A SEX VIDEO SCANDLE - 4

 

Simulizi : A Sex Video Scandle


Sehemu Ya Nne (4)



Hayo ndio maisha ambayo walikuwa wakiishi kila siku, walikuwa ni watu wa kufanya ngono kila siku tena huku wakijirekodi na kisha kuzihifadhi video zile kwenye email zao. Wakaonekana kuzoea sana mpaka kuwajengea tabia ambapo waliona bila kujirekodi wakati wanafanya mapenzi tendo hilo halikuwa likikamilika.
Filbert bado alikuwa akiendelea kwenda shuleni kama kawaida. Ndoto yake nyingine kubwa ambayo alikuwa amejiwekea ilikuwa ni kusoma sana na hatimae baada kuja kugombea urais katika chama chochote kile nchini Tanzania. Hilo ndio lilikuwa lengo kubwa ambalo alijiwekea katika maisha yake na kuhakikisha kwamba siku moja linakuja kutimia.
Saado alikuwa ameuteka moyo wake, hakumfikiria tena Amanda ambaye alimuahidi mambo mengi likiwa la kutokumsaliti katika maisha yake. Filbert alionekana kusahau kila kitu, mapenzi ya Saado yalikuwa yakimlevya kila siku. Hakukumbuka kumpigia simu Saado, hakukumbuka kuwasiliana nae kwa kutumia mtandao wa Skype, mtu ambaye alikuwa muhimu kwake wakati huo alikuwa mtoto wa kisomali, Saado.
Siku ziliendelea kukatika kama kawaida, jina lake liliendelea kuwa kubwa kila siku. Baada ya ligi hiyo kumalizika hapo ndipo Filbert alipotakiwa kuachana na timu ya Westerlo ambayo alikuwa akichezea kwa mkopo na hatimae kujiunga na timu ya Gent, timu ambayo ilikuwa imemsajili. Kutokana na jina ambalo alianza kujijengea, mashabiki wengi wa timu ya Genk wakaonekana kuturahia kwa kuona kwamba mchezaji huyo angeweza kuifanyia makubwa timu hiyo.CHANZO:  https://deusdeditmahunda.blogspot.com/
Kitendo cha kupata jina kubwa nchini Ubelgiji, jina lake nalo lilikuwa likikua kwa kasi sana nchini Tanzania. Watanzania wakajivunia sana kuwa na mchezaji kama Filbert ambaye kila siku kazi yake ilikuwa ni kuitangaza nchi ya Tanzania. Kupitia jina lake, jezi nyingi za timu ya Genk zikaletwa nchini Tanzania, watu wakaanza kuzinunua kama njugu, jina la Filbert likaonekana kuwa kivutio kwa kila mtanzania.
Huo ndio ulikuwa wakati ambao ligi hiyo ilipoanza dhahiri. Kila siku Filbert alikuwa akiamka asubuhi kama kawaida yake na kisha kwenda mazoezini hata kabla wachezaji wenzake hawajafika uwanjani hapo. Hiyo ilikuwa ni njia mojawapo ya kukamilisha ndoto yake ya kuwa mchezaji mkubwa zaidi ya pale alipokuwa. Mazoezini alikuwa akijituma sana kitu ambacho kilimfurahisha kila kiongozi wa timu ile.
“WE LOVE U FILBERT, MARRY ME TONIGHT FILBERT, FILBERT AM FREE TONIGHT” Hayo yalikuwa ni baadhi ya mabango ambayo yalikuwa yameshikiliwa na wanawake ambao walikuwa wakiingia katika uwanja wa timu ya Genk. Mabango yale na sauti nyingi za mashabiki zikamfanya Filbert kupata nguvu ya kuzidi kucheza mpira.
Katika kila mechi ambayo Filbert alikuwa akiingia uwanjani bado alikuwa akionekana kuwa mwiba mkali kwa timu pinzani. Katika kipindi hicho alikuwa ndio kwanza ameingia miaka kumi na nane, alionekana kuwa mshambuliaji machachari ambaye kila alipokuwa akisimama mbele ya goli wazo lake lilikuwa moja tu, kufunga.
