* * * * *



Mzee Ken alimaliza kifungua kinywa akiwa na mkewe kwenye meza ya chakula, wote wawili wakiwa wamejiandaa kutoka, kila mmoja na safari yake na usafiri wake.
“Unakumbuka leo kuna kikao kingine cha harusi?” mkewe alisema.
“Nakumbuka lakini sitokwenda!” mzee Ken alijibu.
“Kikao kilichopita hukwenda na hiki pia huendi?”
“Leo mchana nitakuwa kwenye mkutano utakaokutanisha
wafanyabiashara wa hapa nchini na ujumbe maalumu wa kibiashara kutoka Uturuki unaoongozwa na Waziri wao wa biashara aliyewasili hapa nchini jana. Ukienda wewe inatosha, sio lazima wote tufike.”
“Sawa, basi nitamfahamisha Adam kuwa na leo hutofika.”
“Na mimi baadaye nitampigia simu kumjulisha kuwa sitofika,” mzee
Ken alisema huku akionyesha kutaka kuondoka.
Mkewe akamwangalia kwa sura yenye jambo. “Una haraka sana?”
aliuliza.
“Kwani vipi?”
“Kuna kitu nataka kuzungumza na wewe!”
Kauli hiyo ikamfanya mzee Ken atulie na kumwangalia mkewe kwa
utulivu. “Kinahusiana na hicho kikao cha harusi?” aliuliza.
“Hapana. Kinamhusu Richard!”
“Ana nini?”
“Hivi Richard anataka mpaka mmoja wetu afe ndio aoe?”
Swali hilo kidogo lilionyesha kama kumchanganya mzee Ken,
akaonyesha uso wenye mshangao. “Kwa nini unasema hivyo?” aliuliza.
“Ulishawahi kumshauri lolote kuhusu suala la kuoa?” mkewe aliuliza swali badala ya kujibu swali.
“Mbona sijakuelewa unachotaka kukizungumza?”
“Nataka kujua ni lini Richard atapata wazo la kuoa?”
“Nadhani hilo ni suala lake binafsi. Kwa nini usimwulize?”
“Najua ni suala lake binafsi, lakini sisi wazazi wake ni jukumu letu
kumshauri au kujua mawazo yake kuhusu jambo hilo. Unadhani yeye na Judi wataishi maisha ya uhawara mpaka lini? Wamekwishakaa hivyo kwa muda mrefu, nadhani sasa umefika wakati wa kumshauri afunge ndoa na mwenzake.”
Mzee Ken hakufanya haraka ya kujibu. Alionekana kutafakari huku
akivigonga vidole vyake juu ya meza.
“Ni vyema tukamshauri hivyo,” mkewe akawahi kusema kabla ya
mzee Ken hajajibu na kuichukua nafasi hiyo kulieleza alilotaka kulieleza.
“Ukaaji wao wa uhawara kwa muda mrefu unaweza ukawafikisha
kwenye vishawishi vingine vinavyoweza kuwaingiza kwenye migogoro itakayowafikisha kuachana. Matokeo yake, Richard anaweza akadakwa na shangingi. Akapungwa vilivyo na hatimaye kudai kumuoa. Si unawajua wanawake wa mijini walivyo werevu hasa wakishanusa harufu ya fedha.
Wakijua Richard ni mwanao unadhani watamwachia? Watahakikisha wanamdhibiti hata kama ikibidi kwenda kwa waganga ili mradi wamuinamishe, kama wenyewe wanayosema kulishwa limbwata. Usije ukashangaa ukamwona mwanao akatuletea mwanamke ambaye siye na akadai kutaka kumuoa!”
“Unayoongea ni kweli, lakini pia tunatakiwa tuangalie na upande wa pili. Inawezekana wenyewe wakawa hawajapanga hivyo.”
“Kuna ubaya gani tukiwashauri hivyo? Utajuaje ikiwa hujakaa na
mwanao na kuzungumza naye?”
“Kwa hiyo, unachokitaka nikae na Richard ili nimwulize kama ana
mpango wowote wa kuoana na Judi? Au nimwulize kama ana mpango wowote wa kuoa?”
“Sasa ni yupi mwingine wa kumuoa zaidi ya Judi? Judi ndiye
tunayemfahamu na hata wewe mwenyewe umekwisha kumsifia kuhusu tabia zake. Kwanza ana elimu nzuri, kazi nzuri na tabia yake ni nzuri. Ni yupi mwingine zaidi yake? Richard atakaponiletea kiruka njia unafikiri nitakubaliana naye?”
“Sawa,” mzee Ken alisema kwa sauti ndogo.
“Usiitikie kama vile nakulazimisha!” mkewe alisema huku akionyesha kuugundua unyonge ulioonyeshwa kwenye sauti ya mumewe. “We huoni fahari endapo Richard ataoa sisi tukiwa hai? Au hujisikii vibaya kila baada ya muda tunaletewa kadi za kuhudhuria vikao vya harusi za wenzetu wanaotaka kuozesha watoto wao? Sisi kazi yetu itakuwa ni kuwachangia hadi lini? Na sisi tutachangiwa lini? Au unataka tuchangiwe michango ya sanda badala ya harusi? Aaa bwana, lazima ifikie mahali na sisi tuchangiwe, na sisi tusikie fahari kumwona mtoto wetu anaoa. Nimeshachoka kuwapigia watoto wa wenzangu vigelegele, nataka na mimi mtoto wangu apigiwe vigelegele!”
“Sasa lawama za nini tena mke wangu? Umeongea nimekukubalia!
Nimekwishakwambia nitakwenda kuzungumza na Richard asubuhi hii ili tumsikilize na yeye ana maoni gani!”









