KURUDI KWA MOZA - 4

 

Simulizi : Kurudi Kwa Moza

Sehemu Ya Nne (4)





Doto alimuangalia Salome kwa hasira sana kwani alionekana ni msichana mdogo ila aliyekuwa na amri zaidi, ila bado alikuwa hajielewi elewi hata alivyorudishwa nyumbani na kumuuliza swali Salome bado hakuelewa kabisa, akataka kutoka tena nje ila kabla hajatoka akamuona mama yake akiwa na Ana wakija kwa kasi sana na wameshika sufuria la maji ya moto na kummwagia Salome, ila muda huo huo alishangaa kuona kuwa yale maji kumbe alikuwa anamwagiwa yeye na sio Salome, alijikuta akipiga kelele za maumivu.

Rose na Ana walistaajabu pia kwani hakuna aliyedhania kuwa yale maji yangemmwagikia Doto, kitendo cha Doto kupiga kelele kiliwafanya watupe sufuria na kwenda kumshikilia hata Sara na ndugu yake Kulwa walikuja kwa kasi ya ajabu kwani kelele za Doto ziliwashtua hadi mlinzi getini aliingia ndani kuona kuna nini tena maana zile kelele hazikuwa za kawaida. Sara alimkuta mama yake amemshikilia Doto huku nae analia pia, Sara akauliza

“Kuna nini?”

“Nenda kachukue funguo ya gari tumpeleke Doto hospitali”

Sara akaenda chumbani kwa mama yake kuchukua funguo kisha kurudi nazo, ambapo mama yake aliwaomba wasaidiane kumkokota Doto mpaka kwenye gari ili wampeleke hospitali. Wakati huo Salome alikuwa pembeni tu kanakwamba haoni tukio linalotokea ila alikuwepo na alikuwa akiwaangalia tu, walimpakiza Doto kwenye gari kisha nyumba nzima wakaenda kumpeleka hospitali kasoro Salome na mlinzi ambaye anabaki kulinda nyumba.

Walipoondoka, huyu mlinzi alimshangaa sana Salome na kumfata kumuuliza,

“Mbona unaonekana hujali kabisa! Utafikiri kitu hakijatokea ndani, yani kama mtu ambaye hujui kinachoendelea”

“Ulitaka nifanyeje”

“Yani huonyeshi kujali kabisa, wenzio wote wameenda hospitali kasoro wewe”

“Mbona na wewe hujaenda?”

“Mimi ni mlinzi”

“Ila unajua kwamba mimi naweza kufika hospitali kabla yao? Ila wale hawaendi hospitali kwasasa”

“Wanaenda wapi?”

“Wakirudi watakwambia walipoenda”

“Unajua wewe sikuelewi toka siku umefika hapa”

“Na kamwe hutokaa unielewe”

Kisha mlinzi akaamua kwenda kuendelea na kazi yake kwani kiukweli hakumuelewa kabisa Salome na muda wote alimuona kama mtu wa ajabu.



Wakiwa ndani ya gari kwenda hospitali, walienda mwendo mrefu sana na kuona hospitali kisha wakashuka ila wakashangaa tena hapakuwa hospitali ila ni kwa mganga. Rose alikumbuka kuwa huyo ndiye mganga aliyekuwa akizungumza na Ana kuwa ataenda kwa huyo, watoto wake walimuuliza kwa mshangao,

“Mama vipi tena, mbona hapa sio hospitali? Panaonyesha ni kwa mganga”

“Hata mimi mwenyewe sielewi tumefikaje hapa, ila nadhani ni Mungu katuleta kwani mganga huyu nilikuwa namuhitaji sana bora tuingie tu”

Ana alimuangalia mama yake na kumtahadhalisha,

“Mama tulisema tunampeleka kaka hospitali, ila hatukukubaliana kumleta kwa mganga. Sidhani kama tupo sehemu sahihi”

“Mwanangu Ana, usiwe na mashaka. Acheni mimi niingie kwa mganga maana huu ni uchawi aliofanyiwa Doto”

“Ila mama kumbuka kuwa yale maji tuliyopanga kuyamwaga hayakuwa ya kichawi, tunamuumiza Doto ujue, bora tumpeleke hospitali”

Hapa ndio wengine wote wakaelewa kuwa mama yao na Ana wanafanyaga uchawi ndiomana wamesema maji waliyoyamwaga hayakuwa ya uchawi. Rose alikuwa mbishi sana, kwavile tayari alishafika kwa mganga kwahiyo aliona ni vyema kuingia kwa mganga na kuzungumza nae.

Rose alivyoingia kwa mganga, Ana akawapa ushauri ndugu zake kuwa wampeleke Doto hospitali kwakweli hata wao walishangaa sana kuwa moyo wa Ana umebadilika kiasi kile, Kulwa aliingia kwenye gari kisha wote kupanda kwenye gari na kuanza kuulizia kwa watu waliowaona pale njia ya kuelekea barabara kuu na kuulizia hospitali.

Rose hakujua kama amebaki mwenyewe kwa Yule mganga, kisha akaanza kumueleza matatizo yake,

“Yani hapa nilipo, mwanangu kaungua na maji mwili mzima. Naomba unisaidie, ni kweli maji nimemmwagia mwenyewe ila lengo langu ilikuwa ni kummwagia mtu mwingine ila eti akamwagikiwa yeye, si nifanyiwa mambo yasiyofaa hayo babu”

“Sikia Rose, unajua kwamba wewe ndio chanzo cha wale waganga wawili waliokufa, yani wote walitaka kukusaidia wewe wakafa. Sasa umekuja na kwangu unataka kunimaliza na mimi!”

“Hapana, ila nahitaji maisha yangu yarudi kama zamani. Nahitaji kufurahia tena maisha, ona mume wangu hataki hata kuniona na hata sijui akija siku na hasira zake atanifanya nini, dawa zangu hazifanyiki. Nyumba yangu ila siwezi kufanya chochote utafikiri sio nyumba yangu”

“Kwanza niambie umefikaje leo hapa”

Rose akamuelezea kwa kifupi kuwa walikuwa wakimpeleka mwanae hospitali ila wakashangaa wamefika hapo,

“Hata hukugundua kuwa umebadilishiwa njia, badala ya kwenda hospitali ukaja huku! Na kama ameweza kukubadilishia njia huyo mtu basi ujue kuwa anauwezo wa kuzunguka na wewe kila mahali, kwahiyo tunaweza tukapanga dawa mimi na wewe ila akawa ameshatusikiliza yote. Huyo mtu lazima anajua kuwa unapenda sana waganga ndiomana amekuleta kwangu kwa makusudi kabisa”

“Babu, nahitaji kujua ni mtu gani huyo anayenifanyia vitu hivi?”

“Mfano ukishamjua, utafanyaje?”

“Tumshughulikie”

Basi Yule babu akaanza kupiga ramli zake kwa muda kidogo kisha akatulia na kumwambia,

“Siwezi kukwambia nimekatazwa”

“Jamani babu, umekatazwa na nani?”

“Sikia Rose nikwambie kwa usalama wako, rudi nyumbani kwako na ukiona kuna mtu nyumbani kwako anakuelekeza sana basi fatilia anachokiataka mtu huyo”

“Mtu anayependa kunifatilia nyumbani siku hizi ni mmoja tu, na tangu amefika nyumbani kwangu ndio mambo yamebadilika simpendi hata kidogo ila sidhani kama ana nguvu za kichawi kiasi kwamba aniumize mimi”

“Kwanza unajua kama muda umeenda sana, na usiku umeingia. Huwa sifanyi kazi usiku ila alfajiri ndio muda mzuri kwangu”

“Kwahiyo unanishauri nije kesho”

“Ndio njoo kesho”

“Bora nilale hapa hapa na wanagu ili niwahi kesho”

Rose hakuwa na wazo la haraka haraka kuwa Doto anahitajika hospitali kwani alichowaza yeye ni kutibiwa na mganga tu.

Basi akatoka nje ili akawaambie watoto wake ujumbe wa mganga ila hakuwakuta, alishtuka sana kwani hata gari hakuikuta na vitu vyake vyote aliviacha kwenye gari. Akarudi tena kwa mganga, ila mganga alimshauri alale hapo hadi asubuhi ili waangalie watoto wako wapi, Rose hakuwa na namna zaidi ya kukubali tu.



Neema nae alifika usiku na familia yake yani wale watoto wake mapacha, akiwa amechoka sana ila alikuta ndani kwake kama kuna mtu na kuhisi ni Salome, kisha akagonga mlango na kweli Salome alienda kuwafungulia na kuwapokea huku akionyesha tabasamu zito sana. Neema alikaa na kuzungumza na mwanae,

“Hukuondoka kabisa nini toka siku ile?”

“Niliondoka mama”

“Sasa umejuaje kama leo ndio narudi?”

“Sikujua ila huwa narudi kila jioni, halafu nikahisi kama mnarudi vile ndiomana nikapika kabisa”

Neema alitulia tu ila huyu Salome wake wa kipindi hiki alikuwa akimshangaza sana, kwanza Salome wake ni muoga ila kaweza kulala hapo nyumbani kwa siku zote alizokuwa safarini, halafu Salome wake alikuwa mvivu ila huyu kazi zote anafanya, kama hapo kawapikia kabisa kwahiyo walienda kujimwagia maji tu na kula huku akimpa salamu Salome za kutoka kwa bibi zake na ndugu zake wengine,

“Ila wamekukumbuka, haswaaa bibi yako anaomba uende ukamsalimie”

“Nitaenda tu hata wasijali”

“Ila mwanangu umebadilika sana”

“Kwanini mama?”

“Ulikuwa mvivu sana zamani, yani kama leo ningekuta hujafanya chochote. Halafu ulikuwa muoga sana yani ningekuta umeenda kuishi kwa marafiki huko”

“Nimekuwa mama”

“Amakweli umekuwa sasa”

Aliongea ongea nae kisha akamuaga na kwenda kupumzika huku wadogo zake Salome wakiwa wamelala muda tu walipomaliza kula kutokana na uchovu wa siku hiyo. Basi Salome nae akaenda chumbani kwake, kwahiyo ilijulikana kuwa nae amelala.



Kwenye mida ya saa tano usiku ndio Sara, Ana na Kulwa walirudi nyumbani na kumuacha Doto akiwa amelazwa hospitali, kwahiyo walifika wakiwa wamechoka sana. Mlinzi aliwauliza kuwa imekuwaje huko hospitali,

“Amelazwa, ni ameumia sana”

“Eti Salome alisema hamuendi hospitali”

Ana akauliza,

“Yeye Salome yuko wapi yani huyo msichana ni nuksi tena nuksi kabisa. Ni kweli hospitali tumeenda badae maana mwanzoni tulijikuta kwa mganga. Hivi wewe unamuonaje huyu Salome, kwanza yupo?”

“Hayupo, ametoka”

“Basi nitakuja tuongee vizuri”

Mlinzi alishangaa sana kwa Ana kuongea vizuri vile na yeye kitendo hicho kilimshangaza sana ingawa mambo ya Salome ndio yalikuwa yanamshangaza zaidi.



Waliingia ndani huku wakiamini kwa vyovyote vile mama yao amebaki kwa Yule mganga, walitamani kumuuliza Ana ila walimuogopa maana ana muda wake wa kubadilikia watu.

Ana aliwaacha ndugu zake ndani na kutoka tena kwenda kuongea na mlinzi wao.

“Hebu niambie, kwanza wewe unamuonaje huyu Salome!”

“Kwakweli sijui nisemaje ila simuelewi yani huwa simuelewi kabisa kabisa”

“Unahisi anaweza akawa ni mchawi?”

“Inawezekana maana haeleweki kabisa. Na mama mmemuacha wapi?”

“Yani habari ya mama sijui tukuelezeje ila kwa kifupi amebaki kwa mganga. Hivi mtu akitaka kuacha uchawi anafanyaje? Anaenda kwa mganga kutolewa au anafanyaje?”

“Kwa mganga ni kuuzidisha uchawi sijui sasa mtu anawezaje kuacha uchawi, unataka kumpeleka Salome?”

“Hapana, kuna jambo nataka kulifanya. Utalijua tu”

Kisha Ana akarudi tena ndani na kuwaona dada yake na kaka yake pale wakijadiliana na kukubaliana kesho wawahi hospitali kisha waende kumchukua mama yao maana hakuna aliyejua kuwa mama yao atarudije ila kitu pekee walichojua ni kuwa yupo kwa mganga wa kienyeji.

“Sasa basi tuchemshe chai tunywe tu na ile mikate tuliyonunua”

“Ndio tufanye hivyo hakuna namna”

Kwahiyo Sara akaenda kuandaa chai ili waweze kunywa.



Mishi akiwa ndani kwao, mara alijiwa na rafiki yake ule usiku, ikabidi atoke kumsikiliza,

“Mmmh mbona usiku sana, saa sita kasoro hii!”

“Ni usiku kweli ila sijaweza kulala na habari hii”

“Habari gani?”

“Leo nilikuwa hospitali kumuona ndugu yangu, gafla nikaona kuna mgonjwa analetwa na ameungua vibaya vibaya ndio wametoka kumfunga funga mabandeji na kumpaka dawa, kila mtu kashikwa na huruma pale, ikabidi nimsogelee kumpa pole. Jamani ni Doto Yule mpenzi wako”

Mishi akashangaa sana na kumuuliza rafiki yake,

“Una uhakika ni Doto?”

“Ndio ni Doto maana nilisikia ndugu zake wakimuita Doto”

Mishi alikaa kimya kwa muda kwanza kwani tukio la Doto lilimshangaza toka muda alikuja kuongea nae, akakumbuka kuwa alienda pale kuongea nae ila alitaka kumpiga kibao na mara hakumuona huyo Doto mwenyewe halafu muda huu anapata habari kuwa Doto ameungua na maji ya moto haikumuingia akilini kabisa.

“Au Doto amekufa, aliyekuja kwangu huku ni mzimu!”

“Hapana hajafa bhana, ni mzima ila ameungua sana”

“Unajua watu kufa huwa wanachelewa chelewa kidogo, usikute amekufa anangoja tu muda wa kufa kabisa hapo”

“Kwanini unasema atakuwa amekufa?”

“Sababu Doto alikuja kuongea na mimi jioni jioni hivi na akataka kunipiga mara gafla akatoweka hata nikaogopa”

“Alitoweka?”

“Ndio alitoweka”

“Alitowekaje?”

“Hata sijui nikuelezee kwa namna gani ila alitoweka”

“Inawezekanaje mtu atoweke jamani? Mbona haiwezekani au ulikuwa unaota Mishi! Na kwanini alitaka kukupiga?”

“Hakuna kitu bhana, ila endelea kushangaa kutoweka kwake”

Mishi akainuka pale ila cha kushangaza alitokea kwenye sebule ya kina Doto, na pale sebleni alikuwepo Kulwa, Sara na Ana wakinywa chai kwahiyo nao wakapatwa na mshtuko kumuona ndani kwao.





Mishi akainuka pale ila cha kushangaza alitokea kwenye sebule ya kina Doto, na pale sebleni alikuwepo Kulwa, Sara na Ana wakinywa chai kwahiyo nao wakapatwa na mshtuko kumuona ndani kwao.

Wakainuka wote kwa mshangao na kutaka kumfata ila Mishi akaanza kutafuta sehemu ya kutokea na bahati akauona mlango wa kutoka nje na kufungua akakimbia, wakataka wamfate maana hakuna aliyekuwa anaelewa kuwa imekuwaje vile yani kila mmoja alishikwa na uoga wa hali ya juu huku akishangaa mara gafla kabla hawajatoka nje akatokea Salome huku akicheka sana, wakajikuta wakisema kwa pamoja tena kwa mshangao,

“Salome!!”

“Ndio ni mimi, mnadhani mnaota?”

“Umekujaje kimiujiza?”

“Mbona huyo aliyeondoka hamkumuuliza kuwa amekujaje?”

Wakamuangalia Salome, kisha wakamuacha na kwenda getini ambako walimkuta Mishi ndio akiishia getini kutoka, Ana alimfata mlinzi na kumuuliza,

“Mbona umemuachia atoke?”

“Sikumuelewa na yeye pia anaonyesha hajielewi, sijamuona kuingia ila nimemuona kutoka kwakweli sikumuelewa”

“Na Salome yupo ndani”

Mlinzi alishtuka sana kusikia kuwa na Salome yupo ndani wakati hakumuona akiingia,

“Mbona sijamuona akiingia?”

“Ndio ushangao hapo, Yule msichana ni mchawi hata naogopa kulala ndani ya nyumba”

Muda kidogo Kulwa na Sara nao walitoka wakidai kuwa hawawezi kulala ndani ya nyumba yao maana Salome hakuwa mtu wa kawaida, basi wakakubaliana kuwa watoke nje hata waende wakakodi hoteli ya karibu na kulala huko, mlinzi alitamani pia kuondoka ila alihofia kazi yake huku akiwa na mashaka sana, aliwashuhudia tu wakipanda kwenye gari na kutoa gari nje kisha kuondoka zao.

Mlinzi alikuwa na mashaka sana ila Salome alimfata Yule mlinzi pale getini na kumwambia,

“Umefanya jambo jema sana kutokufatana nao”

“Ila naogopa pia, hivi wewe Salome ni mtu wa kawaida kweli?”

“Kwanini mimi nisiwe mtu wa kawaida?”

“Sijakuona ukiingia ila gafla nakuona ukitokea ndani”

“Yani hiyo tu ndio inafanya mimi nisionekane mtu wa kawaida? Mbona Yule msichana pia hukumuona akiingia na umemuona akitoka, je nae ni mchawi? Ila usiogope sana, hata mimi natoka siwezi kuendelea kulala humu ndani peke yangu”

“Unaogopa?”

“Ndio naogopa pia, mimi ni mtu wa kawaida kwahiyo kitu cha ajabu kama hivi kikitokea lazima niogope”

Salome alitoka na kumuacha Yule mlinzi pale getini, kwakweli aliogopa sana huku akiangalia ile nyumba kwa uoga ila alijipa moyo sababu yuko nje kwahiyo alihisi lolote baya likitokea basi atakimbia.



Mishi alikuwa na uoga wa hali ya juu maana hakudhania kama ingetokea muda angerudishwa kimaajabu kwakina Doto, kwakweli alichanganyikiwa sana. Njiani aliona vijana watatu alianza kukimbia huku akipiga kelele kwani alijua ni lazima angebakwa tu, ila wakati anakaribia nyumbani kwao walitokea vijana wengine na kumpiga teke kisha kuanza kumbaka, Mishi alipiga kelele sana na watu walijitokeza kumsaidia kisha wale vijana wakakimbia, wale waliomsaidia Mishi walikuwa ni ndugu zake, na walimrudisha nyumbani huku wakimpa pole na kumuonea huruma sana, mama yake alikaa karibu na binti yake chumbani kumpa moyo,

“Yani mwanangu tulikumbwa na uoga wa hali ya juu ndiomana wote tulikuwa macho tukikutafuta, maana mwenzio alivyosema umetoweka kila mmoja alishikwa na mashaka hapa. Ilikuwaje mwanangu?”

“Hata sielewi mama”

“Ulitowekaje?”

“Hata sielewi mama”

“Haya ni maajabu sana mwanangu, sijui hata tufanye nini yani hadi naogopa. Hapa naogopa hata kulala”

“Sio wewe tu mama, hata mimi mwenyewe naogopa hata kulala”

“Ndugu zako wote hapo nje wapo kwaajili wamepata habari ya kutoweka kwako, wale mafirauni waliokuwa wanakufanyia kitendo cha kikatili hatujawapata mwanangu, yani tutawatafuta popote pale”

“Mnadhani mtawapata mama? Hata msijisumbnue, kesho nitakupeleka mahali nilipopewa hii laana”

“Laana! Umepewa laana kivipio mwanangu?”

“Mama, ni aibu hata kusema ila nimepewa laana na binti mdogo kabisa yani nadhani yote haya yanatokea kwa laana yake. Mama nipo tayari kuolewa na mzee Juma”

“Kheeee upo tayari kuolewa tena?”

“Ndio, bora niwe mke wa mtu labda itapotea hii laana. Naomba niolewe mama”

“Sasa mwanangu mbona gafla sana, na kwa huyo mtu tutaenda saa ngapi?”