Hiyo ndio siafa ambayo ilimfanya kujulikana, watoto wa kike hawakuwa nyuma, kila siku walikuwa wakimsumbua huku wakimuonea wivu Saado kutokana na kuwa na mwanaume ambaye alionekana kuwa mvuto kwa kila mwanamichezo ambaye alikuwa akimwangalia. Filbert hakutaka kuwa na wanawake wengi, alichokuwa akikitaka ni kuwa na Saado tu.
“Yaani sikusomi kabisa siku hizi” Dennis alimwambia Filbert.
“Kivipi?”
“Kuhusu huyu Saado. Hivi inakuwajekuwaje hapa?” Dennis aliuliza.
“Kuwaje kivipi?”
“Ni mpenzi wako au?”
“Wewe unaonaje?”
“Hapo ndipo unaponichanganya. Kila nikiangalia naona dalili zote za kuonyesha kwamba ni mpenzi wako, ila nilipokuwa nikikuuliza uliniambia kwamba ni rafiki yako. Hebu nieleze leo” Dennis alimwambia Filbert.
“Saado ni rafiki yangu” 
“Hapana”
“Sasa kwa nini hutaki kuamini?”
“Rafiki! Hivi rafiki yako unaweza kulala nae chumba kimoja tena usiku?” Dennis alimuuliza Filbert.
“Kwa nini nisiweze?”
“Sisi ni waafrika na ngozi zetu zina joto, mambo hayo wanayaweza wazungu. Nadhani kuna kitu unanificha” Dennis alimwambia Filbert.
“Huo ndio ukweli bro”
“Hapna. Hebu niambie ukweli”
“Sawa. Saado ni mpenzi wangu”
“Sasa ulikuwa ukinificha nini?”
“Mambo mengine siri sana”
“Hapo hakuna siri. Na vipi kuhusu Amanda?” Dennis alimuuliza Filbert.
“Hilo ndio linaniumiza kichwa”
“Moyo wako umeamua nini?”
“Kiukweli moyo wangu umeamua kuwa na Saado” Filbert alijibu.
“Basi kuwa na Saado”
“Kwa sasa hivi poa ila kwa baadae nadhani Amanda atanihusu sana” Filbert alimwambia Dennis.
“Kwa hiyo Saado sio wa kuoa?”
“Hiyo ndio maana yangu. Huyu ni wa kupita na kuacha?”
“Hilo ni jibu”
Hivyo ndivyo ambavyo Filbert alivyokuwa amejipangia, alijua fika kwamba alikuwa akimpenda sana Saado lakini hakuona kama kulikuwa na uwezekano wa kumuoa msichana huyo maisha yake ya baadae. Alionekana kuwa msichana mrembo lakini bado hakuwa na sifa za kuweza kuwa mke wake. 
Filbert alijua fika kwamba Saado alikuwa Msomali na hakuwa Mtanzania hivyo kama angemuoa basi asingeweza kujisikia uhuru kama ambavyo angekuwa na msichana wa kitanzania. Hiyo pamoja na sababu nyingine za msingi zikamfanya Filbert kuona kwamba Saado hakutakiwa kuwa mke wake.
Shuleni alipokuwa akisoma mambo yalikuwa ni balaa. Watu wengi walikuwa wakimzunguka kila siku huku wengine wakitaka kusainiwa vitabu vyao. Sura ya Filbert ikaonekana kuwa dili kwa wakati huo, wanawake wengi walikuwa wakimfuata na kamera zao na kisha kupiga nae picha kwa ajili ya kuwaonyeshea marafiki zao.
Ucheshi wake pamoja na kuwa na roho ya unyenyekevu kwa watu wengine ndivyo vilikuwa vitu pekee ambavyo vilimfanya kufagiliwa na watu wengi ambao walikuwa wakikutana nae. Kila alipokuwa akiingia katika supermarket mbalimbali hali haikuonekana kuwa ya amani kabisa, watu walikuwa wakimfuata na kisha kumzunguka kitu ambacho alikuwa akipigwa marufuku kuingia supermarket na kama alikuwa akitaka kuingia, watu walikuwa wakitolewa katika kila duka ambalo alitaka kuingia.