RICHARD baada ya kumtupia funguo mzee Rama na kutoka ofisini,alielekea moja kwa moja hadi ilipo ofisi ya baba yake. Aliingia na kumkuta Katibu Muhtasi wa baba yake ambaye ni mama wa makamo, akamsalimia kwa Kiingereza kwa dhamira ya kukwepa kutoa shikamoo.
“Baba yupo?” Richard aliuliza baada ya kusalimia, wakati huo huo akauangalia mlango wa ofisi ya mzee Ken.
“Bado hajafika,” mama huyo alijibu huku akimwangalia Richard usoni.
Richard akashukuru na kutoka. Akaelekea kwenye korido inayoelekea kwenye lifti, akaisikia kengele ya lifti inayoashiria kuwasili kwa lifti kwenye ghorofa hiyo na kuusikia mlango wake ukijifungua. Wakatoka watu wawili, mzee Ken na dereva wake aliyekuwa amebeba mkoba wa ofisini. Richard akasimama.
“Nimetokea kukuulizia sasa hivi,” Richard alisema na kumsalimia baba yake baada ya kukaribiana huku dereva wa baba yake akisalimiana naye bila ya kusimama.
“Vipi una tatizo?” mzee Ken aliuliza.
“Nilikuja kuhusu masuala yale ya TRA.”
“Bado sijayamaliza, nitakujulisha yakiwa tayari.”
“Halafu pia, nilitaka kutoka na huenda nikachelewa kidogo kurudi,”
Richard alisema kwa kujiamini, akauparaza mkono wake kwenye mgongo wa tai iliyompendeza.
“Kabla hujatoka, kwanza nataka tuzungumze,” mzee Ken alisema na kuondoka.
Kauli hiyo ikamlazimisha Richard amfuate baba yake. 
Wakati wakianza kuingia kwenye ofisi ya Katibu Muhtasi, wakapishana na dereva wa mzee Ken aliyekuwa akitoka. Richard akatangulia kuingia ofisini kwa baba yake wakati mzee Ken akiwa amesimama akisalimiana na Katibu Muhtasi wake.
Wakiwa ofisini, mzee Ken akiwa amekaa nyuma ya meza yake ya thamani na Richard akiwa amekaa mbele kwenye sofa ya wageni, mzee Ken alianza kwa kusema, “Mama yako..,” akasita ghafla. Akabadilisha kauli, “Kuna jambo tumelijadili mimi na mama yako, na tumeona ni wajibu wetu kukushauri, hata kama jambo hilo litakuwa linaingiliana na maisha yako binafsi,” hapa alinyamaza na kumwangalia kwa utulivu Richard. Kisha akasema, “Richard, mna mpango wowote wa kuoana,
wewe na Judi?”
Swali hilo likaonekana ni la ghafla kwa Richard aliyeonyesha dhahiri kutolitarajia. Kwa sekunde kadhaa alionekana akiwa kwenye wakati mgumu wa kuweza kulijibu. Akakumbuka kuulizwa swali kama hilo na Judi siku chache zilizopita.
“Hatuna mpango wowote,” hatimaye Richard alijibu.
“Kwa hiyo mtaishi kwenye uhawara mpaka lini? Au hamna mpango hata wa kutangaziana kuwa ni wachumba?”
Richard akajenga ukimya mwingine. Kisha aliinua kichwa chake kumwangalia baba yake. “Nitakapokuwa tayari kuhusu suala hilo nitawaelezeni,” alisema.
“Sipingani na kauli yako, lakini napata shida kuamini kama kwa kipindi chote mlivyoishi pamoja mkiwa marafiki mtakuwa hamjawahi kujadiliana jambo hilo?”
Swali hilo likaonyesha kumpa tena wakati mgumu Richard.
Akakitengeneza kimya kingine.
“Tulishawahi kulijadili,” hatimaye Richard alisema.
Safari hii mzee Ken hakuingiza neno. Akamwonyesha Richard kuwa anasubiri maelezo zaidi ya jambo alilolizungumza.
“Lakini hatukuelewana!” Richard alisema huku akiiangalia sakafu ya vigae ing’aayo.
“Kwa nini?”
“Nilimkatalia!”
“Nadhani sijakuelewa vizuri! Ulimkatalia…?” mzee Ken alisema huku akionyesha kutokiamini alichokisikia.
“Nilimwambia sina mpango wa kumuoa!”
Kauli hiyo ikakamilisha mshituko wa mzee Ken, hata hivyo utulivu wake aliouonyesha uliweza kuuficha mshituko wake.
“Judi alisemaje baada ya kumtamkia hivyo?” mzee Ken aliuliza na alijaribu kujiweka kwenye utulivu zaidi.



Safari hii Richard aliuinua uso wake na kumwangalia baba yake, kisha aliinama tena kuiangalia sakafu. “Hatukuwa na maelewano tena!” alisema na kunyamaza. Ghafla akaendelea, “Sasa hivi hatuko pamoja!”
Bila ya kutarajia, mzee Ken alijikuta akishusha pumzi kwa nguvu. Akaikumbuka kauli ya mkewe iliyoonya hatari ya Richard kuangukia kwenye mikono ya shangingi. “Kama ulijiona huna mpango wa kumuoa karibuni, kwa nini usingemweleza ukweli kuwa, kwa sasa hivi huna mpango huo, lakini ungempa matumaini ya baadaye!” mzee Ken alisema huku akionyesha wazi kutoridhika na maamuzi hayo ya mwanae na hata sauti yake ilifanya mkwaruzo. “Kwa nini umweleze kuwa huna mpango wa kumuoa?”
“Nilimweleza hivyo kwa sababu sio chaguo langu!”
“Jesus!” mzee Ken alihamanika na kushindwa kuamini kuisikia kauli hiyo ikitoka kwa mwanae. “Kwa hiyo chaguo lako ni nani?”
“Dina!” Richard alisema bila ya kutafuna maneno.
“Dina?” mzee Ken aliuliza huku akiwa amepigwa na butwaa na hofu ya kuwa analetewa shangingi aliyetabiriwa na mkewe ikiwa imekwisha kumvaa. “Ni nani huyo Dina?” safari hii sauti yake aliipandisha kidogo.
“Sisi tunamjua?” aliuliza kwa lugha ya Kiingereza.
“Dina Nzasa. Mama anamjua!”