“Tutaenda kesho, lakini baada ya mimi kuolewa. Naomba ukaongee na mzee Juma kesho asubuhi mwambie nipo tayari kuolewa nae, iwe kesho, tufunge ndoa hata ya fasta ila niolewe tu mama”

Mamake Mishi alimshangaa sana binti yake kwa maamuzi hayo ila kwavile hakujua ni kitu gani kilimsumbua binti yake huyo, ikabidi tu akubaliane nae kwani hata yeye tukio la binti yake kutoweka lilimshtua sana.



Sara, Kulwa na Ana walifika kwenye hoteli moja ndogo kisha kulipia vyumba vitatu vya kulala kwani Ana na Sara bado ilikuwa haiivi kulala kwenye chumba kimoja, kwahiyo kila mmoja aliingia kwenye chumba chake kisha wakakubaliana kuwa asubuhi waamshane mapema ili wawahi kurudi nyumbani na waandae chakula cha kumpelekea mgonjwa.

Cha kushangaza walipoamka kila mmoja alijikuta kwenye chumba chake nyumbani kwao, kwahiyo kila mmoja alikuwa na mshangao peke yake kuwa imekuwaje tena. Sara aliinuka na kuangalia vizuri, alikumbuka fika kuwa mara ya mwisho alilala kwenye chumba cah hoteli sasa imekuwaje kujikuta wamelala ndani kwao? Alikuwa na mashaka sana, akaamua kutoka nje na kwenda sebleni, ni kweli ilikuwa ni ndani kwao, muda kidogo alimuona Kulwa akitoka na Ana akitoka na wote wakiwa na mshangao huku wakiulizana,

“Jamani imekuwaje?”

“Labda tukuulize Ana imekuwaje!”

Sara alisema hivyo ila hiyo kauli ilimkera Ana kwani ilionyesha wazi kuwa yeye ana nguvu za ajabu na ndio amefanya hivyo kwao, ila Ana aliwajibu kawaida tu

“Jamani, mimi na nyie tulikuwa eneo moja kwahiyo swala la kuniuliza kuwa imekuwaje hata mimi sijui. Cha muhimu tumesharudi nyumbani basi tukamuandalie chakula kaka na tumpelekee hospitali”

Ikabidi wakubaliane kufanya hivyo ingawa hawakujua kuwa ni chakula gani wataenda kumpelekea hospitali kwa wakati huo, na wakaona kuandaa itawachukua muda mrefu kwahiyo wakajadiliana kuwa waende tu hospiatali kisha wataenda kumnunulia chakula huko huko. Ikabidi waende kujiandaa tu muda huo, kila mtu alijiandaa upesi upesi kwani kila mtu alikuwa na mashaka kupita maelezo ya kawaida, na walipomaliza walitoka nje, walipofika getini mlinzi alishtuka sana na kuwauliza

“Mmeingiaje humu ndani?”

Hawakumjibu kitu kwani hata cha kumjibu kingekuwa ni kitu gani, ila mlinzi aliendelea kusema

“Kwa stahili hii sidhani kama kuna umuhimu wa mimi kuendelea kulinda hapa, ikiwa watu wanavyoingia ndani siwaoni ila nawaona wakati wa kutoka tu”

Wakina Sara hawakumjibu zaidi ya kumsalimia tu, kisha wakatoa gari na kuondoka zao.

Walivyofika hospitali walimkuta ndugu yao akiwa anaendelea afadhali kidogo kisha wakamuuliza chakula cha kumletea,

“Hapana msihangaike, Salome alikuja hapa saa kumi na mbili na kaniletea mtori. Kaninywesha hadi nimeshiba kabisa, Yule binti ana moyo wa huruma sana”

Ana akadakia,

“Ana moyo wa huruma wakati ndio chanzo cha kuungua kwako”

“Ana nyamaza usitake niongee sana, yeye ni chanzo wakati chanzo ni wewe na mama, si wewe na mama ndio mmenimwagia maji ya moto! Unafikiri sikumbuki eeh! Nakumbuka vizuri, ni nyie ndio mmefanya niteseke hivi”

“Mmmh basi yaishe, cha muhimu upone tu na uendelee salama”

Wakaongea ongea nae pale na kumuaga kuwa wataenda tena mchana kumuona, naye aliwaitikia kisha wakaondoka na kuanza safari ya kumfata mama yao ambaye walimuacha kule kwa mganga.



Nyumbani kwa Neema, siku hiyo alishangaa asubuhi asubuhi binti yake amepika na kuondoka halafu muda kidogo akarudi,

“Kheee ulienda wapi Salome?”

“Kaka yangu amelazwa”

“Kaka yako!”

“Ndio, mtoto wa Yule mama wa kule mke wa baba”

“Kheee anaumwa nini tena”

“Eti aliungua na maji ya moto”

“Basin a mimi tutaenda wote kumuona mchana”

Salome alimkubalia mama yake kuwa mchana wa siku hiyo ataenda nae kumuona hospitali, huku akionekana kushughulikia chakula cha mgonjwa. Yani Salome alikuwa akifanya vitu ambavyo alijua badae vitaleta majibu gani.



Wakina Sara walienda hadi kwa Yule mganga ambaye walimuacha mama yao na walikuta bado mama yao akiwa ndani ya kile kibanda cha mganga kumbe kulipokucha bado mganga aligoma kumuhudumia kwahiyo alikuwa akimbembeleza, ilibidi watoto wake wamsubiri tu.

Rose aliendelea kumuomba Yule mganga amsaidie,

“Sasa wewe mganga unavyokataa hivyo, mimi atanisaidia nani? Maji yamenifika shingoni sasa”

“Sijui nani atakusaidia kwakweli ila mimi siwezi, maisha yangu nayapenda sana. Watoto wangu bado wadogo, wengine wananitegemea kwakila kitu, sipo tayari kuwaacha. Nilikuwa nakupa moyo tu jana ila kukusaidia siwezi”

“Inamaana na wewe unamuogopa huyo anayetutisha kwenye nyumba yetu!”

“Wewe Rose una dawa nyingi sana, fanya dawa zako na wewe kuweza kutokomeza hali hiyo”

“Ni kweli nina dawa nyingi lakini sijui jinsi ya kuzitumia”

“Na mimi siwezi kukwambia namna ya kufanya na siwezi kukusaidia kwakweli, labda uende kwa waganga wengine”

Rose alitumia muda mrefu sana kumshawishi huyu mganga ila jitihada zake ziligonga mwamba, ikabidi aanze kumfikiria mganga mwingine wakati akili yake imepata jibu juu ya mganga mwingine wa kwenda akaamua kufanya hivyo, ndipo alipotaka kutoka kwa mganga Yule ila alishangaa Yule mganga akimzuia na kumwambia kuwa atamsaidia, Rose alifurahi na kukaa chini ili kusikiliza Yule mganga atamsaidiaje, kisha Yule mganga akaanza kupiga tunguli zake, na alipomaliza akaanza kuongea nae,

“Kwanza kabisa, Yule mtoto wako ambaye kaungua na maji ya moto hamtakiwi kumpeleka hospitali”

“Mmmh mganga sijui kama watoto wangu watarudi tena hapa, kumbuka usiku sikuwaona au bado wapo nje?”

“Sijui ila hutakiwi kumpeleka hospitali”

“Basi ngoja nijaribu tena kuwatafuta”

Rose alitoka mule kwa mganga huku akiwa na mawazo sana kuwa watoto wake walielekea wapi ila alishangaa kufika nje, kuona gari yake na watoto wake ndani ya gari na ilionyesha wazi walikuja kumfata mama yao. Alijiuliza kuwa mbona usiku wa jana hakuwaona, kwamaana hiyo waliondoka au imekuwaje hapo, hakupata jibu kabisa. Aliwafata na kuwauliza kulikoni mbona usiku wa jana hakuwaona alipotoka kwa mganga, Sara alikuwa wa kwanza kumjibu mama yao,

“Mama tumekuja kukufata wewe, Doto kalazwa hospitali twende ukamuone”

“Kwahiyo Doto mmempeleka hospiatali?”

“Ndio mama”

“Nyie watoto jamani mbona mnanitafutia ubaya!”

“Ubaya upi mama? Doto yupo hospitali na tungemchelewesha tu tungemkosa, naomba twende mama”

Rose alikuwa ameduwaa tu nje huku akiwa hajielewi kuwa afanye kitu gani, Kulwa alishuka kwenye gari na kumpakia mama yao kinguvu kisha akapanda kwenye gari na kuondoa gari hiyo. Rose alikuwa kimya tu kwani bado alikuwa akitafakari bila ya jibu, mganga kamwambia kuwa mtoto wake asipelekwe hospitali na huku washampeleka hospitali kwahiyo hata akienda kumbembeleza tena mganga ni kazi bure kwa wakati huo. Ikabidi atulie tu kwenye lile gari, na alijiuliza tena kuwa mganga alikuwa na maana gani kuwa mtoto wake asipelekwe hospitali! Bado hakuwa na jibu, hadi wanafika hospitali ilikuwa ni mchana tayari, ila walipofika walizuiliwa na kuambiwa kuwa muda wa kuona wagonjwa umeisha, ikabidi Sara aulize

“Jamani mbona asubuhi mlituruhusu wakati muda ulikuwa umeisha?”

“Asubuhi aliyewaruhusu aliwaruhusu kimakosa, njooni jioni ndio muda uko wazi”

“Sasa mgonjwa wetu hajala”

“Ameshakula, kuna ndugu yenu kashampa chakula. Atatoka muda sio mrefu”

Yule nesi alisogea kidogo, na muda sio mrefu wakamuona Salome akiwa ameongozana na mwanamke mmoja, Rose alipomuangalia vizuri Yule mwanamke aligundua ni Neema ambaye ni mama yake na Salome.

Salome na mama yake hata hawakuangalia upande, walikuwa wanaondoka tu ila Rose alimuita Neema,

“Neema”

Neema akageuka na kumuona kuwa ni Rose, uoga ukamshika kwani bado alikuwa anamuogopa Rose vilivyo, ila Rose alimsogelea Neema na leo kwa mara ya kwanza alimsalimia vizuri kabisa,

“Hujambo Neema”

“Sijambo shikamoo”

“Mbona unaniogopa hivyo!”

Salome akadakia,

“Anakuogopa sababu umezoea kumtishia”

Neema alimkatisha mwanae kuwa asiendelee kuongea maneno hayo, Rose alimwambia Neema

“Sina ugomvi na wewe na nimefurahi kukuona. Natumai umetoka kumuona mwanangu, mwanao pia nimempokea vizuri kwenye nyumba yangu ila mwanao ni mshirikina”

Neema akashtuka

“Mshirikina!”

Salome akacheka sana, kisha akamshika mama yake mkono na kumlazimisha kuwa waondoke eneo hilo, ila Neema alikuwa mbishi kufanya hivyo. Salome alimwambia mama yake,

“Mama, sijakuleta hapa kuja kubishana na huyu mtu. Halafu nina mambo mengi ya kufanya siku ya leo, tafadhali tuondoke nyumbani”

Neema alikuwa mbishi mbishi kwani bado alitaka kusikia kuwa kwanini mwanae kaitwa mshirikina ila ikabidi akubaliane tu na mwanae kuwa waondoke, ambapo salome alikodi bajaji iwapeleke nyumbani kwao ila kitendo cha Salome na mama yake kuondoka na ile bajaji, Rose alienda kuwaomba watoto zake kuwa waifate hiyo bajaji hadi wajue wanapoishi Salome na mama yake, kwahiyo walifanya hivyo na kuanza kuifatilia ile bajaji.



Nyumbani kwakina Mishi mamake alipoenda tu kumwambia mzee Juma kuhusu maamuzi ya Mishi wala hakubisha Yule mzee kwani siku zote alitamani Mishi akubali amuoe ukizingatia kashakula hela zake nyingi sana, kwahiyo hakutaka hata kupoteza muda ni siku hiyo hiyo akaita watu na kumuoa msichana huyo, ilifungwa tu ndoa ya kawaida yani haikuwa na shamra shamra zozote kwani ni ndoa ya haraka halafu haikupangwa ila Mishi alifurahi kuolewa na mzee huyu na hakumwambia kama alibakwa au alikutwa na matukio yaliyomfanya akubali kuolewa nae, ingawa alikuwa akijiuliza sana kuwa inakuwaje kuwaje mambo hayaeleweki kabisa.

Alipomaliza kufunga ndoa, akatembelewa na mgeni na kuambiwa kuwa kuna mgeni wake, alitoka kwa mashaka sana kwani bado hakuwa na imani na jambo lolote na uoga ulikuwa umemtawala. Alipoenda kuzungumza nae alishangaa kuwa ni Salome, akataka hata kurudi kwa ndugu zake ila alishangaa miguu yake ikigoma kufanya hivyo, kisha Salome akaanza kuongea nae,

“Usiniogope mimi sio mla watu, wala sio mchanganya wanaume kama wewe”

Mishi alikuwa kimya tu akimsikiliza,

“Umefanya uamuzi wa haraka sana kuolewa, hivi unajijua kama hapo ulipo una mimba? Au unataka hiyo mimba umsingizia Yule mzee wa watu?”

“Nina mimba ya nani?”

“Mi nitajuaje na umebakwa na watu wengi. Unajua wakati wa kubakwa ni vigumu kujizuia tofauti na ukitaka mwenyewe, sasa vipi unataka kumsingizia mzee wa watu!”

“Hapana sikuwa na nia hiyo ila nimeamua tu kutoka moyoni kuolewa”

“Kama umeamua kutoka moyoni mwambie ukweli, Yule mzee anakupenda na atakuelewa tu. Halafu kama umeamua kweli kwa moyo wako, tulia na mumeo. Ni mwanaume gani anaweza kukubali kufunga ndoa ya haraka haraka kiasi hiko? Anakupenda mwenzio, ni wa kawaida tu Yule hata sio mtu mzima kihivyo, mpende sababu umeamua mwenyewe uache tabia ya kuumiza moyo wake”

“Nimekuelewa na ninakuahidi nitampenda sana na nitamwambia ukweli wa kila kitu”

“Usiniogope, mimi ni binadamu wa kawaida tu kama wewe. Kwavile umesema utatulia kwa mumeo, naifuta laana yangu kwako”

Salome aliondoka, na Mishi alikuwa anamuangalia hadi alipoishia, hata alipoulizwa na mama yake kuwa mtu huyo alikuwa anaongea nae nini bado hakuweza kumjibu kwani kwake bado lilikuwa ni swala la aibu.



Wakiwa ndani ya bajaji, Neema alimshangaa mwanae amelala mpaka wanafika nyumbani ndio anamshtua kuwa washuke na waingie ndani, walipoingia ndani mara na wao wakina Rose walikuwa wamefika ila Salome alifanya jambo na kumfanya mama yake kuingia chumbani ili wakigonga mlango wa sebleni wasimkute mama yake na wamkute yeye. Basi kweli wakagonga mlango wa sebleni na kusikia sauti ya Salome ikiwakaribisha,

“Fungua mlango ingia”

Basi wakafungua na kuingia, Rose alikuwa wa kwanza kuingia mule ndani ila alishtuka sana kwani alijiona yupo nyumbani kwake na aliyewakaribisha alikuwa ni Patrick na sio Salome.





Basi wakafungua na kuingia, Rose alikuwa wa kwanza kuingia mule ndani ila alishtuka sana kwani alijiona yupo nyumbani kwake na aliyewakaribisha alikuwa ni Patrick na sio Salome.

Kila mmoja alipoingia alishtuka, kisha Patrick akawauliza kwa kejeli,

“Mnashtuka nini sasa? Mnashtuka kuniona kwenye nyumba yangu mwenyewe? Hapa si nyumbani kwangu, kwahiyo siruhusiwi kuja?”

Wote walikaa kimya kwani kila mmoja alikuwa akijiuliza kuwa imekuwaje tena wamerudi nyumbani kwao wakati walikuwa wakiingia kwakina Salome na aliwakaribisha, Patrick aliwashangaa kuwa hawasemi chochote akajua wanamfanyia kiburi bila ya kujua kilichowasibu.

“Nyie jifanyeji kiburi tu, mmenikuta kwenye nyumba yangu, hata salamu kutoa hamjatoa eti mnashangaa shangaa. Haya endeleeni kushangaa tu mkimalia mtaniambia”

Patrick akakaa chini akiwaacha wao wamesimama huku bado wakishangaa tu, Rose nae alikaa chini huku akitikisa kichwa chake na kusema,

“Hivi ni kweli au naota?”

Alidakia Ana na kumjibu mama yake,

“Ni kweli mama, tumerudishwa nyumbani tena bila ridhaa yetu. Anayetufatilia kwa hakika ana nguvu zaidi yetu”

Wote walikuwa kimya tu, Rose alipumua kwa nguvu maana mambo yalikuwa yakimchanganya zaidi na kuanza kuhisi huenda swala la kumpeleka Doto hospitali ndio limeendelea kuzua hayo wanayoyaona. Alipojitafakari vilivyo akamuangalia Patrick sasa na kuanza kumuomba msamaha maana kwa hakika Patrick alihisi wamemdharau,

“Tafadhali tusamehe bure ila yaliyotupata kwa siku ya leo hapana kwakweli”

“Yaliyowapata yapi hayo?”

“Mume wangu unanichukia bure tu ila familia yetu inafatiliwa na wachawi”

“Wachawi kushinda wewe uliyemuua mama yangu!! Yani mimi naongea na wewe bure tu ila wewe Rose ni mwanamke mbaya sana, umeniulia mama yangu, umefanya niiache familia yangu iteseke, nimeacha ndugu zangu wakiteseka huku mimi nikila raha ya maisha. Nimeacha mwanangu akiteseka huku wanao nikiwalea maisha ya kifahari, wewe ni mwanamke mbaya sana Rose”

“Naomba unisamehe kwanza, halafu hayo si maneno ya kuongelea mbele ya watoto”

“Unataka nikaongelee wapi? Umenitesa sana wewe mwanamke, na kwa taarifa yako ndugu zangu wanakuja hapa sio siku nyingi”

“Patrick! Ndugu zako wanakuja!”

“Ndio ndugu zangu wanakuja hapa na watakuwa wanakaa hapa”

“Haiwezekani Patrick, huwezi kufanya jambo bila kunishirikisha mimi. Humu ndani mimi ndio mama mwenye nyumba”

“Mke wangu ni Neema na ndio mama mwenye nyumba”

“Neema kivipi? Kumbuka Patrick, ulimuacha Neema na kunioa mimi, iweje leo useme mke wako ni Neema! Umechanganyikiwa wewe sio bure”

Kisha Rose akawaangalia watoto wake na kuwaambia,

“Hivi na nyie hamuwezi kwenda kufanya mambo mengine hadi make msikilize mazungumzo ya mimi na baba yenu!”

Patrick akadakia,

“Waonyeshe baba zao watoto wako, mimi sio baba yao. Na kibaya zaidi hata huyo mtoto wako wa mwisho nae sio wangu, nilijivunia nimepata mwanamke kumbe ananiacha ndani anaenda kuzaa na mwanaume mwingine nje”

Wakina Sara baada ya kuona jicho kali la mama yao ikabidi watoke nje na kuwaacha sebleni kwani Patrick aligoma kwenda kuongelea popote pale zaidi zaidi ya hapo sebleni.

“Jamani Patrick twende tukaongelee chumbani mambo hayo”

“Twende chumbani ili ukaniroge? Rose umeniroga kwa miaka mingi sana, akili yangu imefunguka sasa na huwezi kunishawishi juu ya kuniroga tena, mwanamke mbaya wewe”

Rose alijaribu kila njia ya kumtuliza Patrick ila leo alikuwa hatuliziki kabisa, inaonyesha wazi aliamua na alidhamilia.



Kule nje walienda moja kwa moja kwa mlinzi wao na kumuhoji kuwa Yule baba yao alienda saa ngapi pale nyumbani, ila mlinzi alivyowaona alishtuka sana badala ya kumuuliza yeye aliwauliza wao,

“Mmeingia muda gani humu ndani?”

“Tunataka kukuuliza baba amekuja muda gani?”

“Humu ndani mbona mmekuwa na mambo ya ajabu sana sijapata kuona, yani siwaoni kuingia ila gafla nawaona ndani”

Basi akafikicha fikicha macho yake na kuiona gari ambayo walitoka nayo ikiwa imepaki uwani, yani hapo ndio akashangaa kabisa kuwa hata gari ilivyoingia hakuiona yani aliona mambo ya ajabu na kuhisi nyumba yote hiyo ni wachawi.

“Mama akirudi namuomba mshahara wangu naacha kazi”

“Usiache kazi bhana, uache kwasababu gani? Hata hivyo mama yuko ndani”

Mlinzi akashtuka tena,

“Yuko ndani? Ameingiaje?”