Jina lake likazidi kuwa kubwa, Filbert akaonekana kuwa na nyota ya kupendwa sana na watu wa hapo Brussels. Ni kweli katika ligi kuu kulikuwa na wachezaji wengi lakini kwa Filbert alionekana kupendwa zaidi na kila mtu mahali hapo. Kila alipokuwa akipita alikuwa akisimamishwa na watu kwa lengo la kupiga picha hali ambayo ilimfanya kuanza kutembea na gari na kuanza maisha ya kujificha.
“Kumbe kuwa supastaa raha sana” Filbert alimwambia Dennis.
“Kwa nini?”CHANZO:  https://deusdeditmahunda.blogspot.com/
“Heshima. Kila ninapopita ninapewa heshima kitu ambacho kinanifariji sana” Filbert alimjibu Dennis.
“Ila kuwa makini na pia endelea kukumbuka kwamba ndoto zako hazitakiwi kuishia hapo, ikibidi tufanye mchakato uende Uingereza” Dennis alimwambia Filbert.
Maisha yaliendelea zaidi, hakuacha kucheza mpira na wala hakuacha kusoma. Mwaka wa kwanza ukakatika, bado aliendelea kusakata kabumbu. Katika kila msimu wa ulipokuwa ukimalizika wachezaji walikuwa wakipewa likizo ya mwezi mmoja, kwa Filbert hakutaka kuja nchini Tanzania, alikuwa akiondoka zake na kuelekea nchini Marekani na kuponda raha huku akiwa pamoja na msichana wake, Saado.
Katika kipindi hicho Filbert alikuwa na fedha nyingi na za kutosha huku akiwa kijana mdogo sana, hakuwa amezoea fedha hivyo alikuwa akizitumia kadri alivyotaka na wala hazikuisha kabisa. Kama starehe, katika kila mwisho wa msimu alikuwa akifanya starehe ya kila aina, alikuwa akitembelea katika kumbi zilizokuwa na gharama ambazo zilikuwa zikitembelewa na masupataa na watu wenye fedha tu.
Filbert hakuchungulia mfuko wake, alikuwa akiendelea kuzitumia kila siku huku kila wiki kiasi kikubwa cha fedha kikiingizwa kwenye akaunti yake. Mtu mwenye ngozi nyeusi ambaye alikuwa katika maisha ya kimasikini akawa na fedha. Alifanya kila kitu alichokuwa akitaka kukifanya. Alifika mpaka nchini Marekani, nchi ambayo alikuwa akiisikia katika vyombo vya habari tu.
Leo alikuwa akilala New York na kesho kuhamia Washington, leo alikuwa akienda kula chakula cha mchana Ohio na kesho alikuwa akienda kula chakula cha usiku Calfornia. Hayo ndio maisha ambayo alikuwa kiyapenda, katika kila sehemu ambayo alikuwa akienda, mpenzi wake, Saado alikuwa pembeni yake.
Hayo yakawa maisha ya kisupastaa ambayo alikuwa akiishi. Baada ya kukatika siku kadhaa, msimu mwingine ukaanza, huo ulikuwa mwaka wake wa tatu kukaa nchini Ubelgiji bila kurudi nchini Tanzania. Kama kawaida yake, uwanjani hakuwa akitaka kuleta mbwembwe nyingi, kitu ambacho alikuwa akikitaka ni kuudhihirishia ulimwengu kwamba alikuwa mchezaji wa kipekee ambaye alistahili hata kutwaa tuzo ya mchezaji bora wa dunia.
Makali yake yakaongezeka zaidi, starehe ambazo alikuwa amezifanya zikaonekana kama kumpa nguvu ya kucheza zaidi mpira. Mashabiki walivutiwa nae na hata kumuona kama mungu mtu kwenye timu yao. Kila alichokuwa akikitaka alikuwa akipatiwa bila kuulizwa swali lolote lile. Katika kipindi chote ambacho Filbert alikuwa ameichezea Genk, tayari walikuwa wamechukua kombe la ligi mara tatu.