* * * * *



Usiku baada ya mkewe kurudi kutoka kwenye kikao cha harusi na yeye kurudi kutoka kwenye mkutano, wakiwa tena kwenye meza ya chakula, baada ya kumaliza kula ndipo mzee Ken alipomwelezea mkewe yaliyojiri kwenye mazungumzo kati yake na Richard.
“Na anasema unamjua huyo Dina!” mzee Ken alimalizia.
“Dina Nzasa…Dina Nzasa…” mkewe alijaribu kuvuta kumbukumbu.
“Ah, nimekwishamfahamu!” alisema na uso wake kujaa nuru. “Si yule binti wa Bwana Nzasa anayeishi karibu na duka la vinywaji hapa mtaa wa nyuma yetu?”
“Nzasa yupi?” mzee Ken aliuliza huku akionyesha bado hajamtambua mtu anayefahamishwa.
“Nzasa huyu aliyekuwa Mwenyekiti wa Bodi ya Utalii, sasa hivi amestaafu. Ana kama miaka miwili tokea astaafu. Mkewe ni huyu dada anayefanya kazi Ardhi ambaye alitusaidia kupata hati ya umiliki wa kiwanja chetu kilichopo Boko. Mara hii umekwisha kumsahau?”
“Nimekwisha kumkumbuka!” mzee Ken alisema. “Si huyu aliyekuwa
akimtuma binti yake hapa nyumbani kutuletea zile nyaraka…”
“Haswaa!” mkewe alidakia. “Basi ndiye huyo anayeitwa Dina!” kisha sauti yake ikatulia na kuendelea, “Dina anavyoonekana ni msichana aliyetulia na miye nilikuwa sijui kama wana uhusiano wowote na Richard. Au Richard alikwambia kama nilikuwa naujua uhusiano wao?”
“Yeye alisema, wewe unamjua Dina.”
“Ni kweli namjua! Richard jamani!” mkewe mzee Ken akapiga kite cha kuhamanika. Kisha akasema kwa sauti ya kuhuzunisha, “Hili la Richard kusema eti Judi sio chaguo lake, kwa kweli limeniumiza mno. Unajua nashindwa kumwelewa mwanao! Alimtongozaje kama sio chaguo lake? Inahuzunisha kumwona mwanangu amempotezea muda wake yule msichana, kwa kweli siamini! Maskini Judi, nilikuwa nampenda huyu binti wa watu na yeye mwenyewe alikuwa anampenda sana Richard. Hivi nitamwangaliaje siku tutakapokutana?” mke wa mzee Ken akaonyesha kukata tamaa. “Ndio hivyo, hatuwezi tukayaingilia maamuzi ya Richard. Yeye ndiye anayemjua vizuri Judi kuliko tunavyomjua sisi na hatujui kwa nini amemchagua Dina, labda ndiye aliyemwona anamfaa. Pengine amependezwa na tabia zake!”
“Lakini kuna tatizo jingine linaloumiza kichwa kuliko hilo,” mzee Ken alisema, kisha kabla ya kuendelea aliinamisha kichwa na kusikitika.
“Ni mtafaruku juu ya mtafaruku,” alisema. Mkewe mzee Ken akaingiwa na mshangao, akasubiri kusikia mumewe atasema nini.
“Dina hamtaki Richard!” mzee Ken alisema kwa msisitizo.
Mkewe mzee Ken akaishiwa nguvu! “Amekwambia Richard mwenyewe?” aliuliza kama asiyeamini alichokisikia.
“Yeye mwenyewe Richard ameniambia, tena bila ya wasiwasi wowote!
Anasema amejitahidi sana kumbembeleza Dina kwa kutumia mbinu tofauti lakini anadai Dina alikataa katakata kukubali kuolewa naye. Cha ajabu mwanao bado anasisitiza kuwa, Dina ndiye chaguo lake!”
“Huyu mtoto ana wazimu?” mke wa mzee Ken aling’aka. “Mwanamke amemkataa si basi!”
“Labda ana sababu ya kumng’ang’ania.”
“Hawa watoto wetu wa siku hizi watatuua kwa presha. Kama mwanamke amekukataa si unatafuta mchumba mwingine wa kuja kumuoa?”
“Naona unayazungumza mambo yaliyopitwa na wakati mke wangu. Hayo unayoyazungumza ni ya enzi zetu, enzi zetu unatafutiwa mchumba halafu unaonyeshwa, baadaye unaulizwa kama umemkubali au umemkataa. Ukisema humtaki, basi unatafutiwa mchumba mwingine. Leo hakuna hilo. Wenyewe kwa wenyewe wanatafutana huko huko wanapoonana na wakishakubaliana kuoana ndipo wanapokuja kwetu na kutufahamisha na mara nyingine hata kama wazazi wakikataa, wao wanalazimisha kuoana.
Lakini hili la mwanao limekuja kiaina yake, mwanao hatakiwi, yeye analazimisha! Utaliingiliaje jambo kama hilo?”
“Tena umenikumbusha baba Richard!” mkewe mzee Ken alisema.
“Nakumbuka mama yake huyu msichana aliwahi kuniambia yuko mbioni kutaka kumwozesha binti yake…ndio nakumbuka! Aliniambia angeniletea na kadi ya mchango!”
“Binti yake yupi?”
“Nadhani atakuwa ni huyu huyu Dina.”
“Anataka kuolewa na nani?”
“Sijui.”
Uso wa mzee Ken ukaangukia kwenye mshangao. “Ina maana Richard
hajui kama huyo anayetaka kumuoa kuwa anaolewa na mtu mwingine?” aliuliza.
“Sijui. Naona huyu mtoto anataka kutuchanganya!”
“Wacha niongee naye sasa hivi!” mzee Ken alisema na kuichukua simu yake ya mkononi iliyokuwa mezani. Akampigia Richard.
Kimya kilipita kati yao wakati mzee Ken akisubiri kujibiwa kwenye simu aliyoipiga. Hatimaye mzee Ken alijitikisa mwili na kusema, “Richard! Mbona huyu msichana uliyemzungumza kumbe naye anataka kuolewa?”
“Najua!” Richard alijibu kutoka upande wa pili wa simu.
“Lakini ni yeye ndiye niliyempenda na moyo wangu unaniuma kuona anaolewa na
mtu mwingine!” Richard alisema.
“Nitakupigia baadaye!” mzee Ken alisema na papohapo alikata simu. Akamwangalia mkewe, “Unajua huyu mtoto hovyo sana!” aling’aka.
“Kwani anasemaje?”
“Anasema analijua jambo hilo!”
“Jambo gani?”
“La Dina kuolewa!”
“Ebo!” mkewe mzee Ken alisema kwa mshangao.
“Ndivyo anavyodai! Halafu anaendelea kusema, eti huyo ndiye aliyempenda na moyo wake unamuuma sana kuona anaolewa na mtu mwingine! Huyu mtoto ana wazimu?”
“Ama kweli moyo ukipenda..!” mkewe alisema bila ya kumalizia.
Akasikitika peke yake.
“Sasa ana maana gani kusema hivi?” mzee Ken aling’aka tena.
Mkewe akafikiri, kisha akasema, “Hawa watoto wetu wa siku hizi si ajabu ukasikia amefanya jambo la ajabu kwa vitu vya kipuuzi kama hivi!”
Mzee Ken akamwangalia mkewe kwa kushituka. “Una maana gani?” aliuliza.
“Lakini sidhani kwa Richard kama anaweza akafanya upuuzi wa aina hiyo,” mkewe alisema huku akijaribu kuituliza sauti yake.
“Upuuzi gani?” mzee Ken aliuliza huku akionyesha kama vile alikuwa akikijua kinachotaka kutamkwa na mkewe.
“Anaweza akajiua!”
“Ohoo, sasa mke wangu unaongea nini!” mzee Ken alihamanika.
“Khee! Unashangaa hilo? Kwa nini asiweze? Hawa watoto wetu wa leo wana akili? Au unafikiri huko kusoma nje ndio kutamfanya asiweze kufanya upuuzi wa aina hiyo?”
“Sasa kwa mfano akiung’ang’ania huo upuuzi wa kutaka kumuoa
tutafanyaje?”
“Itabidi tukaingize fitna ili Dina asiolewe na huyo anayetaka kumuoa!”
“Halafu?”
“Aolewe na Richard!”
“Wakati huyo Dina kishamwambia wazi mwanao kuwa hamtaki?”
“Yeye Dina ni nani hadi awe na jeuri hiyo?” mke wa mzee Ken alisema kwa sauti ya dharau.
“Sasa utafanyaje?”
“Sijajua, lakini naweza nikaivuruga ndoa yake asiolewe na huyo anayetaka kumuoa, kisha nikakigeuza kibao mwanangu Richard akageuka kuwa mume wa kuja kumuoa Dina. Babu, mwanamke mwenzake ni
mwanamke, asikwambie mtu!”
“Utakwenda kumwambia nini huyo Dina ili akuelewe unachokizungumza?”
“Sina muda wa kuongea naye!” mke wa mzee Ken alisema kijeuri na kubenua mdomo wake.
“Kumbe utakwenda kuongea na nani?” mzee Ken aliuliza kwa kauli iliyoonekana kama kitu anachokizungumzia ni kigumu kufanyika.
“Mama yake!”
“Tutakuwa tumefanya dhambi!” mzee Ken alisema bila ya kumwangalia mkewe machoni.
“Kwa hiyo upo tayari mwanao ajiue?”