“Tulikuja nae”

“Hii nyumba hapana, imenishinda kwakweli yani imenishinda kabisa siwezi kuendelea kuishi humu”

“Usiondoke, haya mambo yatarekebishwa tu hata usiende popote”

“Hapana siwezi, yani watu unawaona wakati wa kutoka tu ila wakati wa kuingia huwaoni!”

“Inamaana nae baba hujamuona wakati wa kuingia?”

Ana aliuliza kwa makini swali hilo kwani alitaka kujua kama ni kiini macho wamefanyiwa au ni kitu gani,

“Mzee yeye kafika vizuri, tumesalimiana nae hapa na kuuliza mko wapi na akaingia ndani kuwangoja. Yani nyie ndio mmenifanyia maajabu, na toka mzee aje sijatoka kabisa hapa getini leo, haya niambieni mmeingiaje”

“Yani hata sisi wenyewe hatujui kwahiyo utakuwa unatushutumu bure tu”

Ila huyu mlinzi alishikilia wazo lake tu kuwa yeye ataomba mshahara wake aondoke kwenye nyumba hiyo, wakati wanaongea na Yule mlinzi alifika mtu na kugonga geti alipomfungulia alikuwa ni Salome, walibaki wanamtazama kama dakika kadhaa ndio kumkaribisha ila Salome alitabasamu tu na kuingia ambapo moja kwa moja alienda ndani na kuwakuta Rose na Patrick wakiwa kwenye majibizano makubwa sana. Alipoingia tu kama kawaida yake aliingilia yale mazungumzo,

“Wewe mama ushaambiwa usamehewi, sasa ya nini kulazimisha msamaha!”

“Hata maandiko yanasema samehe saba mara sabini”

Salome alicheka sana ten asana kisha akamwambia,

“Hivi leo ndio unatambua maandiko yamesema hivyo, je ulipokuwa unamuua bibi wa watu asiyekuwa na hatia ulikumbuka maandiko? Ulipomtumia Ashura ajifanye anaundugu na Neema ili tu azidi kumkandamiza ulitumia maandiko? Wakati Salome anateseka na maisha wakati baba yake anakula raha ulitumia maandiko? Na zaidi ya yote, uliowafuga ndani kwenye chumba chako cha siri unatumia maandiko?”

Patrick akashtuka sana kusikia kuwa mkewe kuna watu anawafuga pia kwenye chumba cha siri,

“Kheee wewe mwanamke kweli ni shetani yani wewe una matendo hata shetani anayaogopa. Kwahiyo kuna watu umewafuga ndani kwako?”

“Salome jamani usizidi kunikandamiza jamani, nisameheni”

“Nani akusamehe mwanamke shetani kama wewe? Yani umefanya maovu mengi napo umeona hayatoshi ila ukaongezea na kuwafungia watu kwenye chumba cha siri!”

“Anafuga watu ndio huyu, hujui tu baba ila ndio hivyo anafuga watu huyu. Siku ukinijua vizuri utaelewa nimejuaje siri zako na njia zako, sipendi unavyowatesa wale watu, waachie waendelee na maisha yao mengine”

Kisha Salome akamgeukia Patrick na kumwambia,

“Wasichana wa kazi wote wanaopotea kwenye nyumba yako halafu anasema kawafukuza ni muongo, anawafungia kwenye chumba cha siri, ikitokea mtu kaumia kwenye nyumba hii damu ikamtoka basi asitoke mlangoni maana akitoka tu anajikuta kwenye chumba cha siri, huyu mama ni mpumbavu sana, anafanya mambo ya kijinga. Watu wa watu wamekonda sababu ya kufungiwa, ni bora ujue ndugu yako amekufa kuliko kujua ni msukule, huyu mama ni mbaya sana”

Sara na Kulwa walikuwepo mlangoni na walisikia yote ambayo mama yao alikuwa akishutumiwa, muda huu Ana alikuwa getini na mlinzi ila wao wakati Salome ameenda ndani walienda kukaa mlangoni, kwahiyo kila kitu kilikuwa wazi kwenye masikio yao na kuelewa kirahisi kuwa wote wanaohisi wamepotea kumbe mama yao amewafungia kwenye chumba cha siri, ndipo Sara nae alipojiwa na swala la Ommy, akaweza kufikiria ni jinsi gani Ommy alikuwa akiteseka kwenye hiko chumba cha siri, alijikuta akiingia ndani na kumwambia mama yake,

“Mama tafadhali mfungulie Ommy wangu”

Sara machozi yalimlengalenga kwani leo alielewa mchezo vizuri kabisa kuwa mama yao ni mchawi tena mchawi haswaa wala sio wa kusingiziwa kama wengine. Rose hakuweza kuvumilia hizi shutuma akaamua kukimbilia chumbani, kwahiyo sebleni alibaki Salome, Patrick na Sara.

Hizi habari za mkewe kuwa na chumba cha siri zilimshtua sana Patrick kwani aliweza kupata kumbukumbu kuwa kuna rafiki yake aliwahi kupotea kwenye nyumba yake hiyo na hakujulikana alipoenda hadi leo hajui ila hapo kapata jibu kuwa huenda nay eye amefungiwa kwenye chumba cha siri, akamuangalia mwanae Salome na kumuuliza,

“Wewe umejuaje hizi habari za huyu mwanamke kufungia watu kwenye chumba cha siri”

“Nilijua toka siku ya kwanza nilipokuja kufanya kazi humu”

Sara na Patrick walishangaa na kujikuta wakimuuliza kwa pamoja,

“Ulipokuja kufanya kazi humu!!”

“Ndio, ila msinihoji zaidi yani nyie mjue tu kwamba nilijua.”

“Sasa tutafanyaje ili awatoe”

“Najua cha kufanya ila njia yangu ni hatari sana, hatari kwake na kwa familia yake ndiomana nataka awatoe mwenyewe kwa hiyari yake”

Wakajikuta wakimuangalia Salome na ilionyesha wazi hawamuelewi elewi maana vitu vingine aliongea kamavile ni mtu wa aina nyingine na sio wa kawaida, Kulwa nae aliingia ndani na kuwaambia kuwa kasikia kila kitu na anashangazwa na habari hizo za mama yake kuwa kuna watu amewaeka msukule, basi akawa anajadiliana pale na dada yeka kisha Salome aliomba kutoka na baba yake ambapo alikubali na kuondoka na Salome halafu wakawaaga pale.



Neema alikuwa bado yupo chumbani kwake tangu muda ule walipotoka hospitali hadi anaiona jioni ikikaribia, akapigiwa simu na rafiki yake mama Pendo na kuanza kuzungumza nae ambapo mama Pendo alimkumbusha Neema swala la kumpeleka mwanae salome kwenye maombi,

“Usipuuzie Neema, mwanao anatakiwa aombewe”

“Sijapuuzia, nilisafiri ndiomana uliona kimya”

“Sasa lini utakuwa tayari ili nimwambie mchungaji wetu”

“Nitakwambia tu, siwezi kusema siku wakati Salome mwenyewe sijaongea nae chochote. Nikiongea nae nitakwambia ni lini”

Basi akakubaliana nae hivyo na kukata simu, kisha akatoka na kuanza kumuita Salome ila akaona kimya na kugundua kuwa Salome ameondoka, aliwakuta tu wanae wale mapacha wakiandika andika,

“Nyie dada yenu kaenda wapi?”

“Sijui ila ametoka”

“Yani huyu mtoto ameanza tabia ya kutoka bila kuniaga! Kweli wa kufanyiwa maombi huyu”

Ikabidi Neema aanze kufanya kazi zake za hapa na pale, ila hadi anamaliza kupika kisha watoto wake wale mapacha kwenda kulala ila Salome alikuwa hajarudi na kushangaa kuwa Salome kama alikuwa anaenda kulala huko huko si angalau angemuga basi, wakati analalamika hivyo akasikia hodi, alipoenda kufungua alikuwa ni Salome na Patrick ambapo aliwakaribisha vizuri tu kisha Salome akawaambia,

“Mi naenda chumbani kwangu, kwahiyo nyie endeleeni na mazungumzo tu”

Salome aliondoka, ila Patrick na Neema waliganda tu wakiangaliana na hakuna aliyemsemesha mwenzie kwani kwa muda huo kila mmoja alijiuliza kuwa nani anastahili kuanza kuongea kati yao. Muda nao ulizidi kwenda ikabidi Neema ajitoe muhanga,

“Nakusikiliza Patrick”

Wazo la haraka haraka la Neema alihisi kuwa Patrick ameenda kudai zile pesa zake alizomleteaga ndiomana alishindwa kuanza kuongea nae, ila Patrick leo alikuwa kama mtu aliyeshikwa na ganzi,

“Sijui hata nisemaje, ila nisamehe Neema”

“Mi nishakusamehe siku nyingi mbona”

“Nifanye nini unisamehe?”

“Wewe mbona mimi nishakusamehe jamani!”

Patrick alikuwa kimya tena kwani kadri alivyomuangalia Neema aliona anazidi kuwa mzuri, alimuona Neema akiwa mrembo zaidi kupita Yule Neema aliyemuoa akiwa na miaka kumi na sita, alijikuta akitamani kumuuliza kuwa mbona urembo ulizidi ila mdomo ulikuwa mzito, Neema nae alimuona Patrick akiwa zaidi ya vile alivyomuoa kipindi cha nyuma, alimuona Patrick amekuwa na sura ya kuvutia hatari, akajikuta anamwambia,

“Naenda kulala bhana”

Neema hakutaka tena kumuangalia Patrick kwani alihisi kumtamani ila ile alivyoinuka baada ya kumwambia naenda kulala, Patrick nae aliinuka na kufatana na Neema hadi chumbani, kwahakika Neema hakuweza kumfukuza Patrick ukizingatia alishakuwaga mume wake.



Kulipokucha, Patrick alikuwa amelala pembezoni mwa Neema na alijisikia vizuri sana, walijiona kamavile mapenzi yao ndio wametoka kutongozana. Waliamka wakitabasamu, na walipotoka chumbani walikuta Salome ameshawaandalia kifungua kinywa, kisha akawakaribisha mezani na kusema,

“Baba, kuanzia leo naomba uhamie hapa”

Patrick alicheka tu ila kicheko cha furaha kwani alijihisi kama amekuwa mtu mpya kabisa kwa siku hii na alikubaliana na kila jambo aliloambiwa na Salome.



Rose aliamshwa na sauti ya mlinzi wake aliyemuomba kwaajili ya maongezi, alipotoka alimsalimia kisha Yule mlinzi akamwambia hoja yay eye kutaka kuondoka kwenye nyumba hiyo.

“Jamani kwanini unataka kufanya hivyo?”

“Mama siwezi, sijawahi kukukosea heshima hata mara moja mama yangu ila kwa hili naomba tu nirudi nyumbani, siwezi kuendelea kuishi humu ndani”

“Jamani nimekuzoea ujue Lazaro, sipendi unavyosema unaondoka. Nitakuongezea mshahara ila usiondoke hapa nyumbani kwangu”

“Mama, hapana acha tu nirudi kwetu”

“Tumetoka mbali Lazaro, kumbuka wewe ni mtu pekee unayefahamu vitu vingi kuhusu mimi, nakuomba Lazaro usiondoke. Kumbuka umeanza kukaa kwangu ukiwa kijana mdogo sana, tafadhali Lazaro usiondoke jamani”

“Basi, naomba niruhusu niende nikasalimie tu halafu baada ya wiki nitarudi”

Kuhusu hilo ikabidi Rose akubali ila wazo la Yule mlinzi ilikuwa akiondoka tu basi harudi tena, basi Rose akampa mlinzi wake hela baadhi na kuagana nae.

Mlinzi alibeba kila kilicho chake kwani lengo lake lilikuwa ni kuondoka na kutokurudi tena kwenye nyumba hiyo, na kweli aliondoka eneo hilo na kwenda kupanda basi la kwenda kwao, ila alipofika tu stendi ya kwao na kushuka kwenye lile basi alijikuta yupo ndani kwenye nyumba ya Rose huku mizigo yake ikiwa pembeni.



Mlinzi alibeba kila kilicho chake kwani lengo lake lilikuwa ni kuondoka na kutokurudi tena kwenye nyumba hiyo, na kweli aliondoka eneo hilo na kwenda kupanda basi la kwenda kwao, ila alipofika tu stendi ya kwao na kushuka kwenye lile basi alijikuta yupo ndani kwenye nyumba ya Rose huku mizigo yake ikiwa pembeni.

Alishangaa sana na kupatwa kama na sintofahamu maana ilikuwa ni kitu cha ajabu kwake ukizingatia alipanda gari la kwenda kwao na gafla anajikuta tena nyumbani kwa Rose, kwahiyo alikuwa akishangaa shangaa tu pale huku mizigo yake ikiwa pembeni. Salome alienda pale getini na kumshangaa pia halafu akamuuliza,

“Vipi na mizigo?”

“Yani sielewi, sielewi kabisa. Nilikuwa nishaondoka kwenye nyumba hii, nilishafika hadi stendi kwetu cha ajabu nimerudishwa tena hapa”

“Nani kakurudisha sasa?”

“Sijui ni nani, ila mimi mwenyewe nakumbuka kuwa mara ya mwisho nilikuwa stendi ya kwetu nashangaa nimerudi tena hapa. Kwanza saa hizi saa ngapi?”

“Saa tisa, kwani vipi?”

“Haya ni mambo ya ajabu sana, kutoka hapa hadi kufika kwetu ni masaa saba, ni kweli hapa nimetoka saa mbili asubuhi ila nimerudishwa kwa sekunde jamani, hii si haki yani hata kijijini kwetu sikufika, nilifika tu mkoani. Hili swala sio haki kabisa”

“Sasa nani kakufanyia hivyo?”

“Sijui ila natamani nifike kwetu jamani, nimechoka mimi na maajabu ya nyumba hii”

“Unatakiwa tu uwe mvumilivu, utapoteza nauli bure tu. Wewe tulia na usifikirie kila anayerudishwa hapa ni mchawi, je wewe ni mchawi?”

Akakumbuka jana yake aliwaambia watu wa humo ndani wote wachawi kwasababu alikuwa anawaona kutoka halafu hawaoni kuingia ila leo jambo hilo lilikuwa limempata yeye, akaona kwa staili ile ni ngumu kwake kuondoka ila hapo hapo alipata wazo la kuwasiliana na kwao ili awaeleze kuhusu tatizo hilo maana limekuwa kubwa sana kwa upande wake.



Rose baada ya mlinzi wake kuondoka asubuhi ya siku hiyo, na yeye alifanya safari ya kumtafuta mganga wake aliyemfikiria kichwani, alimtafuta sana bila ya mafanikio ila njiani akakutana na rafiki yake wa muda mrefu sana ambaye aliwahi kumshauri kuhusu swala la waganga kwahiyo alivyokutana nae alifurahia sana, na kuanza kumshirikisha kuhusu swala lake linalomsumbua kichwa.

“Basi mwezi uliopita mwenzio nilipatwa majanga hayo balaa, yani kuna mavitu yalichanganya kichwa change kama nini ila kuna kijana huyo ni matata, kwanza kijana haogopi kitu yani hakuna takataka yoyote inayomshinda. Huyo kijana ni kimbilio la watu wengi sana, wanaotafuta watoto, wanaotafuta mali yani kila kitu. Nina uhakika huyo kijana hawezi kushindwa, hao waganga wako wamechoka halafu waoga”

“Huyo atakuwa mzuri kweli, nilijaribu kumtafuta hata Yule wa mwanzo aliyewahi kunipa dawa ya kufukia ndani kwangu ila sijampata”

“Unadhani Yule unampata kirahisi hivyo? Yule hakuwa mganga ni jinni lile, na anapatikana kwa waganga wanaojiweza tu, Yule mganga tuliyeenda kipindi kile alikuwa anajiweza ndiomana ikawa rahisi kukutana na Yule wa dawa. Ingawa masharti mengi umeyavuruga ila kwa Yule ndio kiboko”

“Naomba nipeleke ndugu yangu, nipo tayari kutoa kitu chochote kile ila niepukane na aibu hii maana kwangu ni aibu na fedheha”

Basi huyu rafiki wa Rose akajitolea kumpeleka Rose, na kwavile alimuomba ampeleke siku hiyo hiyo akajitolea kufanya hivyo ingawa ni mbali sana hiyo sehemu.



Patrick hakujisikia kuondoka kabisa nyumbani kwa Neema, na alichofanya Salome ni kwenda kumchukulia Patrick nguo zake zote na kumfanya afurahi zaidi kurudi kwa Neema, alimuomba Neema asimfukuze eneo hilo kwani alizidi kufunguka mawazo ya kuhusu mali zake na nyumba zake ambazo zingine alikuwa hata haendi kuzitembelea kwavile alishazisahau ila Neema akawa kama amemkumbusha kwahiyo alifurahi sana kumalizia muda wake kwa Neema, na pia watoto wale mapacha wa Neema aliwaona ila aliogopa kuuliza kuwa wale watoto ni wa nani, ila alijikaza na kuuliza,

“Samahani Neema, na hawa watoto wako wengine baba yao yuko wapi?”

Neema akacheka kisha akamwambia,

“Baba yao ni wewe”

“Ni mimi? Kivipi?”

“Najua huwezi kukumbuka au kujua, hii kitu niliiweka siri siku zote za maisha yangu”

“Niambie kivipi?”

Basi Neema ilibidi amueleze Patrick ilivyokuwa,

“Kuna kipindi nilikuwa nauza baa, na ulikuja kunywa sijui ulikuwa na mawazo gani ila ulikunywa sana hadi ulilewa. Ikawa kila mwanamke anayepita mbele yako unamshika, ilibidi nidanganye kuwa umenihitaji mimi na kwenda na wewe chumbani, ila kwa nguvu ya pombe uling’ang’aniza kulala na mimi, kwavile nilikuwa bado nakupenda sikuweza kukataa, nililala na wewe ila usiku wake niliondoka na kukuacha umelala fofofo. Kulipokucha uliondoka halafu na mimi niliacha kazi pale kwenye ile baa, sikuwahi kumwambia mtu yeyote kilichotokea baina yangu na yako, na baada ya mwezi nilijigundua kuwa nina ujauzito hapo ndipo nilipoamua kufanya siri hadi nimejifungua. Ilikuwa ni siri yangu hata ndugu yangu Yule Ashura sikuwahi kumwambia chochote, ingawa sasa nimegundua hakuwa ndugu yangu, yani kama hakuwa ndugu yangu alikuwa na mipango gani kwangu? Ni siri yake kwakweli, ila hakuwahi kujua kuwa watoto wangu ni wa nani sababu mar azote alizoniuliza nilimwambia kuwa nilibakwa”

Patrick alishangaa sana hii habari, na kujaribu kuvuta kumbukumbu ya siku aliyolewa sana, alikumbuka tu kuna siku alilewa sana ila hakukumbuka ni kitu gani alikifanya,

“Na hiyo siku niliyolewa sana ndio siku iliyobadilisha maisha yangu kabisa, maana tangu siku hiyo niliporudi nyumbani ndio nikafanywa kama ndondocha yani sikuwa na uwezo wa kwenda sehemu yoyote ile bila ruhusa ya Rose, yani kipindi hiko ndio mateso yalizidi kwangu maradufu”

“Pole sana, basi hivyo ndivyo ilivyokuwa kuhusu hawa watoto. Yani ni wanao kabisa”

“Kwakweli nimeteseka sana mimi, siku ile ilipelekea kunywa sana pombe baada ya kumuona mke wangu akiniwekea dawa kwa macho yangu, mimi sio mlevi kiasi kile ila siku ile nililewa sababu ya mawazo. Ila kitendo cha kurudi nyumbani ndio nikawa ndondocha kabisa, yani hakuna kitu nilichokuwa nafanya kwa akili yangu.”

Patrick aliomba aitiwe watoto wale ili awaangalie kwa karibu maana hakuamini amini kuwa alikuwa na watoto, maana alijua kuhusu Salome ila hakujua kama ana watoto wengine.

Neema aliwaita watoto wake, nae Patrick aliwakumbatia kwa furaha hata wale watoto walibaki kushangaa tu kwani hawakutegemea huyo mtu kuwafurahia kiasi kile tena huku akiwaita wanangu, walikuwa wakishangaa shangaa tu ikabidi Neema awaambie,

“Baba yenu huyo”

Na wao wakashangaa na kufurahi maana hawakufikiria kutambulishwa baba, kwani siku zote walipokuwa wakiulizia kuhusu baba yao Neema alikuwa akiwafokea sana.