Jina lake likakuzwa zaidi, timu za Uingereza zikamuona, hapo ndipo purukushani zilipoanza rasmi. Manchester United, Arsenal, Chelsea na Liverpool zilikuwa miongoni mwa timu ambazo zilikuwa zikimhitaji sana Filbert ambaye alionekana kuwa kama lulu katika maisha ya soka. Fedha zikawekwa mezani kwa ajili ya kumsajiri mchezaji huyo ambaye aliitwa kwa jina la utani “Mtambo wa mabao”.
“Ofa zimekuja nyingi tu, tena za fedha ndefu. Unataka nifanye mchakato na timu gani?” Dennis alimwambia Filbert na kisha kumuuliza.
“Kuna timu zipi zimekuja?”
“Zote kubwa unazozijua nchini Uingereza” Dennis alimwambia Filbert.
“Hakuna timu ndogo iliyokuja?”
“Labda na Newcastle”
“Hiyo ndio nzuri.Nataka kwenda kucheza Newcastle” Filbert alimwambia Dennis ambaye akaonekana kushtuka.
“Unasemaje?”
“Nataka kwenda kucheza Newcastle”
“Hapana. Nadhani utakuwa unanitania. Hebu kuwa serious kidogo Filbert” Dennis alimwambia Filbert.
“Huo ndio ukweli”
“Kwa hiyo umeichagua Newcastle mbele ya Arsenal? Umeichagua Newcastle mbele ya Manchester, Chelsea na Liverpool?” Dennis aliuliza huku akionekana kutokumuelewa Filbert.
“Ndio”
“Kuna nini Newcastle?”
“Kuna fedha nyingi”
“Fedha nyingi? Yaani Newcastle kuna fedha nyingi?”
“Ndio”
“Acha masihala”
“Ndio hivyo. Kwani Manchester wameweka mezani bei gani?”
“Wameweka paund milioni kumi na tano, Arsenal wameweka paund milioni kumi na nne, Liverpool paundi milioni kumi na saba Chelsea paund milioni ishirini” Dennis alimwambia Filbert.
“Na vipi kuhusu Newcastle?”
“Wameweka paundi milioni kumi”
“Hapo ndipo ninapotaka kwenda”
“Mungu wangu! Filbert, una akili?”
“Kwa sasa utaona sina akili, ila baada ya miaka minne utaona kwamba nina akili” Filbert alimwambia Dennis.
Huo ndio uamuzi ambao alikuwa ameuweka mahali hapo, aliichagua klabu ya Newcastle kwa moyo mmoja na wala hakutaka kwenda katika klabu kubwa ambazo zilikuwa zikimuhitaji kwa wakati huo. Baada ya tetesi za kutaka kuihama klabu hiyo zilipoanza kusikika, Genk wakaamua kuweka kikao pamoja nae huku wakimtaka kusaini mkataba mpya ambao ule wa zamani ulikuwa umebakisha miaka miwili. 
Hilo likaonekana kuwa gumu kwa Filbert, hakutaka kuongeza mkataba zaidi ya kutaka kuhama katika timu hiyo ambayo ilionekana kumthamini sana. Hilo likaonekana kuwa kama pigo kwa Genk jambo ambalo liliwafanya waandishi wa habari kuanza kumtafuta kwa ajili ya kufanya mahojiano nae, walikuwa wakitaka kujua sababu ya kutosaini mkataba na kama kulikuwa na timu anayotaka kuhamia ilikuwa timu ipi.
“Nataka kwenda Uingereza” Filbert alimjibu mwandishi wa habari.
“Kipi kimekupelekea kwenda nchini Uingereza?”
“Nataka kucheza soka katika timu kubwa zaidi. Najua kwa hapa Ubelgiji hii Genk ni timu kubwa ila nadhani huu ni wakati wa kwenda kucheza klabu kubwa zaidi ya hii” Filbert aliwaambia waandishi wa habari.
“Na si kwamba unafuata fedha Uingereza?”
“Hapana. Nataka kujitangaza zaidi”CHANZO:  https://deusdeditmahunda.blogspot.com/
“Utakwenda timu gani kwa sababu naona timu zote kubwa nchini Uingereza zimeweka ofa mezani?” Mwandishi mwingine wa habari aliuliza.