Mzee Ken akaduwaa na kumwangalia mkewe. “Lakini hajasema kama atajiua!” alisema.
“Anayetaka kujiua anasema? Naomba hili jambo uniachie mimi!”
Mzee Ken alishusha pumzi, akakosa la kusema.
“Hivi, kama Richard anataka kumuoa Dina, kwa nini ishindikane kumuoa?” mkewe mzee Ken alisema kwa sauti ya kiburi. “Marafiki zetu watatuelewaje wakisikia kuwa tumeshindwa kutumia uwezo wetu wa utajiri kuishawishi familia tuliyoizidi kipato kukubali binti yao aolewe na mtoto wetu? Mumewe yule mama sasa hivi hana kitu! Mafao yake ya kustaafu alikwenda kuyanunulia shamba, shamba limewashinda na nasikia wameliuza au wanataka kuliuza. Sasa hivi yule mama ndiye mlishaji wa nyumba kwa kutegemea hicho kibarua chake cha huko Ardhi, sijui ana kicheo gani! We si umeona baada ya kutufanikishia kuipata hati ya kiwanja cha Boko, mbona zile laki tatu tulizompa kama ahsante hakuzikataa?
Azikatae ana jeuri hiyo?”
Mzee Ken akabaki kuwa bubu.
“Na sitaki umwambie Richard lolote!” mkewe alionya. “Niwachie mimi mambo yote nitayaweka sawa.”