Patrick akazidi kupata uchungu dhidi ya Rose na mali zake, ilimuuma sana na kumfanya sasa awaze namna ya kurudisha mali zake kwenye mikono yake ili watoto wake wafaidi.



Ana alishaamua kujitoa kabisa kwenye maswala ya waganga na kumkataza mama yake kwa kadri awezavyo lakini mama yake alikuwa mbishi sana, yeye Ana alikuwa na uwezo wa kupata hisia za mama yake alipoenda kwahiyo siku hiyo akapata hisia kuwa mama yake kaenda tena kwa mganga ila inaonyesha wazi alishindwa kumuaga sababu alijua angemzuia.

Ana alikuwa chumbani kwake, alifunua godoro lake na kutoa dawa yake, kwa mara ya kwanza aliamua kutumia dawa yake ili avuruge akili ya mama yake na kumfanya arudi nyumbani na ili aweze kubaini ni nani anaewaumiza kwenye nyumba yao. Aliamua kwanza abaini ane waumiza katika nyumba yao,

“Jitokeze nikuone wewe unayetusumbua humu ndani”

Alisema maneno hayo kama mara tatu na gafla alihisi kuna mtu kasimama mbele yake, aliinua kichwa chake huku amejawa hofu ila alijitia ujasiri na kumtazama mtu huyo, alikuwa ni Moza kwakweli Ana alishtuka sana na kumfanya ashindwe hata kumuuliza chochote zaidi ya kutetemeka tu. Moza alimuangalia Ana na kucheka ila Ana hakuweza kumtazama zaidi Moza, na badala yake alijikuta akizimia tu pale ndani kwake.

Muda huu Sara alikuwa nje ya chumba cha Ana akigonga na aligonga kwa muda mrefu sana bila ya kufunguliwa hadi ikabidi afungue mwenyewe, alishtuka sana alipoingia ndani kwani alimuona Ana akiwa kajifunika makhanga halafu kuna kitu pembeni yake ambacho alikishangaa sana Sara kwani hajawahi kuona kitu cha namna ile tangia azaliwe, alipiga kelele na kumfanya kaka yao Kulwa aje ndani pia ila alishangaa alichokiona pembezoni mwa Ana muda huo Ana akiwa kazimia, alimshika mkono Sara na kumtoa nje haraka haraka kisha kumwambia,

“Yule mdogo wetu ni mchawi, yani bila ubishi Yule ni mchawi, sasa ndugu yangu maswala ya kumfatilia mchawi ni maswala mazito sana. Pale tunamuona kama kaanguka ila huwezi jua labda ameenda kwenye uchawi wake utashtukia anashtuka na kuanza na wewe, tukae mbali dada yangu tunaishi na nyoka humu ndani”

Sara hakuweza hata kuchangia hoja kwani kiukweli mambo ya nyumbani kwao yalimchosha tena sana tu ila hakuwa na jinsi na hakuwa na pakukimbilia, muda kidogo Salome nae alitokea nje na kuwafata sebleni Sara na kaka yake kisha kuwauliza kuwa kuna nini, ila Sara nae alimuuliza,

“Hili hujalijua au?”

“Ningelijua ningeuliza?”

“Na sisi hatujui kuna nini”

Salome alicheka kisha akaelekea njia ya vyumbani, ila Sara alimuangalia sana Salome kwani siku hizi alianza kuwa na mashaka nae pia.



Rose kule alipopelekwa kwa mganga walifika jioni kabisa karibia na usiku hata hivyo mganga mwenyewe hawakumkuta, ni baadae ambapo giza lilikuwa limeingia kabisa ndio alirudi na kukuta kuwa anangojwa kwa hamu zote. Rose alitaka kuhudumiwa usiku huo huo ingawa Yule mganga pia alikataa kumuhudumia kwa usiku huo kutokana na mlolongo wa matatizo yake.

“Labda tuanze tiba saa nane usiku”

“Nipo tayari hata saa ngapi ila hili jambo liishe, nateseka sana”

“Litaisha tu, hapa ndio mwisho wa matatizo yote”

Rose alisubiri kwa hamu zote hata kulala kidogo hakutaka, rafiki yake aliyempeleka aliamua kuondoka na kumuacha Rose muda uleule, kwahiyo Rose alibaki peke yake kwa Yule mganga huku akisubiri tiba, hakujali kukoje kukoje kule ila alichojali yeye ni kupata tiba tu.

Rafiki wa Rose alijulikana kwa jina la mama Jack, muda aliokuwa anarudi kwake ni usiku tayari ulishaingia kutokana na kwake kuwa mbali kidogo na kwa mganga huyo, ingawa alitumia usafiri wa kukodi ila alichelewa sana kufika nyumbani kwake.

Alipofika tu alimuona mtu yupo pembezoni mwa nyumba yake akilia kanakwamba ni mtu aliyekuwa na shida, alipomuangalia alimuona ni binti mdogo tu, alimfata na kumuuliza tatizo,

“Vipi binti?”

“Nimefukuzwa na mama wa kambo”

Huku Yule binti akiendelea kulia, mpaka mama Jack alimuonea huruma kwani alijua wazi kuwa ikiwa atamuacha hapo nje binti huyo anaweza kubakwa na vijana wasio na huruma kwahiyo alimwambia aingie nae ndani kisha kuzungumza nae na kumuahidi kuwa kesho atamsaidia afike kwa mama yake. Yule binti alikubali na kumshukuru sana huyu mama, kisha Yule mama akamuandalia sehemu ya kulala binti Yule. Hakuwahi kumuona, hakuwahi kumfahamu ila ni huruma tu ndio iliyomfanya amsaidie. Yule binti alionyesha kumshukuru sana Yule mama kiasi cha kumfanya Yule mama ajisikie vizuri na ajione kuwa katenda jambo jema sana kumsaidia Yule binti.



Ilipofika saa nane usiku Yule mganga alianza kufanya dawa zake, Rose alikuwa macho kabisa kwani alitaka kwanza kushuhudia anavyofanyiwa dawa. Yule mganga alijifungia kwa mud, kisha akatoka na kumwambia Rose,

“Unahisi ni nani anayekufanyia mambo ya ajabu?”

“Ni Yule binti Salome, sijui kapata wapi uchawi”

“Hapana, anayekuchezea wewe ni Moza”

Rose alishtuka na kumuuliza mganga kwa mshangao,

“Moza”

“Ndio Moza, amerudi kwa lengo moja tu la kukutesa wewe”

“Kwahiyo Moza alikufa na kurudi?”

“Hapana, Moza hakufa kama unavyofikiria ila Yule unayemsema Salome si Salome ni Moza Yule. Nimekwambia amerudi kwa kasi ya ajabu”

“Kheee, kwahiyo Salome yuko wapi?”

“Salome yupo mahali na amelala usingizi mzito sana, si mimi wala si wewe tunaoweza kumuamsha labda Moza mwenyewe apende kumuamsha na atamuamsha endapo azma yake ikikamilika”

“Mmmh ana azma gani kwangu?”

“Anataka uwaachie wale watu uliowafungia kwenye kichumba”

“Mmmh siwezi mganga, itanigharimu maisha yangu yote, siwezi”

“Anatambua hilo kuwa itakugharimu maisha yako yote ndiomana anataka wewe mwenyewe uwatoe, huyu Moza ni amejipanga yani amejipanga haswaaaa”

“Sasa nitafanyaje?”

“Inahitajika kafara”

“Nipo tayari kuwatoa kafara wale niliowafuga”

“Hapana hawatakiwi hao, kafara inayohitajika ni kafara ya mtoto wako”

Rose alipata hofu kusikia habari ya kutoa mtoto wake kafara tena, uoga ulimshika kwani hakutaka kuona mtoto wake yeyote anakufa kwaajili yake.

“Hakuna njia nyingine?”

“Hakuna, zaidi ya kutoa kafara. Ikiwa unahitaji kuendelea kubaki kwenye nafasi yako, toa mtoto wako kafara”

“Mmmh sasa nitamtoa mtoto wangu gani?”

“Mtoe mwanao wa hospitali, kwani itakuwa rahisi sana kusema kuwa kafia hospitali sababu ya kuungua maji moto”

Kidogo maneno ya huyu mganga yalikuwa yakimuingia vilivyo Rose na kuanza kuhisi kuwa huyu mganga ni mkweli, akafikiria kuhusu mwanae Doto ila badae akaona ni vyema kumtoa kafara mwanae Yule mmoja na kuokoa maisha yake na maisha ya watoto wake wengine, akamkubalia mganga na kusubiria maelekezo atakayompa. Ila mganga alikubaliana nae kumpa masharti asubuhi ya siku inayofuata.



Asubuhi yake, mganga alimtaka Rose kwenda mtoni na kumwambia kuwa huko ndiko ambako ataenda kutoa kafara, kuna dawa alimpa na kumwambia kuwa ataenda kuinyunyiza mtoni halafu kingetokea kitanda cha hospitali ambacho kalazwa Doto kisha kitanda hicho akisukumie mtoni hapo atakuwa amefanikiwa na kumtoa kafara mtoto wake, Rose aliona hilo swala ni jepesi kwake kwani halikuwa sharti gumu kumfanya shindwe kulitekeleza, kwahiyo alichukua hiyo dawa na kuanza safari ya kwenda mtoni.

Alivyofika mtoni alimwaga dawa ile kwenye mto, ni kweli kikatokea kitanda pembeni na alipoangalia aliyelala kwenye kitanda hicho hakuwa Doto bali alikuwa ni Moza.





Alivyofika mtoni alimwaga dawa ile kwenye mto, ni kweli kikatokea kitanda pembeni na alipoangalia aliyelala kwenye kitanda hicho hakuwa Doto bali alikuwa ni Moza.

Rose aliogopa na mkono wake kuanza kutetemeka hata akashindwa kukisukuma kile kitanda mtoni badala yake alikimbia haraka haraka kurudi nyumbani kwa Yule mganga.

Alifika anahema sana, ila alimkuta mganga amechukia vilivyo,

“Umefanya nini wewe?”

“Nimemwaga dawa ila hakutokea Doto, bali alitokea Moza”

“Hata kama ungemsukuma mtoni hivyo hivyo, yani ushaharibu kila kitu”

“Nisamehe”

“Nikusamehe nini na ushaharibu”

“Sasa hutotoa kafara mtoto wako mmoja, itabidi utoe wawili”

Rose alishtuka sana kusikia atoe kafara ya watoto wake wawili ukizingatia huyo mmoja tu alikuwa anafikiria sasa kuhusu wawili ataweza kweli, ikabidi amwombe mganga akafikirie kwanza.

“Hili si jambo la kufikiria ila ni jambo la kufanya maamuzi”

“Mganga nina watoto wane tu, watoto wangu wote ni wa muhimu kwangu”

“Kwahiyo wanao ni wa muhimu kuliko maisha yako?”

“Sikia ndugu yangu, yani watoto hawa ndio wamefanya siku zote hizi nihangaike sababu yao. Yani yote haya ninayoyafanya kwenye maisha ni sababu yao, yani leo nikawatoe kafara kweli?”

“Chagua moja, kuwatoa watoto wako kafara au wewe kuumbuka”

Yule mganga akainuka na kumuacha Rose akiendelea kuwaza kuhusu kuwatoa kafara watoto wake, aliwaza sana bila ya kupata jibu na kufanya kama akili yake kukosa uelekeo.

Yule mganga alirudi tena na kumuuliza Rose kuwa amechagua jambo gani sasa,

“Hapana kwakweli, siwezi kuwatoa kafara watoto wangu”

“Yani hapo watoto wawili tu unasema huwezi, je ukiambiwa wote?”

“Hapana siwezi”

“Basi wewe ndio utolewe kafara”

Rose akashtuka na kuuliza kwa makini,

“Nitolewe kafara kwanini?”

“Umekiuka masharti yangu, na mimi sipo tayari kufa kwaajili ya ujinga wako kwahiyo nitakutoa kafara wewe”

Katika vitu ambavyo Rose alikuwa anaviogopa katika maisha yake basin i kifo, yani kwake ilikuwa ni rah asana kusikia wengine wamekufa ila yeye hata akianza kuumwa tu basi hofu ya kifo humkaa kichwani, kwahiyo swala la kuambiwa kuwa atolewe kafara yeye lilimchanganya akili vilivyo hadi akajikuta anakubali kuwatoa kafara watoto wake.

“Nitawatoa hao wanangu wawili kafara”

“Kwahiyo utamtoa yupi na yupi?”

“Wale mapacha”

“Mapacha hata ukiwatoa wote bado utaonekana umemtoa mmoja sababu wale wamezaliwa siku moja, kafara yao inabidi iwe ya siku tofauti ili iwe na nguvu ila kwa siku moja itakuwa haina nguvu na kafara ninayoitaka mimi ni ya siku moja. Mweke mwingine wa kumtoa kafara hapo”

“Ana najua haiwezekani ila Sara, jamani yani nimtoe mwanangu Sara kifungua mimba wangu! Nampenda Sara jamani, tafadhari nisimtoe Sara”

“Unatakiwa kumtoa, ndiomana nimekwambia kama huwezi basi kafara tukutoe wewe”

Kwa kuhofia kifo akajikuta anakubali kuhusu kuwatoa watoto wake kafara, kwahiyo kilichofatia ni mganga kumpa masharti ya kafara anavyoitaka iwe, kwahiyo Rose alikuwa makini kabisa kusikiliza mlolongo wa kafara.



Mr.Patrick alimuaga Neema kuwa anaenda kumchukulia kitu Fulani ila hakutaka kumtajia, ukweli ni kuwa alijiona mwenye bahati sana kupokelewa tena na Neema na alimuona Neema ni mwanamke mwenye upendo sana juu yake.

Aliondoka nyumbani hapo kwa Neema na alienda kwenye nyumba nyingine aliyowahi kujenga ili aiangalie kama inafaa kumuhamishia Neema hapo, ila wakati yupo kwenye ile nyumba mara wakaja vijana watatu na kumsalimia kisha wakajitambulisha kuwa wao ni wafanyakazi wa Rose, kwahiyo Patrick alitulia akiwasikiliza kwa makini kuwa wana jambo gani wanalotaka kuongea nae,

“Sikia tukwambie, kuna kazi mama alitupa ila kazi yenyewe sijui alipanga yale mazingira tumekuta mambo hayaeleweki kabisa, halafu tunamtafuta hewani hatumpati”

“Hata siwaelewi mjue”

“Hutuelewi kivipi kwani kazi za mkeo huzijui?”

“Bado siwaelewi”

“Sisi tunamtafuta hewani tumpe habari kuwa ile maiti tuliyoendaga kuitupa tumeenda kuifukunyua tumekuta imeoza na ananuka vibaya ila sura ni ya Yule ndugu yake aliyetupa kazi”

“Maiti? Bado siwaelewi”

“Huyu mzee vipi jamani, hatuelewi nini? Hebu toa simu yako umuonyeshe picha za ile maiti tulivyoikuta”

Mmoja akatoa simu na kumfungulia picha Patrick aione, kwakweli Patrick alitamani kuruka, picha ilionyesha maiti kaoza oza ila sura yake inatambulika bado na ilikuwa ni sura ya Ashura. Kwakweli Patrick hakuweza hata kuitazama mara mbili na kuamua kuwauliza tena,

“Inamaana mmemuua Ashura?”

“Hapana ila sisis tulipewa kazi tu ya kutupa ile maiti na tuliambiwa ni maiti ya mtu mwingine halafu tulikuwa tunawasiliana na huyo huyo Ashura nahisi kuna mtu katuzunguka kamuua Ashura halafu kataka sisi tubebea maiti tukijua ni yeye kumbe ni Ashura”

“Mtu gani huyo?”

“Sisi tulitumwa kubebe maiti ya binti mmoja anaitwa Salome, na tulivyobeba tulijua ni Salome kumbe ni Ashura”

Yani hapo ndio walizidi kumchanganya kabisa Patrick kwani hakuelewa kitu chochote kile, halafu wale vijana wakaanza kumueleza kwa utaratibu sasa jinsi ilivyokuwa ambapo kwa mujibu wa maelezo ya wale vijana inaonyesha wazi mtu aliyemuua Ashura atakuwa ni Salome.

“Hapana, hapana kabisa haiwezekani, mwanangu Salome hawezi kuwa muuwaji”

“Kumbe ni mwanao!”

“Ndio ni mwanangu”

“Kama ni mwanao kwanini mkeo alitaka tumuue?”

Patrick hakuwa na jibu kwani muda huu akili yake kama ilipoteza majira hivi, alikuwa haelewi kitu chochote kile hakuendelea hata kuangalia nyumba aliamua tu kuondoka zake eneo lile.



Rafiki wa Rose, leo aliamka na kumkuta Yule binti aliyemkaribisha kwake akiwa ameamka pia huku akifanya shughuli za mule ndani hadi mama Jack akashangaa kuwa huyu mgeni ni wa wapi kiasi cha kufanya shughuli za nyumbani kwake, kwahiyo alisalimiana nae na kumsikiliza kuwa anataka amsaidiaje,

“Mimi naomba unipeleke kwa mama yangu”

“Lakini kwa mama yako si unakujua, kwahiyo nitakupakiza tu gari uende”

“Nakuomba twende wote, napenda mama asikie mtu aliyeniokoa alinikuta kwenye mazingira gani. Naomba unipeleke, mama yangu ana hela na atakulipa kwa shukrani ulizomfanyia”

Mama Jack akasikiliza maneno ya Yule binti ila muda mwingine kama moyo wa imani ulimshika kwahiyo akamuomba waende mchana mchana na Yule binti alionyesha kufurahishwa sana,

“Asante sana mama yangu, nitakumbuka ukarimu wako siku zote za maisha yangu”

“Usijali binti mzuri”

Kwahiyo mama Jack alijikuta akisaidiana na Yule binti kwenye kila kitu hadi muda ulipofikia wa kwenda nyumbani kwa binti, ila wakiwa njiani binti alimuomba mama Jack amsindikize hospitali kumuona ndugu yake nae alifanya hivyo bila hiyana yoyote, walifika hospitali na kumuomba mama Jack amsubiri nje ya wodi, huyu mama alikubali ila hakuelewa kitu chochote wala hakumuelewa huyu binti sababu hakumjua ila alimsaidia, baada ya muda kidogo Yule binti alitoka huku akimsaidia mgonjwa wake kujikokota na kusema kuwa karuhusiwa, sababu mama Jack alikuwa na usafiri hakuona hiyana ya kumsaidia Yule binti kumrudisha na huyo anaedai ni kaka yake nyumbani.



Rose alitulia akisikiliza dawa anazopewa na Yule mganga, ambapo alianza kwa masharti,

“Hakikisha siku ya leo hakanyagi rafiki yako yoyote nyumbani kwako”

“Hata hivyo hakuna rafiki yangu anayepajua nyumbani kwangu”

“Sawa, ukifika tu getini utapuliza dawa hii”

“Sawa, baada ya hapo”

“Utaingia ndani bila kuongea na yeyote ila cha kwanza kabisa, utaanza kumuita jina mwanao aliyeko hospitali maana ukifanya hivyo tu mwanao kule atakufa. Kisha unajifanya ulikosea unaanza kumuita mwanao mwingine wa Kafara, ataanguka alipo na kufa. Hakikisha unaita majina wakati ushaingia ndani kabisa na kwenye kochi umekaa, yani ita kamavile huna wasiwasi na kilichopo au kitakachotokea. Ukipata habari ya msiba wa watoto wako, jifanye umechanganyikiwa na upotee nyumbani kwako yani uje huku mpaka watakapozika. Utakaporudi watakuonyesha tu makaburi ya watoto wako ila baada ya hapo, kila mtu mjini atakujua wewe ni nani maana mali zako zitaongezeka maradufu na utazidi kuheshimika”

“Nimeipenda hiyo ingawa wanangu wananiuma ila hiyo ya mali zangu kuongezeka nimeipenda sana”

“Ila hakikisha nyumbani kwako asifike mgeni wa aina yoyote”

“Haiwezekani mganga, kwanza saivi watoto wote wanapaogopa pale nyumbani kwahiyo hata kualika rafiki zao ni ngumu”

“Sawa, na rafiki zako pia wasifike”

“Hawatofika, yani hakuna anayepafahamu pale”

Rose alijiaminisha vilivyo kuwa hakuna anayepajua nyumbani kwake, mganga alimpaka dawa nyingine ya kumkinga akimwambia kuwa hiyo itamsaidia zidi ya Moza kwani hatomuona tena kwenye macho yake na hatoweza tena kumsumbua.