“Nitakwenda Newcastle”
“Unakwenda Newcastle?”
“Ndio”
“Kwa nini isiwe Manchester, Arsenal au Chelsea”
“Ni kwa sababu nataka kuwaonyeshea mashabiki wa Genk kwamba sikuondoka mahali hapa kwa sababu ninataka fedha zaidi, hapana, ninaondoka mahali hapa kwa sababu ninataka kuwa na changamoto mpya” Filbert aliwaambia waandishi wa habari.
Kitendo cha kusema kwamba alikuwa akitaka kwenda kuchezea klabu ya Newcastle, mazungumzo ya malipo ya mshahara binafsi yakawekwa mezani na kuahidiwa kulipwa paund elfu sitini kwa wiki ambazo zilikuwa ni sawa na milioni mia ishirini na nne kwa fedha za kitanzania tena malipo hayo yakifanyika kila wiki.
Katika kipindi hicho cha mapumziko Filbert hakurudi nchini Tanzania, alikuwa bize akishughulikia mambo yake ya uhamisho. Mpaka msimu mwingine unafunguliwa, Filbert alikuwa ndani ya jezi ya klabu ya Newcastle United ya nchini Uingereza. Kwake, hiyo ikaonekana kuwa ndoto kubwa ambayo alikuwa akiisubiria katika maisha yake.
Picha nyingi zikapigwa, magazeti mengi yakatangaza ujio wake ndani ya klabu hiyo kwa paund milioni kumi. Mashabiki wengi wa mpira wakaonekana kumshangaa kwa kuzikataa klabu kubwa na kuamua kucheza katika klabu hiyo, kati ya watu ambao walikuwa hawamuelewi kabisa Filbert alikuwa Dennis.
“Manchester walisema wangekulipa paundi elfu tisini, Arsenal paundi elfu themanini na Chelsea paund laki moja. Yaani umekataa huko na kuja hapa kwa paundi elfu sitini!” Dennis alimwambia Filbert.
“Najua nilifanyalo. Nimekuja hapa ili tupate fedha zaidi, au wewe hautaki?” Filbert alimuuliza Dennis.
“Tupate fedha nyingi, kivipi?”
“Kihivyo hivyo”
“Utakuwa umechanganyikiwa”
“Najua, ila baada ya miaka mitano utaniona nina akili timamu” Filbert alimwambia Dennis.
Jijini Newcastle, mashabiki wa timu hiyo hawakutaka kutulia, kila wakati walikuwa wakishangilia, kitendo cha kumpata Filbert kilionekana kuwafurahisha sana na kuwaona wapinzani wao, Sunderland kuwa si lolote lile. Filbert alionekana kuwa mwiba mkali uwanjani na kwa upande wa timu pinzani. Uwezo wake wa juu ndio ambao ulimfanya kila mtu kumwamini na kuona kwamba angekwenda kufanya mambo makubwa katika maisha yake ya soka ndani ya klabu hiyo.
“Amanda....!” Filbert alijisemea katika kipindi ambacho alikaa kimya kwa muda chumbani kwake, picha ya Amanda ilikuwa imemjia kichwani mwake, akaanza kumkumbuka msichana huyo ambaye hakuwa amewasiliana nae kwa kipindi kirefu sana, miaka mitatu.






KWA WASOMAJI WAPYA.



Filebrt alikuwa kijana wa kitanzania, kijana ambaye alikuwa na ndoto za kuwa mwanasheria mkuu nchini Tanzania. Ndoto yake hiyo ya kuwa mwanasheria ilikuja kukatika mara baada ya kugundua kwamba alikuwa na uwezo wa kucheza mpira wa miguu. Alicheza sana mpira wa miguu kiasi ambacho baba yake, mzee Martin akaamua kumpeleka katika shule ya vipaji vya michezo, Makongo.