******






ILIKUWA usiku muda mfupi baada ya taarifa habari kutoka kwenye runinga kumalizika, mama yake Dina aliusikia mngurumo wa gari inayosimama nje ya nyumba yao, kisha akasikia mlio wa mlango wa gari uliofungwa. Akajua ni mgeni wa hapo nyumbani.
“Nadhani kuna mgeni,” mzee Nzasa alisema akiwa amekaa sebuleni kwenye sofa akiangalia runinga.
Mama yake Dina aliinuka kutoka kwenye sofa akaenda mlangoni.
“Hodi!” sauti ya mwanamke ilisikika kutoka nje akiwa amekwishaingia ndani ya uzio wa nyumba hiyo kupitia kwenye geti dogo lililokuwa wazi.
“Karibu,” mama yake Dina aliitikia akiwa ndani, akaufungua mlango wa mbele. “Oh, karibu mama Richard,” alisema.
“Ahsante mama Dina,” mke wa mzee Ken alisema na kuingia ndani.
“Karibu mama, karibu!” mzee Nzasa alisema alipomwona mke wa mzee Ken.
“Ahsante shemeji,” mama Richard alisema na kumpa mkono mzee Nzasa na kusalimiana naye kabla ya kukaa kwenye sofa.
“Gari umeiacha na mtu nje?” mama Dina aliuliza.
“Hapana.”
“Hakuna haja ya kutia wasiwasi, vibaka hawapitipiti kwenye mtaa huu,” mzee Nzasa alisema. “Wacha niwapisheni.”
“Ah, hapana shemeji, mbona nimekuja kwa mazungumzo ya kawaida
tu,” mama Richard alisema.
“Lakini si umekuja kwa ajili ya kumwona mwenzako?”
“Ni kweli, lakini sio faragha.”
“Usijali, nitaangalia TV ya chumbani, nyie endeleeni,” mzee Nzasa alisema na kuondoka.
“Ehee, za siku mbili, tatu mama Richard?” mama Dina aliuliza baada ya mzee Nzasa kuondoka.
“Nzuri tu, za kwenu?”
“Sisi hatujambo, karibu.”
“Dina yupo?” mama Richard aliuliza na kuangalia upande wenye korido ambako kuna vyumba.
“Yupo chumbani kwake anaangalia TV.”
“Kilichonileta kwako mama Dina,” mama Richard alisema.
“Nakumbuka uliwahi kuniambia unataka kumwozesha binti yako na ungeniletea kadi ya mchango. Nimeifuata hiyo kadi.”
“Kadi za mchango bado sijaanza kutoa mama Richard, nikitoa nitakupitishia. Wala usitie shaka.”
“Ukweli ni kwamba nilianza kutia shaka, nikasema mhh, huyu mama Dina si aliniambia anataka kumwozesha binti yake na angenipitishia kadi ya mchango? Mbona kimya? Ndio nimeamua kuja mwenzangu, pengine umenisahau.”
“Sijakusahau mama Richard, nasubiri tu mambo yaive ndio nikufuate.”
“Basi kumbe wasiwasi wangu ulikuwa wa bure.”
“Sijui nisemeje mama Richard, nakushukuru kwa kuyafuatilia haya mambo, si unajua yanavyochanganya kichwa?”
“Hayo ni ya kuyasema? Mhh, we haya mambo yaangalie kwa mwenzako tu, lakini yakija kwako lazima yakuchanganye!” mama Richard alisema, akanyamza na kujenga ukimya mfupi. Kisha akajiweka vizuri kuuliza swali lililomleta kwenye nyumba hiyo. “Kwani ni binti yako yupi anayeolewa?” aliuliza.
“Anayeolewa ni Dina!” mama Dina akajinasisha.
Mama Richard akamudu kuutengeneza mshangao wa bandia usoni kwake. “Haa! Dina ndiye anayeolewa?” alisema huku sauti yake ikionyesha kufanikiwa kushangaa.
“Dina mwenzangu!” mama Dina akazidi kujiingiza kichwa kichwa.
“Anaye rafiki yake, wenyewe wamekubaliana waoane, basi ndio ameleta
barua ya kumchumbia.”
“Kwa hiyo tayari mmemjibu?”
“Tumemjibu, sasa tunasubiri alete hayo mahari kisha nasi tuanze vikao.”
Mama Richard akaitumbukiza karata aliyoipanga kuanza kuicheza.
“Nakumbuka Dina aliwahi kuniambia kitu kama vile alikuwa akisubiri majibu yake ya kidato cha sita? Na majibu si tayari yametoka? Kwani hakuchaguliwa kwenda Chuo Kikuu?”
“Hakubahatika mwenzangu!” mama Dina alisema na kuguna.
“Imeniuma sana kutochaguliwa kwake!”
Hapo ndipo mama Richard alipoukamata usukani wa kumwongoza mama Dina! 
“Sasa kwa nini mnakimbilia kumwozesha? Si mngemtafutia kwanza Chuo cha kusoma? Au hata awe na ajira yake kisha ndio aolewe?”
“Kuna mipango ya kazi tunayomfanyia.”
“Sasa kwa nini msisubiri kwanza aanze kazi kisha aolewe?”
“Hata wajomba zake walilizungumza hilo, na sisi tulimshauri hilo na hajakataa, lakini anauliza hiyo kazi itapatikana lini? Ili kama kuiahirisha harusi basi ijulikane itaahirishwa kwa muda gani.”
Mama Richard akajiona yupo karibu ya kumuua Tembo kwa ubua.
“Akipata kazi sehemu nyingine yoyote si anaweza akafanya? Au lazima apate huko mnakomtafutia?” alisema.
“Mwenzangu kokote kule! Je, huko tunakotegemea ikikosekana?”
Mama Richard akaitumbukiza karata yake ya mwisho.
“Basi mimi nitazungumza na baba Richard ili ampatie kazi kwenye kampuni yake. Nadhani sio vyema mkafanya haraka ya kumwozesha, bora aende kwa mumewe akiwa na kazi yake, maisha yenyewe haya ni ya kusaidiana. Tena nitamwambia baba Richard ampe mshahara mzuri.”
Kitanzi kikawa kimening’inizwa usoni kwa mama Dina, naye bila ya kusita akakitumbukiza kichwa chake. “Mbona nitakushukuru mama Richard kama ukiweza kunifanyia hilo!” alisema.
“Kama mimi mwenyewe nimekuahidi, basi hilo usilitie shaka nalo. Nitahakikisha baba Richard anampatia Dina kazi yenye mshahara mzuri!”
Hali ikabadilika ghafla. Mama Dina alijikuta akiwa ananyenyekea kama kijakazi mbele ya nokoa na hata pale mama Richard alipoaga, ilibidi mama Dina kutaka kwenda kumuita Dina ili aje kumsalimia.
“Hapana usimsumbue mtoto, mwache apumzike. Lakini kitu kimoja mama Dina,” mama Richard alisema kwa utulivu. “Habari hizi za kazi usimgusie kabisa Dina, usimwambie kama kuna kazi ninayomtafutia. Na
sitaki ajue kama ni mimi ndiye ninayemtafutia. Na endapo kama atajua, ama kwa kumwambia wewe mwenyewe au kuambiwa na mtu mwingine yeyote, mama Dina itabidi unisamehe, ujue sitohangaika kumtafutia kazi mwanao! Naomba hilo ulizingatie. Please usimwambie!”
“Kwa jina la Yesu Kristo Msalabani, sitamwambia!”
“Nitafurahi ukilizingatia hilo!”
“Sitomwambia, hilo nakuahidi!”