Mama Jack alifika nyumbani kwakina Yule binti na kukaribishwa vizuri sana, mama Jack hakuelewa kuwa alikuwa mtegoni maana Yule binti alikuwa ni Salome ambapo alipitia hospitali kumchukua Doto kwahiyo mama Jack alifika kwenye nyumba ya Rose bila kujua kuwa pale ni nyumbani kwa Rose, na kwavile mama Jack hakuwazoea watoto wa Rose kwahiyo ilikuwa vigumu sana kwa yeye kugundua kuwa wale ni watoto wa Rose, mtoto pekee wa Rose aliyemfahamu alikuwa ni Ana na muda huo aliofika Ana alikuwa bado yupo shuleni.

Walimkaribisha vizuri sana huku Salome akiwaambia kuwa Yule mama kamsaidia sana bila ya kusema kuwa kamsaidia vitu gani, ila Salome alimuomba huyu mama asubiri mama yao atarudi nyumbani muda sio mrefu, Sara alimuuliza Salome,

“Una uhakika mama atarudi leo?”

Salome alimuangalia kwa jicho kali Sara na kumfanya Sara ainuke tu pale alipokuwa amekaa kanakwamba alimwambia kuwa aondoke, kisha Salome akabadilisha mada na kuanza kuongea na Doto habari za hospitali na jinsi anavyojisikia, kwavile habari ilibadilika kidogo, Sara alijikuta akirudi tena sebleni huku akiwa ameongozana na Kulwa ambaye alifurahi kusikia kuwa Doto ametoka hospitali.



Patrick alirudi moja kwa moja kwa Neema na kujikuta akimueleza Neema kile ambacho kaelezwa na vijana aliokutana nao, kwakweli Neema alishangaa sana na kuuliza kwa makini

“Kwahiyo Ashura amekufa?”

“Ndio, nimeona hivi picha akiwa ameanza kuoza kwakweli sijui kama ile picha itatoka akilini mwangu ila siamini kama Salome anaweza kutenda kitu cha namna hiyo”

“Nimeumia sana, ingawa kuna mengi nimeyagundua kijijini lakini Ashura niliishi nae kama ndugu yangu kabisa, alikuwa kama mdogo wangu na aliwapenda wanangu. Ila siamini kama Salome anaweza kutenda kitu cha namna hiyo, hapana kwakweli. Salome ni mwanangu, namjua vyema sana, hawezi kufanya jambo la namna hiyo. Salome hawezi kuua”

“Hata mimi nimekataa kuwa Salome hawezi kuua”

“Naomba hao vijana watupeleke huko nikaone jambo alipotupiwa ndugu yangu Ashura jamani nimeumia sana, sasa mbona nilikuwa nawasiliana nae jamani aaah haiwezekani”

Akajikuta akikumbuka kuwa wanae hawa wadogo wamewahi kumwambia kuwa mama yao mdogo Ashura alianguka na povu kumtoka halafu Salome akawaambia ni mchezo wanacheza, akajikuta anasema,

“Ina maana……”

“Ina maana nini?”

“Aaah tuachane na habari hizo, jamani Ashura ndugu yangu hapana jamani. Hata kama hakuwa ndugu yangu, hakustahili kuzikwa kinyama hivyo”

Alichukua simu yake na kujaribisha ile namba aliyokuwa anawasiliana na Ashura ila hakuipata hewani na kumfanya hadi tumbo limuume na kuzidi kuamini kuwa itakuwa kweli ashura kauwawa ila bado moyo wake ulikataa kuwa kauliwa na Salome kwani hakutegemea kama mwanae anauwezo wa kuua.



Rose aliondoka kwa mganga na kwenda nyumbani kwake, alifika getini na kumwaga ile dawa kisha kuingia ndani, kwanza alishangaa kumuona mlinzi getini kwake wakati alimshuhudia akiwa anaondoka ila hakuweza kuongea nae kwa kuhofia kuharibu masharti ya dawa, alisalimiwa lakini hakuitikia kiasi kwamba Yule mlinzi alifikiria kuwa Rose hajapenda kumuona tena.

Rose aliongoza hadi ndani kwake na kuingia sebleni, alishangaa kumuona rafiki yake akiwa amekaa sebleni, halafu pembeni yake yupo Doto, Sara, Kulwa na Salome ila kabla hajaita hata jina moja alishangaa kuona rafiki yake akianguka chini na kuanza kujipigiza kama mtu mwenye kifafa huku mapovu yakimtoka.





Rose aliongoza hadi ndani kwake na kuingia sebleni, alishangaa kumuona rafiki yake akiwa amekaa sebleni, halafu pembeni yake yupo Doto, Sara, Kulwa na Salome ila kabla hajaita hata jina moja alishangaa kuona rafiki yake akianguka chini na kuanza kujipigiza kama mtu mwenye kifafa huku mapovu yakimtoka.

Alijikuta anainama kumpa rafiki yake huduma ya kwanza huku akimuita,

“Mama Jack, jamani mama Jack”

Kile kitendo cha kumuita tu kilimfanya awe kimya gafla hata kule kujipigiza aache, kwakweli Rose alichanganyikiwa yani kama kuchanganyikiwa sasa hapa alichanganyikiwa tena sio kwa kujifanyisha ila ni kuchanganyikiwa kweli.

Alijikuta akikazana kumita ila kadri alivyomuita ndivyo alivyozidi kukauka, yani watoto wake wote walikuwa wakishangaa lile tukio huku wakitaka kwenda kumsaidia mama yao ila Salome aliwazuia,

“Muacheni”

Sara alimuangalia kwa gadhabu Salome na kumwambia,

“Hivi una nini wewe? Yani mama yetu yupo kwenye matatizo unasema muacheni, unataka tukusikilize au?”

Sara akataka kwenda, ila Salome aliwazuia na kuanza kuwaambia,

“Hivi nyie hata hamjui mtu ameanza kutapatapa sababu ya nini halafu manataka mkamsaidie, mkipata kesi ya kujibu je?”

Walitamani kwenda kumsaidia mama yao ila kuna uzito uliingia ndani kwao na kujikuta wakiishia kuongea tu bila ya kwenda kumsaidia.

Rose alilia sana huku akimuita rafiki yake, yani kwa muda huu hata hakukumbuka kama kakosea masharti au vipi maana alishachanganyikiwa kuwa rafiki yake kaanguka ndani ya nyumba yake, ila kwavile yeye alikuwa na mwili na rafiki yake alikuwa mwembamba, alijikuta akimbeba bila hata msaada wa watoto wake, alimbeba na kumtoa nje kisha akampakiza kwenye gari na yeye kupanda kwenye gari na kuondoka.

Njiani alikuwa akiendesha kwa kasi sana kwani alikuwa anamuwaisha rafiki yake kwa mganga kwani alijua akichelewa tu ataharibu kila kitu na rafiki yake anaweza akapoteza maisha kweli.

Ila leo ilimchukua muda mrefu sana kufika kwa mganga kiasi kwamba aliendesha gari hadi alichoka huku ana machungu kuhusu rafiki yake ila mara kidogo alipofika mbele ya safari yake alijikuta akishindwa kuendesha gari tena halafu akapitiwa na usingizi mzito sana.



Pale ndani walibaki watoto wa Rose wakiwa na Yule Salome huku wakimlaumu Salome kwanini kawakataza kumsaidia mama yao,

“Hivi nyie hamuwezi kujiongeza au? Mama yenu anajua kilichompata rafiki yake ndiomana kambeba hapa bila msaada wa mtu yeyote sababu anajua ni kipi kimempata nan i wapi atampeleka”

“Kwani wewe Salome kuna chochote unatambua?”

“Mngekuwa misukule leo ndio mngeniuliza kuna kuna chochote natambua, mama yenu alitaka kuwatoa kafara”

Wote wakashangaa, kuwa mama yao awatoe kafara kwa misingi ipi na kumbishia Salome kuwa mama yao hawezi kuwatoa kafara,

“Aaah ningemuacha awatoe eeh!”

“Mama anatupenda sana, hawezi kufikia hatua hiyo. Kwanza atutoe kafara kwa lipi!”

“Sasa nitamuacha awatoe kafara halafu hayo maneno yenu mkayazungumzie kuzimu huko”

“Sidhani kama umetuelewa Salome, tunauliza mama atutoe kafara kwasababu ipi!”

“Tulieni tu tena mnishukuru mie, la sivyo mngekuwa marehemu nyie. Mnafikiri Yule mama anaenda kupona? Yule ndio basi tena, mama yenu akirudi hapa muulizeni kuhusu Yule mama atawaambia”

Walikaa kimya, baada ya muda mfupi Ana nae alirudi ila leo ndio hakuongea na mtu yeyote kwani alipitiliza chumbani kwake hata ndugu zake wakamshangaa kwani walijipaga moyo kuwa Ana amebadilika ila kitendo cha kupitiliza bila kuwasalimia kiliwafanya waanze kuhisi kuwa amesharudi kwenye matendo yake.

Ana hakuwaongelesha sababu alikuwa akienda kwenye dawa zake, na aliweza kutazama na kuona mama yake alipewa masharti ya aina gani na alitaka kufanya nini na kitu gani kimetokea, Ana kwa kutumia dawa yake mara nyingine alikuwa na uwezo wa kuona matendo yaliyotokea ila tu hakuweza kuona matendo yatakayotokea, kwahiyo aliweza kuona masharti ambayo mama yake alipewa na alichokifanya hadi ameondoka.

Ana akahisi kuwa mama yake amerudi tena kwa Yule yule mganga, aliweza kuangalia njia vizuri kwa dawa zake na kuiona, kisha akabalisha nguo za shule na kuondoka tena bila ya kuongea chochote maana alitaka akakutane na mama yake na amzuie kutokwenda tena kwa Yule mganga kwamaana kunapoendelea aliona mama yao anaweza kumtoa kafara hata yeye ukizingatia anaogopa kufa.

Kwahiyo aliwaacha wote wakiwa wanamshangaa anatoka hadi anaishia zake, walimuangalia tu na hawakuelewa kuwa alikuwa anaenda wapi.



Usiku ulimkuta Ana akiwa njiani na kuamua kwenda kulala hotelini, ingawa alikuwa anajiamini sana ila hakutaka kutembea usiku ule peke yake. Alijiaminisha kuwa asubuhi ya siku hiyo angeondoka zake, pale hotelini alienda kula kwanza na kusikia watu wakipiga stori huku wakisema kuhusu wachawi,

“Yani wachawi bhana hakuna kinachowashinda, natamani kuwa mchawi”

“Mimi ningekuwa mchawi ningekuwa naingia benki kuchukua hela si mchawi bhana hawanioni”

“Mimi ningekuwa mchawi wangenikoma mtaani kwangu, yani ukiwa mchawi hakuna kitu kinachokushinda”

Ana alitabasamu na kuinuka kisha kuingia kwenye chumba alichokodi huku akijaribu kuzitafakari akili za wale watu kuwa wana akili mbovu na wanaona kuwa mchawi hakuna kinachoweza kukushinda wakati wao Salome tu anawatoa jasho. Ila kadri alivyokaa mule ndani alijisikia kwenda kuwafundisha adabu wale wote waliokuwa wanazungumzia mada za kichawi, na usiku wake alienda kuwatembelea kwa uchawi na kwa bahati mbaya alimuua mmoja wao na kurudi kwenye chumba chake huku akijiambia kuwa hakutaka kuua ila Yule mmoja kiherehere chake kimemponza ila yeye binafsi hakutaka kuua, toka muda huo hakuweza kulala hata alivyorudi kwani muda mwingine roho ya kibinadamu inamjia na anaona huruma ila muda mwingine anaona ni sawa kwa Yule mtu kufa. Kulipokucha alisikia kelele za vilio sehemu ile na kuamua kuondoka zake kwani hakutaka kusikiliza kelele za vilio vya msiba aliosababisha mwenyewe.

Kwahiyo aliendelea na safari yake ya kwenda alipoenda mama yake.



Salome alirudi nyumbani kwao siku ya leo na kumkuta mama yake na baba yake wanataka wajiandae kwenda kuwatafuta wale vijana ili wawaonyeshe ile maiti ya Ashura na waifanyie utaratibu wa maziko, aliwauliza kuwa wanajiandaa kwenda wapi,

“Mwanangu, kumbe mamako mdogo Ashura amekufa”

“Kwani nyie mmejuaje?”

Wakamshangaa vile ambavyo hajaonyesha kushtushwa hata kidogo, kisha Patrick aliamua kumueleza vile ambavyo alikutana na wale vijana na jinsi walivyomueleza na kushutumu kuwa atakuwa ni Salome ndio kahusika na kumuua Ashura, ila cha kushangaza Salome akacheka na kuwafanya waangaliane kwa zamu maana hawakumuelewa anachochekea kisha akamuuliza Patrick,

“Ni ushahidi gani wamekuonyesha kuwa Ashura amekufa?”

“Wamenionyesha picha ya maiti yake ikiwa imeharibika sana”

“Matapeli hao”

“Matapeli! Kivipi?”

“Msiwafatilie hao ni matapeli, watawatapeli na kuwafanya muumie tu. Hakuna cha mwili wa Ashura wala nini, amekufa wakati tunawasiliana nae kila siku! Achana na hao”

Kisha Salome akaenda chumbani kwake na kufanya Patrick na Neema wazidi kupatwa na maswali, ila bado hawakutaka kubadili wazo lao la kuwatafuta hao vijana ili kama ni kweli basi wamzike Ashura sehemu stahiki, kwahiyo wakaondoka hivyo hivyo.

Walifanya ile safari yao, ila wakiwa njiani wakashangaa gari yao ikisimamishwa kisha kijana mmoja wapo kati ya wale vijana ambao Patrick aliwaona jana aliwasimamisha halafu akawasalimia na kuwaambia kuwa ataenda kuwaonyesha ulipo mwili wa Ashura kwahiyo walipanda nae kwenye gari na kuanza safari ila walivyofika mbele ya safari, walishangaa wakishikwa na usingizi na kulala kwenye gari tena fofofo kamavile wapo kitandani.



Nyumbani nako ambapo walikuwepo Kulwa, Doto na Sara walikuwa wakizungumzia kuhusu tukio la jana yake, kuhusu Yule mtu ambaye alienda na Salome nyumbani kisha kurudi mama yao na Yule mtu kuanguka akitapatapa kisha mama yao kumbeba na kuondoka nae, walikuwa wakijiuliza sana kuhusu lile tukio na jinsi mdogo wao alivyorudi kutoka shuleni na kuondoka ambapo mpaka siku hiyo hakuwa amerudi nyumbani,

“Ila jamani mara nyingine kwenye hii nyumba tunafanya vitu kama tumerogwa vile, hivi kweli sisi tunalala kabisa wakati mdogo wetu hatujui alipo! Bora mama ni mtu mzima ila Ana bado mdogo sana”

“Weee Kulwa nawe umeanza kuugua kichaaa nini, si ulimuona mwenyewe akitoka hapa jana mbona hukumuuliza mdogo wangu unatoka unaenda wapi?”

“Yani wewe Sara badala umuhurumie mtoto wa kike mwenzio eti na wewe unamkandamiza na kuona ni sawa kabisa Yule mtoto kutokurudi nyumbani”

“Mimi dada ila nyie ni kaka zake, mmeshindwa kuwa na sauti kweli kwa mdogo wenu wa kike? Kumbukeni nishawahi fanywa kipofu, nishawahi fanywa bubu na huyo mnaemuita ni mtoto, Ana ni mtoto kwa nje ila ndani ni mkubwa”

“Mmmh jamani Sara, sasa unashauri nini?”

“Mimi mwenyewe roho inaniuma sana kuhusu mama na Ana, mama yetu amekuwa mtu wa kutojielewa kabisa siku hizi kwakweli roho inaniuma sana ila nashindwa cha kusema. Kuna kitu nikiwaonyesha kaka zangu na nyie pia mtashangaa sana”

“Kitu gani hicho?”

“Ndani ya nyumba hii, kuna chumba cha siri cha mama ambacho hatukijui ila cha kushangaza Salome alikijua”

Wote walishangaa kusikia habari za chumba cha siri na wakatamani kwenda kukishuhudia hiko chumba cha siri walichoambiwa.



Patrick na Neema walikuwa kwenye usingizi mzito sana, ila aliyekuwa wa kwanza kushtuka alikuwa ni Neema ambaye alimuamsha Patrick walishangaa wakiwa nyumbani tena wakiwa wamechoka sana hata vichwa vilikuwa vinawauma na kuwafanya kutokukumbuka kwa muda huo huo kuwa walikuwa wapi mara ya mwisho, muda kidogo Patrick akakumbuka tena akiwa na macho ya usingizi bado na kumwambia Neema,

“Si tulikuwa kwenye gari sisi?”

Neema nae akakumbuka vilivyo ila nay eye macho yalikuwa mazito hatari, yani yalizingirwa na usingizi,

“Ndio tulikuwa kwenye gari tunaenda kufata mwili wa Ashura. Yuko wapi Yule kijana wa kutupeleka? Halafu mbona tuko nyumbani?”

“Hata mimi sielewi kabisa, tumerudije hapa? Gari yangu imepona kweli”

Patrick akataka kuinuka ili akaangalie kama gari yake ipo lakini usingizi ukamzidia na kumfanya ashindwe hata kuinuka zaidi ya kulala vizuri, Neema nae alipomuangalia Patrick amelala akajikuta nay eye akilala usingizi wa nguvu tena usingizi wa safari hii haukuwa sawa na ule usingizi wa kwanza kwani huu ulikuwa mzito zaidi.

Kwahiyo wenyewe walilala chumbani kisha Salome akawaandalia wadogo zake chakula ambapo walikula bila kuhoji zaidi kuhusu wazazi wao, halafu akawapeleka nao kulala huku yeye akiondoka kabisa hapo nyumbani kwao.



Ana ilikuwa inamchukua mud asana kufika kwa Yule mganga sababu alitumia usafiri wa jumuiya tofauti na mama yake alitumia gari lake, Ana alikuwa anapanda kwenye gari hii na kushuka mbele sababu safari yenyewe kwa kutumia madaladala ilikuwa ni ya kuunganisha unganisha, ila Ana alikuwa akisumbuliwa sana kichwa na Yule mtu aliyemmaliza kichawi usiku uliopita, ilikuwa ni kwenye hasira tu akajikuta akimmalizia ila hakupanga kummalizia. Ila damu ya huyu mtu ilimuumiza sana kichwa Ana, ikabidi atafute mto kwanza kwahiyo alivyofika kwenye maeneo ya karibu na kwa mganga alitafuta mto kwanza na kwenda kuoga mtoni kwani yeye aliamini kuwa unapooga kuna vitu vinaondoka kwenye mawazo yako haswa kumfikiria huyo mtu ambaye alimuua bila ya hatia.

Alichukua muda mrefu sana kuoga huko mtoni kisha alipomaliza akavaa nguo zake vizuri tu, ila kuangalia pembeni akaona kitu kinang’aa sana na kuhisi kuwa huenda ikawa dhahabu na kwavile kule kulikuwa sehemu ya ndani ndani kwahiyo uwezekano wa kitu hicho kuwa dhahabu ulikuwa mkubwa sana, ingawa Ana ni mtu mwenye machale sana ila kitendo cha kuona dhahabu kilimaliza machale yake, akainama na kuiokota kisha kuiweka vizuri kwenye mifuko yake kuwa ataenda nayo kila mahali na atarudi nayo mjini kwaajili ya kuiuza, baada ya kuiweka vizuri ndipo akaendelea na safari yake ya kufika kwa mganga.



Sara aliwachukua wenzie mpaka ile sehemu aliyochukua funguo na Salome kisha kufungua hiko chumba na kuingia ndani, wote wakashangaa,

“Inamaana siku zote hizi tulikuwa hatujui kama hiki chumba kinaingilika au ni nini jamani mbona sielewi yani hatujawahi kukihisi hata mara moja!”