Huko aliendelea kusakata kabumbu mpaka pale alipochaguliwa kujiunga na timu ya mkoa wa Dar es Salaam na kisha kushiriki katika mashindano ya Copa Coca Cola. Timu hiyo ikachukua kombe na Filbert kuwa mfungaji bora na mchezaji bora pia. Timu ikachaguliwa kwenda nchini Ubelgiji. Siku kadhaa kabla ya kwenda Ubelgiji, Filbert akakutana na msichana ambaye alimpa namba ya simu, huyu alikuwa Amanda. Walipokutana wakaongea mengi na kujikuta wakiwa wapenzi waliopendana kwa dhati.
Siku ya safari inapofika, Filbert anaondoka na kuelekea nchini Ubelgiji. Nchini humo, anafanikiwa kununuliwa na timu ya mpira wa miguu ya Genk ambayo inamtoa kwa mkopo na kuchezea timu ya Westerlo. Filbert anaonyesha uwezo wake, anafunga sana magoli, anapata umaarufu mkubwa uliompeleka kukutana na msichana wa kisomali, Saado.
Wawili hawa wanaanza uhusiano wa kimapenzi huku wakijirekodi video katika kila kipindi walichokuwa wakifanya mapenzi. Japokuwa Filbert alikuwa akiwasiliana sana na Amanda lakini baada ya kumpata Saado, mawasiliano yanapungua na kufa kabisa. Yeye na Saado, Saado na yeye. Filbert akaamua kurudi darasani, lengo la kurudi darasani ni kwamba anataka kuwa rais wa Tanzania hapo baadae, anasoma na kucheza mpira.
Timu zote kubwa za Uingereza zikamtaka lakini yeye akaamua kwenda Newcastle huku akisema kwamba baadae angepata fedha nyingi mno kitu kinachomchanganya wakala wake ambaye ni kaka yake, Denis. Maisha ya soka nchini Uingereza yanaanza na huku mahusiano yake na Saado yakiendelea kama kawaida. Filbert hamkumbuki Amanda, anayemkumbuka ni yule ambaye yupo nae katika kipindi hicho, Saado tu. Inatokea siku, siku ambayo alikaa na kulitamka jina ambalo hakulitamka katika kipindi kirefu cha nyuma, AMANDA. 



*******************
CHANZO:  https://deusdeditmahunda.blogspot.com/
Amanda hakuonekana kuwa na furaha nchini Tanzania, kila siku mawazo yake yalikuwa kwa mvulana ambaye alikuwa akimpenda kuliko mtu yeyote yule, Filbert Martin. Katika kipindi hicho Filbert hakuwepo nchini Tanzania, alikuwa amesafiri na kuelekea nchini Ubelgiji kwa ajili ya kufanya mazoezi ya mpira wa miguu pamoja na timu ya taifa ya vijana ya Tanzania.
Usiku, mawazo yake yalikuwa yakimfikiria sana Filbert, kila wakati alikuwa akikosa raha, hakuwa akijisikia vizuri kwani alitamani kipindi chote cha maisha yake awe pamoja na Filbert kwani ndiye alionekana mfariji wa maisha yake. Filbert hakuwa pamoja nae, alikuwa akimfikiria kila siku lakini hali hiyo haikuonekana kubadilisha kitu chochote kile kwani Filbert aliendelea kuwa mbali na uwepo wa macho yake.
Wakati mwingine Amanda alionekana kuchukia na kujuta kwa kuuruhusu moyo wake kuingia katika mahusiano ya kimapenzi na Filbert, alijiona kama mtu ambaye alikuwa amefanya kosa kubwa la kumruhusu mwanaume huyo kuushika moyo wake kama kupita kawaida. Wiki ya kwanza ikakatika tangu Filbert aondoke na kuelekea nchini Ubelgiji, Amanda aliendelea kuvumilia kwa kuona kwamba ilikuwa imebakia wiki moja tu na hatimae mpenzi wake arudi nchini Tanzania na kuendelea kuonana kama kawaida.
Wiki ya pili ikaingia na kumalizika lakini Filbert hakuwa amerudi nchini Tanzania. Maswali mengi yakaanza kumiminika kichwani mwake kwamba kulikuwa na kitu gani ambacho kilitokea nchini Ubelgiji mpaka mpenzi wake kutokuja ndani ya wiki hiyo, maswali hayo yalijibiwa na gazeti la michezo la Champion ambalo liliandika kwamba wachezaji kadhaa wa timu ya vijana wa Tanzania ambao walikwenda nchini Ubelgiji walikuwa wamesajiliwa na timu za huko.