Kabla ya mama Richard hajatoka nje, aliombwa asubiri kidogo ili aitwe mzee Nzasa ambaye alitoka na kumsindikiza pamoja hadi nje. Huko nje mama yake Dina alionyesha unyenyekevu uliopitiliza kwa mama Richard na kumwombea kwa kumtaja Yesu kila baada ya muda kabla ya mama
Richard hajaingia kwenye gari.
Mama Richard alipokuwa akiondoka na gari lake, mama Dina aliipunga mikono yake yote miwili kwa furaha yenye unyenyekevu.






* * * * *






“Nimekwisha kummaliza!” mama Richard alimwambia mzee Ken wakati alipokuwa akimwelezea kuhusu mazungumzo yake na mama Dina yalivyokwenda. “Kwa hiyo, kinachotakiwa ni kumwajiri na kumpa kazi itakayomuweka karibu na Richard na Richard ataitumia nafasi hiyo kumshawishi Dina asiolewe na badala yake amuoe yeye!”



“Usitegemee jambo hilo litafanyika kwa haraka kama unavyozungumza!” mzee Ken alionya huku akiwa ndani ya vazi la pajama akiwa amelala kitandani kama ilivyokuwa kwa mkewe.



“Lipi? La kumwajiri? Au la kumshawishi?” mama Richard aliuliza kwa sauti iliyoonyesha kushituliwa na kauli ya mzee Ken.



“La kumshawishi Dina hadi akubali,” mzee Ken alijibu akiwa amelala chali. “Lazima litachukua muda hadi kufanikiwa. Na endapo itakuwa hivyo, ujue uwezekano wa Dina kuolewa na huyo mchumba wake mara tu baada ya kupata kazi utakuwepo. Utakuwepo kwa sababu kikwazo kilichokuwa kimeisimamisha ndoa yao kitakuwa hakipo tena! Kwa hiyo, ipo hatari ya ndoa hiyo kufanyika wakati Richard akiwa bado hajafanikiwa kumshawishi Dina kuizuia ndoa hiyo!”
“Ken, lazima itumike mbinu kumzuia Dina asiolewe na huyo mchumba wake!” mama Richard alisema kwa sauti kavu.
“Kivipi?” mzee Ken aliuliza kwa sauti ya upole.
“Mbinu ni hii Ken; utakapomwajiri Dina, umpe barua itakayomuweka chini ya uangalizi wa miezi mitatu hadi ajira yake itakapothibitishwa,” mama Richard alisema. “Barua hiyo itatoa masharti atakayoyasaini, na moja ya masharti hayo ni kuwa, kwa kipindi hicho cha miezi mitatu atakachokuwa anaangaliwa utendaji wake, hakutakuwa na ruhusa ya dharura atakayopewa itakayozidi siku moja labda itokee kuwe na msiba wa kifo cha mmoja wa wazazi wake, kaka au dada wa kuzaliwa naye! Sharti hilo litambana ashindwe kuomba ruhusa kwa ajili ya kwenda kufunga ndoa!”



“Usisahau kuwa, umekwisha kujenga ukaribu na mama yake na anaweza akautumia ukaribu huo kuja kumwombea mwanae apatiwe ruhusa ya kwenda kuolewa!”



“Hapo ndipo atakapokosea! Nitaitumia nafasi hiyo kumweleza umuhimu wa kazi ya mwanae kimaisha, na nitamshawishi na lazima atashawishika kukubali kuliahirisha suala la ndoa hadi baada ya miezi mitatu aliyopewa mwanae imalizike. Nina hakika kwa mshahara utakaokuwa unampa Dina, kamwe hatokubali kuilaani bahati hiyo.”



“Kuna umuhimu wa Richard kuambiwa kusudio hilo?”



“Hapana, kwa sasa asiambiwe! Ataambiwa baada ya Dina kuajiriwa.” “Na ikimalizika miezi hiyo mitatu huku Dina akiendelea na msimamo wake wa kukataa kuolewa na Richard, hapo itakuwaje?” “Ikatishe ajira yake!”



* * * * * 



Mawasiliano kati ya mama Richard na mama Dina yakaendelea bila ya watoto wao kufahamu, huku mmoja akiijua njama anayoifanya dhidi ya mwenzake, mwingine akiwa haijui njama anayofanyiwa na mwenzake!



Baada ya wiki moja, zengwe la mama Richard likawa limekamilika, na ulipofika usiku akampigia simu mama Dina!
“Mwambie Dina, kesho asubuhi saa nne awe ofisini kwa mzee Ken,” mama Richard alimwambia mama Dina kwenye simu na kumwelekeza ilipo ofisi yenyewe. “Aende na vyeti vyake vya shule. Akifika mapokezi aseme ameitwa na mzee Ken.”
“Nitamwambia usiku huu aanze kuvitafuta vyeti vyake!” mama Dina alisema kwa sauti iliyonyenyekea.
“Yeye akifika mwambie ajitambulishe kwa mzee Ken kuwa ni mtoto wa mzee Nzasa.”
“Nitamwambia dada, kwa kweli nakushukuru sana.” “Haina tabu. Haya usiku mwema.”
“Nawe pia. Yesu akubariki mama Richard!”
“Amen.”



****



RICHARD alikuwa amesimama, mgongo wake ukiwa umeelekezwa mlangoni wakati alipokuwa akizungumza na msichana mfanyakazi anayefanya kazi idara ya mapokezi kwenye kampuni ya mzee Ken. Richard aliyekuwa amemsindikiza mgeni wake aliyemtoa hadi hapo mapokezi na kuagana naye sekunde chache zilizopita, lakini kabla hajarudi tena ofisini kwake, akakumbuka kuwa, asubuhi hiyo magazeti aliyokuwa ameletewa ofisini kwake yalikuwa pungufu.