“Sasa nasikia kuna watu mama kawafungia kwenye hiki chumba, unaambiwa ukisukuma lile kabati utaona mlango mwingine na hapo kuna chumba kingine”

Ikabidi Kulwa asukume kabati kwani hawakutaka kuandikia mate wakati wino upo, na kweli alivyosukuma kabati aliona mlango wa chumba kingine kinachoonekana kama choo cha ndani, Kulwa alitaka kuwa shahidi bado na kukisogelea kile chumba kisha akashika ule mlango ila aliganda pale pale, akawa anajaribu kuutoa mkono wake ila haikuwezekana na mara chumba kile kikaanza kutingishika na kuwafanya wengine yaani Sara na Doto waanguke chini huku Kulwa akiwa kaganda pale pale mlangoni na mara akaanza kukauka kama anapigwa na shoti ya umeme.





Ikabidi Kulwa asukume kabati kwani hawakutaka kuandikia mate wakati wino upo, na kweli alivyosukuma kabati aliona mlango wa chumba kingine kinachoonekana kama choo cha ndani, Kulwa alitaka kuwa shahidi bado na kukisogelea kile chumba kisha akashika ule mlango ila aliganda pale pale, akawa anajaribu kuutoa mkono wake ila haikuwezekana na mara chumba kile kikaanza kutingishika na kuwafanya wengine yaani Sara na Doto waanguke chini huku Kulwa akiwa kaganda pale pale mlangoni na mara akaanza kukauka kama anapigwa na shoti ya umeme.

Sara na Doto walitamani wakamsaidie ndugu yao lakini hawakuweza kwani chumba kilikuwa kinatingishika na wao wapo chini, ile hali ilizidi kuwa mbaya kwa upande wao na gafla ikakatika mara tu ya mlango wa kuingilia chumba kile ulipofunguliwa na aliyeingia alikuwa ni Salome, walibaki wakimtazama tu kasoro Kulwa kwani hata kilichoendelea hakujua na alikuwa amekauka kama kapigwa na shoti ya umeme, alionekana Salome akipuliza upepo kutoka mdomoni kwenda kwenye mkono ambao Kulwa alishika kitasa cha ule mlango mwingine, na gafla alijikuta kakiachia na kuanguka chini ila akiwa vile vile hajitambui, Salome akamwamuru Sara amkongoje Kulwa kutoka kwenye kile chumba kwani Doto alikuwa bado na maumivu ya kuungua.

Kwahiyo Sara aliinuka na kuanza kumburuza Kulwa nje huku hofu ikiwa mmemtanda moyoni kuwa huenda Kulwa amekufa maana alikuwa kimya kabisa kama kabigwa shoti ya umeme na alikuwa amekauka kabisa, ila Salome alimwamuru Sara amvutie hadi nje kabisa ambapo Sara alimburuza Kulwa hadi nje kabisa, kwa hakika alichoka maana Kulwa alikuwa mzito sana, alimuhurumia kumburuza ila ilibidi afanye vile kwani hakuwa na jinsi zaidi ya kumburuza tu, ukizingatia alishapewa amri na Salome kuwa afanye hivyo kisha akarudi sebleni ambako Salome alikuwa amekaa na Doto, hapo Sara akauliza,

“Hivi Kulwa atapona kweli?”

“Angekuwa haponi wala nisingekusumbua kuwa umbebe. Na ulianzaje na wewe kuwapeleka wenzio kwenye kile chumba?”

“Hata sijui kwakweli, ila nilitaka kuwaonyesha kuwa kuna chumba ambacho hatukifahamu humu ndani”

“Haya sasa, faida yake umeiona? Kaka yako atapona ila itamchukua muda sana kurudi kwenye hali ya kawaida, familia mnazidi kuugua magonjwa yasiyoeleweka”

“Sikuelewi”

“Si huwa mnabisha nyie siku zote kuwa mama yenu ni mchawi! Haya sasa kama mama yenu si mchawi, kile chumba kwanini kipo kisiri? Na kwanini mtake kuumia sababu ya kukichunguza kile chumba?”

“Unajua ni vigumu sana mtu kuamini kuwa mama yako mzazi ni mchawi”

“Basi ndio hivyo, wakati nafanya kazi hapa kwenu. Siku niliyoamua kukichunguza kile chumba nilizimia muda mrefu sana”

“Wakati unafanya kazi hapa kwetu!!!”

Sara na Doto walijikuta wakishangaa kwani waliona Salome anaongea maajabu ukizingatia kwenye nyumba hiyo wamemjua badae sana ila yeye anawaambia wakati anafanya kazi pale kwao, ila Salome hawakuwajibu chochote ila aliwaambia wasitoke nje mpaka Kulwa atakapozinduka.



Rose alikuja kushtuka na kugundua kuwa alilala pale usiku mzima na kazinduka kesho yake huku mwili wa mama jack ukiwa kwenye siti ya nyuma ya gari lake kama alivyouweka, alishangaa sana kisha kuanza tena kuendesha gari kwa haraka haraka hadi akafika nyumbani kwa mganga ila alimkuta akiwa amechukia sana, kwani aliposhuka tu kwenye gari lake na kukutana uso kwa uso na Yule mganga alishangaa akifokewa na Yule mganga,

“Ndio umefanya nini sasa Rose?”

“Sielewi”

“Huelewi nini na umemtoa kafara rafiki yako? Nenda kamzike sasa”

Rose alihisi kuishiwa nguvu kabisa kwani hakutegemea kama rafiki yake atakuwa amekufa,

“Nisamehe mganga”

“Na bora ungewahi jana ile ile, sasa mwili umeshapoa kabisa ndio unamleta kwangu? Nenda kazike tu”

“Nisamehe tafadhari sijui cha kufanya”

“Hujui nini? Nenda kazike”

“Sijapanga kumtoa kafara rafiki yangu hata sijui imekuwaje”

“Hivi wewe mwanamke una akili gani? Mwanzo si nilikutuma na dawa mtoni wewe nikakwambia ukimwaga utamuona mwanao kitandani halafu msukume mtoni, ila wewe ukamuona sijui Moza wako ukakimbia na hukuweza kumsukuma, sasa nimekupa dawa umwage mlangoni kwako, usiongee na mtu yeyote zaidi ukifika ndani uanze kutaja majina ya unaowatoa kafara. Ni kweli hujaongea chochote ila umeanza kumtaja rafiki yako huyu, ulikuwa na mpango gani nay eye zaidi ya kumtoa kafara tu. Na hiyo kafara haikusaidii chochote ni kama umetoa sadaka tu, haya nenda kazike mzoga wako”

Rose alijikuta akikosa nguvu kabisa kwani haya mambo yalivyoenda ndivyo sivyo yalizidi kumchanganya akili na akaona kunapoelekea sasa hata yeye binafsi atajikuta amejiua kwa presha au kwa namna nyingine yoyote maana hakuelewa chochote, hakujua aanzie wapi kuzika au aishie wapi.

“Sasa mimi nitamzikaje?”

“Kwani hujui watu wanazikaje? Wewe mwanamke ni mjinga sana, rafiki yako kakusaidia kakuleta kwangu halafu umemtoa sadaka, yani wewe mwanamke ni mpumbavu”

“Nakuomba mganga tumsaidie rafiki yangu kwa namna yoyote ile”

“Tumsaidie nini na mwili umepoa huo? Labda utoe kafara ya watoto wako wote”

Rose alichanganyikiwa kabisa, ila Yule mganga aliondoka na kwenda kwenye chumba chake cha uganga na kumuacha Rose akiwa na mawazo yasiyo na kifani.

Aliwaza kuhusu watoto wake na kuona kuwa vyote alivyovifanya kwa kipindi chote ni kazi bure,

“Hivi mimi si ndio nilimtesa yule mwanaume yani Patrick na kumfanya kama ndondocha sababu ya watoto wangu! Nilitaka waishi vizuri, wale raha ya maisha, yani leo nikawatoe wote kafara kweli! Hao wawili wenyewe nilikubali kwa shingo upande, naweza kuwatoa kafara watoto wangu kweli! Kuna sababu gani ya mimi kuendelea kuishi na kutafuta mali kwa haj azote ikiwa watoto angu nimewatoa kafara, kuna faida gani ya kuishi vizuri huku nikinyooshewa vidole na watu kuwa niliwatoa kafara watoto wangu! Nawapenda sana, niishi bila Sara, Kulwa, Doto na Ana kweli! Hapana kwakweli, na huu mwili wa rafiki yangu sijui nitafanya nao nini”

Aliwaza sana bila ya jibu la mawazo yake na alijihisi ni mkosanji kila alipofikiria kwani aliona anapoelekea sasa sio kuzuri, yani awatoe watoto wake wote.

Yule mganga akamtuma mtu ambaye alienda kumuita Rose na kuingia kwenye chumba cha mganga, na baada ya kuingia tu aliulizwa alichokiamua,

“Utaenda kumzika rafiki yako au utawatoa watoto wako kafara?”

“Nitaenda kumzika rafiki yangu”

“Yani wewe naelewa sasa kwanini wachawi wenzio hawashirikiani na wewe, yani wewe uchawi wako mkubwa ni kutegemea nguvu za waganga wa kienyeji, hakuna mchawi ambaye hatoi kafara, wewe ni mchawi gani wewe? Nakuuliza mara ya mwisho, utaenda kumzika rafiki yako au utawatoa watoto wkao kafara?”

“Nitaenda kumzika rafiki yangu”

Mganga ilibidi acheke huku akisikitika, alimuangalia kwa makini sana Rose halafu akamwambia tena,

“Nakupa machaguzi ya mwisho, nenda kafikirie kati ya kumzika rafiki yako na kuwatoa kafara watoto wako”

Rose alitoka tena na kukaa chini ya mti huku kichwa chake kikiwa kimejawa na msongo wa mawazo.



Kulwa alishtuka kama mtu aliyeshtuka usingizini halafu moja kwa moja akakimbilia ndani huku akihema sana, ni Sara aliyeenda kumdaka maana haikujulikana kuwa alitaka kukimbilia chumba gani ukizingatia Salome alishawaambia kuwa akili yake itakuwa kidogo inasumbua kufanya kazi kwa kipindi hiko kutokana na kuanguka kwenye kile chumba.

Kwahiyo Sara alimshikilia kaka yake huku akimsihi kuwa akae kwanza akili itulie, ila Kulwa alipokaa tu alianza kuropoka kuwa kuna vitu aliviona wakati amelala,

“Vitu gani hivyo?”

“Kwanza mama yuko wapi?”

“Hayupo, unajua fika mama tangu jana aliporudi na rafiki yake kuanguka akaondoka nae ndio hajarudi hadi leo”

“Basi nilichokiona ni cha kweli”

“Kitu gani hicho?”

“Nimeona mama yupo kwa mganga, yani Yule rafiki wa mama wa jana eti amekufa”

Wenzie wakashangaa na kuuliza,

“Amekufa!!”

“Ndio nilivyoona, na mama kapewa achague chaguo moja na Yule mganga, yani aende akamzike rafiki yake au atutoe sisi wanae kafara. Kwenye kumuona kwangu yani bado mama anafikiria kuhusu hilo swala kuwa atutoe kafara au akamzike rafiki yake”

“Yani mama yetu atutoe kafara sisi!”

Doto aliuliza kwa mshangao, na Kulwa akamjibu

“Ndio, kapewa chaguo hizo kuwa atutoe kafara au akamzike rafiki yake”

“Haiwezekani, haiwezekani mama kututoa kafara sisi. Hayo ni mawazo yako tu yasiyokuwa na maana yoyote Kulwa”

Salome aliyekuwa akiwasikiliza tu akacheka sana kisha kumuangalia Doto na kumwambia,

“Tena wewe ndio usiseme kabisa, nadhani leo ndio ingekuwa mazishi yako. Mama yako alishakubali muda mrefu sana kukutoa kafara wewe, na badae akakubali kukutoa wewe na Sara, ila kwa ninavyomjua angekutoa wewe kwanza”

Wote walikaa kimya kwanza baada ya kusikia kuwa walikuwa kwenye orodha ya kutolewa kafara, na lile swala aliloongea Kulwa kuwa mama yao yupo kwenye machaguzi ya kuwatoa kafara wao au kumzika rafiki yake. Doto alijikuta akiuliza,

“Jamani sasa tutafanyaje ikiwa mama atapanga kututoa kafara wote?”

Kulwa akawaambia wenzie kwa msisitizo,

“Jamani sikilizeni, kama mama alipanga kuwatoa kafara nyie mwanzoni ila Salome alipokuja na Yule mgeni wote tulimshangaa ila kumbe ndio ametolewa sadaka kwaajili yenu. Hapa hatuna budi zaidi ya kumwambia Salome atusaidie”

Kisha akamgeukia Salome na kumwambia,

“Salome tusaidie maana kwajinsi nilivyomuona mama anasuasua kwenye ndoto kwa hakika atachagua kututoa kafara tu, naomba utusaidie”

Sara nae akachangia,

“Kweli Salome tusaidie”

Sasa nyie mnaniombaje hivyo binadamu mwenzenu badala mmuombe Mungu awasaidie, ombeni Mungu awasaidie na muelewe kuwa mama yenu sio mtu mzuri, kila siku nawaambia kuwa mama yenu sio mtu mzuri ila hamtaki kuelewa ila muelewe sasa, na mkitaka niwasaidie tushirikiane kwa pamoja ili mama yenu aachane na uchawi na arudi kwenye maisha wanayoishi binadamu wa kawaida”

“Kwahiyo ni kweli mama kahifadhi watu kwenye kile chumba kidogo?”

“Yani siku wakitoka mtashangaa sana, kwanza ni wamekonda mno halafu watu wengine hata hamuwezi kuwadhania kama wapo humo”

“Mmmh hivi wewe Salome ni mtu wa kawaida kweli?”

Salome akacheka na kuwaambia,

“Mimi ni mtu wa kawaida ila ipo siku mtanijua mimi halisia kuwa ni nani na kwanini nilikuwa nafanya yote haya”

Walijikuta wote wakitamani kumjua Salome halisia ni nani ila Salome aliwabadilishia mada na kuwataka kuwa wakapate chakula ila alimtaka Sara akamuite mlinzi ili siku hiyo ale chakula pamoja na mlinzi.

Sara alifanya hivyo kwenda kumita mlinzi ila mlinzi aligoma na kusema kuwa hawezi kwenda kula ndani kwenye nyumba hiyo.

“Kwanini?”

“Sitakli tu, na siwezi kuja”

Sara alirudi na kumpa huo ujumbe Salome ambaye alisema, sawa hakuna tatizo ila muda mfupi tu mlinzi alikuwa mezani akishangaa shangaa kuwa ameingiaje ndani ya nyumba wakati alikataa.



Patrick na Neema muda huu waliamka tena na kujiona kuwa sasa wapo sawa kiasi yani ule uchovu umepungua pungua ila muda nao ulikuwa umeenda sana yani giza lilishaanza kutanda, waliamka na uchovu na kutoka sebleni ambapo Neema alianza kwa kumuita Salome ila ilikuwa kimya na kuhisi kuwa Salome hakuwepo,

“Unajua huyu mtoto kipindi cha nyuma alisema kuwa anakuja kukaa nyumbani kwako ili akae karibu na baba yake, sasa kipindi hiki uko hapa ila mbona haonekani nyumbani?”

“Labda kaenda kujisomea na wenzie”

“Aende kujisomea wapi? Yule mtoto amekataa kwenda shule kama hujui, na ndio kwanza yupo kidato cha tatu ila kwenda shule amegoma sijui ataingiaje hiyo kidato cha nne mwakani maana miezi inazidi kukatika tu”

“Kumbe hasomi? Kwanini umeacha mtoto hasomi?”

“Sassa kakataa shule mwenyewe unadhani mimi ningefanyaje? Hivi unakumbuka kwanza mara ya mwisho kabla hatujarudi nyumbani tulikuwa wapi?”

“Hata safari ya kurudi nyumbani sijui imefanyajwe fanyajwe. Ila Neema mchunguze mtoto, haiwezekani mtoto akatae tu gafla kwenda shuleni halafu wewe ukae unamchekelea tu, labda kaanza wanaume usikute wanamuongopea”

“Mmmh kama nakumbuka kitu hivi, Salome aliniambiaga ana simu umemnunulia wewe”

“Mmmh sijawahi kumnunulia Salome simu”

Neema machale yakamcheza na kuanza kuhisi vile alivyoambiwa na Patrick kuwa usikute mwanae ana mwanaume ndiomana hataki shule, akaamua kwenda kupekua chumbani kwa Salome kuwa pengine anaweza kukuta hata barua ya mapenzi na ajuwe ni wapi aanzie na mtoto wake huyu.

Wakati ameenda kupekua chumbani kwa salome, aliona begi dogo na kulifungua, alikuta simu ila alishtuka sana kwani ilikuwa ni simu ya Ashura.



Rose aliitwa tena na mganga ili atoe chaguo lake alilolifikiria,

“Muda unakwenda Rose, na usiku huo unaingia, chagua moja kumzika rafiki yako au kutoa kafara wanao”

“Hapana kwakweli, kuwatoa kafara wanangu hapana, nipo tayari kumzika rafiki yangu”

“Kumbuka utaenda kumzika peke yako na giza hili, hakuna wa kukusaidia. Chagua tena”

Rose hakuwa na jibu la zaidi ya kumzika rafiki yake,

“Kama umeamua hivyo sawa, inabidi azikwe leoleo yani maiti yake isilale tena maana yatatokea majanga bure”

“Majanga gani?”

“Usiniulize majanga gani, jua kuwa yatatokea majanga. Yani unatakiwa uizike maiti leoleo, ila kwa usalama wako ukiwa unatoka hapo mlangoni kwenda kuizika hiyo maiti usiongee na mtu yeyote Yule ila nenda moja kwa moja kuna mahali utakuta shimo halafu utamdumbukiza rafiki yako huku ukitaja majina yote ya watoto wako baada ya hapo utarudi na kulala hapa. Nadhani tumeelewana”

“Ndio tumeelewana”

“Haya lamba dawa hii na usiseme chochote”

Rose akalamba ile dawa na kutoka nje, ila kabla hajalisogelea gari lake akashangaa kumuona mwanae Ana akiwa amemfata kule kwa mganga, alishangaa sana na kujikuta akisema,

“Ana!”

“Ndio ni mimi mama, nimekufata nata……”

Ila kabla Ana hajamaliza sentensi yake, Rose alianguka chini na kuanza kutapatapa.



Rose akalamba ile dawa na kutoka nje, ila kabla hajalisogelea gari lake akashangaa kumuona mwanae Ana akiwa amemfata kule kwa mganga, alishangaa sana na kujikuta akisema,

“Ana!”

“Ndio ni mimi mama, nimekufata nata……”

Ila kabla Ana hajamaliza sentensi yake, Rose alianguka chini na kuanza kutapatapa.

Ana alipatwa na hofu sana baada ya kumuona mama yake katika hali ile ila gafla alijikuta akipata wazo la kutoa lile jiwe la dhahabu ila hakujua kuwa afanye nalo kitu gani.

Akalitoa lile jiwe la dhahabu na kujikuta akilishika na kuliweka kwenye kifua cha mama yake na gafla wakatoweka mahali pale.

Mganga alikuwa pembeni akiwaangalia na akiangalia kinachoendelea kwahiyo alishangazwa sana na kuona kuwa gafla watu wale hawaonekani ila gari ya Rose ilibaki pale pale na mwili wa mama Jack ulibaki mule mule kwenye gari, mganga alishangaa sana na kumwambia msaidizi wake,

“Mwanamke mshenzi sana Yule, ananiletea uchawi wake kwenye nyumba yangu pia! Kaacha maiti yake hapa, akimaanisha nini? Na nitamkomesha kwakweli yani nitamkomesha haswaa”

Msaidizi wa mganga alikaa kimya kwani hata yeye hakuelewa kitu chochote kile kinachoendelea, na pia hakuelewa kuwa yeye na mganga watafanya nini na maiti ambayo imeachwa ndani ya gari.



Nyumbani kwa mama Jack napo hawakuelewa kabisa kuhusu mama yao, walijaribu kuulizia sehemu mbali mbali ila hakuna mahali walipopata jibu la kueleweka, ila wakakumbuka tu kuwa mara ya mwisho mama yao alimsindikiza Yule binti aliyemuokota na kuamua kumpeleka kwao, watoto wake walijiuliza kuwa bora hata wangeenda na mama yao kumsindikiza ila kwavile waliona ni mtu mzima basi wakamuacha aende mwenyewe ila kitendo cha kutokupata mawasiliano yake na kitendo cha kutokurudi nyumbani kiliwapa hofu kubwa sana, walijiuliza maswali mengi bila majibu na mwisho wa siku walipanga kuwa wakatoe taarifa polisi maana walihisi kuwa huenda mama yao ametekwa na watu wenye lengo la kumuibia gari sababu aliondoka na gari, basi wakakubaliana kufanya hivyo ila walipotoka nje walishangaa kuona gari ya mama yao iko pembeni kama vile alirudi na kuondoka tena bila ya gari,

“Jamani gari imerudije?”