Taarifa hizo zikaonekana kuwa sifa kwa taifa zima la Tanzania lakini kwa Amanda ilionekana kuwa kama taarifa ya msiba kwani aliposoma majina ya vijana hao katika gazeti lile, Filbert alikuwa mmoja wapo. Amanda akashindwa kuvumilia, akaanza kutokwa na machozi, kitu ambacho alikifahamu ni kwamba Filbert asingeweza kuwa nae tena, alikuwa akimpoteza huku akimuona.
Mawazo ya Amanda yakaonekana kuwa tofauti hasa pale ambapo Filbert alipoanza kumpigia simu mara kwa mara na kuanza kuongea nae. Hiyo ikaonekana kuwa kama faraja kwa Amanda, hakuamini kama angeweza kupokea simu kutoka kwa Filbert na kumwambia kwamba bado alikuwa akimpenda kupita kawaida na alikuwa akimhitaji zaidi ya msichana yeyote yule.
Maneno yale yakamfariji na kumtia nguvu sana, akajiona kuwa msichana aliyekuwa na bahati kuliko msichana yeyote katika dunia hii. Mawasiliano baina ya watu hao wawili yalikuwa yakiendelea kama kawaida, mara kwa mara walikuwa wakiongea huku Filbert akimwambia Amanda juu ya kila kilichokuwa kikiendelea nchini Ubelgiji.
“Utarudi lini?” Hilo lilikuwa swali kutoka kwa Amanda, alikuwa akimuuliza kila siku.
“Nitarudi hivi karibuni, lakini kwanza subiri nikaekae kidogo huku mpenzi” Filbert alimwambia Amanda.
“Sawa. Ila usinisahau tu kipenzi” 
“Hilo usijali, siwezi kukusahau, wewe ndiye mwanamke ambaye ninampenda kwa moyo wote maishani mwangu, naahidi kukuoa” Filbert alimwambia Amanda.
“Nashukuru”
“Kuna kitu nimekifikiria mpenzi”
“Kitu gani?”
“Nataka kuwa rais wa Tanzania hapo baadae” Filbert alimwambia Amanda.
“Kwa nini umefikiria hivyo?”
“Basi tu, nataka kuwa rais, ili kukamilisha ndoto yangu naomba uniunge mkono” Filbert alimwambia Amanda.
“Hakuna tatizo mpenzi, nitafanya hivyo” Amanda alimwambia Filbert.
“Nitashukuru”
Hayo ndio yalikuwa maongezi ambayo walikuwa wakiongea kila siku, walikuwa wakipeana ahadi za kuishi pamoja baadae pamoja na kuwa na familia moja yenye amani na upendo. Walipendana na kusikilizana japokuwa walikuwa katika nchi mbili tofauti. Kila mmoja alionekana kumjali mwenzake, walikuwa wakipendana sana.
Baada ya mwaka mmoja, mabadiliko yakaanza kutokea katika mahusiano yao, mawasiliano yakaanza kupungua na hayakuwa kama zamani. Hilo likawa swali gumu kujibika kichwani mwa msichana Amanda. Hakujua ni kitu gani ambacho kilikuwa kikifanya hivyo lakini alipofikiria kwamba Filbert alimwambia kwamba angeanza kuingia darasani akaonekana kupunguza wasiwasi juu ya mahusiano yao kwa kuona kwamba Filbert alikuwa bize na masomo.
Walizoea kuongea simuni, Filbert hakuwa akipiga simu, walizoea kuongea kupitia mtandao wa Skype lakini Filbert hakufanya hivyo. Hilo likaonekana kuwa kama pigo kwa Amanda, alikuwa amemkumbuka sana mpenzi wake lakini hakujua ni kipi kilikuwa kimesababisha jambo hilo kutokea. Huku akiwa analifikiria sana hilo, hapo ndipo akaanza kupata jibu, jibu la swali ambalo lilikuwa likimsumbua kichwani.