“Leo sijaliona gazeti la Flames likiletwa ofisini kwangu, wewe unalo hapo kwako?” Richard alimwuliza msichana huyo wa mapokezi.
“Mtu wa magazeti leo kaleta hilo moja tu la Flames, na limepelekwa kwa Mkurugenzi,” msichana wa mapokezi alijibu.
Wakati msichana yule alipokuwa akijibu, mlango wa kuingilia hapo mapokezi uliotengenezwa kwa kioo ukasikika ukifunguliwa. Macho ya yule msichana yakavutika kuuangalia mlango huo, kitendo hicho nacho kikamvuta Richard aangalie mlangoni.



Wakamwona Dina akiingia!



Kitendo cha kuonana kati ya Dina na Richard kikawa kimewaletea mshituko wote wawili na kuonyesha dhahiri hakuna yeyote aliyetarajia kukutana na mwenzake eneo hilo huku Dina akionyesha wazi kabla ya hapo alikuwa hajui kama Richard alikuwa akifanya kazi kwenye kampuni hiyo!



Tukio la kumwona Dina akiingia kulimfanya Richard agande kwa sekunde chache huku akiwa hayaamini macho yake kama aliyekuwa akimwangalia alikuwa kweli ni Dina. Akili yake kwa sekunde hizo chache ilikuwa kama iliyokuwa imepooza, ikashindwa kuwaza kwa haraka. Akabaki akiwa ameduwaa huku akimwangalia Dina ambaye naye alikuwa akimwangalia. Ndipo Richard akakumbuka tukio lililoufanya moyo wake uzidi kupata pigo…



Aliikumbuka kauli aliyoambiwa na Dina mara ya mwisho walipokutana nje ya duka linalouzwa simu, kauli iliyomtaarifu kuwa, Dina na John Sailas wanatarajia kufunga ndoa wakati wowote!



* * * * *



Richard alikuwa akimfahamu John Sailas, wote waliwahi kusoma shule moja ya Azania, walikutana wakiwa kidato cha kwanza na wakawa darasa moja. Hawakuwa na ukaribu wa kuitwa marafiki, lakini walikuwa na ukaribu wa kuwa wanafunzi waliosoma darasa moja. Walisoma wakiwa pamoja kwa muhula mmoja pekee. Muhula wa pili, Richard alihamishiwa shule nyingine nchini Kenya.



Kwa upande mwingine ujuano wa kujuana kati ya Richard na Dina ulikuwa ni wa muda mrefu. Walijuana tokea wakiwa wadogo kutokana na kuishi eneo moja na mitaa yao ilikuwa jirani. Wakati Richard alipokuwa kidato cha kwanza, Dina alikuwa darasa la sita. Mwanzo wa Richard kuanza kumtongoza Dina kilikuwa ni kipindi Richard alichokuwa amerudi likizo kutoka nchini Kenya wakati huo akiwa kidato cha tatu na Dina akiwa ameingia kidato cha kwanza.



Kupoteana kwao kulikosababishwa na Richard kusoma nchini Kenya, kulimfanya Richard ayashangae mabadiliko ya ghafla ya kimwili yaliyomtokea Dina baada ya yeye Richard kurudi nchini kwa ajili ya likizo. Richard alimwona Dina kama aliyekua haraka kimaumbile. Umbile zuri la kike lililokuwa limejichomoza kwa kuvigawa viungo vya Dina kwenye hesabu sahihi, kulimfanya Richard aingiwe na hisia za matamanio ya mapenzi dhidi ya jirani yake huyo.



Uzuri wa Dina na umbile lake hilo lililoanza kutatanisha wanaume wengine lilimfanya Richard awe na wakati mgumu wa kushindwa kuzificha hisia zake na kujikuta kama mtu anayepigwa na shambulizi la ghafla kila alipokuwa akikutana na Dina njiani. Akashindwa kujizuia, akaamua kumkabili Dina na kumpa yake kauli.



Dina akamkataa!



Richard hakukata tamaa. Akabuni mbinu mpya ambayo kwa upande mwingine ilikuwa kama ya kitoto; mbinu ya kulitumia jina la baba yake. Akawa anamwomba Dina aende naye nyumbani kwao na kumwambia kuwa, baba yake angefurahi sana kama angemwona naye. Richard alikuwa akiamini kama Dina angeukubali mwito huo wa kwenda nyumbani kwao, ule ufahari wa kimaisha ulioenea kila sehemu ya nyumba yao ungekuwa ni chachu kuu ya kumfanya Dina amkubali kirahisi. Hata hivyo, Dina hakulikubali karibisho hilo!



Si kwamba Dina alikuwa hamjui baba yake Richard, alikuwa akimjua vizuri sana mzee Ken kuwa ndiye baba yake Richard, na utajiri wa mzee huyo ulikuwa ukijulikana na kila mtu kwenye kila kona ya maeneo hayo wanayoishi. Hata hivyo, sababu iliyomfanya Dina kumkataa Richard ilitokana na Dina kujiona ndio kwanza ameanza masomo ya Sekondari na alikuwa amepania afike mbali kimasomo, hivyo hakuwa tayari kujiingiza katika mapenzi na mwanamume yeyote.



Hatimaye Richard aliondoka na kwenda masomoni Uingereza baada ya kufanikiwa kupata chuo, lakini aliondoka akijijua ana deni la kuja kuhitimisha dhamira yake aliyoiwekea nadhiri kuwa lazima aje kumpata Dina kimapenzi wakati atakaporudi likizo.



Likizo yake ya kwanza ilipowadia, Richard alirudi nchini akiwa na matumaini tele ya kumpata Dina. Alirudi akiwa amebadilika tabia. Akawa mtu wa kunata na kujisikia huku akionyesha kuuhusudu Uzungu kupitiliza. Katika siku za mwanzoni mwa likizo yake alidhani kule kusoma kwake nchini Uingereza kungemfanya Dina ampapatikie na angeweza kumpata kirahisi. Lakini Dina hakuwa hivyo! Dina aliendeleza msimamo wake uleule wa kuhakikisha Richard hampati!