“Lazima alirudi jamani, inawezekana vipi gari lirudi lenyewe?”

Wakalisogelea gari lake na kulichunguza, funguo za gari zilikuwa mlangoni na kila kitu kwenye gari kilikuwepo kasoro tu mama Jack ndio hakuwepo, ila kwavile waliona gari wakajipa matumaini kuwa atarudi tu na kuacha kwenda kutoa ripoti polisi,

“Maana kama karudisha gari basi yupo hapa hapa mtaani atakuja tu, na akiona tumeenda kutoa taarifa polisi atatuona sisi ni wajinga sana. Bora tumeona gari kidogo mioyo imetulia”

“Hivi lakini mama arudishe gari halafu asiingie hata ndani?”

“Labda sehemu aliyokuwa anaenda ni ya muhimu sana, atakuwa kwa majirani tu huko sidhani kama kaenda sehemu ya mbali aache gari”

Wakakubaliana kuwa atakuwa mazingira hay ohayo na kuwafanya hofu iondoke kwenye mioyo yao kuwa mama yao yupo.



Wakina Rose waliamua kwenda kulala sababu usiku ulishafika, ila Salome aliwaaga kuwa anaondoka muda huo.

“Kheee mbona usiku tayari?”

“Aaah kuna umuhimu wa mimi kuondoka muda huu, natakiwa niwahi nyumbani”

“Kwanini usingelala hapa ukaondoka kesho asubuhi?”

“Hivi mmeshaniona nikilala hapa toka siku mama yenu alipotaka kufanya mambo ya ajabu kwenye chumba change? Mi naenda kulala nyumbani kwetu”

Wakatazamana ila hakuna aliyemjibu la zaidi, kisha Salome akaondoka zake na kuwaacha wakijadiliana, huku Doto akiuliza kuwa ni mambo gani ya ajabu ambayo mama yao alitaka kuyafanya chumbani kwa Salome.

“Jamani mimi kama nilisikia sikia tu kuwa eti mama alitaka kuzini na mlinzi wetu”

Wote wakashangaa na kuuliza kwa makini huku wakimfikiria mama yao na Yule mlinzi wao,

“Hivi kweli mama anaweza kufikia hatua hiyo ya kutaka kuzini na mlinzi wetu? Yule mlinzi si yupo sawa na sisi tu?”

“Hivi kama mama ameweza kutaka kututoa kafara sisi atashindwaje kutaka kuzini na mlinzi? Mama yetu kawa na mambo ya ajabu, tutakataa hilo ila ndio ukweli huo, mama amekuwa na mambo ya ajabu”

“Mimi naona tusiendelee kujadili tena mambo hayo, jamani tunataka kwenda kulala na mkumbuke kuwa mimi nalala peke yangu”

“Hivi unaweza kwenda kulala chumbani kweli leo?”

“Basi nawaomba jambo moja, tulale wote sebleni jamani”

Wakakubaliana na Sara kuwa wote walale sebleni kwa usiku wa siku hiyo.



Swala la Neema kukuta simu ya Ashura kwenye begi la Neema ni swala lililompa wasiwasi zaidi, akajikuta akitoka nayo kwa Patrick na kumueleza kuwa ile ni simu ya Ashura na ameikuta chumbani kwa Salome.

“Hivi umesema kuwa tangia Ashura aondoke umekuwa ukiwasiliana nae kwa njia ya ujumbe”

“Ndio, hata nikashangaa kusema kuwa eti umeona picha ya maiti yake ikiwa imeoza ila nimeshangaa zaidi kukuta simu ya Ashura kwenye pochi ya Salome na kunitia uwoga zaidi kuwa huenda Salome anajua kuhusu kifo cha Ashura au huenda ndio yeye mwenyewe aliyekuwa akiniandikia ujumbe mimi. Tuseme….”

Akafikiria kidogo kuwa Salome ndio kamuua Ashura, akajikuta akitikisa kichwa chake na kusema,

“Hapana, mwanangu sio mkatili kiasi hicho. Mwanangu hawezi kuwa amemuua Ashura, kwanza kwa lipi baya alilofanyiwa na Ashura hadi amuue? Hapana kwakweli, haiwezekani yani haiwezekani kabisa”

Patrick akamshauri Neema kuwa awashe ile simu ya Ashura ili wajaribu kuangalia kuwa ni namba gani zimewahi kupigwa na ujumbe mingapi iliyowahi kujibiwa kwenye simu hiyo. Basi Neema akajaribu kuwasha simu ile ila haikuwaka na kugundua kuwa haikuwa na chaji kwahiyo ikabidi aiweke kwenye chaji huku wakiwa na hamu ya kujua kuwa ni watu gani wamekuwa wakiwasiliana nae kwenye simu ile.

Muda kidogo alijaribu tena kuiwasha ila iliwaka na ilipowaka tu kuna ujumbe ambao inaonyesha ulikuwa unasubiri kuingia kwahiyo uliingia muda huo huo, ilionekana ni namba mpya ambayo haijatunzwa kwenye simu hiyo ndio imemtumia huo ujumbe, ujumbe ule ulisema,

“Umeona mambo uliyoyafanya sasa Ashura yani umenivurugia kila kitu, huyu Salome amekuwa mtihani mkubwa sana katika maisha yangu. Nilikutuma umamalize ila ukakimbia bila ya kummaliza, sasa huyu mtoto amekuwa na nguvu za ajabu na anataka kunimaliza mimi. Je utafurahi ukisikia ndugu yako nimemalizwa na huyu mtoto wa laana? Sijapendezewa kabisa na ulichofanya”

Neema na Patrick walitazamana kwani kuelewa huo ujumbe moja kwa moja ilikuwa ngumu kabisa ukizingatia mtumaji wa ujumbe ule hawakumfahamu, hivyo wakaamua kufatia mazungumzo kwa namba hiyo na jumbe zilizotumwa, mwishowe waligundua kuwa mtuma ujumbe alikuwa ni Rose na walishangaa sana kwani waliona hadi jinsi Rose alivyopanga mipango ya kummaliza Salome kwa kushirikiana na Ashura yani hadi walijikuta wakishindwa kuangalia jumbe zingine zaidi ya zile kwani ziliwatisha kwakweli,

“Yani kumbe Ashura nilikuwa naishi nae halafu anajuana na Rose! Kumbe alipanga mipango ya kumuua mwanangu! Sielewi kabisa sielewi”

Patrick alikuwa kimya tu kwani yeye ndio hakuelewa zaidi, muda kidogo walisikia mlango wa sebleni ukigongwa kisha Neema kwenda kufungua, alikuwa ni Salome ila Neema alishindwa hata kumfokea Salome kwa kurudi usiku huo nyumbani kwani jumbe za kwenye simu ya Ashura zilikuwa zimemtisha sana, badala yake alijikuta akimkaribisha ndani na kumuuliza kuhusu Ashura kama ana mpango wa kumuua yeye alijuaje na je imekuwaje hadi simu ya Ashura ipo kwake,

“Mama na Baba naomba niwaeleze kwa ufasaha kabisa, kama mmesoma hizo jumbe mtakuwa mmapata maana kuwa Ashura alikuwa ni mtu wa aina gani katika maisha yetu. Mama ulimchukulia Ashura kama mdogo wako ila kiukweli kuna kazi alipewa ndiomana alikuja kukaa hapa, Ashura na Rose hawakumuweza Salome sababu alikuwa na kinga thabiti kutoka kwa marehemu mama yake na Patrick”

Walimshangaa kuwataja majina yao ila kwavile walitaka kujua zaidi ndiomana walikuwa wakimuuliza tu maswali kuhusu Ashura,

“Eeh mwanangu hebu nieleze vizuri, ilikuwaje tena yani ilikuwaje hadi kutaka kukuua wewe na ilikuwaje hadi simu yake ipo kwako?”

“Mama, nilimsikia kwa masikio yangu akiongea na simu kuhusu dawa ya kuweka ili wanimalize, ndipo akaandaa chakula na kuniwekea hiyo dawa kwenye chakula ila mimi nilifanya mchezo wa kumbadilishia sahani ya chakula na ndipo alipokula alianza kutoka povu na kutapatapa na akawa kimya hapo hapo kumbe ilikuwa ni sumu kali sana ya kuua kwa muda mfupi. Nikachukua simu yake na kugundua kuwa kuna vijana alizungumza nao kuja kubeba mwili wangu, kwahiyo nikampakia yeye kwenye viroba na kuwatumia wale vijana ujumbe kuwa waje wabebe tayari ila mimi niliondoka kwani nilipata pesa kwenye begi la Ashura na kuja kutafuta nyumba. Kwahiyo wale vijana walijua wameenda kunitupa mimi. Nilifanya hivyo kwasababu ni kesi kukutwa na maiti tena imeuwawa kwa sumu, nilifanya hivyo kuficha ushahidi kwani hata yeye alipanga kufanya hivyo”

Neema alishindwa kuwa alie au acheke kwani hakujielewa kabisa, siku zote alimchukulia Ashura kama mdogo wake ila hakuelewa kama Ashura alikuwa akimzunguka, ndipo akaelewa jinsi alivyoulizia habari za Ashura kwa mamake wa kambo na kuambiwa kuwa huyo mtu hawamtambui kabisa, alijaribu kuunganisha picha ya jinsi alivyokutana na Ashura na kupata jibu ya maswali aliyokuwa akimuuliza na kujua kuwa Ashura alitumwa katika maisha yake.

Salome akawaeleza vingi sana kuhusu Ashura na kuwafanya wabaki wameduwaa tu na hawakuelewa chochote kile, yani Neeema hakujua alie kwa kupata uhakika wa kifo cha Ashura au acheke sababu mwanae kanusurika na kifo, walijikuta wakikaa kimya tu wakitafakari kuhusu Ashura na kutumwa na Rose, yani Patrick alijikuta akijutia maisha yake,

“Najuta kumfahamu Rose, najuta kuanza kufanya biashara na mwanamke huyu. Alinifanya niifukuze familia yangu, amefanya nisiwathamini wanangu, amefanya mamangu auwawe kikatili, amenifanya niwasahau ndugu zangu, amefanya niwe kama ndondocha kwenye mali zangu mwenyewe. Najuta, amefanya niamini maneno ya Ashura kuwa ni ya ukweli sababu ni ndugu yako kumbe ni mtu ambaye amempanga kuja kuharibu maisha yetu, huyu mwanamke sijui nimfanye nini? Yeye ni mchawi ila mimi nitamfanyia kitu cha kawaida tu ambacho hatokisahau maishani mwake”

Patrick alionyesha kutokufurahishwa kabisa na mambo ya Rose, waliinuka na kwenda kulala ila si Patrick wala si Neema waliopata usingizi, kwani usingizi haukuwajia hata kidogo, muda wote Neema aliwaza alivyokuwa akiishi na Ashura jinsi alivyokuwa akishauriana nae halafu kumbe alikuwa na mipango ya kuuwa mtoto wake, ila tu alijiuliza kuwa kama alikuwa na mpango huo kwanini hakuweza kumuua mtoto wake wakati akiwa mdogo kabisa ndio kutaka kumuua mkubwa vile, aliwaza sana bila ya jibu la aina yoyote ile. Kwa upande wa Patrick nae alikuwa akiwaza tu toka siku ya kwanza alivyomfahamu Rose na jinsi alivyotelekeza familia yake.



Asubuhi ilipofika walikuwa palepale sebleni yaani Sara, Doto na Kulwa. Waliamka na kusalimiana, mara wakashangaa kumuona mama yao akitoka chumbani, wakajikuta kwa pamoja wakisema,

“Mama!”

Muda kidogo wakashangaa kumuona na Ana nae akitoka chumbani, na kujikuta wakisema tena kwa pamoja,

“Ana!”

Ila Ana na mama yao walikuwa wakishangaa pia kwani ilionyesha kuwa nao hata hawakujijua kama wapo hapoa nyumbani, ikabidi Rose atoke nje ili akaangalie kama gari yake ipo, alipotoka hakuiona ile gari ambayo alienda nayo ikamfanya ajiulize sana kuwa imekuwaje yeye amerudi ila gari yake haijarudi? Halafu akakumbuka kuhusu rafiki yake aliyetakiwa kumzika wakati mwili ulikuwa ndani ya lile gari, hapo bado hakuelewa, akarudi ndani na kumtazama Ana kisha akamwambia,

“Mara ya mwisho nakumbuka nilikuona wewe ila kilichoendelea sikumbuki, imekuwaje mwanangu nimerudi nyumbani?”

“Hata mimi sielewi mama, nakumbuka ulianguka na kuanza kutapatapa. Kuna jiwe la dhahabu nililiokota mtoni, nikachukua na kukuwekea kifuani ila kilichoendelea sijui, ninachojua ni kuwa nimeamka asubuhi hii nipo chumbani mwangu”

“Unasema jiwe la dhahabu? Liko wapi hilo?”

“Sijui lilipo, yani mara ya mwisho ni kulitoa na kuliweka kwenye kifua chako ila sikumbuki limekwenda wapi”

“Unasema uliliweka kifuani mwangu?”

“Ndio mama”

Rose alikaa chini na kuanza kulia, watoto wake wote wakamshangaa kuwa anacholilia ni kitu gani maana wao hakwakuona cha kushangaza na kumfanya mama yao hata alie, walimuuliza kuwa analia nini,

“Ana mwanangu umenimaliza, yani umenimaliza kila kitu”

“Kivipi mama?”

Mara akaanza kuulizia kuhusu Salome na kuacha mada ya kuwa anamalizwa,

“Salome yuko wapi?”

“Yupo kwao”

“Sio Salome Yule, wanangu Yule ni Moza”

“Moza!!!”

Waliuliza wote kwa mshangao wa hali ya juu,

“Ndio ni Moza”

“Kivipi mama?”

“Nyie nieleweni tu, Yule sio Salome ni Moza”

“Mmmh kwahiyo Salome yuko wapi?”

“Sijui ila Yule ni Moza anatumia tu mwili wa Salome”

Wote walikuwa wanashangaa ila gafla wakasikia mtu akicheka na mara kidogo akatoka sebleni, na kusikia sauti ya Moza ikisema sasa,

“Unasemaje Rose?”

Kila mmoja alikuwa anatetemeka na hakuna aliyeweza kumtazama Moza machoni.





Wote walikuwa wanashangaa ila gafla wakasikia mtu akicheka na mara kidogo akatoka sebleni, na kusikia sauti ya Moza ikisema sasa,

“Unasemaje Rose?”

Kila mmoja alikuwa anatetemeka na hakuna aliyeweza kumtazama Moza machoni.

Ila sauti ya Moza iliendelea kusema,

“Waambie yote watoto wako sio unawaambia tu kuwa Yule si Salome ni Moza, sasa Moza nimekuja mwenyewe na uzungumze yote mbele yao”

Hakuna aliyeweza kuinua uso wake wala hakuna aliyeweza kusema kitu chochote na kumfanya Moza aendelee kuongea,

“Najua hapa nitakapoondoka kila mmoja atatafuta pa kwenda na kuogopa kurudi tena kwenye nyumba hii, ila niwaambie kuwa hakuna mtakapoenda nisiwarudishe. Yani mkienda popote pale mtajisumbua tu kwani mimi nitawarudisha ndani ya sekunde. Mnashindwa kuuliza kitu au kuongea chochote sababu mnaniogopa eeh! Naondoka ila kuanzia sasa, mkinitaja tu nakuja”

Kimya kikatanda na wote walikuwa kimya kila mmoja akiogopa kunyanyua kichwa chake na kutazama kwani hofu ilishatanda kwenye mioyo yao. Sara aliuliza wenzie huku bado kainamisha sura yak echini,

“Jamani, ameshaondoka?”

Hakuna aliyejibu ila ikabidi Sara ainue kichwa chake na kutazama, akaona kweli ameondoka na kuwahakikishia wenzie kuwa ameondoka, hakuna aliyeweza kucheka wala kusema neno lolote kwa muda huo kwani kila mmoja alikuwa na mashaka na nafsi yake.

Kisha aliinuka mmoja mmoja na kuelekea chumbani kwake na kuwaacha Rose pamoja na Ana kwani walikuwa kama ni watu waliopigwa na shoti vile maana ni kitu ambacho hakikutarajiwa kabisa kwa siku hiyo.



Walikaa kaa pale sebleni kisha Rose aliinuka na kwenda ndani kwake, kisha akachukua simu yake na kuiwasha yani ziliingia jumbe mbali mbali kwenye simu ile kanakwamba zilikuwa zikimsaubiri awashe tu simukwahiyo ziliingia jumbe nyingi hata akashindwa aanze na ujumbe upi na kumalizia na ujumbe upi, wakati anataka ajiweke sawa sasa asome akashangaa simu yake inaita, ilikuwa ni namba ngeni ila alipopokea ndio akagundua kuwa ni wale vijana wake wa kai ndio walikuwa wanapiga,

“Mama mbona hujibu ujumbe tunakutumia, hupatikani tatizo ni nini?”

“Yani nisameheni bure vijana wangu, simu ndio naiwasha leo. Nilikuwa na majanga mengi sana”

“Basi mama, ule mzoga tulioenda kutupa tumejaribu kuufukunyua ili tuone ni nini, mama ni maiti ya Ashura, yani aliyeuwawa na tuliyemtupa ni Ashura”

“Nini?”

“Ndio hivyo mama ni maiti ya Ashura, nadhani tulifanyiwa mchezo ndiomana namba ya Ashura tukipiga alikuwa haongei anatuma tu meseji”

Rose alihisi kushikwa na tumbo kabisa na kumwambia Yule kijana kuwa atampigia tena, aliinuka na kwenda chooni kuendesha yani tumbo lilimvurugika kabisa kwani alipewa habari ambazo hakuzifikiria kabisa, yani alihisi kuwa ni vitu vingine vimetupwa ila hakufikiria kama ni Ashura ndio alikuwa amekufa. Alitulia chooni kwa muda kadhaa kwani tumbo lilimvurugika vilivyo ingawa hakuna chakula kinachoeleweka alichokula ila tumbo lake lilivurugika, alirudi tena chumbani kwake na kujitupa kitandani huku akiwaza bila ya kupata jibu,

“Yani Ashura ndio amekufa!”

Hakujua kuwa aanze kupiga kelele za msiba au afanye kitu gani, alichukua tena simu yake na kupigia wale vijana kisha akaomba wakutane nae ili akaonyeshwe hapo ambapo walimtupa Ashura, nao wakakubaliana nao. Kwakweli leo Rose alichanganyikiwa kabisa, kwani aliona kama likitoka hili basi linaingia lile na kuzidi kumchanganya.

Alijiandaa na kutoka sebleni ambako aliwakuta tena wanae muda huu wamekaa sebleni kasoro Ana ndio alikuwa bado chumbani, kisha akawaaga na kuwaambia,

“Jamani natoka, nadhani badae tutaongea vizuri”

Alikuwa ni mtu mwenye hofu na mashaka halafu machozi yalionekana kumlengalenga, kitu hicho kilifanya wanae wamuulize kuwa mama yao anaenda wapi na kulikoni yani ni kitu gani kilichomsibu,

“Wanangu, Ashura amekufa”

“Ashura amekufa?”

“Ndio amekufa”

Machozi yalikuwa yakimtililika na kuondoka huku akiwaacha wanae wakijadiliana pale.

Walijiuliza kuwa huyo Ashura amekufa kivipi yani taarifa zimeletwaje maana mama yao alionekana kuchanganyikiwa kabisa na taarifa hiyo, Kulwa alijikuta akiwauliza wenzie,

“Sasa kama mama ni muoga hivi wa kifo hadi amechanganyikiwa kwa kifo cha Ashura, mbona alitaka kututoa kafara sisi? Angeweza kweli kuvumilia wakati watoto wake tumekufa kwa kutolewa kafara nay eye?”

“Unajua hata mimi mwenyewe namshangaa sana mama, kama anashtuka hivi na kifo cha Ashura je kifo chetu sisi angefanyaje!”

“Mi nadhani kwasababu kifo chetu alikuwa anakitarajia kwahiyo kisingemshtua sana, ila kifo cha huyo Ashura hakukitarajia. Sijui kafa vipi nay eye mmmh!”

Walijadiliana sana bila ya majibu yoyote yale ya moja kwa moja.