Filbert alikuwa ameanza kupata umaarufu, mara kwa mara picha zake zilikuwa zikionyeshwa katika magazeti mengi Ulaya pamoja na magazeti ya kitanzania, hususani gazeti la Champion. Filbert alionekana kuwa mwanasoka ambaye alipenda sana starehe, leo alikuwa hapa na kesho alikuwa pale, alikuwa akitumia pesa bila kuwa na habari yoyote ile.
Japokuwa alionekana kuwa hivyo lakini bado Filbert alikuwa kipenzi cha wapenda soka duniani, alikuwa akijituma sana mazoezini na hata kwenye mechi kitu ambacho kilimfanya kufunga magoli mengi. Amanda alikuwa akifuatilia kila kitu, kila siku ambayo gazeti la Champion lilipokuwa likitoka, Amanda alikuwa akilinunua, alihitaji kusoma taarifa nyingi kuhusiana na Filbert.
Umaarufu, fedha vikaonekana kumsahaulisha Filbert ila pamoja na hayo yote, kulikuwa na kitu kimoja kikubwa ambacho kilimfanya Filbert kumsahau Amanda, kitu hiki kilikuwa ni mapenzi. Kwa mara ya kwanza Amanda alipoona taarifa kwamba Filbert alikuwa amempata msichana wa kisomali, Saado, mwili wake aliuhisi ukisisimka kupita kawaida, moyo wake ukawa na maumivu ya ghafla, maumivu ambayo yalifanana na kuchomwa msumali wa moto kwenye kidonda kibichi.

CHANZO:  https://deusdeditmahunda.blogspot.com/
Hilo likaonekana kuwa pigo kwa Amanda, akakosa raha, kila siku akawa mtu wa kulia tu. Katika kipindi hicho Amanda alikuwa kidato cha tatu, hakuweza kusoma vizuri, hakuweza kusoma kwa furaha kutokana na kile ambacho kilikuwa kikiendelea nchini Ubelgiji. Alimpenda sana Filbert na alikuwa tayari kufanya kitu chochote kwa ajili yake lakini Filbert alionekana kubadilika, akamsaliti na kuanza kutembea na msichana mwingine, msichana aliyeonekana kuwa mrembo sana, Saado.
Mwaka huo ukakatika na kuingia kidato cha nne, bado hakuwa akipata simu kutoka kwa Filbert, hakumsahau mwanaume huyo, kila siku alikuwa akiendelea kununua magazeti ya Champion huku lengo lake likiwa ni kuzisoma taarifa mbalimbali za Filbert, alijua kwamba zilimuumiza sana lakini hakuwa na jinsi, alijisikia kuwa na mapenzi ya dhati moyoni mwake.
“Ninashindwa kusoma mama” Amanda alimwambia mama yake, Bi Vanessa.
“Kwa nini?” Bi Vanessa aliuliza kwa mshtuko.
“Mapenzi mama” Amanda alimwambia mama yake.
“Mapenzi! Yamefanya nini?” 
“Ninampenda mwanaume ambaye anaonekana kutokuwa tayari kunipenda kama ninavyompenda. Mwanaume huyu amekuwa mwanaume wangu toka kidato cha pili ila kwa sasa hayupo pamoja nami” Amanda alimwambia mama yake maneno ambayo yalionekana kumshtua.
“Mwanaume gani?”
“Filbert. Yule mchezaji wa mpira Ulaya” Amanda alimwambia mama yake.
Bi Vanessa akashindwa kuvumilia kabisa, alionekana kukasirika sana lakini hakuwa na jinsi, alichoamua kukifanya ni kumwambia mume wake, mzee Frank juu ya kila kilichokuwa kikiendelea kwa binti yao. Kwanza mzee Frank akawa na hasira kali, hakutegemea kusikia kwamba binti yake alikuwa kwenye mahusiano na mvulana yeyote yule, alitaka binti yake asome kwa juhudi kubwa na hatimae kutimiza ndoto zake ambazo alikuwa amejiwekea toka kitambo.
CHANZO:  https://deusdeditmahunda.blogspot.com/
ITAENDELEA