Kengele ya hadhari ikalia kichwani mwa Richard, akagundua kumbe ujivuni ungemharibia mambo. Akajibadili kutoka kwenye tabia ya ujivuni na kuingia kwenye tabia ya kuwa mpole, akawa mnyenyekevu mbele ya Dina. Akaepuka kuzungumza stori za mapenzi kila alivyokuwa akikutana naye. Akaanza kuzungumza stori za matukio ya kusisimua yaliyopo na yaliyotokea nchini Uingereza. Stori hizo zenye mchanganyiko wa kutoka kwenye matukio halisi na historia nyingine za kuvutia alizokuwa akiziangalia kutoka kwenye dokumentari tofauti za vipindi vya kwenye runinga huku akimudu kuvielezea kwa ufasaha, vikaonekana kumwingia na kumvuta Dina.



Hali ikabadilika ghafla, Dina akaanza kuyafurahia mazungumzo hayo kila alipoonana na Richard. Ukaribu wao ukazidi, na Richard akajaribu kuitumia tena nafasi hiyo kumtaka Dina afike nyumbani kwao, lakini Dina hakuwa tayari kwa hilo. Hata hivyo, mkaa pamoja na waridi hunukia waridi. Ukaribu huo ukaanza kuleta mabadiliko, mwelekeo wa kuelekea kwenye mapenzi ukaanza kimya kimya. Ikafikia mahali ikawa halahala mti na macho! Richard akakaribia kidogo afanikiwe kumpata Dina kimapenzi.



Tukio hilo lilianzia usiku wakiwa pamoja nje ya nyumba ya akina Dina, walikuwa peke yao kwenye eneo hilo walilokuwa wakipenda kuonana na kuzungumza stori zao. Richard akazungumza neno lililomfurahisha Dina, Dina akajikuta akicheka na kukiegemeza kichwa chake kwenye bega la Richard. Ghafla Richard akapata akili ya kujaribu bahati yake, akauzungusha mkono wake kwenye shingo ya Dina na kumkumbatia. Akaunamia uso wa Dina na kuonyesha dhahiri alikuwa na lengo la kuubusu mdomo wa Dina. Mungu si Adam, akaishikia siku ya Richard kwa Richard kujikuta akinyonyana ndimi na Dina bila ya bishano la aina yoyote.



Siku hiyo Richard hakuiamini bahati hiyo! Hata alivyokwenda kulala, usingizi ulikataa kuja mapema, muda mrefu alijikuta akilifikiria tendo hilo na kuwa kama gurudumu la santuri ya video iliyokuwa ikijirudia wakati wote!



Lakini bahati hiyo ikaja kuharibiwa na marafiki zake ambao ni watoto wa matajiri kama alivyo yeye. Badala ya kuendelea na mkakati wa kutulia uliomletea matunda kwa Dina, Richard akaanza kukosa utulivu. Marafiki zake wakaanza kumyumbisha kwa kumfuata nyumbani kwao na kwenda naye kwenye madisko. Ikawa leo huko, kesho kule. Mara kwenye fukwe za bahari, mara wako na wasichana hawa, kesho wale. Dina akazishitukia tabia za Richard za kubadilisha wasichana, hata hivyo akaamua asimlalamikie Richard jambo hilo.



Aliamua asimlalamikie kwa sababu hakuuona ulazima huo! Ukaribu wao haukuwa mzito hivyo, hata kile kitendo cha faragha kilichofanyika kati yao cha kunyonyana ndimi zao hakikuwa kimemwumiza kutokana na kuwa, kilifanyika mara moja!



Dina hakukubali tena kukirudia kitendo hicho kila walipokuwa pamoja. Akawa amembadilikia ghafla Richard! Akaanza kumkwepa Richard kila Richard alivyokuwa akiomba kuonana naye na hata wakati walivyokuwa wakionana, Dina hakuwa tayari tena kukubali kusimama eneo lolote la faragha. Akawa anampa picha ya wazi Richard kumwonyesha kuwa, sasa ule ukaribu uliokuwa ukihitajiwa kati yao haukuwa na umuhimu tena! Richard akaanza kumlalamikia Dina kuwa amebadilika ghafla, hata hivyo Dina aliamua kutompa sababu ya kwa nini alikuwa akifanya hivyo!



Kugundua kuwa alikuwa hatakiwi na Dina kulianza kumchanganya Richard, lakini kilichomchanganya zaidi ni kule kutoijua sababu iliyomfanya Dina auchukue uamuzi huo wa ghafla wa kumkataa pasipo kumtamkia. Matumaini ya uhusiano wao baada ya tukio la kuzikutanisha ndimi zao akayaona yakiteleza mikononi mwake huku juhudi za kuzuia zikipoteza dalili zote.Hapo ukawa mwanzo wa Richard kugundua kile alichokuwa hakijui mwanzoni kuwa, kitendo cha kukataliwa na Dina kilikuwa ni jambo lisilokubalika kwake!



Mapenzi ya kumpenda Dina yalikwisha kumuingiza kichwa kichwa kiasi cha kujiona hawezi akajitoa! Ukawa ni mshituko ambao hakuutarajia, likawa ni pigo kwake kukataliwa baada ya kupenda! Akajaribu kuomba aina yote ya misamaha, lakini Dina hakuonyesha dalili ya kurudi nyuma kwenye uamuzi wake!



Wakati akiwa kwenye jitihada zote za kutaka kulirudisha tena penzi kwa Dina, likizo nayo iliyokuwa ikimuweka nchini ikaisha. Richard akarudi Uingereza bila ya mafanikio ya kuurudisha tena uhusiano wake na Dina!






* * * * * 



****DINA ndani ya ofisi moja na RICHARD..mpenzi wake wa utotoni…nini kitaendelea??



****Je? Ile mbinu ya Mama Richard itazaa matunda.
***Ndoa ya John na Dina…na vipi hatma ya Judy???
**NI VITA KATI YA PESA, MAPENZI NA WIVU!!!



ITAENDELEA