Patrick siku ya leo aliomba asafiri kwani aliona ana ulazima wa kufanya hivyo ili aende kwa ndugu zake, Neema hakumpinga hata kidogo zaidi zaidi akamsaidia kujiandaa na kisha kumsindikiza kwenda kupanda magari ya kusafiri kwenda mkoa mwingine. Patrick hakuondoka na gari badala yake aliliacha gari lake nyumbani kwa Neema kwahiyo waliagana kisha Neema wakati wa kurudi akapitia tena kwa rafiki yake mama Pendo ambaye baada ya maongezi mafupi bado alimsisitizia kuwa mtoto wake ampeleke kwenye maombi,

“Sasa ndugu yangu Yule si mtoto mdogo kusema nitambeba mgongoni kwenda nae huko kwenye maombi”

“Ushawahi kuongea nae lakini kuhusu maombi?”

“Sijawahi yani kila nikitaka kuongea nae yanatokea mambo mengine najikuta sijaweza kuongea nae, yani usinione hivi nina makubwa ndugu yangu hata siju nianzie wapi na niishie wapi”

“Inatakiwa na wewe uende kwenye maombi”

“Nitakuja unipeleke, yani akili yangu haipo sawa kabisa”

Akaongea ongea nae pale kisha akaagana nae na kwenda kupanda daladala ili aweze kurudi nyumbani kwake, alipokuwa kwenye lile daladala kuna vijana pembeni akawasikia wakiongea,

“Yani muvi zingine za ajabu kweli yani, eti mtu anakufa mara mtu huyo anarudi kwenye mwili wa mtu mwingine sasa huyu mtu mwingine wanamshangaa kuwa anafanya mambo ya ajabu ambayo hajawahi kufanya kabla, unashangaa mtu alikuwa hanywi mara gafla anakuwa mlevi kupitiliza. Yale mambo ingekuwa kweli sijui ingekuwaje!”

“Lakini kuna baadhi ya vitu ni kweli sema tu tunapuuziaga vitu hivi”

“Mmmh hivi inawezekana kweli mtu akarudi kwenye mwili wa mtu mwingine? Hapo ikitokea itakuwaje?”

“Kwani hiyo picha iliishia wapi?”

Mara wale vijna kituo chao kikatangazwa na kushuka, kwa jinsi Neema alivyovutiwa na maongezi yao ni hakika kama ingekuwa ni kituo cha kushuka yeye basi angepitilizwa ili aendelee kusikiliza walichokuwa wakizungumzia. Akajiuliza mara mbili mbili kuwa inawezekana vipi kwa mtu mwingine kuingia kwenye mwili wa mtu mwingine, kisha akaanza kuwaza jinsi mtoto wake Salome alivyobadilika yani anatenda mambo ya tofauti kabisa na aliyokuwa anayafanya awali, na mara nyingine anapika chakula kinachoendana na alichokuwa akipika Moza, akaanza kujiuliza,

“Inamaana Moza… Hapana haiwezekani, ile walikuwa wanasimuliana ni muvi tu. Haiwezekani mwanangu Salome akawa Moza, Yule ni Salome na wala sio Moza, halafu Moza alishakufa”

Akawa anawaza huku akikataa majibu yake mwenyewe anayoyawaza kwani aliona akichanganyikiwa tu, kuja kushtukia kapitilizwa kituo chake sababu ya mawazo, kwahiyo akashuka na kupanda gari nyingine ili aende nyumbani kwake.

Alipokuwa kwenye gari nyingine alisikia sauti ya mtu ikimwambia,

“Pole kwa mawazo mama”

Sauti hiyo ilimchanganya vilivyo kwani ilikuwa ni moja kwa moja sauti ya Moza, kwahiyo akashindwa hata kugeuka kumtazama mtu huyo kwani hofu tayari ilikuwa imeanza kuingia kwenye moyo wake, alifika kituo chake na kushuka ila alihisi Yule mtu ameshuka nae, na kila alipotembea kwenda nyumbani kwake alihisi kuwa Yule mtu yupo nyuma. Alipatwa na uoga kadri alivyoongoza mwendo mpaka anafika kwenye geti la nyumbani kwake, bado alihisi Yule mtu yupo nyuma yake, akagonga geti kwa nguvu huku akijaribu kugeuka nyuma ili kama akikutana na maajabu basi apige kelele, ila alipogeuka nyuma hakuona mtu yeyote, kidogo moyo wake ukatulia na kujiona kuwa ni muoga sana ambapo alikuwa anaogopa kitu cha mawazoni.

Akajiona ni mjinga zaidi kugonga geti lake wakati linakuwaga wazi muda wote, akalifungua na kuingia ndani, aliwakuta wale wanae mapacha wakiwa sebleni na kuwauliza,

“Dada yenu yuko wapi?”

“Amerudi muda sio mrefu yani nadhani mliongozana mama, maana muda huu huu kaingia ndani. Yupo jikoni”

Neema bado aliganda kwani alikuwa kama haelewi elewi kitu vile, alikaa kwenye kochi huku akihema kwa nguvu ili kujitoa hofu kwanza.



Rose alikutana na wale vijana wake na moja kwa moja wakampeleka kule wakikotupa ule mwili, nay eye aligundua tu nguo za Ashura,

“Jamani ni kweli Ashura wangu”

“Ndio mama, ni Ashura kumbe ndio tulimtupa na tukajua ni kile kitoto”

“Jamani nani kamuua Ashura wangu?”

“Mama itakuwa ni kile kitoto tu ndio kimetuchezea mchezo mchafu, labda ndio kamuua Ashura halafu akatuma ujumbe kuwa tukambebe na kumtupa”

Yani Rose hakujua cha kufanya kwa muda huo kwani vitu hivyo vilikuwa vikimchanganya sana, hawa vijana walimuuliza kuwa ni kitu gani kifanyike kwa mwili wa Ashura ulioharibika na kuwaomba kuwa wachimbe hata shimo na kumzika kwani hakuelewa kuwa hata wafanyeje,

“Sisi tutachimba mama ila mshiko ndio tunaouhitaji”

“Nitawapa jamani, naomba tu mchimbe bora kidogo niwe na amani kuwa ndugu yangu hata alizikwa, yani roho inaniuma sana kumuona Ashura katiaka hali hiyo.”

Wale vijana hawakupoteza muda na kuanza kuchimba shimo, ila wakati wanataka kumzika Ashura lile shimo lilijaa maji na kumfanya Rose ashangae kuwa shimo limechimbwa vizuri halafu lijae maji tena, akawaomba wale vijana wachimbe tena. Walichimba mashimo kama matatu na yote yalijaa maji wakamwambia,

“Nadhani tuzike hivyo hivyo tukisema tuchimbe chimbe tutabambwa hapa, ujue vitu vya magendo hivi tunafanya? Na tukikamatwa ni kifungo cha maisha hakuna atakayetuelewa, tutaonekana tuliua na ndio tumeamua kuja kuzika mtu tuliyemmaliza”

Rose hakuwa na jinsi ikabidi wazike hivyo hivyo kwenye mimaji na kufukia, roho ilimuuma sana kuona ndugu yake amezikwa kama mnyama, ndugu yake kazikwa kikatili na ameuwawa ingawa bado hakuelewa kuwa dawa aliyoweka ili auwawe Salome ndio dawa hiyo hiyo iliyomuua Ashura.

Walimaliza, akawalipa wale vijana na kuondoka, alikuwa anarudi nyumbani kwake huku ana mawazo mengi sana haswaa akiwaza kuwa afanyaje na huyu mtu wa kuitwa Salome ilihali kashaujua ukweli kuwa huyo Salome ndio Moza ila huyo Moza akija kwenye umbile lake la Moza asilia anatisha sana bora akija kama Salome, na hapo akajiona mapambano ya kupambana na Salome yakimshinda kabisa.

“Natakiwa nimtafute Patrick nimwambie ukweli kuwa mwanae Salome ni mtu mwingine”

Alipanga kumtafuta Patrick ila alijaribu kupiga simu za Patrick kwa wakati huo hakuzipata hewani zilikuwa hazipatikani.



Neema alikuwa pale sebleni ila ndani ya muda ule ule, Salome alikuja kumwambia kuwa chakula ni tayari na kumfanya uoga umshike zaidi kuwa amekipika saa ngapi ikiwa watoto wale wamemwambia kuwa karudi muda sio mrefu, ila kabla hajamuuliza chochote Salome akamwambia,

“Mama unajiuliza kuwa chakula nimepika muda gani, unafikiri nimekipika sasa hivi basi? Nilikiacha jikoni, na mimi nilienda dukani”

Kidogo alivyosema hivyo hofu ilimuisha Neema na kujikuta akiinuka kwenda kula, ila macho yake hayakuisha kumuangalia Salome, alikuwa akimuangalia kwa jicho la wizi lakini alikuwa akimuangalia haswa wakati anakula alimuangalia sana, kwa kawaida Salome hakuwa na utaratibu wa kula ila alishangaa Salome wa sasa hivi alikuwa na utaratibu wa hali ya juu hata wakati anakula hakuwa akiongea wakati Salome hadi alikuwa akipaliwa kwa mtindo wake wa kula na kuongea.

Walipomaliza kula aliamua kuzungumza na Salome kuhusu swala aliloambiwa na mama Pendo la maombi,

“Sawa nitaenda, ila nipe sababu ya kunipeleka mimi kwenye maombi?”

“Salome umekataa kusoma, sasa unafikiri nisikupeleke kwenye maombi kweli!”

“Kusoma sijakataa ila nimekwambia nimechoka kwa kipindi hiki na nitasoma mwakani, kwani mbali jamani mwakani si hapo tu. Halafu kitu kingine kwani mtu asiposoma ndio ana matatizo hadi aombewe? Wangapi hawajasoma na maisha yao ni mazuri tu”

“Hatakama Salome, ila mimi ni mama yako naomba twende kwenye maombi”

“Sawa mama tutaenda”

“Kesho jiandae nikupeleke kwenye maombi”

Salome alimuitikia Neema bila ya pingamizi lolote ila muda wote Neema alikuwa akijiuliza maswali bila ya majibu huku akijaribu kuhusisha stori za wale vijana na jinsi alivyo Salome wake, ila alijikuta akipinga kuwa Salome wake hawezi kuwa amevamiwa na mzimu ila ni Salome Yule Yule sema kabadilisha matendo yake.



Kwa Yule mganga ambapo Rose aliacha lile gari likiwa na mwili wa mama Jack, mganga akataka afanye jambo la kichawi ili mwili ule urudi kwa Rose kisha Rose angejijua mwenyewe, mganga alimchukua msaidizi wake na ule mwili kisha wakauweka kwenye kile chumba cha mganga na kuanza kufanya dawa zake ili ule mwili uende nyumbani kwa Rose, basi alifanya dawa zake kwa muda kama wa nusu saa na ule mwili ukatoweka machoni mwao, mganga alijisifia,

“Mimi ndio kiboko wa kila kitu”

Mara gafla ule mwili ulirudi kibandani kwake na kumfanya mganga na msaidizi wake wabaki wanashangaa,

“Imekuwaje tena?”

“Nadhani kuna mtu anacheza na akili yangu, ila sikubali”

Akafanya tena dawa zake kama kwa nusu saa hivi, na mwili ukatoweka kweli. Sasa muda huu alitaka kujua kuwa ulipo mwili ni kitu gani kinatokea, akachukua kioo chake na kuangalia alishangaa sana kuwa muda huo mwili wa mama Jack ulionekana nyumbani kwa mama Jack na watu kwenye nyumba hiyo walikuwa wakishangaa tu.





Akafanya tena dawa zake kama kwa nusu saa hivi, na mwili ukatoweka kweli. Sasa muda huu alitaka kujua kuwa ulipo mwili ni kitu gani kinatokea, akachukua kioo chake na kuangalia alishangaa sana kuwa muda huo mwili wa mama Jack ulionekana nyumbani kwa mama Jack na watu kwenye nyumba hiyo walikuwa wakishangaa tu.

Mganga alishtuka sana na kumuangalia msaidizi wake,

“Sijui ni wapi nimekosea yani sijui, badala mwili uende nyumbani kwa Rose eti umerudi kwa familia yake”

“Sasa tutafanyeje?”

“Sijui ila kuurudisha huku siwezi, hata mwanzo nimeshangaa ulirudi huku sasa sijui ndio ulienda nyumbani kwa Rose au ni kitu gani halafu saivi umeenda nyumbani kwa mama jack. Sina jinsi itabidi tu nikubali kuwa anaenda kuzikwa nyumbani kwake ingawa ni mbaya sana ila sina cha kufanya”

Msaidizi wa mganga alikuwa kimya tu huku akishangaa matukio ya siku hiyo.



Nyumbani kwa mama Jack, walishtushwa sana na kitendo cha kukuta mwili wa mama yao upo ndani tena inaonyesha alikufa siku mbili au tatu zilizopita, kwakweli walilia sana na kufanya wakose hata la kufanya na mwili huo, wengine wakawaambia wakazike tu maana utakuwa na harufu, ila walikataa kuwa haiwezekani kuzikwa bila ya kuchunguzwa kwanza, kwahiyo wakakubaliana kuwa mwili ule ukafanyiwe uchunguzi maana hata ulivyofika pale nyumbani ilikuwa ni kiajabu ajabu kwahiyo wakaita watu na kusaidiana kupakia kwenye gari ili kuupeleka hospitali kwaajili ya uchunguzi, kila mmoja alikuwa haelewi na watoto wa mama Jack walilia tu kuwa mama yao umekuja mwili amekufa wakati walijipa moyo kuwa yupo, na kama mama yao kauwawa hao waliomuuwa walikuwa na lengo gani maana gari halikuibiwa lilikutwa tu nyumbani ila mwili wa mama yao umekutwa ndani, hakuna aliyeelewa moja kwa moja kuwa yale ni mambo ya kishirikina.

Basi walipanda kwenye gari na ule mwili wa mama yao ila wakati wanakaribia hospitali ule mwili ulitoweka kwahiyo walifika hospitali bila ya ule mwili kuwepo kwenye gari, kila mmoja alimtazama mwenzie na kufanya waanze kuogopa sasa, huku wakirudi na gari upesi upesi nyumbani n hakuna aliyeweza kubaki nyumbani hapo kwani wote walikuwa na mashaka muda wote, ndipo kuna ndugu yao mmoja aliyetoa wazo kuwa waende kwa mganga wa kienyeji ili wakaangalie maana yake hayakuwa mambo ya kawaida.



Upande wa Yule mganga, walitulia kwa muda na kuhisi kuwa ule mwili wa mama jack utakuwa tayari umeshazikwa kwake ila walishangaa gafla mwili ukirudi kwenye kibanda chao, kwakweli mganga hakutaka tena kushindana na zile nguvu zaidi ya kumuomba kijana wake watafute vijana wawasaidie kuchimba kaburi kisha auzike huo mwili,

“Nitamkomesha huyu mwanamke aitwaye Rose, anadhani ni rahisi rahisi hivi kunitesa mimi! Nitamkomesha”

Yule msaidizi akaenda kutafuta vijana nao wakachimba kisha kwenda kwaajili ya kuzika ila kaburi lilijaa maji, mganga hakutaka kujisumbua zaidi kuwa wachimbe kaburi lingine badala yake aliwaambia wazike hivyo hivyo kaburi likiwa na maji, nao wakafanya hivyo ili wakimbizane na muda kwani giza lilikuwa linaanza kuingia, na walipomaliza waliondoka zao.



Rose alifika nyumbani kwake na kukutana na watoto wake getini wanataka kuondoka, ikabidi awaulize kulikoni,

“Mama kuna vioja huko ndani, unajua tulikuwa tumekaa pale sebleni mara ikaletwa maiti ya Yule rafiki yako na kuwekwa pale kati kati yetu yani kila mmoja hapa alichanganyikiwa na gafla ikapotea tena”

“Mmmh jamani, sio mawazo yenu tu!”

“Mawazo yetu! Mawazo wapi? Kila mmoja ameona kwakweli ni mambo ya ajabu, hakuna anayeweza kuishi tena humo ndani”

“Kwahiyo na Ana yuko wapi?”

“Yupo chumbani kwake, yeye hajatoka kabisa tangia muda ule”

“Wanangu tafadhari msiondoke, maana hata mkiondoka hamtatui tatizo kabisa, hili ni tatizo ila halimalizwi kwa kuondoka”

“Mama tunaondoka”

Mlinzi akawaambia,

“Hata msijisumbue kuondoka, mtashtukia mmerudishwa hapa hapa”

Ndipo wakakumbuka na maneno ya Moza kuwa wasikimbie nyumba hiyo kwani hata wakikimbia watarudi, pia wakakumbuka siku ambayo walikimbia na kwenda kulala hotelini ila wote walirudishwa nyumbani kwenye vyumba vyao, mwisho wa siku wakaona hata kukimbia ni kazi bure na kuamua kurudi na mama yao ndani, ila walipoingia tu ndani wakamwambia mama yao,

“Mama tafadhali toa ile misukule yako kwenye kile chumba cha siri maana ndio vitu vinavyotumika kututesa sisi”

Rose aliwashangaa wanae kuwa wamejuaje kuhusu kile chumba chake cha siri, ila Kulwa aliendelea kujua,

“Usishangae tu kuwa tumejuaje kuhusu kile chumba cha siri ila ujue kwamba tumejua kuwa ulitaka kututoa kafara watoto wako. Mama umeugua sana na kifo cha Ashura, hivi watoto wako sisi sio zaidi ya huyo Ashura? Sisi si ndio uliotutolea uchungu mama, ila ukataka kututoa kafara mama ili upate faida gani? Na kama kupata mali, utumie na nani wakati watoto wako umetutoa kafara”

Rose alikaa chini kwanza kwani hakufikiria kuwa watoto wake wamejua habari zake za kutaka kuwatoa kafara pia, yani habari za chumba hazijaisha zimekuja habari zingine za kutaka kuwatoa kafara. Akajikuta tu akiongea kwa unyonge,

“Nani amewaambia habari hizo wangu?”

Kulwa ndiye aliyemjibu mama yao maana leo alijitoa muhanga haswaa kwa hakika alichoshwa na kilichokuwa kinaendelea kwenye nyumba yao.

“Mama sekeseke lilianzia kwenye chumba chako cha siri ambako mtoto wako nilipigwa na shoti, sijui umeweka nini kwenye kile chumba. Nilizimia ila nililetwa ulipo kwa mganga na alikupa machaguo mawili kuwa umzike rafiki yako au uwatoe kafara watoto wako”

“Lakini sikuchagua kuwatoa kafara wanangu”

“Mama hukuchagua ndio ila kumbuka kuwa ulishataka kuwatoa kafara Doto na Sara, hivi wewe ni mama wa aina gani ambaye huna upendo na watoto wako? Siku zote umekuwa ukihangaika kwaajili ya maisha yetu, kuhangaika kwako huku ili tule vizuri na tulale vizuri, leo hii uliowahangaikia uwatoe kafara kweli?”

“Nisameheni wanangu”

Rose alijikuta akitoa machozi tu, muda ule ule Ana nae alitoka chumbani na kusema,

“Tena nisingekuwahi mama, ungeenda tu kumzika Yule rafiki yako basi ungetutoa kafara na sisi maana uliambiwa utaje majina wakati unamzika, yani ungemtaja mwanao mmoja mmoja na huku ingekuwa kwaheri”

“Umejuaje Ana?”

“Mama, tambua kuwa mimi nina utambuzi mkubwa sana. Nashukuru lile jiwe la dhahabu nililoliokota maana lilikuwa na nguvu za ajabu, mwanzoni tulipotoweka nilijilaumu kuliokota lile jiwe ila baada ya kujua ukweli nashukuru kwa kuliokota lile jiwe. Mama hata mimi uchawi umenichosha sasa, jamani ndugu zangu msiniogope ila nisaidieni natamani kuacha uchawi”

Wote walimshangaa Ana kuwa amebadilika hivyo kwa muda mfupi tu, na amekubali kuacha uchawi, Sara alijikuta akimsogelea mdogo wake ingawa kwa uoga uoga ila alimkumbatia na kumpongeza kutaka kuachana na uchawi, ila alikuwa anampongeza huku ana mashaka bado, sema Kulwa hakuacha hoja yake kumwambia mama yao kuwa atoe misukule aliyoiweka kwenye chumba chake cha siri, mama yao akawaomba kuwa wampe muda kidogo ajifikirie kwanza, akainuka na kwenda chumbani kwake.





ITAENDELEA